Category: Lajme

Në ditën e dytë të vizitës në KFOR, zëvendëskomandanti i Komandës së Forcës së Përbashkët të NATO-s në Napoli, gjenerallejtënant Peter K. Scott dhe komandanti i KFOR-it gjeneralmajor Enrico Barduani, vizituan sot Kampin Bondsteel, ku u pritën nga komandanti i Komandës Rajonale Lindje.

Ata diskutuan për sfidat dhe mundësitë aktuale brenda fushës së operacioneve të KFOR-it dhe rolin që Komanda Rajonale Lindje luan në garantimin e sigurisë dhe stabilitetit në të gjithë rajonin.

Gjenerallejtënant Scott gjatë ditës ka takuar edhe komandantin e Forcës së Sigurisë së Kosovës (FSK) gjenerallejtënant Bashkim Jashari. Takimi ishte një mundësi për të ri-konfirmuar angazhimin e KFOR-it për të kontribuar në një mjedis të sigurt për të gjithë njerëzit dhe komunitetet në Kosovë.

Vizita dy ditore përfundoi pasdite në selinë e KFOR-it ku gjenerallejtënant Scott përgëzoi gjeneralmajorin Barduani për kontributin e misionit që ai drejton në stabilitetin rajonal.

KFOR-i vazhdon të zbatojë mandatin e tij për të kontribuar në një mjedis të sigurt në Kosovë, në koordinim të ngushtë me Policinë e Kosovës dhe EULEX-in.

Në emër të asistencës sociale për familjet serbe në nevojë, Qeveria e Serbisë do të ndajë nga 170 euro ose 20 mijë dinarë ndihma për 5 mijë serbë, vendim që do të zbatohet nga 1 shkurti.

Eksperti i sigurisë Avni Islami ka thënë se njoftimi i Qeverisë së Serbisë është përpjekje për të blerë votat e serbëve lokalë në Kosovë, dhe rrjedhimisht për të siguruar më shumë vende për Listën Serbe, që me shumë gjasë tashmë e ka humbur besimin e komunitetit pakicë serb në Kosovë.

“Ky vendim lidhet me deklaratat e para ca ditëve të presidentit autoritar Aleksandar Vuçiq për të shpallur Kosovën “zonë speciale e mbrojtjes sociale” me ç’rast do t’i krijohet mundësia qytetarëve serbë për të përfituar financiarisht”, ka shkruar Islami në X.

Për më tepër, Islami thotë se veprimi i radhës i Beogradit zyrtar tregon qartë se nuk synon përkujdesjen ndaj serbëve, por vetëm shtrirjen e ndikimit në Kosovë përmes instrumentalizimit të qytetarëve serbë.

“Kjo “ndihmë” vjen në mes të fushatës zgjedhore, që nënkupton që Serbia po i përdor serbët e Kosovës për vota, pikërisht në dobi të Listës Serbe për zgjedhjet e 9 shkurtit. A po i “blen” Serbia serbët?”, ka përfunduar Avni Islami.

Kryetari i Aleancës për Ardhmërinë e Kosovës, Ramush Haradinaj tha se Kosova duhet “t’i kthehet marrëdhënieve bilaterale me administratën Trump”.

“Nuk guxojmë të humbim kohë, besoj shumë që do të ishte lajm I keq nëse nuk do ta ndërronim qeverinë Kurti, për shkak se dështoi të punojë me administratën Biden. Duhet t’i kthehemi marrëdhënieve bilaterale me administratën Trump”, tha Haradinaj në një intervistë për Zërin e Amerikës, derisa po qëndron në Shtetet e Bashkuara ku mori pjesë në inagurimin e presidentit Trump.

Haradinaj tha se Kosova nuk duhet të përfshihet në planet e reja siç tha ai për riorganizim të prezencës amerikanë.

“I kemi ofruar Amerikës përjetësisht lokacione, për përdorim ushtarak dhe civil, si Bondsteel dhe Film City, jemi të hapur për Aeroportin e Gjakovës, dhe Parku stërvitor në Babaj të bokës”, tha Haradinaj, transmeton KosovaPress.

Në 20 janar, Donald Trump ka marrë zyrtarisht detyrën si president i 47-të i Shteteve të Bashkuara.

Qysh në ditën kur mori mandatin, Trump nënshkroi një urdhër ekzekutiv që pezullon përkohësisht të gjitha programet e ndihmës ndërkombëtare të SHBA-ve për 90 ditë.

Të mërkurën më 22 janar, Presidenca e Kosovës tha se asnjë nga vendimet e deritanishme të Trumpit nuk e afektojnë tani për tani negativisht Kosovën.

Haradinaj kritikoi kryeministrin Albin Kurti i cili sipas tij ka dështuar të punojë me administratën e Joe Biden, e cila më 20 janar zyrtarisht e përfundoi mandatin.

Ndërkaq, duke folur për dialogun me Serbinë, Haradinaj tha se nëse e merr pushtetin pas zgjedhjeve të 9 shkurtit, qysh në javën e parë do ta dërgonte draftin e Asociacionit në Gjykatën Kushtetuese.

“Do t’i kryejmë obligimet që dalin nga dialogu, përfshirë Asociacionin – ta dërgojmë që në javën e parë në Kushtetuese”, tha Haradinaj.

Kosova dhe Serbia dialogojnë për normalizim të marrëdhënieve që prej vitit 2011. Ky proces ka nxjerrë disa marrëveshje por pak prej tyre janë zbatuar.

Një adoleshent britanik që vrau tri vajza në një klasë vallëzimi kushtuar yllit të muzikës Taylor Swift, u dënua sot me të paktën 52 vjet burg.

Tri ditë më parë, Axel Rudakubana (18) pranoi kryerjen e vrasjeve korrikun e kaluar në Southport të Anglisë veriore dhe gjithashtu u deklarua fajtor për dhjetë akuza për tentativë vrasjeje, si dhe për prodhimin e helmit vdekjeprurës ricin dhe zotërimin e një manuali të trajnimi të organizatës terroriste Al Kaida.

Gjashtëvjeçarja Bebe King dhe shtatëvjeçarja Elsie Dot Stancombe vdiqën gjatë sulmit me thikë, ndërsa nëntëvjeçarja Alice da Silva Aguiar vdiq në spital nga plagët. 11 persona të tjerë u plagosën në sulm dhe rasti ngjalli interes të madh në publikun britanik dhe më gjerë.

Prokurorët e cilësuan krimin si jashtëzakonisht të dhunshëm pasi autori me sa duket tentoi t’ua presë kokën njërës prej viktimave. Dy nga viktimat e tij pësuan lëndime të tmerrshme që janë të vështira për t’u shpjeguar si diçka tjetër përveç sadizmit, tha prokurorja Deanna Heer në Gjykatën e Liverpool Crown.

Gjykatësi Julian Goose e dënoi adoleshentin në mungesë për refuzimin e kthimit në gjykatë pasi u largua dy herë për ndërprerjen e seancës.

Axel Rudakubana, i cili lindi në Cardiff nga prindër ruandez, ishte 17-vjeç në kohën e vrasjeve. Andrew Menary, një gjyqtar në Gjykatën e Lartë të Liverpool-it, hoqi një ndalim për raportimin e identitetit të tij në gusht.

Presidenti i SHBA-së Donald Trump u tha udhëheqësve të biznesit në Forumin Ekonomik Botëror në Davos se ai po punon për të frenuar inflacionin dhe imigracionin e paligjshëm duke rritur prodhimin e karburanteve fosile në Shtetet e Bashkuara.

“Ajo që bota ka dëshmuar në 72 orët e fundit nuk është asgjë më pak se një revolucion i sensit të përbashkët,” tha Trump përmes video-konferencës.

Në hyrje të fjalimit të tij, Trump shpalli fitoren e tij në zgjedhje si fillimin e një “epoke të artë” për Amerikën. Ai tha se administrata e tij kishte nisur një “revolucion të arsyeshëm” dhe premtoi se Amerika dhe bota do të bëhen “më të pasura” dhe “më paqësore” falë presidencës së tij.

Ai akuzoi administratën e mëparshme për “politika të dështuara” dhe “kaos ekonomik”, duke kritikuar shpenzimet e deficitit, rregulloret dhe “tatimet e fshehura”.

Ai theksoi se çmimet ishin “rritur në qiell” dhe fajësoi Biden për humbjen e kontrollit të ekonomisë, duke premtuar se do t’i kthente gjërat dhe do të ndalonte politikat e “të majtës radikale”.

Trump tha se “besimi ekonomik tani po lulëzon” në Amerikë dhe se shumë kompani kanë njoftuar investime “në miliarda” në ekonominë amerikane.

Ai paralajmëroi se kompanitë që nuk prodhojnë në Amerikë do të përballen me tarifa, ndërsa ato që transferojnë prodhimin do të marrin lehtësira tatimore “të mëdha”. Ai premtoi gjithashtu uljen më të madhe të taksave në historinë e SHBA.

Ai përmendi investimin prej 500 miliardë dollarësh në zhvillimin e inteligjencës artificiale në SHBA dhe shtoi se Arabia Saudite kishte njoftuar investime në vendin e tij, duke i kërkuar me shaka Princit Mohammed bin Salman që ta rrumbullakonte atë shumë në një trilion dollarë.

Trump i tha pjesës tjetër të botës se nëse nuk i prodhojnë produktet e tyre në SHBA, do të përballen me tarifa me vlerë “trilionë dollarësh”. Kjo do të nënkuptonte futjen e tarifave universale, për të cilat shumë kanë frikë dhe që do të preknin të gjithë botën.

“SHBA do të jetë kryeqyteti botëror i inteligjencës artificiale dhe kriptomonedhës… Ejani dhe bëni produktet tuaja në Amerikë, por nëse nuk e bëni, ky është vendimi juaj. Por shumë thjesht, do të paguani tarifa në shuma të ndryshme, të cilat do të drejtojnë qindra miliarda, madje trilion dollarë në thesarin tonë”, tha Trump, duke iu drejtuar drejtpërdrejt elitave në Davos dhe shqetësimeve të tyre më të mëdha.

Më herët, kryetarja ekzekutive e Santander, Ana Botín, pyeti Trump për prioritetet e tij në lidhje me rregullimin dhe reduktimin e burokracisë, si dhe se sa shpejt mund të ndodhin këto ndryshime.

Trump tha se do të “lëvizte shumë shpejt”, më pas vazhdoi të listonte se sa shpejt beson se administrata e tij po i kryen gjërat vetëm tre ditë pas inaugurimit të tij.

Pyetja tjetër për Trump ishte nëse do të kishte një marrëveshje paqeje në luftën midis Rusisë dhe Ukrainës kur presidenti amerikan të flasë përsëri në Davos vitin e ardhshëm.

“Duhet të pyesni Rusinë. Ukraina është gati të bëjë një marrëveshje,” u përgjigj presidenti amerikan.

Trump tha se shpreson se Kina mund të ndihmojë SHBA-në t’i jep fund luftës midis Rusisë dhe Ukrainës.

“Ata kanë një ndikim të madh në atë situatë,” tha ai.

Trump u pyet për marrëdhëniet mes SHBA-së dhe Kinës. Ai tha se “duan vetëm një fushë loje të barabartë”, duke shtuar se nuk dëshiron që Kina të përfitojë nga SHBA.

Ai shtoi se dëshironte të punonte me Kinën për denuklearizimin, duke vënë në dukje se liderët e tjerë botërorë, përfshirë presidentin rus Vladimir Putin, do ta mbështesin idenë.

Kur u pyet nëse SHBA nën udhëheqjen e tij do të garantonte furnizimin me gaz në Evropë, Trump u përgjigj pozitivisht.

“Ne patjetër do të bënim një marrëveshje energjetike me Evropën dhe do ta arrinim atë.”

Ai theksoi rëndësinë e furnizimeve amerikane të gazit natyror të lëngshëm për BE.

Shtetet e Bashkuara janë tashmë furnizuesi kryesor i gazit të lëngshëm natyror për 27 anëtarët e BE-së dhe roli i saj pritet të rritet edhe më tej.

Trump përsëriti se Kanadaja mund të bëhet një shtet amerikan.

“Ne nuk kemi nevojë për makinat e tyre dhe nuk kemi nevojë për drutë e tyre,” tha ai.

Trump u përgjigj duke thënë se do të ulte normën e taksës së korporatave në 15% për kompanitë që prodhojnë produktet e tyre në SHBA.

“Unë do të ulë taksën e korporatave në 15%. Kjo do të krijojë interes të madh në SHBA”, tha ai.

Duke iu përgjigjur një pyetjeje nga themeluesi i Blackstone Group, Trump detajoi ankesat e tij për BE.

Në përgjithësi, ai tha se detyrimet doganore dhe taksat në vendet evropiane janë shumë të larta, rregulloret e tyre janë kufizuese, deficiti tregtar me SHBA-në është shumë i madh dhe se paditë kundër kompanive amerikane si Google janë të padrejta.

“Ne planifikojmë të bëjmë diçka për këtë. Unë po përpiqem të jem konstruktiv sepse e dua Evropën. Unë i dua vendet evropiane, por procesi është shumë i ndërlikuar dhe ata i trajtojnë SHBA shumë padrejtësisht,” tha Trump.

Trump ka thënë se do të kërkojë nga aleatët e NATO-s për të kontribuar më shumë. Ai tha se shumica e vendeve nuk paguanin derisa ai erdhi në pushtet.

Ai gjithashtu vuri në dukje se ishte përgjegjës për armëpushimin në Gaza të arritur në ditët e fundit të administratës së Joe Biden dhe kthimin e pengjeve në familjet e tyre.

Dy anëtarët bullgarë të ekuipazhit të Galaxy Leader të rrëmbyer, të cilët janë liruar nga rebelët Houthi në Jemen të mërkurën, pas më shumë se një viti u kthyen në shtëpi të enjten.

Kapiteni Lyubomir Chanev dhe oficeri i parë Danail Veselinov mbërritën në Sofje me aeroplanin qeveritar, i cili u dërgua për t’i marrë nga Muscat, Oman, me urdhër të kryeministrit Rosen Zhelyazkov.

Ministri i Jashtëm Georg Georgiev udhëtoi në Oman me avion për të sjellë në shtëpi marinarët bullgarë. Në aeroportin e Sofjes ata u pritën nga të afërmit e tyre, raporton BTA.

Galaxy Leader u kap nga Houthi në brigjet e Jemenit në nëntor 2023. Anija në pronësi britanike, e drejtuar nga Japonia dhe me flamur Bahamas kishte një ekuipazh prej 25 personash nga disa vende, duke përfshirë dy shtetas bullgarë. U bënë përpjekje për lirimin e anëtarëve të ekuipazhit.

Të mërkurën, televizioni Al Masirah në pronësi të Houthi-ve raportoi, se Houthi të Jemenit të lidhur me Iranin kanë liruar ekuipazhin dhe ia kanë dorëzuar Omanit “në koordinim” me armëpushimin treditor midis Izraelit dhe Hamasit. Informacioni u konfirmua më vonë nga Ministria e Jashtme bullgare.

Prokuroria Themelore në Gjilan, Departamenti për Krime të Rënda, ka ngritur aktakuzë ndaj dy personave me inicialet V.S. dhe F.M., të cilët gjenden në paraburgim prej datës 12 nëntor të vitit 2024.

Ata akuzohen për vrasjen që kishte ndodhur më 7 nëntor 2024, pas një konflikti fizik të ndodhur dy vjet më parë.

Në njoftimin e Prokurorisë thuhet se “i pandehuri V.S., më 7 nëntor 2024, rreth orës 14:00, në rrugën ,”Mërgimtarët e Gjilanit”, në Gjilan, me dashje, për shkak të një konflikti fizik të ndodhur para dy viteve, ka privuar nga jeta tani të ndjerin S.O., në atë mënyrë që derisa i ndjeri ishte duke hyrë në veturë, i afrohet dhe me armë e gjuan në pjesën e pasme të shpinës, ku pasi rrëzohet në tokë e godet me grusht dhe shqelm dhe më pas së bashku me të pandehurin F.M. janë larguar nga vendi i ngjarjes, ndërsa i ndjeri për shkak të plagëve të marra ka ndërruar jetë”.

I njëjti akuzohet edhe për veprën penale ‘’Mbajtja në pronësi, kontroll ose posedim të paautorizuar të armëve’’, pasi pa autorizim ka mbajtur në pronësi armë zjarri, e cila është sekuestruar.

“I pandehuri F.M., që nga data 7 – 12 nëntor 2024, në vende të ndryshme në Gjilan, me dashje ka ndihmuar të pandehurin V.S., në fshehjen – mos zbulimin e kryesit të veprës penale të vrasjes së rëndë, me çka ka kryer veprën penale ‘’Dhënia e ndihmës kryesve pas kryerjes së veprave penale’’, nga neni 380 të KPRK-së”, thuhet në njoftimin e Prokurorisë./KP

Operatori i Sistemit, Transmisionit dhe Tregut (KOSTT) sot ka inauguruar nënstacionin në Ferizaj dhe ky projekt që kap vlerën afro tetë milionë euro ka për qëllim që të zgjidh problemet e furnizimit me energji elektrike për banorët dhe bizneset e kësaj zone.

E pranishme në këtë ceremoni ishte edhe ministrja e Ekonomisë, Artane Rizvanolli, e cila ka theksuar se ky investim gjithashtu ndikon edhe reduktimin e humbjeve teknike prej 5 mijë megavat orë energji elektrike në rrjet.

“Me energjezimin e këtij nënstacioni sot po zgjidhen problemet e furnizimit me energji për banorët dhe bizneset e kësaj zone, dhe po mundësohet lehtësimi i ngarkesës për vendbanimet që furnizohen nga linjat e ndërlidhura në komunën e Kaçanikut, Shtërpcës, përfshirë qendrën e skijimit të Brezovices dhe do të ketë ndikim pozitiv edhe tek një pjesë e konsumatorëve në Komunën e Shtimes. Ky investim gjithashtu ndikon edhe reduktimin e humbjeve teknike prej 5 mijë megavat orë në rrjet. Ky investim e rrit stabilitetin me furnizim me energji elektrike dhe eliminon ndërprerjet që kanë ndodhur, duke përmirësuar kështu kushtet e jetesës, mirëpo edhe duke mundësuar zhvillim më të qëndrueshëm ekonomik dhe social të qytetit dhe të Komunës së Ferizaj”, tha Rizvanolli.

Kryesuesi i Bordit të drejtoreve në KOSTT, Gëzim Tosuni ka thënë se efektet e këtij nënstacioni pritet që të ndjehen në ditët dhe muajt e ardhshëm në aspektin energjetik.

“Një projekt i cili është gati, kryesisht i mbështetur financiarisht, investim i KOSTT. Efektet e tij pritet që të ndjehen në ditët dhe muajt e ardhshëm… Mirëpo për shkak të kushteve të vështira, temperaturave të ftohta, kontraktoret dhe ekipet e KOSTT-it kanë bërë maksimumin e mundshëm për të përshpejtuar lansimin e këtij projekti. Prej sot qytetarët e Ferizaj nuk do të ngelen pa rrymë për shkak të KOSTT-it”, tha Tosuni.

Në anën tjetër, kryeshefi ekzekutiv i KOSTT-it, Evetar Zeqiri tha se ky investim është i një teknologjie të fundit dhe do të sigurojë furnizim të pandërprerë me energji elektrike.

“Sot po e energjizojme nënstacionin Ferizaj 3. Ky nënstacion është i një rëndësie të veçantë, sepse mbështet qytetarët e Komunës së Ferizaj. Ky nënstacion ka pas sfidat e veta të përfundimit të cilat në bashkëpunim me gjitha palët i kemi tejkaluar. Ky është projekt strategjik i realizuar me përkushtim dhe vizion të të gjithë neve dhe shënon një periudhë të re në Komunën e Ferizaj, sepse do të mbështet qytetarët dhe bizneset në tërësi. Ky nënstacion kap vlerën prej rreth 7.8 milionë euro së bashku me linjën 3.31 kilometra. Ky investim është i një teknologjie të fundit dhe do të sigurojë furnizim të pandërprerë…Kërkojmë ndjese për çfarëdo ndërprerje që ka ndodhur e cila është shkaktuar për nevojat e ruajtjes së stabilitetit të energjisë dhe shpresojmë që në të ardhmen nuk do të ketë më reduktime ”, tha Zeqiri.

Gjatë muajit dhjetor të vitit të kaluar, qytetarët e vendit, veçanërisht ata të zonës së Ferizajt u përballen me mungesë të energjisë elektrike.