Category: Lajme

Ambasadori i ShBA-së në Kosovë, Jeffrey Hovenier, zhvilloi takim lamtumirës me komandantin e KFOR-it, gjeneralmajor Enrico Barduani.

Hovenieri tha se SHBA-të janë kontribuues i rëndësishëm në misionin e NATO-së në Kosovë dhe sipas tij mbeten të përkushtuara ndaj tij, duke siguruar mjedis të qetë dhe të sigurt për të gjithë njerëzit që jetojnë në Kosovë, duke promovuar stabilitet në rajon.

Mandati i Hovenierit përfundon së shpejti, teksa ka paralajmëruar se pas përfundimit të misionit të tij në Kosovë, ai do të pensionohet.

Holanda ka gjobitur Netflix me 4.75 milionë euro për mënyrën sesi platforma e transmetimit menaxhonte të dhënat personale të abonentëve të saj.

Agjencia holandeze për mbrojtjen e të dhënave AP tha se midis 2018 dhe 2020, Netflix nuk u dha përdoruesve të tij informacion të mjaftueshëm për atë që kompania bën me të dhënat e tyre personale. Informacioni i dhënë nga Netflix ishte i paqartë në disa zona.

“Një kompani e tillë, me një qarkullim prej (shumë) miliarda e miliona përdoruesish në mbarë botën, duhet t’u shpjegojë siç duhet abonentëve të saj se si i menaxhon të dhënat e tyre personale. Duhet të jetë e qartë. Sidomos nëse përdoruesi kërkon informacion për të. Dhe nuk ishte kështu”, tha kreu i AP, Aleid Wolfsen.

AP tha se Netflix nuk e bëri të qartë se pse mbledh të dhëna personale, i ndan ato me palët e treta, për sa kohë i ruan ose si garantohet siguria e tij kur dërgohet jashtë Evropës.

Netflix ka apeluar vendimin, duke vënë në dukje se kishte bashkëpunuar me autoritetet e mbrojtjes së të dhënave dhe kishte ndryshuar tashmë politikat e tij.

“Qëkur hetimi u hap më shumë se pesë vjet më parë, ne kemi bashkëpunuar me agjencinë holandeze të mbrojtjes së të dhënave dhe kemi zhvilluar në mënyrë pro-aktive informacionin tonë të privatësisë për të ofruar qartësi më të madhe për anëtarët tanë. Kemi bërë ankesë kundër këtij vendimi”, tha një zëdhënës i Netflix.

Ambasadori i ShBA-së në Kosovë, Jeffrey Hovenier, zhvilloi takim lamtumirës me komandantin e KFOR-it, gjeneralmajor Enrico Barduani.

Hovenieri tha se ShBA-të janë kontribuues i rëndësishëm në misonin e NATO-së në Kosovë dhe sipas tij mbeten të përkushtuara ndaj tij, duke siguruar mjedis të qetë dhe të sigurt për të gjithë njerëzit që jetojnë në Kosovë, duke promovuar stabilitet në rajon.

Mandati i Hovenierit përfundon së shpejti, teksa ka paralajmëruar se pas përfundimit të misionit të tij në Kosovë, ai do të pensionohet.

Kryeministri Albin Kurti ka thënë sot në mbledhjen e qeverisë, se Kosova do të ketë një muze të dinjitetshëm ku do të shfaqen krimet e ish-Jugosllavisë dhe Serbisë ndaj shqiptarëve.

Ai tha se në muzeun e gjenocidit do të dëshmohen krimet monstruoze të Serbisë gjenocidiale ndaj Kosovës.

“Vendi ynë do të ketë një muze të dinjitetshëm ku do të tregohen krimet e ish-Jugosllavisë dhe Serbisë ndaj popullit tonë. Ky muze është institucionalizimi i kujtesës sonë kolektive dhe dëshmi e krimeve monstruoze të Serbisë gjenocidale dhe dëshmi se Republika e Kosovës ka ngadhënjyer dhe nuk harron”, tha ai.

Krahas kësaj, Kurti bëri thirrje sërish që mërgimtarët të regjistrohen për votim në zgjedhjet parlamentare të 9 shkurtit 2025, duke përkujtuar se afati për regjistrim është deri më 26 dhjetor.

“Po i drejtohem mërgatës sonë nga mbledhja e qeverisë, sepse vota e tyre ka qenë përcaktuese për përbërjen e kësaj qeverie, siç ka qenë edhe kontributi i saj përcaktuese për fatin e mirëqenien vendit tonë ndër vite. Me qeverinë tonë, për herë të parë, mërgata jonë do të kenë mundësi që të votojë në ambasada e konsullata në shtetet ku jetojnë bashkatdhetarët. Kjo është bërë e mundur sepse e kemi ndryshuar ligjin siç edhe u kemi pas premtuar. Votimi përmes postës brenda vendit dhe në ambasada e konsullata është një fitore e madhe për mërgatën tonë punëtore e patriotike dhe për shtetin tonë demokratik e të pavarur, si dhe një nga arritjet kryesore të qeverisë sonë në shërbim të mërgatës. E drejta e votës është e drejtë e garantuar me kushtetutë… Regjistrimi në faqen e KQZ-së nuk merr më shumë se pesë minuta kohë. Aq merr kohë edhe votimi me postë. Andaj, të gjithë ju që planifikoni të votoni nga jashtë vendit, ju ftoj edhe një herë, që të regjistroheni sa më parë në diaspora.kqz-ks.org. Sepse pa regjistrim, nuk ka votim. Regjistrimi është parakushti i votimit, por njëkohësisht edhe garancia për të drejtën e votimit për mundësinë e votimit, të dashur bashkatdhetarë”, tha Kurti.

Kreu qeveritar foli edhe për heqjen e regjimit të vizave për Bosnjë Hercegovinën nga 1 janari 2025.

“Ky vendim do të rrisë lidhjet ndërmjet qytetarëve të Kosovës dhe Bosnjës, do të shtojë mundësitë për bashkëpunim ndërmjet tyre dhe do të nxisë shkëmbimet e studentëve, ndërmarrësve, sportistëve, artistëve e profesionistëve të të dy vendeve. Veçanërisht më gëzon fakti që nga ky lehtësim do të përfitojnë shqiptarët në Bosnje që kanë familje dhe farefis në Kosovë dhe boshnjakët në Kosovë që mund të mirëpresin familjarët dhe farefisin e tyre nga Bosnja. Rreth 12 mijë shqiptarë jetojnë në Bosnje dhe Hercegovinë, ndërkaq rreth 27 mijë boshnjakë jetojnë në Kosovë. Nga 1 janari 2025, Kosova do të jetë vendtakimi i tyre, andaj edhe ne do t’i mirëpresim përzemërsisht”, tha Kurti./kp

Qeveria e Kosovës nisi procedurat për ndërtimin e Spitalit të Ferizajt në vlerë 27.9 milionë euro. Në mbledhjen e mbajtur të mërkurën iu dha drita e gjelbër edhe koncept-dokumentit për zhvillimin e kornizës rregullative të tregjeve financiare të Kosovës dhe dy marrëveshjeve ndërkombëtare në vlerë 70 milionë euro.

Ministri i Shëndetësisë, Arben Vitia tha se me ndërtimin e Spitalit të Ferizajt do të rriten kapacitetet infrastrukturore dhe shërbimeve paraklinike në këtë komunë si dhe ato përreth.

“Me qëllim të rritjes së kapaciteteve infrastrukturore dhe ngritjes së cilësisë së shërbimeve paraklinike në komunën e Ferzajt, Ministria e Shëndetësisë bazuar në Ligjin për buxhetin kërkon aprovimin e propozimvendimit për inicimin procedurave si projekt shumëvjeçarë në vlerën 27.9 milionë euro”, tha ai.

Ndërkaq, ministri i Financave, Hekuran Murati tha se me miratimin e koncept-dokumentit për zhvillimin e kornizës rregullative të tregjeve financiare do të zhvillohet edhe më tej ekonomia e Kosovës.

“Ky është hapi i radhës në mënyrë që zhvillohet më tutje ekonomia e vendit. Do të krijohet edhe një katalizator shtesë për mundësi e qasje të reja në financim për bizneset tonë në mënyrë që të rriten përtej produkteve të tanishme financiare siç janë kreditë nga sektori bankar. Në kuadër të zhvillimeve që kemi nisur edhe për themelimin e Bankës Zhvillimore ky vendim paraqet hapin e radhës për ndërtimin e një ekonomie moderne dhe që ka qasje në instrumentet financiare”, tha ai.

Ai prezantoi edhe dy marrëveshje ndërkombëtare mes ministrisë që drejton, KfW, Frankfurt Am Main dhe kompanisë regjionale Pastrimi për projektin “Zhvillimi Urban i Përshtatshëm për Klimën II.

Ai tha se njëra marrëveshje është grant kurse tjetra kredi e butë në vlerë 70 milionë euro.

Por, Murati ngriti shqetësimin se ky projekt mund të dështojë për shkak se Komuna e Prishtinës ka shpall tenderë për kontraktimin e shërbimeve të njëjta që ofron kompania Pastrimi.

Sipas tij, kryeqyteti duhet të rishqyrtojë ky vendim dhe të mbështetet kompania regjionale Pastrimi për fuqizim të kapaciteteve.

“Kohëve të fundit ka një problem sa i përket menaxhimit dhe raportit me komunën. Me aq sa jemi në dijeni komuna e Prishtinës ka shpallur tenderë për kontraktim të shërbimeve të njëjta që ofron kompania Pastrimi. Kësisoj vendoset në rrezik projekti në fjalë që është në vlerë 70 milionë euro dhe 50 milionë euro parashihen të jenë grante. Të rishqyrtohet ky veprim në mënyrë që sigurohemi që bashkërisht të mbështesim ndërmarrjen Pastrimi”, nënvizoi Murati.

Krahas këtyre, ekzekutivi miratoi edhe Projektligjin për inspektoratin qendror të shëndetësisë si dhe Projektligjin për prodhimin, kultivimin, grumbullimin, përpunimin, tregtimin, kontrollin e duhanit, produktet e duhanit dhe produktet e ndërlidhura.

Po ashtu u emërua Luan Sylaj, drejtor ekzekutiv në Agjencinë për Zhvillimin e Bujqësisë në Ministrinë e Bujqësisë./kp

Dogana e Kosovës ka njoftuar se ka parandaluar një rast të kontrabandimit të mallrave nga Maqedonia e Veriut në Kosovë, ku ka zënë mallra pa asnjë dokument për prejardhjen.

Gjatë kontrolleve taktike dhe operacioneve në teren në brezin kufitar RKS-RMV në zonën që kufizohet me komunën e Vitisë, njësitet e Doganës thuhet se kanë ndaluar dy automjete transportuese me targa vendore me drejtues shtetas kosovarë.

“Gjatë kontrollit të tyre janë hasur mallra komerciale te kontrabanduara nga RMV-ja për të cilin mall nuk kishin asnjë dokument mbi prejardhjen e tyre”, thuhet në njoftim.

Gjithashtu thuhet se njësitet e Doganës kanë zhvilluar kontrolle edhe në një depo në Prishtinë, pronë e të dyshuarve.

“Nga njësitë e lartcekura është kryer edhe një kontroll në Prishtinë në depon e të dyshuarve ku janë hasur, mallra të ndryshme komerciale pa prejardhje dhe pa dokumentacion përkatës. Mallrat janë sekuestruar dhe dërguar në terminalin doganore ku për procedim te mëtejshëm te rastit. Vlera e mallrave sipas tregut është mbi 30.000€ pa llogaritur shmangiet doganore”, thuhet në njoftim.

Presidentja e Sllovenisë, Natasha Pirc ka arritur në Kosovë.

Ajo është pritur nga zëvendëskryeministrja Emilija Rexhepi në aeroportin “Adem Jashari”.

“Mirësevjen presidente”, ka shkruar Rexhepi në Facebook ku ka ndarë edhe fotografi me Pirc.

Në njoftimin e lëshuar nga Presidenca e Sllovenisë thuhet se ajo do të jetë e shoqëruar nga shefi i Shtabit të Përgjithshëm të Forcave të Armatosura sllovene, gjenerallejtënant Robert Glavash. Aty thuhet se dyshja në fjalë do të vizitojnë pjesëtarët e kontingjentit të 50-të të Forcave të Armatosura Sllovene, pra forcat që shërbejnë në kuadër të KFOR-it në Kosovë.

Pirc do të takohet me shtabin komandues të këtij operacioni dhe do të mësojë për detyrat dhe projektet që Sllovenia po i zbaton në Kosovë.

Ajo do të marrë pjesë edhe në një koncert të grupit të Forcave të Armatosura sllovene “Naboj”.

Ndër tjera thuhet se Pirc do të takohet edhe me komandatin e KFOR-it, gjeneralmajor Enrico Barduani.

Europol së bashku me autoritetet e zbatimit të ligjit në disa shtete evropiane, përfshirë dhe Prokuroria e Posaçme SPAK, ka goditur një rrjet ndërkombëtar të pastrimit të parave, i cili pastronte të ardhurat nga trafiku i drogës.

Operacioni ka çuar në arrestimin e nëntë individëve dhe sekuestrimin e 27 milionë eurove në kriptovaluta, si dhe sende të tjera luksoze.

Hetimi ka zbuluar një rrjet të fshehtë bankar, i cili ofronte shërbime për pastrimin e parave të paligjshme përmes kriptomonedhave.

Një nga gjetjet kryesore të hetimit ka qenë identifikimi i një anëtari të një grupi kriminal me bazë në Shqipëri, i cili lehtësonte transferimin e shumave të mëdha parash përmes kriptomonedhave. Ky person ka operuar si pjesë e një rrjeti që vepronte në Shqipëri dhe që ishte nën mbikëqyrjen e një rrjeti ndërkombëtar të pastrimit të parave, i lidhur me grupime të tjera kriminale në Bullgari, Spanjë, Belgjikë, Holandë dhe SHBA.

Ky operacion është një vazhdim i operacionit “Gorgon”, atij të muajit korrik dhe gusht, ku u godit klani “Çopja” në Elbasan.

Në muajin gusht, në Shqipëri, operacioni i përbashkët u kodua me emrin “Gorgon” – figura monstruoze sipas mitologjisë greke, me Meduzën si përfaqësuesen më të njohur të tyre.

SPAK bëri me dije në atë kohë se kishte lëshuar 33 urdhër-arreste ndaj anëtarëve të dyshuar të një organizate kriminale, që drejtohet sipas hetuesve nga dy vëllezërit Franc dhe Hajdar Çopja.

SPAK njoftoi se nga 33 urdhër-arrestet, ishin ekzekutuar 13 në Shqipëri, ndërsa 2 persona u arrestuan jashtë vendit.

Si Europol zbardhi skemën e pastrimit të parave?

Në vitin 2021, autoritetet spanjolle sekuestruan një sasi të madhe parash gjatë një kontrolli shtëpie në kuadër të një hetimi për trafikun e kokainës. Disa kartëmonedha pesë eurosh u gjetën me mbishkrime të shkruara me dorë, të cilat ofronin informacione të rëndësishme mbi ata që koordinonin aspektin financiar të trafikut të drogës. Guardia Civil e Spanjës e dorëzoi këtë informacion Europolit, i cili e analizoi atë në përputhje me të dhënat nga hetimet e mëparshme në rastet EncroChat dhe Sky ECC. Si rezultat i këtyre analizave, u identifikua një koordinator i cili ofronte shërbime bankare nëntokësore për një rrjet kriminal të bazuar në jug të Spanjës dhe i lidhur me një tjetër rrjet që operonte nga Dubai. Ky individ, shtetas britanik, u arrestua më 12 shtator 2022.

Për të thelluar hetimin, autoritetet zbatuan një analizë të detajuar të të dhënave për të identifikuar individët e tjerë të përfshirë dhe për të hartuar strukturën e plotë të rrjetit kriminal. Ky bashkëpunim i ngushtë ndërmjet Europolit, Guardia Civil dhe Task Forcës Operacionale të Europolit çoi në shpërndarjen e një morie informacioni inteligjence. Bazuar në këto gjetje, u realizua një aksion i koordinuar më 4 nëntor 2024 në Malaga, Spanjë, i cili përfshiu autoritete të zbatimit të ligjit nga Belgjika, Bullgaria, Holanda dhe Shtetet e Bashkuara.

Qeveria e Kosovës miratoi të mërkurën themelimin e Muzeut të Gjenocidit dhe Përpjekjes për Liri. Ekzekutivi tha se në këtë mënyrë synon dokumentimin e krimeve të ish-Jugosllavisë dhe Serbisë ndaj shqiptarëve dhe të tjerëve në Kosovë.

Ai do të themelohet si njësi e veçantë në kuadër të Muzeut Kombëtar të Kosovës, ndërsa pas hyrjes në fuqi të Ligjit për muze si institucion, bëri të ditur ministri i Kulturës, Hajrulla Çeku.

Në një konferencë për media, Çeku tha se për ndërtimin e këtij institucioni, kanë siguruar buxhetin e nevojshëm.

“Muzeu i Gjenocidit dhe Përpjekjes për Liri ka për synim dokumentimin dhe prezantimin e krimeve të ish Jugosllavisë dhe Serbisë ndaj shqiptarëve dhe të tjerëve në Kosovë. Muzeu fillimisht do të themelohet si njësi e veçantë në kuadër të Muzeut Kombëtar të Kosovës, ndërsa menjëherë pas hyrjes në fuqi të ligjit për muzetë që akutualisht është në proces të hartimit ky institucion ngritët në nivel të një institucioni muzeal të nivelit kombëtar. MKRS do të nis të gjitha hapat përkatës. Për këtë qëllim tashmë kemi siguruar edhe buxhetin e nevojshëm, po ashtu do të vendoset në ndërtesën ku aktualisht vepron MKRS”, tha Çeku .

Për këtë muze, ai tha se kanë qenë në komunikim edhe me disa shtete që kanë përvojë të dalluar në çështjen e muzealizimit dhe të prezantimin të së kaluarës.

“Fillimisht si hapi i parë ne fillojmë hartimin e detyrës projektuese që i paraprin shpalljes së konkursit ndërkombëtar për hartimin e projekteve. Pra, ndërtesa ekziston, bëhet detyra projektuese dhe shpallet konkursi për projekt. Momentin që e kemi studion e arkitekturës që kontraktohet fillon periudha e hartimit të projekti që nuk është vetëm arkitekt unik, por e ka edhe komponentën e konceptimit muzeal dhe koraterial, në fund del edhe kostoja për realizmin. Deri tash kemi qenë në komunikim edhe me disa shtete që kanë përvojë të dalluar në çështjen e muzealizimit dhe të prezantimit të së kaluarës atracitcare dhe besoj se në këtë kuptim do të kemi edhe bashkëpunim ndërkombëtar për të siguruar ekspertizën e nevojshme, sepse duam që ta ndërtojmë një institucion që është reprezentativ dhe i nivelit botëror”, nënvizoi Çeku .

Ai tha ky institucion do të ta ketë ndërtesën kryesore në Prishtinë, në objekt të MKRS-së.

“Misioni të cilin do ta ketë ky institucion e bënë totalisht të ndryshëm nga nisma e para disa viteve që ka qenë në raport me vendosjen e një institucioni tjetër publik në atë ndërtesë. Natyrisht ne kemi zhvilluar të gjitha konsultimet, ndërsa te vendimi që të zgjedhim pikërisht këtë ndërtese kemi ardhur pasi që i kemi pas në shqyrtim të paktën pesë opsione. Grupi Punues ka diskutuar edhe opsionet jo vetëm në Prishtinë por edhe në vendet tjera, më i përshtatshmi për shkak të qasjes dhe ndodhjes është zgjedhur ndërtesa e Ministrisë së Kulturës”, tha Çeku .

Në votimin për themelimin e këtij muzeu ka abstenuar ministri për Kthim dhe Komunitete, Nenad Rashiq.

“Janë disa muze të vegjël në gjithë Kosovën që dokumentojnë këto krime nga e kaluara dhe besojmë mënyra më e mirë do të jetë që të gjitha këto të bëhen pjesë e këtij institucioni të ri muzeal të Kosovës… Ndërsa, sa i përket ministrit Rashiq, ne kemi diskutuar edhe më herët kur është themeluar grupi punues, kemi qenë shumë të kujdesshëm që të trajtojmë në një forme perspektivën e tij në lidhje me këtë institucion, mirëpo pika u pajtohemi të gjithë është që e kaluara jonë është ajo që është dhe detyra jonë është të tregojmë ashtu si është”, tha Çeku.

Në Kosovë janë vrarë mbi 13.000 civilë në luftën e fundit më 1998-1999. Ndërkaq, mbi 1.600 persona vazhdojnë të jenë të zhdukur./KP