Pritje të gjata janë regjistruar në hyrje të pikës kufitare te Dheu i Bardhë.
Sipas përditësimit të fundit të Qendrës Kombëtare për Menaxhim Kufitar, pritjet e mërgimtarëve për të hyrë në Kosovë në pikën kufitare te Dheu i Bardhë kanë arritur deri në dy orë.
Bëhet e ditur se kolonat e veturave atje arrijnë deri në 1.5 kilometra.
Prokuroria Speciale ka ngritur aktakuzë kundër një personi të nacionalitetit serb, nën dyshimin se ka kryer veprën penale “Krim i luftës kundër popullsisë civile”.
Në njoftim thuhet se hetimet kanë vërtetuar se gjatë periudhës kohore të luftës në Kosovë gjatë vitit 1998-1999, i pandehuri ka kryer dhunë seksuale si krim i luftës ndaj një viktime të nacionalitetit shqiptar.
“Në mbështetje të neneve 234 par.2 dhe 303 par. 7 të KPP-së, Prokuroria Speciale i ka propozuar Gjykatës që të mbaj gjykimin në mungesë për shkak se i pandehuri G.V është i paarritshëm për organet e drejtësisë, kurse janë plotësuar kushtet ligjore nga neni 234 i KPP-së, për ngritjen e aktakuzës në mungesë. Kjo çështje penale tashmë i ka kaluar në kompetencë Departamentit Special të Gjykatës Themelore në Prishtinë për procedurë të mëtutjeshme”, shkruhet në njoftim.
Postimi i plotë:
Prishtinë, 24 dhjetor 2024 –Prokuroria Speciale e Republikës së Kosovës, ka ngritur aktakuzë në Gjykatën Themelore në Prishtinë – Departamentin Special, kundër të pandehurit me inicialet G.V, i nacionalitetit serb, për shkak të dyshimit se ka kryer veprën penale Krim i luftës kundër popullsisë civile, e sanksionuar me nenin 142 lidhur me nenin 22 të RSFJ-së.
Hetimet kanë vërtetuar se gjatë periudhës kohore të luftës në Kosovë gjatë vitit 1998-1999, i pandehuri ka kryer dhunë seksuale si krim i luftës ndaj një viktime të nacionalitetit shqiptar.
Në mbështetje të neneve 234 par.2 dhe 303 par. 7 të KPP-së, Prokuroria Speciale i ka propozuar Gjykatës që të mbaj gjykimin në mungesë për shkak se i pandehuri G.V është i paarritshëm për organet e drejtësisë, kurse janë plotësuar kushtet ligjore nga neni 234 i KPP-së, për ngritjen e aktakuzës në mungesë.
Kjo çështje penale tashmë i ka kaluar në kompetencë Departamentit Special të Gjykatës Themelore në Prishtinë për procedurë të mëtutjeshme.
Lista Serbe është ankuar në Panelin Zgjedhor për Ankesa dhe Parashtresa (PZAP) pasi Komisioni Qendror i Zgjedhjeve nuk e certifikoi për pjesëmarrje në zgjedhjet e 9 shkurtit.
Nga PZAP kanë konfirmuar se kanë ka pranuar ankesën dhe do të vendosë brenda 48 orëve, sipas afatit ligjor.
“Ju njoftojmë se kemi pranuar një ankesë nga subjekti politik Lista Serbe dhe PZAP brenda afatit ligjor do të vendosë”, kanë thënë nga PZAP për RTV21.
Ndërkaq, nga Lista Serbe, sot në një konferencë për media kanë konfirmuar se do të paraqesin ankesë, duke e cilësuar këtë vendim si të kundërligjshëm.
“Besojmë se kjo është bërë me urdhër të Albin Kurtit për të penguar pjesëmarrjen e serbëve në zgjedhje. Ky vendim nuk ka bazë ligjore dhe është dëshmi se sa shumë dëshiron Kurti të eliminojë serbët nga këto treva. Kurti nuk dëshiron të shohë anëtarë të Listës Serbe në Kuvend, por dëshiron të shohë në të serbë të bindur si Nenad Rashiq”, ka thënë në konferencën për media Zlatan Elek, kryetar i Listës Serbe.
Presidentja e vendit, Vjosa Osmani ka uruar të gjithë besimtarët e krishterë, duke thënë se festa e Krishtlindjes është një mundësi reflektimi për shpresën, bujarinë dhe bashkimin – një periudhë kur na kujtohet fuqia e dashurisë dhe shpresës.
Osmani ka thënë edhe se, Krishtlindja na kujton se shpresa duhet të triumfojë përballë sfidave.
Urimi i Presidentes Osmani për Krishtlindje:
Festa e Krishtlindjes është një mundësi reflektimi për shpresën, bujarinë dhe bashkimin – një periudhë kur na kujtohet fuqia e dashurisë dhe shpresës.
Në këtë ditë ne çmojmë posaçërisht lidhjet dhe traditat që na bashkojnë.
Krishtlindja është frymëzim që na kujton të gjithëve se përballë sfidave, duhet të triumfojë shpresa.
Uroj të gjithë besimtarët e krishterë për Krishtlindje me shumë dashuri, gëzim dhe paqe! Le të na frymëzojë kjo festë për një të ardhme me shpresë të pakufishme!
Gëzuar për shumë mot Krishtlindjen!
Ditën e sotme është ngritur alarmi në Kullën Eiffel, për shkak të zjarrit të shkaktuar në një nga ashensorët.
Zjarri u vu shpejt nën kontroll dhe u shua, por pati shumë panik pasi 1200 persona brenda atraksionit turistik u detyruan të evakuoheshin.
Sipas informacioneve fillestare, zjarri ka rënë në një bosht ashensori mes katit të parë dhe të dytë.
Në fakt, vlerësimet e para të zjarrfikësve tregojnë se zjarri ka nisur kur një pajisje pranë një kablloje ashensori është mbinxehur.
Autoritetet franceze vendosën me shpejtësi shërbimet e urgjencës për të menaxhuar situatën.
Kulla Eifel, një nga destinacionet turistike më të njohura në botë, zakonisht tërheq 15,000 deri në 25,000 vizitorë çdo ditë, siç vërehet nga databaza e statistikave RoadGenius.
Ndërsa hetimet vazhdojnë, priten të dhëna të reja për shkakun dhe shtrirjen e zjarrit.
Ish-kryetari i Organizatës së Veteranëve të Luftës së Ushtrisë Çlirimtare të Kosovës, Hysni Gucati, ka njoftuar se e ka përfunduar dënimin prej 4 vite e 3 muaj.
Këtë e ka bërë të ditur vetë Gucati përmes një postimi në Facebook, ku ka shkruar se për këtë është njoftuar nga Gjykata Speciale.
Mes tjerash, ai ka thënë se ky vendim ishte i padrejtë dhe lirinë nuk e gëzon të plotë pa shokët.
“Gjatë qëndrimit në Hagë së bashku më shokët dhe bashkëluftëtaret i qëndruam pranë njëri tjetrit dhe secili nga ne treguam zotësi të vërtetë dhe qëndruam ballë lartë dhe krenar për veprat tona, asnjëherë nuk u dorëzuam, por liria ime nuk mund të jetë liri e plotë pa shokët, duke filluar nga Baca Jakup, Hashimi, Kadriu, Rexha, Cali e Pjetri, të cilët janë të pafajshëm dhe i duhen më shumë se kurrë Kosovës sot”, ka shkruar ai.
Postimi i plotë:
Sot u njoftova nga Gjykata Speciale përmes avokatëve që kam përfunduar dënimin prej 4 vite e 3 muaj, dënim që ishte ulur nga 4 vite e 6 muaj, i tërë vendim ishte i padrejtë.
Gjatë këtyre 4 viteve nuk mund të isha pranë familjes dhe atdheut tonë të dashur Kosovës, gjatë qëndrimit në Hagë në Kosovë dhe në familje ndodhën një mori ngjarjes, ajo që me goditi më së shumti ishte vdekja e babes i cili ndërroi jetë sa isha në Hagë.
Gjatë qëndrimit në Hagë së bashku më shokët dhe bashkëluftëtaret i qëndruam pranë njëri tjetrit dhe secili nga ne treguam zotësi të vërtetë dhe qëndruam ballë lartë dhe krenar për veprat tona, asnjëherë nuk u dorëzuam, por liria ime nuk mund të jetë liri e plotë pa shokët, duke filluar nga Baca Jakup, Hashimi, Kadriu, Rexha Cali e Pjetri, të cilët janë të pafajshëm dhe i duhen më shumë se kurrë Kosovës sot.
Faleminderit gjithë atyre që më qëndruan pranë mua dhe familjes time gjatë kësaj periudhe.
Çdo herë do jem në mbrojtje të vlerave të luftës dhe të Kosovës.
Kryeministri i Kosovës edhe njëherë ka refuzuar t’i përgjigjet pyetjeve rreth Prokurorisë Speciale të Kosovës.
Kurti sot sërish është pyetur nga gazetarët nëse do t’i përgjigjet ftesës së re për t’u intervistuar, por ka shmangur përgjigjen.
“Në Dragash e në Malishevë duhet të shkoj”, ishte përgjigja e shkurtër e tij kur dëgjoi pyetjen.
Prokuroria Speciale ka përcjellë një ftesë të dytë në adresë të kryeministrit Kurti për intervistim në cilësinë e dëshmitarit, për çështjen e rezervave shtetërore.
Zëdhënësi i Qeverisë, Përparim Kryeziu bëri të ditur se Kurti ka shprehur gatishmëri që prokurorët ta intervistojnë në zyrën e tij, për çka edhe ka propozuar tri orare.
Ipeshkvi Imzot Dodë Gjergji ka uruar Krishtlindjes, duke thënë bërë thirrje që të bëhen lutje për paqe, gëzim e forcë.
Ai gjithashtu u shpreh se janë Kërshëndellat e 25-ta që po i festojmë në liri dhe tha se sivjet, sikur asnjëherë tjetër, nëpër gjitha sheshet e qyteteve dhe oborret e famullive, besimtarët dhe bashkëqytetarët tanë janë duke festuar, “po gëzojnë e po kënaqën me njëri -tjetrin”.
“Por, nuk duhet harruar që ne të pagëzuarit, kremtojmë Mishërimin e Fjalës, ardhjen e Zotit në historinë e botës dhe në jetën e njerëzve, sikurse e dëshmon Shën Gjoni në ungjillin e tij: “Fjala u bë njeri e banoi ndër ne. Ne e pamë lavdinë e tij, atë lavdi që prej Atit i përket Birit të vetëm plot hir e të vërtetë.” (Gjn 1, 14). Në të kaluarën kemi përjetuar lloj-lloj vuajtjesh, padrejtësish e mohimesh, si nga të huajit ashtu edhe nga tanët. Megjithatë, ne qëndruam të fortë e të pathyeshëm duke kënduar: “Lavdi Zotit në më të lartin qiell e paqe mbi tokë njerëzve që i ka për zemër!” (Lk 2, 14). Me shpirtin e kësaj kënge të mbushur me gëzim, kemi shprehur besimin tonë në Zotin dhe kemi përjetuar shfaqjen e dashurisë së Hyjit në ne”.
“Fjala e Mishëruar-Krishti, është shpresa jonë që na mban të fort e të lumtur gjatë përballimit të vështirësive të botës, na forcon në vuajtjet tona dhe iu jep kuptim sakrificave që bëjmë përditë, kurse Shpirti i Tij i shenjtë na mëson të duam, të besojmë dhe shpresojmë. Ai është frymëzimi ynë që na bën t’i mbetemi besnikë Fjalës. Forca jonë që na bën të qëndrueshëm në fe dhe gëzimi i shpresës që na mëson të shpresojmë në amshim”.
“Me Krishtin, Hyji ka kryer projektin e tij për shpëtimin tonë, përvujtënisht ka manifestuar dashurinë e tij në ne, dhe ka shfaq mbi ne mëshirën e vet. Nëpër Krishtin e ka shpall Ungjillin, Lajmin e Mirë të shpëtimit; na ka ftuar në kthim dhe pajtim me Hyjin Atë dhe ata që kanë pranuar Atësinë e Tij, i ka bërë bijë për amshim. Në Krishtin e ka manifestuar gjithë madhështinë dhe lavdinë e Tij, duke e ngjallur nga të vdekurit. Me ngjalljen e tij të gjithë ne jemi bërë pjesë e Lavdisë Hyjnore. Prandaj, ndonëse akoma shtegtojmë mbi tokë, të jetojmë hyjnisht duke i kultivuar dhe përdorur frytet e shpirtit, që janë: “dashuria, hareja, paqja, duresa, dashamirësia, mirësia, besnikëria, butësia, përkormëria.” (Gal 5,22-23)”, thuhet në mesazhin e tij.
Ai tha gjithashtu se ushtrimi i fesë me dhe brenda bashkësisë së të pagëzuarve nëpërmjet siç u shpreh ai, “uratës, shërbesës së sakramenteve dhe shërbimit me dashuri, na mundëson të jetojmë realitetin e sotëm”.
“Ne të pagëzuarit besojmë, dëshmojmë dhe shpallim Krishtin shpëtimtar, pasi jemi “…trupi i Krishtit dhe secili prej nesh gjymtyrë e Tij” (1 Kor 12,27) . Duam të jemi burim paqeje dhe gurrë dashurie për të gjithë, sikur lutej Shën Françesku, e pastaj edhe Shën Nënë Tereza: “O Zot më bëjë vegël të paqes sate, ashtu që ku ka urrejtje të sjell dashuri, ku ka fyerje, të sjell falje; ku ka përçarje, të sjell unitet; ku ka dyshim, të sjell besim, ku ka dëshpërim, të sjell shpresë; ku ka errësirë, të sjell dritë; ku ka trishtim, të sjell gëzim.”
“Në këtë lutje përmblidhet tërë feja dhe misioni i të pagëzuarave, këndej dëshirojmë ta duam çdo njeri e çdo krijesë me zemrën e Krishtit, mu ashtu siç Ai na deshi ne (Khs. Gjon 15,12). Por, e gjithë kjo nuk mund të kuptohet pa fe. Pasi, s’ka shkencë që mund t’i vërtetojë, nuk kultivohen me asnjë lloj ndërhyrje gjenetike, nuk mund t’i njohë e as t’i lexojë algoritmi më i përkryer i inteligjencës artificiale. Pastaj, ato nuk mund të blihen me pasuri materiale, të ruhen me rite religjioze, ose të mbrohen me mjete juridike. Këto dhunti mund t’i ketë, t’i ndjejë, t’i sheh e t’i njeh vetëm një zemër e shëruar me mëshirë, një mendje e ndriçuar me fe dhe një njeri i shpëtuar prej Zotit dashuri”.
“Ushtrimi i fesë me dhe brenda bashkësisë së të pagëzuarve nëpërmjet uratës, shërbesës së sakramenteve dhe shërbimit me dashuri, na mundëson të jetojmë realitetin e sotëm, duke e bâ të tashme t’kaluemen e të qyshtashme atë që shpresojmë. Kjo do të thotë se në ne shprehet, përjetohet dhe shpresohet dashuria e Zotit, njëkohësisht dhe vazhdimisht. Kështu na mundësohet të shohim rrugën që përshkuan të parët tanë, të ndriçojmë shtigjet nga duhet të kalojmë, duke krijuar njëkohësisht shtegun e udhëtimit për gjeneratat e reja. Për këtë arsye, “përqendroni të gjitha forcat tuaja që t’ia shtoni fesë virtytin, virtytit dijen, dijes përkormërinë, përkormërisë qëndresën, qëndresës përshpirtërinë, përshpirtërisë dashurinë vëllazërore, dashurisë vëllazërore dashurinë që përfshin gjithkënd.” (2 Pjt 1, 5-7)”.
“Vëllezër dhe motra, si gjithmonë, as në këto Krishtlindje, nuk do të mungojnë lutjet e mija për ju. Njëkohësisht ftoj që gjithë së bashku t’i lutemi Zotit të na mbush me paqe, gëzim dhe forcë, që si pasues të Krishtit, ta mbushim misionin tonë dhe të shpallim dashurinë e Tij në çdo kohë e në çdo vend. Qofshin të gjitha lutjet dhe veprat tona të mbushura me hirin e Hyjit dhe udhëzimin e Shpirtit Shenjt. Gëzuar Krishtlindjet. Zoti ju bekoftë të gjithëve”, thuhet tutje në mesazhin e Ipeshkvi Gjergjit.
Përfaqësimi i grave në menaxhmentin e lartë në ndërmarrjet publike mbetet relativisht i ulët.
Ndonëse gjatë vitit 2023 dallohet një zhvillim pozitiv, përqindja e grave që mbajnë pozita të tilla në këto 16 ndërmarrje publike është rritur nga 21 në 26 për qind.
Kurse, në administratë, 31 për qind e të punësuarve në këto ndërmarrje publike janë gra, ndërsa 69 për qind burra.
Këto të dhëna u publikuan të martën nga Instituti GAP, Grupi për Studime Juridike dhe Politike (GLPS) dhe Instituti për Politika Zhvillimore (INDEP).
Një dallim më i madh mbetet te të punësuarit në terren ose prodhim te këto ndërmarrje, ku 96 për qind e të punësuarve janë burra, ndërsa vetëm 4 për qind gra.
Në periudhën 2021-2023, vërehet një rënie në numrin e përgjithshëm të të punësuarve në këto ndërmarrje publike, ku në vitin 2023 ka rreth 8.8% më pak punonjës se në vitin 2021.
Telekomi i Kosovës ka rreth 488 punëtorë më pak (-21.2%), “Trepça” 290 (-19.6%), KEK-u 146 (-3.9%) etj. Faktorët që kanë ndikuar në uljen e numrit të punëtorëve janë mosha e shtyrë, pakot e daljes vullnetare nga puna të adoptuara nga disa ndërmarrje, si dhe riorganizimi ose sistematizimi i vendeve të punës. Për nga aspekti i rritjes së numrit të punëtorëve, vetëm KRU Prishtina ka një rritje më përmbajtësore (+11.9%), me 65 punëtorë më shumë në vitin 2023 se në 2022.
Anisa Zogaj nga Instituti GAP, ka thënë se ky raport analizon të dhënat e punësimit dhe përfaqësimit të grave në 16 ndërmarrje publike qendrore, në pozita drejtuese dhe të larta në këto ndërmarrje, si dhe në administratë dhe terren.“Ndër vite, shumë nga ndërmarrjet publike nuk kanë zbatuar Ligjin për barazinë gjinore, i cili është i integruar edhe në Ligjin për ndërmarrjet publike, që obligon përfaqësim të barabartë të burrave dhe grave në pozitat e larta udhëheqëse. Shkalla e punësimit të grave nëpër ndërmarrje publike është jo-proporcionale me atë të burrave, si në nivelin drejtues, po ashtu edhe ne punën në administratë dhe punën në terren. Raporti analizon të dhënat e punësimit dhe përfaqësimit të grave në gjithsej 16 ndërmarrje publike qendrore, në pozita drejtuese dhe të larta në këto ndërmarrje, si dhe në administratë dhe ne terren”, deklaroi Zogaj.
“Viteve të fundit, vërehet një trend më pozitiv veçmas në përfaqësimin e grave në bordet e ndërmarrjeve, por edhe pozitat e larta menaxheriale. Konkretisht, në dhjetor të vitit 2024, në 14 nga 16 ndërmarrjet e analizuara, mbi 40% e anëtarëve të bordeve janë gra, ku në rastin e Telekomit (80%), KRU ‘Mitrovicës’ (60%), Postës së Kosovës (50%) dhe KRU ‘Radoniqit’ (50%) kjo shifër arrin në 50% ose më lart”, ka thënë ajo.
Besart Zhuja, nga Instituti GAP, ka thënë se raport statistikor ka pasur fokus aspektin e bilancit gjinorë nëpër ndërmarrjet publike, duke shtuar se subjekt i këtij raporti janë ndërmarrjet publike qendrore dhe rajonale të ujit.
Zhuja ka thënë se nga të dhënave e paraqitura në këtë raport, nga viti 2021 deri në vitin 2023, nga gjithë të punësuarit nëpër ndërmarrjet publike, mesatarisht për këto vite 11% të punëtorëve janë gra, kurse 89% burra, gjë që sipas tij tregon një hendek të theksuar gjinor.
“Si trend i përgjithshëm i punësimit, nëpër ndërmarrjet e analizuara, kemi një ulje të numrit të përgjithshëm të të punësuarve nëpër ndërmarrjet publike në një mesatare prej 6.2% ose 994 veta më pak të punësuar. Këtu prijnë ndërmarrjet si Telekomi me 488 më pak punëtorë në vitin 2023 sesa në vitin 2021, pasuar nga ‘Trepça’, KEK-u dhe ‘Ibër Lepenci’. Në këtë ulje kanë ndikuar një seri e faktorëve siç janë pensionimi i parakohshëm dhe riorganizimet e fuqisë punëtore. Pra, ky trend i rënies së numrit të punëtorëve është i dukshëm tek 10 nga 16 ndërmarrjet e analizuara”.
“Sidoqoftë, një trend që shkon në anën e kundërt, pra të rritjes së numrit të punëtorëve vërehet kryesisht te Kompanitë Rajonale të Ujërave: e këtu përfshihen: KRU ‘Prishtina’ me rritjen më të madhe me 65 punëtorë më shumë nga viti 2021 në vitin 2023, pasuar nga Hidroregjioni Jugor dhe ‘Bifurkacioni’. Për nga aspekti i përgjithshëm i punësimit gjinorë, pra, nga gjithë të punësuarit nëpër NP, mesatarisht për këto vite 11% të punëtorëve janë gra, kurse 89% burra. Që tregon një hendek të thellë të përfaqësimi në ndërmarrjet publike”, ka thënë ai.
Ai ka thënë se hendeku gjinor ka edhe në punësimin në punët e terrenit, si dhe administratë.
“Si përqindje e të punësuarve në punët e terrenit, gratë përbëjnë vetëm 4% të punës në terren, derisa ka dominim absolut të burrave me 96%. Kur flasim për punësimin në Administratë, po ashtu ekziston hendeku mes burrave dhe grave, kemi një mesatare, 69% të të punësuarve janë burra, kurse 31% gra. Edhe këtu, sikurse tek rasti i punësimit të përgjithshëm, vërejmë se ka një rritje për 1% të grave, derisa ka një ulje prej 1% të burrave që janë të punësuar në Administratë”.
“Menaxhmeti, kur flasim për menaxhmentin, flasim për katër pozitat e lartë në ndërmarrje të përcaktuara në ligj. Aktualisht, hendeku mes burrave dhe grave për kryeshef ekzekutiv vërehet qartë, i kemi vetëm dy nga 16 ndërmarrjet e prezantuara udhëhiqen nga gratë, derisa 14 ndërmarrje si kryeshefa janë burra. Derisa në KEK, ‘Ibër Lepenc’, ‘Drinin e Bardhë’ dhe Hidroregjionin Jugor nuk ka asnjë grua në pozitat e larta”, ka thënë ai.
Komandanti i KFOR-it, gjeneralmajor Enrico Barduani, u takua me zëvendëskryeministrin dhe ministrin e Punëve të Jashtme të Republikës së Italisë, Antonio Tajani, në ‘Camp Film City’, në Prishtinë.
Gjeneral Barduani informoi ministrin Tajani mbi aktivitetet e vazhdueshme dhe situatën e sigurisë, duke theksuar kontributin e rëndësishëm të Italisë në KFOR, që përbën 20% të forcës totale, duke përfshirë lidershipin dhe njësitë operacionale.
Në një komunikatë për media thuhet se ministri Tajani iu drejtua Kontingjentit Italian, duke nënvizuar rolin jetik të KFOR-it në ruajtjen e stabilitetit në Ballkan, një prioritet kyç për Italinë dhe Bashkimin Evropian. Ai përfundoi duke lavdëruar personelin italian për mbajtjen e standardeve më të larta të drejtësisë, ligjshmërisë dhe respektit për dinjitetin njerëzor.