Category: Lajme

Kandidati për deputet i PDK-së, Qëndrim Kryeziu, ka reaguar pasi kryeministri i Shqipërisë, Edi Rama, shpërndau një video të tij me titullin: “Dje ‘Komandant’ me pagesë, po sot shërbëtor me çfarë?”.

Në një deklaratë për Indeksonline, Kryeziu ka hedhur akuza të rënda ndaj Dritan Goxhajt, duke pretenduar se ai pas luftës ka qenë i përfshirë në rrëmbimin e një biznesmeni në Kosovë.

“Dihet se çfarë ka bërë në lokalet e Ramiz Sadikut si bandit, kur ka kidnapuar njerëz. Do të presim edhe publikimin e raporteve të Policisë. Ai ka kidnapuar një biznesmen në vitin 2004”, ka deklaruar Kryeziu.

Duke komentuar shpërndarjen e videos nga Edi Rama, Kryeziu tha se nuk ka çfarë të komentojë, duke shtuar se “i ka bërë një argat shqiptarësisë”.

Ai gjithashtu pretendoi se Goxhaj, ndonëse kishte hyrë në radhët e UÇK-së, nuk kishte marrë pjesë në asnjë ditë luftimesh në front.

“Ka ardhur në ushtri, por nuk ka marrë pjesë asnjë ditë në front. Ai i ka sjellë katër komando nga Shqipëria”, u shpreh Kryeziu.

Më tej, ai paralajmëroi se në të ardhmen do të dalin informacione të tjera lidhur me këtë çështje.

“Një person do të flasë për këtë çështje kur t’i vijë koha, pasi ka kontratë me CIA-n amerikane dhe NATO-n dhe nuk mund të flasë tani. Pas dy vitesh do t’ia nxjerr të palarat zotëri Goxhajt”, deklaroi ai.

Kryeziu i bëri këto komente gjatë një deklarimi nga Hoteli Grand në Prishtinë, duke e quajtur Goxhajn edhe me nofkën “Tani i Prishtinës”.

Shënim: Akuzat e paraqitura nga Qëndrim Kryeziu janë pretendime të tij dhe nuk janë konfirmuar nga institucione kompetente apo nga vetë Dritan Goxhaj.

Deputetja e zgjedhur e AAK-së, Time Kadrijaj, ka thënë se kryeministri në detyrë, Albin Kurti, duhet të nisë takimet me partitë e tjera politike për arritjen e një marrëveshjeje, pasi tashmë dihet qartë ndarja e ulëseve në Kuvend.

Në një përgjigje për RTV21, deputetja Kadrijaj tha se për të shmangur edhe një palë zgjedhje, Kurti duhet të jetë i gatshëm të arrijë një marrëveshje në të cilën parashihet edhe zgjedhja e presidentit të ri.

“Duhet një marrëveshje politike në të cilën të përfshihet edhe çështja e presidentit, sepse nëse nuk arrihet një marrëveshje politike që siguron 80 vota për zgjedhjen e presidentit, vendi automatikisht shkon në zgjedhje. Kosova nuk e ka luksin të shkojë në zgjedhje, pasi brenda një viti kemi pasur tri palë zgjedhje. Zoti Kurti duhet të reflektojë, të ulet dhe të bashkëpunojë sinqerisht, t’i ftojë partitë e tjera politike dhe, ndoshta, të bëjë edhe koalicion me to. Duhet të gjendet një zgjidhje në mënyrë që vendi të mos shkojë në zgjedhje, por të formohen institucionet dhe të zgjidhet presidenti.”, tha Kadriaj.

Ish-kryetari i AAK-së, Ramush Haradinaj, ka thënë se opozita nuk ka arritur të krijojë një marrëveshje të përbashkët politike dhe një kandidat të përbashkët, duke vlerësuar se në këto rrethana vendi do të vazhdojë të udhëhiqet nga agjenda e Lëvizjes Vetëvendosje dhe kryeministrit në detyrë, Albin Kurti, raporton Ekonomia Online.

Haradinaj ka theksuar se vetëm një bashkim i opozitës me një kontratë të qartë politike dhe me një kandidat të përbashkët për president mund të ndryshojë situatën aktuale politike në vend.

“Ne po jetojmë në epokën Kurti, që i vjen ai kur ka një, 40% ose mbi 40 deputetë, do ta zbaton agjendën e tij në Kosovë. Ndikimi jonë, ose ne do të mundshim me jetu jo vetëm në epokën e tij por edhe në epokën e të tjerëve, sikur të kishim një kontratë të përbashkët si opozitë. Pra, AAK dhe LDK, PDK, edhe një plan konkret, një kandidaturë konkrete”, tha ai.

Sipas tij, mungesa e një alternative të organizuar opozitare po i jep mundësi Kurtit të vazhdojë me politikat e tij dhe ta çojë vendin sërish në zgjedhje.

“Përderisa nuk kemi, një kontratë edhe s’kemi një ofertë, ne jetojmë në epokën Kurti, në agjendën Kurti dhe ai do ta zbaton atë që di më së miri, një lloj eksperimentimi me Kosovën e do të na dërgon në zgjedhje prapë. Pra kjo është ajo që e di edhe ajo që po ndodh. Nga përvoja ime politike e gjatë unë po e lexoj këtë”, tha ai.

Haradinaj ka folur edhe për mundësinë e zgjedhjes së presidentit, duke thënë se opozita mund të bëhet faktor vendimtar nëse arrin marrëveshje të përbashkët.

“Opozita mundet pra, me hy e me qenë faktor në marrjen e fatit të vendit në dorë, duke pasur një kontratë mes vete edhe një kandidaturë për president. Nëse dikush nga opozita e merr mbështetjen e opozitës, gjithsesi që do ta mbështesja, nëse do të isha i propozuar (për president) do ta shqyrtoja. Pra, nuk jam kandidat, nuk kam kushte, nuk kam kërkesë për askënd. Ne nuk bëhemi pjesë e qeverisjes ose vazhdimit të qeverisjes Kurti, se e kemi shpjeguar disa herë sa e dëmshme edhe sa humbje është për Kosovën. Po e thashë edhe një herë, përderisa VV nuk bie nën 40%, do të jetojmë në epokën Kurti, në agjendën Kurti, në eksperimentin Kurti. Mundemi me e pengu këtë, mundemi me e ndryshu vetëm nëse bëhemi bashkë opozita”, tha ai.

Franca ka konfirmuar rastin e saj të parë të virusit Ebola, pasi një mjek që ishte kthyer nga një mision humanitar në Kongo rezultoi i infektuar.

Sipas autoriteteve shëndetësore franceze, mjeku u shtrua menjëherë në një qendër të specializuar për trajtimin e sëmundjeve infektive dhe ndodhet në gjendje të qëndrueshme shëndetësore.

Rasti vjen në një kohë kur Kongo po përballet me një shpërthim të ri të virusit Ebola, i shpallur muajin e kaluar. Ekspertët e shëndetësisë besojnë se virusi ka qarkulluar për disa javë përpara se të identifikohej zyrtarisht.

Sipas të dhënave më të fundit, mbi 260 persona kanë humbur jetën nga Ebola në vendin e Afrikës Qendrore, ndërsa numri i të infektuarve ka kaluar 1.000 raste.

Autoritetet franceze kanë nisur procedurat e monitorimit dhe gjurmimit të kontakteve për të parandaluar përhapjen e mundshme të virusit, duke theksuar se rreziku për popullatën mbetet i ulët falë masave të rrepta të izolimit dhe kontrollit shëndetësor.

Kryetari i Komunës së Vushtrrisë, Ferit Idrizi, ka uruar Mrsc.Ph. Besim Muzaqin me rastin e emërimit të tij në pozitën e drejtorit të Spitalit “Sheikh Zayed”.

Përmes një postimi publik, Idrizi i ka dëshiruar Muzaqit punë të mbarë dhe suksese në drejtimin e institucionit shëndetësor, duke vënë theksin në rëndësinë e ofrimit të shërbimeve cilësore për qytetarët.

Ai ka bërë të ditur se gjatë takimit i ka shprehur drejtorit të ri gatishmërinë për bashkëpunim të plotë institucional, me synim përmirësimin e vazhdueshëm të shërbimeve shëndetësore dhe rritjen e cilësisë së kujdesit për pacientët.

“Urime dhe punë të mbarë!”, ka shkruar Idrizi në urimin e tij drejtuar drejtorit të ri të Spitalit “Sheikh Zayed”.

Në selinë e PS kryesocialisti Edi Rama u kërkoj drejtuesve politik në 12 qarqe dhe ministrave, të analizojnë me prioritet shqetësimet dhe rrugët e zgjidhjeve për problematikat e qytetarëve.

Burime nga kjo mbledhje thanë për Top Channel, se i pasi shumicës socialiste ka thënë se “lufta hibride përmes rrjeteve online e cila vjen nga protesta, është njëra anë e medaljes ndërsa tjetra analizimi shqetësime të shprehura nga qytetarët përveç merakut të Flamingove”.

Rama ka kërkuar prezencë të shtuar të deputetëve në terren për të adresuar shqetësimet e qytetarëve, pasi sipas tij kontakti i drejtpërdrejtë me njerëzit nuk mund të zëvendësohen vetëm me postimet online.

Sikurse e ka vënë theksin tek mirëfunksionimi zyrave të deputetëve në çdo qytet.

Duke marrë shkas edhe nga shqetësimet konstante të Erion Braces, se si sillen ministrat kur një deputet kërkon zgjidhje për probleme në territor, kjo ka qenë prej porosive të Edi Ramës.

E ka vënë theksin tek nevoja e një koordinimi efikas e pa vonesa për shqetësimet që sjellin deputetët, deri tek zgjidhja e cila duhet të vijë nga çdo ministri.

Nuk ka mbetur jashtë diskutimit edhe rëndësia e mesazh përcjelljes të deputetëve dhe ministrave përmes rrjeteve sociale gjë për të cilën Rama mësohet të ketë kërkuar një aktivitet të shtuar. /Tch/

Kryetari i Komunës së Mitrovicës, Faton Peci, bëri të ditur se ka nisur instalimi i kamerave të sigurisë publike.

Ai, përmes një postimi në Facebook, tha se ky projekt ka nisur nga objekti i komunës, teksa shtoi se deri në fund të këtij viti, instalimi i kamerave do të vazhdojë në gjithë qytetin.

“Paradoksalisht, Mitrovica, me nivel të lartë të rrezikshmërisë që ka pasur në të kaluarën, nuk ka kamera të sigurisë. Siguria e qytetarëve në radhë të parë”, shkroi Peci.

Qeveria e Kosovës në mbledhjen e mbajtur sot ka ndarë 200 mijë euro për blerjen e një gjeneratori të ri për Burgun e Sigurisë së Lartë.

Kryeministri në detyrë, Albin Kurti, tha se ky investim synon të sigurojë furnizim të pandërprerë me energji elektrike.

Kurti për 200 mijë eurot për gjeneratorin: Investimi synon funksionim të qëndrueshëm të sistemeve të sigurisë

“Shqyrtimi i kërkesës së Ministrisë së Drejtësisë për ndarjen e mjeteve buxhetore për financimin e furnizimit dhe instalimit të një gjeneratori në Burgun e Sigurisë së Lartë. Ministria e Financave paraqet kërkesën për ndarjen e 200 mijë eurove. Investimi synon të sigurojë furnizim të pandërprerë me energji elektrike dhe funksionim të qëndrueshëm të infrastrukturës dhe sistemeve të sigurisë në këtë institucion korrektues”, tha Kurti, raporton KosovaPress.

Ndërsa, ministri në detyrë i Financave, Hekuran Murati, tha se mjetet do të merren nga Programi i Shpenzimeve të Paparashikuara, pra te rezervat.

Murati tha se 200 mijë eurot për gjenerator do të merren nga rezervat.

“Mjetet në vlerë prej 200 mijë euro merren nga Programi i Shpenzimeve të Paparashikuara, pra te rezerva dhe ndahen në Ministrinë e Drejtësisë në kuadër të projektit kapital ‘shpenzimet emergjente’”, tha Murati.