Category: Lajme

Luka Misetic, avokat i ish presidentit Hashim Thaçi, ka reaguar pas raportimeve se presidentja dhe kryeprokurori i Dhomave të Specializuara të Kosovës janë takuar fshehurazi me diplomatë të vendeve donatore për t’u raportuar atyre.

Ai ka thënë se sipas Ligjit Specialja nuk raporton te shtetet tjera “e aq më pak në mënyrë të fshehtë”.

Avokati ka shtuar se “fatkeqësisht” Ligji nuk kërkon që Specialja të raportojë te ndonjë institucion në Kosovë, gjë që sipas tij përbën shkelje të normave të Këshillit të Evropës.

“Dhomat e Specializuara të Kosovës (“KSC”) @SpecialChambers janë një institucion i Republikës së Kosovës që nuk i jep llogari publikisht ndaj askujt apo ndaj ndonjë institucioni për punën e tyre, gjë që mund të konsiderohet shkelje e normave të Këshillit të Evropës (shih më poshtë). Nacionale raportoi dje se presidentja dhe kryeprokurori i KSC-së janë takuar fshehurazi me diplomatë të vendeve donatore për t’u raportuar atyre, përfshirë diskutime rreth komenteve të @richardgrenell. Le ta përsëris: fshehurazi. Ligji për Dhomat e Specializuara, i miratuar nga Kuvendi i Kosovës, nuk e autorizon KSC-në që të raportojë tek shtetet tjera, e aq më pak ta bëjë këtë në mënyrë të fshehtë. Fatkeqësisht, Ligji nuk kërkon që KSC të raportojë te ndonjë institucion në Kosovë, gjë që përbën shkelje të normave të Këshillit të Evropës. Në Opinionin Nr. 18 të Këshillit Konsultativ të Gjyqtarëve Evropianë, të publikuar në vitin 2015 nga Këshilli i Evropës, thuhet në paragrafin 24 se “gjyqësori duhet të jetë i përgjegjshëm për menaxhimin e tij ndaj pushteteve të tjera të shtetit dhe shoqërisë në përgjithësi”. Në Raportin 2014-15 të Rrjetit Evropian të Këshillave për Gjyqësorin thuhet në faqen 11: “Një gjyqësor që pretendon pavarësi, por refuzon të jetë i përgjegjshëm ndaj shoqërisë, nuk do të gëzojë besimin e shoqërisë dhe nuk do të arrijë pavarësinë për të cilën synon”.”

Tutje avokati shtuar Specialja po i shkel normal e Këshillit të Evoprës për mungesë të llogaridhënies ndaj institucioneve apo shoqërisë së Kosovës. Sipas tij kjo mungesë e llogaridhënies kërkon veprim nga Specialja, institucionet e Kosovës dhe nga Këshilli i Evropës.

“Megjithatë, KSC-ja nuk është e përgjegjshme ndaj “pushteteve të shtetit” të Kosovës dhe as nuk jep llogari për punën e saj për shoqërinë e Kosovës. Përkundrazi, ajo raporton në takime të fshehta me vendet donatore, të cilat nuk janë transparente, nuk janë të hapura për publikun e Kosovës dhe mbahen pa autorizim nga ligji i Kosovës. Është ironike që KSC-ja, një institucion i themeluar si rezultat i një raporti të Këshillit të Evropës (Raporti Marty), shkel normat e Këshillit të Evropës për mungesën e llogaridhënies ndaj institucioneve të Kosovës apo shoqërisë së Kosovës. Kjo mungesë e llogaridhënies kërkon veprim nga KSC-ja, nga institucionet e Kosovës dhe nga Këshilli i Evropës.”

Serbia mbetet ushtarakisht neutrale, por është e hapur për bashkëpunim me NATO-n për hir të stabilitetit dhe sigurisë në rajon, njoftoi të martën Ministria e Mbrojtjes e Serbisë pas një takimi të zyrtarëve të lartë me komandantin e Komandës së Forcave të Përbashkëta të NATO-s në Napoli, Stuart Munsch, raporton Radio Evropa e Lirë në serbisht.

Shefi i Shtabit të Përgjithshëm të Forcave të Armatosura të Serbisë, Milan Mojsiloviq, ministri i Mbrojtjes Bratislav Gasiq dhe presidenti i Serbisë Aleksandar Vuçiq u takuan me Munsch në Beograd.

Vuçiq tha se Serbia është e hapur për bashkëpunim të mëtejshëm me aleancën e NATO-s për ta ruajtur stabilitetin dhe sigurinë në rajon, njoftoi Ministria e Mbrojtjes.

“Serbia është e përkushtuar për forcimin e marrëdhënieve me të gjithë partnerët dhe do të vazhdojë ta kundërshtojë çdo formë të veprimeve të njëanshme që mund ta kërcënojnë paqen dhe sigurinë”, tha Vuçiq.

Ministria shtoi se gjenerali Mojsiloviq bisedoi me admiralin Munsch, para së gjithash për situatën e sigurisë në Kosovë.

“Serbia, në përputhje me Rezolutën 1244 të Kombeve të Bashkuara dhe Marrëveshjen Ushtarako-Teknike, e sheh KFOR-in si të vetmin formacion legjitim të armatosur në Kosovë”, i tha Mojsiloviq Admiralit Munsch, njoftoi Ministria.

Admirali Stuart Munch ndodhet në Serbi për të marrë pjesë në ceremoninë e dorëzimit të kreut të Zyrës së Ndërlidhjes Ushtarake të NATO-s në Beograd.

Ushtria serbe njoftoi në shtator se është duke bashkëpunuar me misionin paqeruajtës të KFOR-it në Kosovë, i cili udhëhiqet nga NATO, që nga viti 2005 në kontrollin e Zonës së Sigurisë Tokësore.

Pjesëtarët e Forcave të Armatosura të Serbisë dhe KFOR-it kryejnë patrullime të përbashkëta në zonën kufitare ndërmjet Kosovës dhe Serbisë në një gjerësi prej pesë kilometrash.

“Ato janë duke u zbatuar në përputhje me Rezolutën 1244 të Këshillit të Sigurimit të Kombeve të Bashkuara dhe Marrëveshjen Ushtarako-Teknike”, njoftoi Ministria e Mbrojtjes e Serbisë në shtator.

Ministria e Mbrojtjes e Serbisë tha se KFOR-i dhe Forcat e Armatosura të Serbisë shkëmbejnë vazhdimisht informacione të sigurisë dhe se patrullimet e përbashkëta ndikojnë në zvogëlimin e aktiviteteve të paligjshme në zonën e kontrollit.

Serbia është anëtare e programit të Partneritetit për Paqe të NATO-s që nga dhjetori 2006.

Në fund të vitit 2007 shpalli neutralitetin ushtarak me Rezolutën e Kuvendit për Mbrojtjen e Sovranitetit, Integritetit Territorial dhe Rendit Kushtetues.

Në dhjetë vitet e fundit, Serbia ka mbajtur dhjetëra stërvitje të përbashkëta ushtarake me vendet e NATO-s, përfshirë Shtetet e Bashkuara të Amerikës (SHBA), si dhe me Federatën Ruse dhe Bjellorusinë.

Që nga fillimi i pushtimit rus të Ukrainës më 24 shkurt 2022, Serbia nuk ka marrë pjesë në stërvitje ushtarake as me Lindjen dhe as me Perëndimin.

Përjashtim bëjnë stërvitjet ushtarake dy-javore me SHBA-në dhe vendet e tjera të NATO-s, të cilat mbahen vazhdimisht në Serbi që nga viti 2014.

Në aktivitetin e dhjetë jubilar, të mbajtur këtë vit në qershor, Ministria e Mbrojtjes njoftoi se synimi është përmirësimi i ndërveprimit në operacionet e mbështetjes së paqes në një mjedis shumëkombësh.

Shefi i Zyrës së Bashkimit Evropian në Kosovë, Aivo Orav tha se shumë projekte janë në plan të zhvillohen në vendin tonë, derisa theksoi se synimi i tyre është që sa më shpejtë ta afrojnë Kosovën më pranë Bashkimit Evropian. Këtë e bëri të ditur pas takimit të zhvilluar me kryetarin e Prishtinës, Përparim Rama.

Ndërkaq, Rama tha se kryeqyteti ka bërë hapa për t’i përmbushur të gjitha detyrat e dhëna nga komuniteti evropian si kryeqytet.

Në një prononcim për media, ambasadori Orav, potencoi se përveç me qeverinë, BE-ja po bashkëpunon me të gjitha komunat në Kosovë dhe sipas tij, BE-ja është donatori më i madh këtu në Kosovë.

“Ishte e mirëpritur të bisedoja me Kryetarin e Komunës dhe gjithashtu me ekipin e tij, për të mësuar më shumë rreth Prishtinës, rreth problemeve, rreth sfidave dhe për të mësuar gjithashtu se si BE-ja dhe komuna mund të punojnë më ngushtë së bashku. Sepse synimi është ta afrojmë Kosovën më pranë Bashkimit Evropian sa më shpejt të jetë e mundur, dhe nuk është vetëm qeveria me të cilën po punojmë, por po punojmë edhe me të gjitha komunat. BE-ja është donatori më i madh këtu në Kosovë. Ka shumë projekte të BE-së që janë duke u zhvilluar. Ka shumë projekte edhe në plan. Dhe shpresoj shumë që të mund të vazhdojmë punën tonë në fusha si arsimi, shëndetësia, menaxhimi i mbetjeve, bashkëpunimi me të rinjtë, me ndihmën e BE-së”, ka thënë ai.

Kryetari i kryeqytetit, Përparim Rama tha se bashkë me ambasadorin Orav diskruan rreth sfidave që ka Prishtina dhe mundësive për bashkëpunim dhe investime.

Ai tha se kanë bërë hapa për t’i përmbushur të gjitha detyrat të cilat dalin prej komunitetit evropian.

“Diskutuam mbi sfidat që i kemi si kryeqytet dhe mundësitë për bashkëpunim sidomos në investimet, tash në muzeun, sallën koncertale, mënyrat se si mund t’i tejkalojmë problemet e tanishme, në mënyrë që të krijojmë hapësira të mirëfillta edhe për komunitetin e artit, kulturës, arsim, shëndetësi dhe për sfera të ndryshme në kryeqytet…Ne kemi bërë hapa për t’i përmbushur të gjitha detyrat të cilat na jepen prej komunitetit evropian si kryeqytet, t’i përmbushmi ndoshta edhe para kohe sepse kemi mundësi…Vendosëm që të bashkëbisedojmë edhe për çështje të tjera sido që na vijnë sepse edhe jemi shumë afër, jemi në një distancë shumë të vogël. Vendosëm t’i bëjmë bisedat rreth zhvillimeve të ardhshme në kryeqytet dhe në vendin tonë”, tha Rama.

Pas takimit, ambasadori Orav i shoqëruar nga kryetari Rama vizituan një pjesë të objektit të komunës, Sahat Kullën e Kryeqytetit dhe një pjesë të vendndodhjes së biçikletave nga komuna.

Përveç këtyre, shefi i Zyrës së Bashkimit Evropian, Aivo Orav vizitoi edhe hapësirat e “TechPark” në Bërnicë të poshtme. Aty bashkë me drejtoreshën e STIKK-ut, Vjollca Çavolli, i takuan startup-et të përkrahura nga Bashkimi Evropian dhe shkëmbyen ide rreth zhvillimit të këtij sektori në Kosovë.

Komuna e Prishtinës sot ka nderuar liderin e Bashkimit Demokratik për Integrim (BDI), Ali Ahmetin me “Çelësin e qytetit”.

Lideri Ahmeri derisa u shpreh i emocionuar teksa pranoi “Çelësin e qytetit”, theksoi se me këtë veprim, Prishtina ka nderuar sot shqiptarët e Maqedonisë së Veriut.

“Do doja thjesht të shpreh një moment emocional të jetës time dhe ju do pyesni pse ky moment emocional, sepse mua sot kryetari i Prishtinës më jep çelësin e vendlindjes time të dytë Prishtinës. Faleminderit kryetar, më keni nderuar mua, familjen time, keni nderuar shqiptarët e Maqedonisë”, tha ai.

Ndërsa, kryetari i Kryeqytetit, Rama e quajti Ahmetin “hero”.

“Gjeneratat tona janë me fat që kanë qenë pjesë e kësaj historie, që jo vetëm u ka ra me shijua lirinë, mirëpo edhe me qenë pjesë e të gjithë këtij procesi edhe me u takua me njerëz të jashtëzakonshëm të historisë tonë të kombit shqiptar. Janë figurat si zotri Ahmeti që jo vetëm që kanë sakrifikuar dhe kanë dhënë çdo gjë nga vetja e i kanë inspiruar të gjithë tjerët për me e mbrojt gjuhën tonë, flamurin tonë, prandaj edhe sot këtu në zyrat e kryeqytetit jemi me fat që e kemi zotëri Ahmeti dhe e nderuam me çelësin e qytetit, i cili është edhe bashkë-themelues i Ushtrisë Çlirimtare të Kosovës”, deklaroi Rama.

Edhe pse u pyet për çështje politike, Ahmeti vendosi që të mos përgjigjej. Takimi Rama e Ahmeti nuk përfshiu politikë, e dy politikanët shfrytëzuan rastin të bisedojnë për familjet e tyre. I pranishëm në takim ishte edhe kryetari i komunës së Drenasit, Ramiz Lladrovci.

Gjykata Themelore në Gjilan ka shpall aktgjykim dënues prej 20 vjet burgim ndaj të akuzuarit D. T., për vrasjen e një personi para një viti në Gjilan.

Në njoftimin e Gjykatës thuhet se më 16 dhjetor 2023, rreth orës 20:35 minuta, në fshatin Dobërçan Komuna e Gjilanit, i akuzuari D. T., me dashje ka privuar nga jeta tani të ndjerin A. B., në atë mënyrë që fillimisht i akuzuari përmes telefonit e thërret A. i cili me automjetin e markës Golf IV, vjen te rruga ku ishte duke e pritur i akuzuari, i cili hyp në karrigen e parë të automjetit dhe me automjet kishin lëvizur deri afër ordinancës private “Dr. A.”.

“Aty pas një mosmarrëveshje verbale në automjet, i akuzuari e sulmon me thikë të ndjerin A. njëherë në trup, ndërsa viktima arrin ta ndal automjetin dhe të del nga automjeti duke ikur për t’iu shmangur të akuzuarit, hynë në oborrin e shtëpisë së Xh. B., ashtu që i akuzuari i vihet pas një ndjekje dhe në terasë para derës së hyrjes së kësaj shtëpie, përsëri e godet edhe gjashtë herë me thikë në pjesë të ndryshme të trupit, ndërsa nga kacafytja dhe zhurma e krijuar, nga kjo shtëpi del Xh. B., intervenon për të i ndarë, e kap për trupi të pandehurin dhe e largon nga vendi i ngjarjes, ndërsa tani të ndjerin A. e dërgon në ordinancen private “Dr. A.” aty nga doktori i jepet ndihma e parë mjekësore dhe njëkohësisht mjeku e thërret ndihmën e shpejtë, ndërsa për shkak të lëndimeve të pësuara, tani të ndjerin e hypin në një automjet tjetër deri te rruga e Përplenicës, aty takohen dhe e dorëzojnë A. në automjetin e ndihmës së shpejtë dhe të njëjtën e transportojnë në Emergjencën e Spitalit Regjional në Gjilani, ku tani i ndjeri A. për shkak të lëndimeve të pësuara nuk ka mundur të mbijetojë dhe në hyrje të spitalit i njëjti ndërron jetë, ku edhe konstatohet vdekja”, thuhet në komunikatën e Gjykatës.

Më tej thuhet se me këto veprime, i pandehuri ka kryer veprën penale; vrasje nga neni 172 e Kodit Penal të Republikës së Kosovës (KPRK).

“Trupi gjykues në Departamentin e Krimeve të Rënda, pas shtjellimit të gjitha provave dhe dëgjimit të dëshmitarëve ka shqiptuar dënim ndaj të akuzuarit D. T. në kohëzgjatje prej njëzet (20) vjet burgim. Të akuzuarit i vazhdohet masa e paraburgimit derisa ky aktgjykim të bëhet i formës së prerë, por jo më gjatë se dënimi i shqiptuar”, thuhet në njoftim.

Palët kanë të drejtën e ankesës ndaj këtij vendimi në Gjykatën e Apelit.

Ish-presidenti Hashim Thaçi ka folur edhe njëherë në Gjykatën Speciale në Hagë duke kërkuar respektim të Kushtetutës dhe ligjeve të Kosovës.

Thaçi po akuzohet për herë të dytë nga Prokuroria e Specializuar në Hagë. ZPS e ngarkon atë me vepra që lidhen me ndikimin në dëshmitarë – derisa ai ndodhet në një proces të tejzgjatur gjyqësor për krime të pretenduar të luftës.

“Gjithë jetën time kam punuar për lirinë dhe shtetin e Kosovës, me vizionin për anëtarësim në NATO dhe Bashkim Evropian me raport special të përjetshëm me Shtetet e Bashkuara të Amerikës. Dëshiroj të ritheksoj dhe nënvizoj domosdoshmërinë e respektimit të Kushtetutës dhe ligjeve të Kosovës në këtë sallë. Mosrespektimi i ligjeve të Kosovës dhe normave të tjera ligjore nga palët, në këtë sallë të shenjtë për drejtësinë, paraqet rrezik për minimin e demokracisë në Kosovë, paraqet rrezik për cenimin e besimit qytetar, prandaj ftoj që të ruhet vetëpërmbajtja institucionale nga të gjithë edhe në këtë sallë”, tha Thaçi në konferencën mbi ecurinë e çështjes më 18 dhjetor”, tha Thaçi.

Edhe njëherë, Thaçi tha se ai nuk paraqet rrezik në kuptimin politik e as “për ndonjë projekt qeveritar”.

“Pikërisht në këtë fazë të hershme të këtij procesi, për mbarëvajtjen e rregullt kushtetues dhe ligjor që duhet të ndodh, ju e dini para katër vitesh në nëntor 2020 u ngrit aktakuzë kundër meje vetëm tre muaj para se të rizgjedhësha president i vendit. Tash, para dhjetë ditësh nxitimthi Zyra e Prokurorit prezantoi aktakuzë shtesë vetëm dy muaj para zgjedhjeve parlamentare në Kosovë. Dua të sqaroj edhe njëherë, nuk jam pjesë e garës politike e as nuk kam ndonjë ambicie politike as për president as për kryeministër e as për deputet, e as ndonjë ambicie tjetër për pozitë publike. E ritheksoj se nuk jam pengesë e as nuk paraqes rrezik për askënd në kuptimin politik e as për ndonjë projekt qeverisës”, tha Thaçi.

Në vazhdimin e kësaj seance, gjykatësja Marjorie Masselot tregoi procedurat që duhet ndjekur për nxjerrjen e materialeve.

Në konferencën mbi ecurinë e çështjes, që sjell paraqitjen e dytë të Thaçit në rastin e ri ndaj tij – akuzat për ndërhyrje në dëshmitarë – ai u paraqit përmes video-lidhjes nga qendra e paraburgimit në Sheveningen të Hagës.

Më 6 dhjetor, Specialja konfirmoi aktakuzë të re kundër Thaçit, ish-ministrit të Drejtësisë, Hajredin Kuçi, ish-shefit të Agjencisë së Kosovës për Inteligjencë, Bashkim Smakaj, ish-kryetarit të Malishevës, Isni Kilaj, dhe ish-pjesëtarit të UÇK-së Fadil Fazliut.

Bëhet fjalë për vepra penale që lidhen me pretendime për “të ndikuar në dëshmitë e dëshmitarëve” në rastin gjyqësor “Thaçi dhe të tjerët”.

Kilaj, Kuçi dhe Fazliu janë deklaruar të pafajshëm, ndërkaq Thaçi dhe Smakaj nuk janë deklaruar ende.

Sipas gjykatës, ata kanë afat deri më 7 janar të që bëjnë deklarimin e tyre.

Aktakuza vjen ndërkohë që Hashim Thaçi, Kadri Veseli, Rexhep Selimi e Jakup Krasniqi kanë hyrë në vitin e pestë që ndodhen në paraburgim nën pretendimet për krime lufte.

Ndaj tyre po zhvillohet një proces gjyqësor që aktualisht ndodhet në fazën e paraqitjes së provave nga ana e ZPS-së. Çështja e prokurorisë pritet të mbyllet në pranverën e vitit të ardhshëm, për t’i hapur rrugë çështjes së mbrojtjes./KP

Një takim trepalësh mes kryenegociatorëve të Kosovës dhe Serbisë me të dërguarin e Bashkimit Evropian është duk u zhvilluar në Bruksel në kuadër të dialogut, të cilin e lehtëson blloku.

Sikur edhe herëve të mëparshme, së pari u zhvilluan takimet dypalëshe të përfaqësuesit të Posaçëm të BE-së për dialog, Miroslav Lajçak, me shefin e delegacionit të Kosovës, Besnik Bislimi, dhe me atë të Serbisë, Petar Petkoviq.

Takimi i përbashkët trepalësh mes tyre filloi pas orës 15:00.

Sipas burimeve nga Bashkimi Evropian, në këto takime do të shqyrtohen një varg çështjesh, përfshirë edhe implementimin e marrëveshjes për rrugën drejt normalizimit.

Takimi i fundit në këtë nivel në kuadër të dialogut të lehtësuar nga BE-ja është zhvilluar më 23 tetor në Bruksel. Prej atëherë nuk ka pasur takime tjera.

Sipas burimeve diplomatike të BE-së, Lajçak u ka raportuar ndërkohë përfaqësuesve të vendeve anëtare për gjendjen me dialogun dhe ka thënë se palët kanë treguar mungesë të qartë të gatishmërisë dhe vullnetit për të bërë ndonjë progres në zbatimin e marrëveshjes mes dy vendeve.

Ndërkohë, përfaqësuesja e Lartë e BE-së për Politikë të Jashtme dhe Siguri, Kaja Kallas, ka shprehur gatishmërinë që të angazhohet aktivisht në procesin e dialogut.

Mandati i të dërguarit të Posaçëm për Dialog, Miroslav Lajçak, i vazhduar disa herë, do të përfundojë në fund të muajit janar të vitit që vjen.

Ndërkohë pritet që Kaja Kallas, në bashkëpunim me vendet anëtare, të vendosë lidhur me vazhdimin e dialogut, përfshirë edhe rreth asaj se a do të ketë pasardhës të Lajçakut në atë pozitë dhe kush do të jetë ai.

Bashkimi Evropian do të përsërisë sot thirrjen për Kosovën dhe për Serbinë që “pa vonesa dhe pa parakushte të zbatojnë Marrëveshjen për rrugën drejt normalizimit të raporteve dhe aneksin për zbatimin e saj, sikur edhe të gjitha obligimet tjera që kanë dalë nga procesi i dialogut”.

Për Kosovën do të përsëritet thirrja që pa vonesa të nisë procesin e themelimit të Asociacionit të komunave me shumicë serbe, ndërsa për Serbinë të nisë procesin për njohjen e dokumenteve dhe simboleve të Kosovës.

Kosovës dhe Serbisë do t’iu përsëritet sërish se përparimi në procesin e normalizimit të raporteve do të vazhdojë të jetë kusht edhe për rrugëtimin e tyre në procesin e integrimit në BE.

Këto thirrje pritet të jenë në konkluzionet për zgjerim që do të miratohen të martën në takimin e Këshillit të çështjeve të përgjithshme të BE-së. /REL

Ish-presidenti i Kosovës, Hashim Thaçi, sërish ka kërkuar në Gjykatën Speciale, që të respektohet Kushtetuta dhe ligjet e Kosovës.

Në seancën mbi ecurinë e çështjes për aktakuzën për pengim të drejtësisë, Thaçi ka thënë se sikurse aktakuza për krime lufte ashtu edhe kjo u ngritën nxitimthi nga Zyra e Prokurorit të Specializuar, pranë DhSK-së.

Ish-presidenti ka deklaruar se aktakuza e parë e vitit 2020 i ishte ngritur pak muaj para rizgjedhjes si president, derisa kjo e dyta në prag zgjedhjesh. Thaçi ka përsëritur se s’do të jetë pjesë e garës politike zgjedhore.

“Ju e dini para katër vitesh në nëntor 2020 u ngrit aktakuzë kundër meje vetëm tre muaj para se të rizgjidhesha president i vendit. Tash, para dhjetë ditës nxitimthi ZPS-a prezantoj aktakuzë shtesë vetëm dy muaj para zgjedhjeve parlamentare në Kosovës. Unë nuk jam pjesë e garës politike as nuk kam ambicie politike as për kryeministër, as për president, as për deputet as ambicie politike. Ritheksoj se nuk jam pengesë e as nuk paraqes rrezik për askënd në kuptimin politik e as për ndonjë projekt qeverisës. Gjithë jetën time kam punuar për shtetin e Kosovës në vizionin për anëtarësim në NATO dhe BE në bashkëpunim me SHBA-në. theksoj dhe nënvizoj domosdoshmërinë për respektimin e Kushtetues dhe ligjeve të Kosovës në këtë sallë. Mosrespektimi i ligjeve dhe Kushtetutës nga palët në këtë sallë të shenjtë paraqet rrezik për minimin e demokracisë në Kosovë, paraqet rrezik për minimin e besimit qytetar, prandaj ftojë që të ruhet vetëpërmbajtja institucionale nga të gjithë edhe në këtë sallë”, ka thënë Thaçi.