Raportohet se është liruar ish-ushtari i UÇK-së, i arrestuar në Serbi një vit më parë
Ish-ushtari i UÇK-së, Hasan Dakaj, raportohet se është liruar nga burgu në Serbi.
I njëjti ishte arrestuar bashkë me vëllain e tij, janarin e vitit të kaluar teksa po e kalonte kufirin në Merdarë.
Ata ishin nisur në drejtim të Italisë.
Të paktën 30 persona, përfshirë fëmijë, janë vrarë në Gazë nga sulmet izraelite të kryera gjatë natës dhe mëngjesin e 3 janarit, thanë zyrtarët spitalorë, raporton Radio Evropa e Lirë.
Stafi i spitalit Martirët e Al-Aksës tha se gra dhe fëmijë janë në mesin e të vrarëve në sulmet ajrore që goditën disa vende në Gazën qendrore, përfshirë në Nuseirat, Zavaida, Magazi dhe Deir al Bala. Edhe një ditë më parë kishte pasur viktima nga sulmet, duke bërë që numri i të vrarëve në 24 orë të arrijë në 56.
Ushtria izraelite nuk ka komentuar sulmet e fundit ajrore. Megjithatë, në një deklaratë të premten tha se gjatë ditës paraprake kishte sulmuar dhjetëra pika kontrolli dhe qendra të komandës të Hamasit – grupit palestinez të shpallur organizatë terroriste nga Shtetet e Bashkuara dhe Bashkimi Evropian – në mbarë Gazën, nga ku tha se Hamasi po planifikonte të kryente sulme. Ushtria izraelite tha se ka ndërmarrë masa për të minimizuar dëmet ndaj civilëve, duke përdorur municione precize dhe teknologji të vëzhgimit nga ajri.
Teksa lufta në Gazë po vazhdon, bisedimet për arritjen e një armëpushimi pritet të rinisin të premten.
Zyra e kryeministrit izraelit, Benjamin Netanyahu, tha se ka autorizuar një delegacion nga agjencia e inteligjencës, Mossad, nga agjencia për siguri të brendshme, Shin Bet dhe ushtria për të vazhduar negociatat në Katar.
Bisedimet, që udhëhiqen nga SHBA-ja, vazhdimisht kanë ngecur gjatë 15 muajve luftë, që u nxit pasi Hamasi sulmoi Izraelin më 7 tetor 2023. Hamasi vrau afër 1.200 persona, shumica civilë, dhe rrëmbeu afër 250 të tjerë. Afër 100 pengje ende janë brenda Gazës dhe të paktën një e treta e tyre besohet se kanë vdekur.
Ofensiva hakmarrëse e Izraelit ka lënë të vrarë më shumë se 45.500 palestinezë në Gazë, sipas Ministrisë së Shëndetësisë në këtë territor. Kjo ministri thotë se mbi gjysma e viktimave janë gra dhe fëmijë./REL
Polonia e ka marrë zyrtarisht kryesimin e Presidencës së e Këshillit të Bashkimit Evropian.
Ky njoftim është dhënë nga vetë faqja zyrtare e Këshillit në rrjetin social “X”.
Kryeministri polak, Donald Tusk, në fjalën e tij pas nisjes zyrtare të Presidencës, ka thënë se siguria do të jetë top prioritet përgjatë kësaj presidence.
“Kjo presidencë do të jetë novator në shumë mënyra. Fillon gjatë një kohe sfiduese të shënuar nga konflikte dhe detyra jonë do të jetë të bindim të 27 vendet anëtare të BE-së se Evropa mund të vazhdojë të jetë vendi më i sigurt dhe më i qëndrueshëm në Tokë. Siguria do të jetë prioriteti ynë kryesor gjatë gjashtë muajve të ardhshëm”, ka thënë Tusk.
Avokati Ardian Bajraktari, ka thënë se insistimi i kryeministrit Albin Kurti për t’u intervistuar nga Prokuroria Speciale si dëshmitar në Zyrën e tij, mund të krijojë precedent të keq tek qytetarët e vendit.
Sipas tij, Albin Kurti si kreu i Qeverisë duhet të jetë shembull që urdhrat e organeve të zbatimit të ligjit duhet të zbatohen.
Bajraktari ka thënë se është shqetësuese hezitimi i kryeministrit lidhur me dëshminë e tij për çështjen e rezervave shtetërore, të cilat tash e sa kohë janë nën llupën e Prokurorisë Speciale.
“Sa i përket këtij procesi, natyrisht e kam parë me shqetësim hezitimin e kryeministrit të vendit për faktin se për dallim prej herës së parë kur për shkak të pamundësisë objektive, përgjegjësisht u mirëkuptua. Kërkesa e tij pastaj për t’u intervistuar në zyrën e tij natyrisht që në bindjen vë në pozitë të pabarabartë qytetarët e vendit, prandaj vlerësoj që sistemi prokurorial i ka tri alternativa: Të dëshmojë që në raport me ligjin janë apo jo të gjithë qytetarët e barabartë apo ka disa të tillë të cilët janë më të barabartë se sa të tjerët që nënkupton që t’i përgjigjet ftesës së kryeministrit”, ka thënë Bajraktari, teksa tregon edhe për mundësitë tjera. Shqiptimi i gjobës dhe autorizimi i Policisë për ta intervistuar Kurtin, janë disa nga alternativat tjera që i përmend Bajraktari.
“Alternativa e dytë në bindjen time është që kryeministri të reflektojë, nëse jo natyrisht që prokuroria të veprojë konform dispozitave ligjore që në rast të mos-përgjigjes pozitivisht të ftesës dhe të mos-arsyetimit të saj, të veprojë sipas dispozitave, fillimisht të shqiptojë gjobë deri në 250 euro e në rast se kjo bëhet e vazhdueshme atëherë mund të jetë edhe subjekt i ndëshkimit me burgim jo me tepër se 1 muaj apo të shkohet në alternativën e tretë që në bindjen time po ashtu është e ligjshme ku sipas nenit 118 të Kodit të Procedurës Penale, Prokuroria mund ta autorizojë Policinë të ndërmarrë një nga veprimet hetimore dhe duke qenë se kjo gjë është e ligjshme, atëherë le të shikohet si alternativë që Policia e Kosovës nën udhëzimet e Prokurorisë së Shtetit ta kryejë këtë veprim procedural”, u shpreh Bajraktari.
Por a ka bazë ligjore që Kurti të intervistohet në Zyrën e tij, Bajraktari e sheh të pamundur. Kjo sipas tij mund të bëhet vetëm në rrethanat kur qytetarët nuk mund të intervistohen për shkaqe shëndetësore.
“Këtë mundësi e përcakton si rrethanë përjashtuese në rrethanat kur ata për shkaqe shëndetësore e të ngjashme nuk mund t’i përgjigjen, ata mund të intervistohen (në shtëpi), ndërsa në bindjen time kjo nuk ka mbulesë ligjore, prandaj është nën përgjegjësinë e Prokurorisë së Shtetit të dëshmojë që në rast se janë ose jo të gjithë qytetarët e vendit të barabartë para ligjit”, u shpreh tutje Bajraktari.
Ai ka thënë se shefi i ekzekutivit duhet të përçojë mesazh se organet e zbatimit të ligjit duhet të zbatohen dhe jo të krijojë precedent “të rrezikshëm”.
“Pikërisht kjo është një gjë që kryeministri i vendit duhet me pas parasysh, duhet me reflektua si kreu i Qeverisë në raport me përgjegjësinë që ka jo vetëm si qytetar i vendit, mirëpo edhe si kreu i ekzekutivit dhe të përçojë një mesazh që organet e zbatimit të ligjit dhe urdhrat dhe veprimet e tyre të ligjshme duhet të zbatohen, prandaj duhet t’i përgjigjet pozitivisht ftesës dhe të shkojë për të dhënë dëshminë e tij. E kam thënë disa herë, dëshmia nuk duhet të paragjykohet për faktin se është detyrë dhe përgjegjësi e prokurorit të çështjes që me u sigurua që krahas provave fajësuese, të përkujdeset edhe për sigurimin edhe atyre shfajësuese, prandaj vlerësoj që politizimi i kësaj çështje është i panevojshëm dhe në rrjedhë të kësaj kryeministri duhet të dëshmojë që është i përgjegjshëm në raport me ftesën e Prokurorisë”, ka deklaruar Bajraktari.
Remitancat e huaja në Kosovë arritën në 1,224 miliardë euro në periudhën janar-nëntor, nga 1,208 miliardë euro në të njëjtën periudhë të vitit të kaluar, tha banka qendrore, duke cituar të dhënat preliminare.
Vetëm në muajin nëntor, remitancat e huaja në Kosovë u rritën me 2.3% krahasuar me një vit më parë, tha Banka Qendrore e Kosovës në një publikim të të dhënave.
101.3 milionë euro është shuma e mjeteve të dërguara në muajin nëntor të vitit 2024.
Krahasuar me muajin tetor, remitancat nga jashtë ranë me 9.6% në muajin nëntor.
Në vitin 2023, remitancat e huaja në Kosovë u rritën 10% krahasuar me vitin paraprak.
Komisioni Qendror i Zgjedhjeve njofton se ka filluar periudha e aplikimit për akreditimin e vëzhguesve për vëzhgimin e Zgjedhjeve për Kuvendin e Kosovës, të cilat do të mbahen më 9 shkurt 2025.
Për të lehtësuar aplikimin, KQZ ka funksionalizuar platformën online: https://vezhgo.kqz-ks.org
Subjektet politike të certifikuara, OJQ-të, organizatat qeveritare dhe ndërqeveritare, organizatat ndërkombëtare të specializuara të cilat merren me zgjedhjet dhe mbrojtjen e të drejtave të njeriut, mediat si dhe përfaqësuesit e vendeve të huaja, mund të dorëzojnë online kërkesën e tyre për akreditimin e vëzhguesve brenda afateve, si në vijim:
Afati për dorëzimin e kërkesës për akreditimin e vëzhguesve të subjekteve politike të certifikuara do të përfundojë më 15 janar 2025;
Afati për dorëzimin e kërkesës për akreditimin e vëzhguesve të OJQ-ve vendore do të përfundojë më 25 janar 2025;
Afati për dorëzimin e kërkesave për akreditimin e vëzhguesve të organizatave qeveritare – ndërqeveritare do të përfundojë më 25 janar 2025;
Afati për dorëzimin e kërkesës për akreditimin e mediave vendore dhe ndërkombëtare do të përfundojë më 4 shkurt 2025;
Afati për dorëzimin e kërkesës për akreditimin e vëzhguesve të përfaqësive të vendeve të huaja do të përfundojë më 25 janar 2025;
Afati për dorëzimin e kërkesës për akreditimin e vëzhguesve të organizatave ndërkombëtare do të përfundojë më 25 janar 2025.
Si do të bëhet aplikimi?
Të gjitha subjektet politike të certifikuara për pjesëmarrje në zgjedhje, KQZ, përmes Zyrës për Regjistrim, Certifikim dhe Kontrollin Financiar të Subjekteve Politike (ZRCKFSP) iu ka krijuar dhe dërguar ‘Userët’, përmes të cilëve mund të qasen në platformë dhe të ngarkojnë aplikimin për akreditimin e vëzhguesve.
Gjithashtu, KQZ, përmes Zyrës do të krijojë ‘Userët’ edhe për OJQ-të, organizatat qeveritare dhe ndërqeveritare, organizatat ndërkombëtare të specializuara të cilat merren me zgjedhjet dhe mbrojtjen e të drejtave të njeriut, mediat si dhe përfaqësuesit e vendeve të huaja.
Kërkesën për ‘User’ duhet ta paraqitni në e-mail adresën [email protected] dhe duhet të përmbajë këto të dhëna:
• Emri i organizatës / medias;
• Emrin dhe mbiemrin e përfaqësuesit të autorizuar;
• E-mail adresën e përfaqësuesit të autorizuar;
•Numri kontaktues i përfaqësuesit të autorizuar. Për më shumë informacione, mund të kontaktoni në këtë numër +383 38 200 81 010, i qasshëm nga ora 08:00 deri në orën 16:00.
Vetëm vëzhguesit e akredituar nga Komisioni Qendror i Zgjedhjeve mund t’i vëzhgojnë Zgjedhjet për Kuvendin e Republikës së Kosovës, të cilat do të mbahen më 9 shkurt 2025 dhe aktivitetet tjera që do të zhvillohen në 38 Qendrat Komunale të Numërimit (QKN) dhe Qendrën e Numërimit dhe Rezultateve (QNR).
Policia e Kosovës ka publikuar statistikat e përgjithshme për 24 orët e fundit, të cilat tregojnë një numër të lartë shkeljesh në komunikacion dhe raste të tjera të evidentuara.
Sipas raportit, fatmirësisht nuk është shënuar asnjë aksident me fatalitet, por janë regjistruar 31 aksidente me të lënduar dhe 67 aksidente me dëme materiale.
Gjithashtu, janë shqiptuar 1,373 gjoba trafiku, ndërsa policia ka arrestuar 17 persona, ka vendosur në mbajtje 15 të tjerë dhe kanë ndaluar në mënyrë policore 2 persona.
Po ashtu, 3 persona janë dërguar në vuajtje të dënimit.
Policia apelon për kujdes të shtuar në trafik dhe respektim të rregullave për të shmangur aksidentet dhe për të garantuar sigurinë publike.
Gjykata e Apelit të Posaçëm vendosi detyrim paraqitje dy herë në muaj për kryedemokratin Sali Berisha.
Seanca për shqyrtimin e kërkesës së SPAK për rikthimin e Berishës në arrest shtëpie, u drejtua nga gjyqtari i posaçëm, Engert Pëllumbi, ndërsa i pranishëm ishte dhe avokati i ish-kryeministrit, Genc Gjokutaj.
Gjatë seancës që zgjati një orë e gjysmë, avokatët e Berishës kërkuan lënien në fuqi të heqjes së masës qe kishte vendosur Shkalla e Parë. Nga ana tjetër, SPAK kërkoi rrëzimin e kësaj kërkese. Në fund, gjyqtari vendosi për masën ‘detyrim paraqitjeTre javë më parë, SPAK apeloi në Apelin e Posaçëm lirimin e ish-kryeministrit Sali Berisha nga arresti shtëpiak dhe kërkoi rikthimin e masës. Berisha u lirua në 27 nëntor 2023 pas qëndrimit për rreth 1 vit në arrest shtëpiak, pasi akuzohej si i përfshirë në dosjen “Partizani”.
Sali Berisha u mor i pandehur për korrupsion pasiv pasi akuzohet nga SPAK se ka ndërmarrë veprime konkrete në miratim ligjesh dhe aktesh nënligjore, për t’i përshtatur sipas nevojave të pesë familjeve pronare në kompleksin sportiv Partizani, ku përfitues ishte edhe dhëndri i tij, Jamarbër Malltezi.
Jamarbër Malltezi akuzohet për korrupsioni pasiv, kryer në bashkëpunim me Sali Berishën pasi në marrëveshje me këtë të fundit, duke shfrytëzuar pushtetin, privatizuan kompleksin Partizani, që i solli familjes miliona euro përfitime. Malltezi akuzohet dhe për pastrim parash nga Prokuroria e Posaçme.
Për privatizimin e ish-kompleksit sportiv “Partizani” akuzohet edhe biznesmeni Fatmir Bektashi për korrupsion aktiv, Xhimi Begeja, trashëgimtar i tokës dhe bashkëpronar i “Homeplan” për pastrim parash, ndërsa Andia Pustina, financierja që kreu operacionet financiare e ligjore të “Homeplan”, akuzohet për pastrim parash./TCH
Dy 41-vjeçarë shqiptarë janë arratisur nga Burgu i Kassavetias në Greqi, raportojnë mediat shqiptare.
Arratisja e tyre është zbuluar rreth orës 21:00 të mbrëmjes së djeshme nga gardianët e burgut.
Bëhet fjalë për personazhe të dënuar me 20 vjet heqje lirie për vepra të rënda si vrasje, grabitje dhe shkatërrim prone me zjarr.
Ata ndodheshin në burgun e Kassavetias prej vitit 2019 dhe mbaheshin në një zonë të parrethuar për shkak të sjelljes së mirë.
Siç raportohet, ata rezultojnë të kenë marrë 5 leje gjatë vitit 2024 dhe mesa duket kanë përfituar nga kthimi i tyre nga leja disa ditë më parë, për të planifikuar arratisjen.
Tash kur pritet të hyjë në fazën e tretë, dhe të fundit, të procesit të tranzicionit, Forca e Sigurisë së Kosovës synon që të bëhet me pajisje ajrore.
Ministri i Mbrojtjes, Ejup Maqedonci, ka thënë se janë duke gjeneruar opsione për furnizimin me helikopterë.
Sipas tij, në ditët në vijim do të kenë një informacion të qartë se ku është orientimi për helikpoterët.
“Jemi duke gjeneruar opsione për furnizim me helikopterë dhe besoj që në ditët në vijim do të kemi një informacion më të qartë se ku është orientimi ynë për helikopterët dhe qytetarët normalisht do të jenë të informuar për orientimin tonë dhe për qasjen tonë në raport me helikoptetët dhe gjithmonë synimi ynë është që para përmbylljes së fazës së tretë të tranzicionit, para vitit 2028, të paktën të kemi një pjesë të këtyre aseteve në FSK”, ka potencuar ai për KP.
Gjatë këtij procesi, Kosova ka blerë dronë e automjete të ndryshme ushtarake.
Shteti i Kosovës është fokusuar në investime për sisteme moderne të armatimit, në mesin e tyre edhe blerjen e anti-tankeve “Javelin”.