Category: Lajme

Nënkryetari i LDK-së dhe një prej figurave politike që ka qenë pjesë e proceseve politike të bërjes së Kosovës shtet, Lutfi Haziri, në një intervistë për Gazetën Express ka folur për propozimin e kryeministrit të Shqipërisë, Edi Rama, që Kosova të vazhdojë me implementimin e një anshëm të obligimeve të marra në Dialog dhe të mos pres fare Serbinë, meqë sipas Ramës kjo do t’i siguronte Kosovës një hap të madh përpara drejt integrimit në BE.

Haziri ka thënë se kjo është hera e parë që kryeministri Edi Rama zëshëm e thotë diçka të tillë në Kuvendin e Republikës Kosovës, ndonëse s’është hera e parë që e përmend si ide.

“Nuk është hera e parë, por është hera e parë zëshëm që kryeministri Rama, në Kuvendin e Kosovës, e tha që Kosova duhet njënanshëm të vazhdojë bisedimet, por më herët ka thënë që Kosova njënashëm duhet ta implementojë draft-statutin, që në njëfar forme, ai e ka sjellë një draft- dokument në emër të palëve më herët, por edhe ka besuar që Kosova duhet ta ndërtojë, draftojë e pajtojë me BE-në me SHBA-të një draft-statut i cili njënanshëm mund të implementohet. Kjo, në kuadër të angazhimeve, që ai, si kryeministër dhe si njëri prej liderëve rajonalë me influencë, e ka shtyrë edhe në agjendën e BE-së e edhe me partnerët si SHBA në këtë rast”, ka thënë Haziri për Express.

Megjithatë Haziri thotë se kryeministri i Kosovës, Albin Kurti, përfaqëson një mentalitet plotësisht tjetër politik meqë e ka refuzuar formatin që kërkon kryeministei Rama, pra që Kosova të negociojë me BE si ndërmjetëse dhe SHBA si ndihmëse.

Haziri shprehet se kryeministri Albin Kurti duke thënë se nuk negocion me Serbinë, ka rënë në gropën e negociimit 100% me Serbinë.

Haziri në fund thotë se mendësia politike e Kurtit s’përputhet me atë që kërkon kryeministri Edi Rama, prandaj sipas tij, duhet pritur Qeverinë e ardhshme që del nga zgjedhjet e 9 shkurtit.

“Tani, z. Kurti përfaqëson mendësi totalisht të kundërt, sepse ai këtë format të bisedimeve e ka refuzuar totalisht, jo me Serbinë, por me BE-në dhe SHBA-në, sepse duke thënë që nuk negociojë me Serbinë, ka ra në gropën e negocimit me Serbinë qind për qind, dhe përfaqësimi i një mendësie, formati e profili tjetër, nuk është i përputhshëm me atë që e ka thënë z. Rama. Në këtë rrafsh, duhet pritur zgjedhjet e ardhshme dhe qeverinë e ardhshme”, ka përfunduar Haziri.

Shqipëria pritet të përfshihet nga mot i keq dhe me reshje të dendura shiu. Ministria e Mbrojtjes ka apeluar për strukturat qendrore dhe vendore, që të jenë në gatishmëri, me qëllim evitimin e përmbytjeve të mundshme.

Në 23 dhjetor, reshje intensive deri shumë intensive do të përfshijnë pesë qarqe si; Vlorë, Gjirokastër, Shkodër, Kukës dhe Dibër.

Kurse në zonat e tjera reshjet do të jenë mesatare deri intensive, të shoqëruara me shtrëngata.

Njoftimi i Ministrisë së Mbrojtjes:

Bazuar në raportimin e Shërbimit Meteorologjik Ushtarak dhe IGJEO, Ministria e Mbrojtjes nëpërmjet Agjencisë Kombëtare të Mbrojtjes Civile, u bën thirrje të gjitha strukturave vendore dhe qendrore të marrin masa parandaluese për shmangien e përmbytjeve dhe të jenë në gatishmëri për të reaguar në kohë ndaj çdo situate emergjente.

Sipas IGJEO dhe SHMU, pjesën e dytë të ditës së sotme priten reshje të dobëta në të gjitha qarqet.

Në 23 dhjetor, reshje intensive deri shumë intensive do të përfshijnë qarqet Vlorë, Gjirokastër, Shkodër, Kukës dhe Dibër, ndërsa në zonat e tjera reshjet do të jenë mesatare deri intensive, të shoqëruara me shtrëngata.

Në lartësitë mbi 400 m në Veri, Lindje dhe Juglindje reshjet do të jenë në formë dëbore, duke shkaktuar ngrica dhe vështirësi në transport. Bashkëpunimi dhe veprimi i shpejtë janë thelbësore për të minimizuar pasojat dhe për të garantuar sigurinë e qytetarëve./abcnews.al

Kryeministrja italiane Giorgia Meloni tha të dielën se Rusia përbën një kërcënim më të madh për sigurinë e Bashkimit Evropian sesa thjesht nga pikëpamja e mbrojtjes pasi Moska mund të përdorë emigracionin e paligjshëm dhe çështje të tjera për të minuar bllokun.

Kryeministrat e Finlandës, Italisë, Suedisë, Greqisë si edhe shefja e Politikës së Jashtme të BE-së u takuan në fundjavë në Lapland në veri të Finlandës për të diskutuar mbi sigurinë në rajonin nordik dhe Mesdhe, si dhe sfidat e migracionit në Evropën Jugore.

“Ne duhet ta kuptojmë se kërcënimi është shumë më i madh nga sa mund ta marrim me mend”, tha zonja Meloni në një konferencë për shtyp kur u pyet për Rusinë.

Rreziku ndaj sigurisë së BE-së nga Rusia apo nga aktorë të tjerë nuk do të zhduket pasi të përfundojë konflikti në Ukrainë dhe BE-ja duhet të jetë e përgatitur për këtë, tha ajo.

“Bëhet fjalë për demokracinë tonë, për ndikimin që mund të ushtohet ndaj opinionin tonë publik, për atë që ndodh në Afrikë, ka të bëjë me lëndët e para, ka të bëjë me instrumentalizimin e migracionit. Duhet ta kuptojmë se bëhet fjalë për një ide shumë të zgjeruar të sigurisë”, tha zonja Meloni.

Ajo bëri thirrje që BE-ja të bëjë më shumë për të mbrojtur kufijtë e saj dhe të mos lejojë Rusinë apo ndonjë “organizatë kriminale” të kontrollojë fluksin e emigrantëve të paligjshëm. Disa anëtarë të BE-së, përfshirë Finlandën dhe Estoninë, kanë akuzuar Rusinë se i lejon migrantët e paligjshëm nga Lindja e Mesme dhe vendet e tjera të hyjnë në shtetet e BE-së përmes Rusisë pa kontrollet e duhura, duke minuar sigurinë e BE-së.

Moska ka mohuar se Rusia po i lejon qëllimisht migrantët e paligjshëm të shkojnë në BE.

Kryeministri finlandez Petteri Orpo tha se sigurimi i kufirit prej 1,340 km të vendit të tij me Rusinë është “një çështje ekzistenciale” për Finlandën dhe për anëtarët e tjerë të BE-së dhe aleatët e NATO-s.

Zonja Meloni tha se BE-ja ka gabuar duke e trajtuar çështjen e imigracionit ndër vite thjesht nga këndvështrimi i ndarjes së barrës.

“Trajtimi i çështjes së imigracionit të paligjshëm vetëm si një debat i bazuar në solidaritet ishte i gabuar,” tha ajo. “Rezultati është që nuk kemi mundur të mbrojmë kufijtë tanë… Ne duam të mbrojmë kufijtë tanë të jashtëm dhe nuk do të lejojmë Rusinë ose organizatat kriminale të minojnë sigurinë tonë.”

Ndërsa NATO mbetet “gur themeli” i sigurisë së BE-së, blloku është ndeshur me sfida më të gjera, tha zonja Meloni, e cila drejton një qeveri konservatore.

“Me siguri nënkuptohet gjithashtu infrastrukturë kritike, inteligjencë artificiale, siguri kibernetike, lëndët e para, zinxhirë furnizimi. Nënkuptohet një politikë e jashtme dhe bashkëpunuese e re dhe më efektive, por edhe imigracioni,” tha ajo. /VOA

Shpërndarja e buxhetit nga qeveria aktuale në kohë fushate dëshmon dështimin 4 vjeçar të saj, ka thënë koordinatori për Financa në Partinë Denokratike të Kosovës, Arben Mustafa.

Ai tha se shpërndarja e 100 eurove për pensionistët është e pamjaftueshme ndërsa theksoi se në qeverinë e udhëhequr nga Bedri Hamza pensionistët do të kenë rritje të përhershme të pensioneve.

“Me këtë qeveri, pensionistët marrin vetëm 100 euro më shumë gjatë gjithë vitit. Me Bedri Hamzën Kryeministër, pensionistët do të marrin 1000 euro më shumë brenda një viti, dhe shumë më shumë kushte për përmirësimin e jetës për familjet kosovare”, tha Mustafa.

Agim Hyseni, është emëruar të premten në pozitën e zëvendësministrit të Ministrisë së Industrisë, Ndërmarrësisë dhe Tregtisë, në vend të Resul Makreshit, cili u lirua nga detyra, raporton EO.

Përmes një komunikate ka reaguar Partia Demokratike e Ashkalinjve, që sipas kësaj partie Hyseni ka qenë i dënuar dhe ka vuajtur burgimin për keqpërdorim të fondeve.

Në një konferencë për media kryeministri i Kosovës Albin Kurti tha se ende nuk kanë arritur ta shqyrtojnë atë se çka thuhet për zëvendësministrin e ri.

“Me partinë e cila i përfaqëson ashkalinjtë në Kuvendin e Republikës dhe në Qeverinë tonë unë jam në koalicion. Prandaj zëvendësministri nga radhët e tyre është si emër i veçantë pjesë e marrëveshjes sonë të koalicionit. Tash ne ende nuk kemi arritur ta shqyrtojmë krejt çfarë thuhet për zëvendësministrin e ri, por kur ta bëjmë këtë do ta marrin veprimin apo vendimin adekuat. Por, tash nuk mund të flasë për këtë gjë. Porsa e emëruam atë”, tha Kurti.

Nga e gjithë Evropa, mërgimtarët nisen drejt Kosovës për t’i kaluar ato në gjirin familjar.

E kjo ka shtuar fluksin në pikat kufitare, sidomos ato me Serbinë.

Jo pak nga ta ballafaqohen me vështirësi gjatë ardhjes në Kosovës, e më së shumti me kolonat që shkakohen.

Madje disa nga ta presin edhe me orë të tëra për të hyrë në Kosovë.

Sipas një lexuesi të Klankosova.tv, atij i ka rënë të presë edhe mbi 10 orë.

Ai tregoi se po vinte nga Franca për t’i kaluar pushimet në shtëpi.

Pas vendimit të Qeverisë për ndarjen e 100 eurove për fëmijë dhe pensionistë, ka reaguar Lidhja Demokratike e Kosovës, raporton EO.

“Vizion në javën e parë të mandatit, apo panikë në muajt e fundit?”, thuhet në reagimin e LDK-së.

“Ky pra është dallimi. Sepse LDK e ka programin dhe zotimin e qartë: koeficient të pagave 150 euro – që do të thotë rritje mesatare e pagës për 200 euro – për të giithë shërbyesit publik në javën e parë të mandatit, dhe zgjidhje të qëndrueshme që i përgjegjen vështirësive dhe nevojave të përditshme të qytetarëve”, thuhet në reagim.

Po ashtu në reagim theksohet se ka dallim të madh me lëmoshën e dhënë në fund të vitit, e cila nuk mjafton as për ta paguar rrymën në këtë dimër.

“Kjo ka dallim të madh me lëmoshën e dhënë në fund të vitit e cila nuk mjafton as për ta paguar rrymën në këtë dimër. Sepse kjo që pamë sot nga kjo qeveri nuk është asgjë më shumë se shenjë e panikës dhe mungesë e vizionit nga një udhëheqësi e dështuar e cila nuk ka implementuar asgjë të qëndrueshme në 4 vite qeverisje. Qytetarët janë lodhur nga qeverisja e paaftë, dhe ata po na e tregojnë çdo ditë se ata duan ndryshim, dhe e duan atë menjëherë! E këtë ndryshim, me mirëqenie, mundësi e paga të mjaftueshme për të gjithë – dhe atë gjatë tërë vitit, do ta sjell vetëm LDK nën udhëheqjen e Dr. Lumir Abdixhikut dhe ekipit tonë profesionist. Bashkë me qytetarët e vendit do të bëhemi ndryshimi i domosdoshëm për Kosovën!”, thuhet në reagim.

Nëntë nga dhjetë gra shtatzëna nuk i mbijetojnë gripit të shpendëve. Ky është alarmi i ngritur nga studiuesit në Institutin e Kërkimeve për Fëmijët Murdoch (Mcri) në Melburn, Australi, të cilët analizuan gjithsej 30 raste të grave shtatzëna të infektuara, 27 prej të cilave humbën jetën. Kjo tregon një shkallë vdekshmërie prej 90% njëqind, ndërkohë që infeksionet njerëzore të lidhura me shpërthimet e viruseve të shpendëve shumë patogjene po rriten globalisht, raporton A2 CNN.

Ekspertët përsërisin “nevojën për të konsideruar gratë shtatzëna një prioritet në programet e gatishmërisë ndaj pandemisë”. Duke shtuar se “megjithë rrezikun e lartë, kjo popullatë shpesh përjashtohet nga provat e vaksinave dhe has vështirësi në aksesin në programet publike të vaksinimit”.

Një nga autorët e studimit australian, studiuesja Rachael Purcell, thekson se “një ndryshim paradigme nevojitet për të përfshirë sistematikisht gratë shtatzëna në programet ndaj pandemisë dhe për të shmangur vdekjet “. Studiuesit nënvizojnë se si situata “përkeqësohet nga rritja globale e infeksioneve njerëzore të shkaktuara nga viruset e shpendëve shumë patogjenë”, shkruan a2.

Raporti më i fundit alarmues erdhi nga Shtetet e Bashkuara, ku rasti i parë i sëmundjes së rëndë të lidhur me gripin e shpendëve A/H5N1, u regjistrua në një pacient të shtruar në spital në shtetin e Luizianës, pasi ra në kontakt me zogj të sëmurë dhe të ngordhur në oborrin e shtëpisë. Kalifornia ka shpallur tashmë një gjendje të jashtëzakonshme kombëtare.

“Gripi i shpendëve po përparon në Shtetet e Bashkuara dhe po shqetëson gjithashtu Evropën, e cila po grumbullohet me vaksina, përveç Italisë. 2025 rrezikon të jetë vërtet viti i gripit të shpendëve”, paralajmëron Matteo Bassetti, drejtor i sëmundjeve infektive në spitalin poliklinik San Martino në Xhenova të Italisë, i cili apelon autoritet italiane të organizophen dhe të jenë në gatishmëri nga ëprphapja e këtij virusi, që mund të fitojë aftësinë për t’u transmetuar nga njeriu te njeriu, përcjell A2 CNN.

“Një artikull i botuar në “Science”, thotë se mungon vetëm një mutacion shumë i vogël që virusi të bëjë kërcimin përfundimtar të specieve dhe të fitojë aftësinë për t’u transmetuar nga njeriu te njeriu”, thekson mjeku italian.

Autoritetet gjermane kanë ngritur aktakuzë për vrasje dhe tentim vrasje ndaj të dyshuarit për sulmin vdekjeprurës në tregun e Krishtlindjes në qytetin Magdeburg, ku u vranë pesë njerëz dhe u plagosën 200 të tjerë, njoftoi policia gjermane mëngjesin e së dielës.

I dyshuari – i identifikuar si Taleb A në përputhje me ligjin për privatësi në Gjermani – ngarkohet me pesë akuza për vrasje, disa akuza për tentim vrasje dhe disa akuza për shkaktimin e lëndimeve të rënda trupore, tha policia.

Ai u paraqit para gjykatësit të shtunën në mbrëmje, i cili urdhëroi që ai të dërgohet në paraburgim në pritje të gjyqit.

Sipas autoriteteve, i dyshuari i përdori korsitë e lira të emergjencës për ta ngarë veturën me shpejtësi të lartë nëpër tregun e Krishtlindjes të premten, ku i shkeli njerëzit që ishin mbledhur për të festuar.

Katër gra të moshës 45, 52, 67 dhe 75-vjeçare, si dhe një djalë nëntëvjeçar, u vranë në sulm.

Sulmi shkaktoi tronditje dhe dhimbje jo vetëm në Gjermani, por në të gjithë botën.

Hetuesit thonë se i dyshuari veproi i vetëm, pasi tani për tani nuk ka asnjë tregues se ka pasur ndonjë të përfshirë tjetër, sipas gjetjeve të tyre.

Magdeburg është qytet me rreth 237.000 banorë në landin e Saksoni-Anhalut, rreth 150 kilometra në perëndim të Berlinit.

Taleb A është mjek 50-vjeçar nga Arabia Saudite, i njohur si aktivist kritik ndaj Islamit.

Ai ka bërë akuza të çuditshme në rrjetet sociale dhe në intervista, duke pretenduar se autoritetet gjermane nuk po bëjnë mjaftueshëm për të luftuar islamizmin.

Dikur mbrojtës i grave saudite që largoheshin nga vendi i tyre, më vonë ai këshillonte njerëzit të mos kërkonin azil në Gjermani, duke shkruar në faqen e tij të internetit në anglisht dhe arabisht: “Këshilla ime: mos kërkoni azil në Gjermani”.

Nuk është ende e qartë çfarë e shtyu atë ta kryejë sulmin, por, pavarësisht natyrës së sulmit, nuk ka asnjë tregues që ai ishte i motivuar nga islami, tha një zyrtar i lartë ligjor.

Shefi i Zyrës Federale të Policisë Kriminale (BKA), Holger Munch, tha për transmetuesin publik gjerman ZDF të shtunën se nuk është e mundur të thuhet përfundimisht se akti ishte i motivuar politikisht, megjithëse ai e pranoi se i dyshuari mbante qëndrime kundër islamit dhe merrte pjesë në platforma të ekstremit të djathtë.

Kryeprokurori publik në Magdeburg, Horst Ëalter Nopens, tha se motivi mund të kishte të bënte me pakënaqësitë e tij për mënyrën se si trajtohen refugjatët nga Arabia Saudite në Gjermani.

Munch shtoi se pas marrjes së një paralajmërimi nga Arabia Saudite për këtë person në nëntor 2023, “u iniciua një rast edhe këtu. Policia në Saksoni-Anhalt kreu gjithashtu hetime përkatëse”, tha ai.

“Ai kishte kontakte të ndryshme me autoritetet, bënte fyerje dhe herë pas here kërcënime, por nuk ishte i njohur për akte dhune”, tha Munch për të dyshuarin.

Burimet e sigurisë saudite thanë se e kishin paralajmëruar Gjermaninë për sulmuesin e dyshuar dhe kishin kërkuar ekstradimin e tij, por Gjermania nuk ishte përgjigjur.

Ata thanë se i dyshuari është mysliman shiit me prejardhje nga qyteti Al-Hofuf në lindje të Arabisë Saudite.

Shiitat janë pakicë në vend, pasi përbëjnë vetëm rreth 10% të popullsisë në një komb me shumicë sunite.REL

Berat Rukiqi nga LDK-ja ka reaguar pasi Qeveria deklaroi sot ndarjen nga 100 euro për secilin fëmijë e pensionist, raporton Ekonomia Online.

Sipas tij Qeveria po e vazhdon përdorimin e parasë publike për blerje të votave.

Ai tha se ky është keqpërdorim eklatant i parasë publikë që as nuk ndihmon as nuk zhvillon.

“Asgjë e re. Qeveria në panik, vazhdon përdorimin e parasë publike, për blerje të votave. Ky është keqpërdorim eklatant i parasë publike, që as nuk ndihmon, e as nuk zhvillon. Të njejtat para, me automatizëm, do të shkojnë në faturat e shtrenjta të energjisë elektrike.”, ka shkruar ai.