Category: Lajme

Emisari special i SHBA-së për Misione të Posaçme, Richard Grenell ka folur për herë të parë për Kosovën pas inaugurimit të Donald Trump si president i ri në Shtëpinë e Bardhë.

Ai një postim në X ka folur mbi një koment të kryeparlamentarit Glauk Konjufca për mediat për tashmë ish-administratën Joe Biden dhe Barack Obama.

“Ata shpenzuan katër vjet duke komplimentuar Joe Biden dhe duke marrë pjesë në konventa dhe festa të tyre. Pse nuk u ankuan më parë?”, ka shkruar Grenell.

“Administrata e presidentit Biden, ma merr mendja, që kjo rrjedh prej administratës së presidentit Obama, këto në relacion me Kosovën, këta dy presidentë të shumë respektuar të Amerikës, prej vitit 2011, e kanë pasur një qasje ndaj Kosovës, e cila me thënë të drejtën, Kosovën e ka vendosur në situatë të disfavorshme ndaj Serbisë, këtë jemi dëshmitarë të gjithë. Pikërisht, administrata e presidentit Obama dhe Biden, dhe neve gjatë kësaj kohe, na kanë ndodhur disa çështje që i ka shty Serbia, që shumë e kanë dëmtuar reputacionin e Kosovës”, ka thënë Konjufca.

Një delegacion nga presidenca e Kosovës po qëndron për një vizitë zyrtare në Shtetet e Bashkuara të Amerikës.

Pasi morën pjesë në inaugurimin e presidentit të 47-të Donald Trump, dy pjesëtarët e stafit Learta Hollaj dhe Rejhane Vuniqi, kanë takuar Zëvendës Ndihmëssekretarin për Ballkanin Perëndimor Alexander Kasanof.

Theksi i veçantë i takimi ishte dialogu strategjik Kosovë – ShBA, i cili u arrit me iniciativë të Presidentes, fushat që do të mbulohen nga ky dialog strategjik si dhe pritshmëritë nga ky proces, e poashtu çështje të tjera të interesit të përbashkët.

“Gjithashtu, duke qenë dita e parë e punës e administratës së re të udhëhequr nga Presidenti Trump, Presidenca konfirmoi përkushtimin e saj të plotë për thellimin e vazhdueshëm të marrëdhënieve dhe zgjerimin e bashkëpunimit, duke potencuar rëndësinë e ruajtjes dhe avancimit të sigurisë si dhe fuqizimit dhe afirmimit ndërkombëtar të Republikës së Kosovës”, thuhet në njoftim.

Ndërkaq, Alekxander Kasanof, theksoi rëndësinë e vazhdimit të procesit të dialogut Kosovë-Serbi, ndërsa nga Presidenca u ritheksua nevoja që Dialogu të përqendrohet në njohjen reciproke.

Policia e Kosovës ka realizuar sot një aksion kontrolli në një shtëpi dhe objektet e saj përcjellëse në rrugën “Kollashini” në Mitrovicën Veriore, ku janë gjetur dhe sekuestruar disa armë dhe pajisje për kriptovaluta.

Me këtë rast janë konfiskuar një armë e gjatë, pushkë ajrore, pesë kartela grafike për prodhimin e kriptovalutave me pajisje përcjellëse, 42 minera për prodhim të kriptovalutave me pajisje përcjellëse, një shtëpizë e kompjuterit, një karikator i revoles, 14 fishekë të revoles kalibri 9 mm, një radiolidhje, një kamerë vëzhgimi, një DVR, një vulë metalike dhe një letërnjoftim.

Aparatet për prodhimin e kriptovalutave do t’i dorëzohen Doganës së Kosovës.

Në vendin e ngjarjes nuk është hasur ndonjë person i dyshuar, por është identifikuar një person dhe i cili është me interes për policinë që të intervistohet.

Në lidhje me rastin është njoftuar Prokurori i Shtetit, i cili ka urdhëruar inicimin e rastit mbajtja në pronësi, kontroll ose posedim i pa autorizuar të armëve.

Policia e Kosovës njofton se të mërkurën në dy raste të ndara ka arrestuar pesë gra dhe një burrë pasi dyshohet se ofruan shërbime seksuale me pagesë në rajonin e Prishtinës.

Sipas njoftimit të PK-së, në rastin e parë, Policia ka arrestuar dy gra pasi dyshohet se kishin marrë me qira një banesë për të kryer veprën penale “Mundësim ose detyrim në prostitucion. Ato janë dërguar në mbajtje për 48 orë.

Ndërkohë në rastin e dytë, Policia ka arrestuar tri gra dhe një burrë nën dyshimin për veprat penale “Mundësim ose detyrim në prostitucion” dhe “Ofrim i lokaleve për prostitucion”.

Të njëjtit dyshohen se në dy lokale në rajonin e Prishtinës kanë ofruar shërbime seksuale me pagesë. Janë dërguar në mbajtje për 48 orë.

Kryeministri i Kosovës, Albin Kurti, ka marrë pjesë në një diskutim në “Davos” ku ka folur për disa çështje ekonomike dhe të sigurisë.

I pyetur se pse është e rëndësishme që Kosova të hyjë në BE dhe në NATO, Kurti ka thënë e Kosova dëshiron që bashkërisht të përfitojë dhe të kontribuojë nga anëtarësimi në BE dhe në NATO.

Sipas Kurtit, Kosova më shumë gjasa ka që të futet më përpara në NATO sesa në BE.

“Besoj që BE-ja është projekti më më vlerë i paqes dhe koncepti i prosperitetit që nga lufta e dytë. Ne duam të hyjmë në BE dhe NATO, sepse duam të përfitojmë dhe të kontribuojmë. Por me shumë gjasë do të futemi më përpara në NATO. Përderisa përballemi me agresionin e Rusisë, ne duam të përshpejtojmë këtë hyrje në NATO. Jemi të gatshëm t’i bashkohemi NATO-s”, ka thënë Kurti.

Ai tutje ka shtuar se me përfshirjen e rajonit të Ballkanit Perëndimor, BE-ja do të bëhet Evropë.

“Hyrja në NATO është diçka që synojmë. Gjithashtu edhe në BE. Ne jemi Evropë, por BE-ja duhet të bëhet Evropë sepse ende s’është. Me përfshirjen e Ballkanit Perëndimor, BE-ja do të bëhet Evropë”, ka shtuar Kurti.

Prokuroria Speciale e Kosovës, pas zhvillimeve të hetimeve, ka ngritur sot aktakuzë në Gjykatën Themelore në Prishtinë ndaj të pandehurve A.L. dhe B.B. nën dyshimet se kanë kryer veprën penale përgatitje e veprës penale vrasje e rëndë.

Po ashtu, sipas aktakuzës për dy të pandehurit ekziston dyshimi i bazuar mirë, se kanë kryer edhe veprën penale mbajtja në pronësi, kontroll ose posedim të paautorizuar të armëve.

Prokurori nga Prokuroria Speciale ka kërkuar nga gjykata që të pandehurit t’i shpallë fajtorë duke i dënuar sipas ligjit.

Turqia ka arrestuar nëntë persona, përfshirë pronarin e hotelit, në lidhje me një zjarr vdekjeprurës që mori jetën e 76 personave dhe la të lënduar dhjetëra të tjerë në një vend skijimi në Turqinë perëndimore, tha të mërkurën herët ministri i Brendshëm Ali Yerlikaya.

Yerlikaya raportoi gjithashtu se trupat e 45 viktimave u ishin dorëzuar familjeve të tyre, ndërsa testet e ADN-së po kryheshin për të identifikuar trupat e mbetur në institutin e mjekësisë ligjore, raporton Reuters.

Zjarri ka rënë në një hotel në vendpushimin e skijimit Kartalkaya në malet Bolu.

Nga hoteli ku shpërtheu zjarri, shprehën dhimbjen e thellë në një deklaratë të mërkurën dhe u zotuan për bashkëpunim të plotë me hetimin.

“Ne po bashkëpunojmë me autoritetet për të hedhur dritë mbi të gjitha aspektet e këtij incidenti”, thuhet në deklaratë.

“Ne jemi thellësisht të pikëlluar nga humbjet dhe duam që ju të dini se ne e ndajmë këtë dhimbje me gjithë zemër”.

Hoteli 12-katësh, i cili kishte 238 mysafirë të regjistruar, u dogj nga flakët pasi zjarri filloi në katin e restorantit rreth orës 3:30 të mëngjesit. Të mbijetuarit përshkruan skena paniku teksa iknin nëpër korridoret e mbushura me tym dhe u hodhën nga dritaret për të shpëtuar.

Autoritetet po përballen me kritika në rritje për masat e sigurisë së hotelit, pasi të mbijetuarit raportuan se asnjë alarm zjarri nuk u ndez gjatë incidentit.

Presidenti turk, Recep Tayyip Erdogan, shpalli të mërkurën ditë zie kombëtare pas tragjedisë, e cila ndodhi gjatë pikut të sezonit të turizmit dimëror, me shumë familje nga Stambolli dhe Ankaraja që udhëtonin drejt maleve Bolu për skijim.

Gjyqtarët e Gjykatës Supreme dhe stafi mbështetës tash e një vit janë duke punuar në kushte të pasigurta pune, si pasojë e ashensorëve të cilët bllokohen dhe lëvizin në mënyrë të pakontrolluar, e të cilët janë nën menaxhimin e Ministrisë së Punëve të Brendshme.

Sipas një njoftimi për media bëhet e ditur se sot, për rreth 40 minuta janë bllokuar brenda ashensorit tre gjyqtarë dhe tri zyrtare të Gjykatës, dhe gjatë kësaj kohe ashensori ka pasur lëvizje të pakontrolluara dhe tronditëse.

“Gjyqtarët dhe stafi janë trajtuar nga stafi mjekësor i Ndihmës së Shpejtë dhe për rastin është njoftuar edhe Policia e Kosovës”, thuhet në njoftim.

Tutje në njoftim bëhet e ditur se: “Rastet e ngjashme të vitit të kaluar dhe rasti i sotëm shton nevojën që kjo cështje të mos neglizhohet më tutje, por të trajtohet me seriozitet dhe institucionet kompetente ta marrin seriozisht situatën dhe të krijojnë kushtet e punës duke siguruar se jeta e gjyqtarëve dhe stafit të Gjykatës është e sigurt”.