Category: Lajme

PËRGATITI: NORA LUTA

I akuzuar për sulm ndaj gazetarëve, dhe pjesëmarrje në protestat në Zveçan Dalibor Spasiq, ka kërkuar marrëveshje për pranim të fajësisë.

Spasiqit, i cili gjendet nën masën e dorëzanisë, Gjykata e Mitrovicës i ka dhënë kohë 30 ditë për arritjen e saj.

Deri më tani, Gjykata nuk ka pranuar ndonjë njoftim për arritjen e marrëveshjes apo për dështim të negociatave, ndonëse palëve iu është dhënë afati prej tridhjetë (30) ditësh.

Kërkesën për negocim të marrëveshjes, e ka paraqitur avokati i Spasiq, Sërxhan Mitrovic, i cili gjatë ditës nuk ka qenë i qasshëm për televizionin.

Sipas Prokurorisë së Mitrovicës, ai ishte kontaktuar para 17 dhjetorit kur ishte planifikuar nisja e shqyrtimit gjyqësor, por nuk ishte paraqitur për të filluar negociatatat.

Dalibor Spasiq ishte arrestuar më 17 qershor të vitit të kaluar, në Jarinjë, por ishte liruar një muaj më vonë./atvlive.tv

PËRGATITI: FATLUM JASHARI 

“Për projektin për të cilin sot nënshkruam kontratën, dua t’ju njoftoj se gjatësia është 9.78km dhe bëhet fjalë për segmentin nga Lumi i Madh deri në Gojbulë”.

Edhe pse kontrata e nënshkruar më 8 Shkurt, parasheh zgjerimin dhe ndërtimin e një segmenti 9.78 kilometërsh të rrugës nacionale Prishtinë-Mitrovicë, qeveritarët prenë shiritin pas kompletimit të punës në 56% të gjatësisë së tij.

Përkundër kësaj, kryeministri Albin Kurti tha se projekti “që ka pothuajse moshën e pavarësisë po bëhet”.

Por, përfundimi i pjesës tjetër të segmentit të kontraktuar, nga hyrja e Vushtrrisë në drejtim të Mitrovicës, do ende kohë.

Jo larg vendit ku u bë inagurimi, në hyrje të Vushtrrisë, po vazhdojnë punimet për ndërtimin e pjesës tjetër të segmentit deri në fshatin Gojbulë, që ka një gjatësi rreth 4 kilometra.

Në kohën kur kanë mbetur më pak se dy muaj afat për finalizimin e punës, në pjesën që shmangë kalimin nëpër qytet nuk u panë ekskavatorë e as punëtorë.

Kontrata e nënshkruar Shkurt, parasheh ndërtimin e rrugës nga fshati Lum i Madh deri këtu në Gojbulë, për të vazhduar lidhjen me segmentin e përfundua r deri në fshatin Smrekonicë.

Tutje për segmentin nga Smrekonica e Vushtrrisë deri në hyrje të Mitrovicës, në gjatësi prej rreth 5 kilometrash, nuk është shpallur ende tenderi.

Punët për zgjerimi dhe ndërtimin e rrugës nacionale N2 Prishtinë-Mitrovicë, në një gjatësi rreth 35 kilometra, kanë nisur para 15 vjetësh./atvlive.tv/

Komisioni Qeveritar për Persona të Zhdukur sot ka njoftuar se janë rivarrosur mbetjet mortore të dy viktimave të luftës së fundit, Feriz Mrasori dhe Ilmi Aliu.

“Pas gjetjes dhe zhvarrimit gjatë vitit 2023, dhe procesit të identifikimit përmes analizës shkencore të ADN-së, në respektim të kërkesave të familjeve, janë rivarrosur mbetjet mortore të dy viktimave të luftës, Feriz Mrasori dhe Ilmi Aliu”, tha Komisioni në njoftim.

Ky Komision tha se më 18 dhjetor 2024, në Pastasel, u krye rivarrimi i mbetjeve mortore të Feriz Mrasorit. Sot, më 20 dhjetor 2024, në varrezat e fshatit Strofc, janë rivarrosur mbetjet mortore të Hilmi Aliut.

Ndërsa nesër, më 21 dhjetor 2024, në Rahovec, do të kryhet rivarrimi i mbetjeve mortore të Sylejman Demës.

“Të tre viktima të luftës që ishin në Listën e Personave të Zhdukur. Komisioni Qeveritar për Persona të Zhdukur mbetet i përkushtuar për zbardhjen e fatit dhe vendndodhjes së gjithë personave të zhdukur, për të respektuar të drejtën e familjeve për të ditur fatin dhe vendndodhjen e më të dashurve të tyre të rrëmbyer dhe zhdukur me dhunë”.

Zëvendësministri i Ministrisë së Punëve të Jashtme, Kreshnik Ahmeti, ka njoftuar se nga sot pasaporta e Republikës së Kosovës do të njihet zyrtarisht edhe nga shteti i Armenisë.

Ahmeti ka thënë se Armenia njeh zyrtarisht të gjitha pasaportat e Kosovës, përfshirë ato të zakonshme, diplomatike e zyrtare.

“Pasaporta e Republikës së Kosovës vazhdon të fuqizohet. Nga sot, Armenia njeh zyrtarisht të gjitha pasaportat e Kosovës, duke përfshirë ato të zakonshme, diplomatike dhe zyrtare. Ky është një hap i rëndësishëm drejt forcimit të lidhjeve dhe marrëdhënieve ndërmjet qytetarëve dhe institucioneve të të dyja vendeve”, ka shkruar Ahmeti.

Rusia ka bombarduar mbrëmjen e djeshme kryeqytetin e Ukrainës. Sipas informacioneve nga këto bombardime është goditur edhe godina ku ndodhet ambasada shqiptare në Kiev.

“Gjashtë ambasada u dëmtuan si rezultat i sulmeve me raketa ruse në Kiev, tha zëdhënësi i Ministrisë së Jashtme Tykhy.

Nga sulmi kanë mbetur të dëmtuara dhe ambsadat e Argjentinës, Palestinës, Maqedonisë së Veriut, Portugalisë dhe Malit të Zi, të cilat janë të vendosura në të njëjtën ndërtesë.

Lajmin e ka konfirmuar edhe Ministria për Evropën dhe Punët e Jashtme, e cila ka dënuar këto sulme të Rusisë të cilat i ka quajtur brutale.

“Një seri sulmesh ajrore të Federatës Ruse tronditën Kievin të premten në mëngjes, duke shkaktuar dëme të shumta në disa zona në kryeqytetin e Ukrainës.

Si pasojë e këtyre sulmeve, u dëmtuan pjesërisht fasada e jashtme dhe disa hapësira brenda godinës së ambasadës së Republikës së Shqipërisë në Kiev dhe ambasadave të pesë vendeve të tjera, duke vënë në rrezik jetën e personelit diplomatik. Raportohet vetëm për dëme materiale.

Ministria për Evropën dhe Punët e Jashtme dënon pa asnjë mëdyshje këto sulme brutale. Ky akt i pakuptimtë është një sulm ndaj themeleve të vetë diplomacisë ndërkombëtare. Mbrojtja e personelit diplomatik dhe paprekshmëria e misioneve janë parime të panegociueshme që duhet të respektohen dhe të zbatohen plotësisht”, thuhet në deklaratën e Ministrisë.

LEXONI EDHE:

Dëmtohet ambasada e Maqedonisë së Veriut nga sulmet ruse në Kiev

Bazuar në të dhënat nga mbikëqyrja javore e gripit sezonal, Instituti Kombëtar i Shëndetësisë Publike të Kosovës ka bërë të ditur se është rritur numri i rasteve të raportuara të gripit, krahasuar me javët paraprake.

Me qëllim të parandalimit të rasteve të reja dhe komplikimeve të rënda shëndetësore që mund të vijnë nga Gripi, IKSHPK u bën thirrje qytetarëve që të vaksinohen kundër Gripit në njësitë e vaksinimit në komunën ku jetojnë.

Efekti i vaksinës, sipas IKSHP-së fillon 1 deri 2 javë pas marrjes dhe mbrojtja vazhdon rreth një vit pas vaksinimit.

IKShPK-ja rikujton se Ministria e Shëndetësisë në bashkëpunim me IKShPK-në, në fillim të sezonës së gripit 2024/2025, ka siguruar 85,000 doza të vaksinës sezonale.

Presidenti i Francës, Emmanuel Macron e ka nderuar figurën e Gisele Pelicotit për forcën që ka shfaqur në gjyqin e dhunimeve masive, të inciuara nga burri i saj dhe të kryera nga 50 burra tjerë.

Duke e përshkruar atë si pioniere për gratë, ai ka thënë se “dinjiteti i saj dhe kuraja e kanë inspiruar Francën dhe botën”.

Ish-burri i saj, Dominique Pelicot, 72-vjeçar, është dënuar me 20 vjet burgim për dhunim, pasi e ka pranuar se e ka droguar Giselen për pothuajse një dekadë dhe se ka rekrutuar burra tjerë për ta dhunuar atë, teksa ajo ka qenë në gjendje kome në shtrat.

Të 50 burrave tjerë u janë dhënë dënime më të vogla.

Gisele Pelicot ka thënë se procesi gjyqësor ka qenë i vështirë, mirëpo beson në një të ardhmen kur burrat dhe gratë mund të jetojnë “në harmoni dhe me mirëkuptim”.

Ajo pati marrë vendim që procesi të mos jetë anonim dhe e ka bërë rastin publik, i cili ka marrë vëmendje globale.

Gjyqtarët në jug të Francës kanë thënë se 51 burrat që janë paditur, të moshave prej 27 deri në 74-vjeçare, janë fajtorë dhe janë dënuar, mirëpo avokati i Giseles ka thënë të premten se “asnjë vendim nuk do t’ia kthejë mbrapsht jetën që i është shkatërruar”.

Tre fëmijët e saj kanë dhënë se janë të zhgënjyer me disa dënime që u janë shqiptuar disa burrave, të cilat dallojnë prej tre deri në 15 vjet.

Sipas raportimeve, 41 burra janë dërguar menjëherë në burg.

Avokati i Dominique Pelicotit ka thënë se është “tronditur” nga dënimi ndaj klientit të tij dhe do të vendosë në ditët në vijim nëse duhet apeluar atë, raporton REL.

Aktivistët kundër dhunës seksuale e kanë ndjekur nga afër procesin gjyqësor, me shpresën se do të nxisë reforma në ligjet e Francës dhe të ndryshohet kultura e debatit për dhunimet dhe dhunën seksuale që përfshin edhe abuzim me drogën.