Category: Lajme

Përgatiti: Ardiana Jashari

As këtë të martë Kuvendi Komunal i Gjilanit nuk arriti të votojë buxhetin për vitin 2025 meqë seanca e ftuar nga Lëvizja Vetëvendosje nuk pati kuorum.

“Ne nuk kemi korum për të vazhduar tutje. Faleminderit, e shpalli të mbyllur këtë seancë”, tha kryesuesi i kuvendit nga LDK, Kushtrim Kadriu.

Ani pse fjala nuk iu dha nga kryesuesi i Kuvendit meqë ky i fundit mbylli seancën, nënkryetarja e Gjilanit, Leonora Morina-Bunjaku shfrytëzoi rastin t’i bëj thirrje opozitës të votojnë buxhetin.

“Ai nuk është një instrument politikë por një mekanizëm për mirëqenien të përbashkët. Ju ftoj të gjithëve që t’i lëm më një anë dallimet dhe të veprojnë për të mirën e komunitetit tonë”, tha Morina-Bunjaku.

Në anën tjetër partia opozitare në këtë komunë LDK thotë se nuk e voton këtë buxhet pasi në të nuk janë përfshirë nevojat e qytetarëve por nevojat politike të Vetëvendosjes.

“Pra shihet qarë se z.Hyseni së bashku me bashkëpunëtorët e tij kanë bërë buxhet për nevojat politike mbajtjen gjallë të aktivistëve politike, të kontratave të paligjshme”, tha Kadriu.

Edhe partia tjetër opozitare në Gjilan, PDK thotë se nuk do të votojë buxhetin duke renditur arsyet.

“Janë tri arsye kryesore që ne nuk do ta votojmë këtë buxhet e para ka të bëjë me mosrespektimin e afateve ligjore, arsyeja e dytë është përmbajtja e buxhetit i cili është i destinuar për dy fushatat zgjedhore Arsyeja e tretë është mënyra se si kryetari i komunës nuk donë të hap diskutim në kuvendin komunal për këtë buxhet por kërkon vetëm votën tonë”, tha Riad Rashiti, asambleist nga PDK.

Komuna e Gjilanit është komuna e vetme e cila nuk ka arritur ende të miratojë buxhetin për këtë vit. E nëse nuk votohet deri në mars Gjilani rrezikon të shkojë në zgjedhje të jashtëzakonshme.

Më shumë detaje i gjeni në Edicionin Qendror të lajmeve në videon më poshtë:

Përgatiti: Benita Zeneli

Buxhetin që e patën në vitin 2024 për projekte kapitale, disa nga komunat nuk arritën ta shfrytëzojnë. Kjo ngase siç thonë niveli qendror e pamundësoi realizimin.

Në komunën e Prishtinës, sipas nënkryetarit Alban Zogaj, shkak i qeverisë ndër vite kanë mbetur shumë projekte pezull.

“Ka ndikuar goxha shumë niveli qendror pasi shumë nga projektet madhore. Shembull një nga projektet është nënkalimi Agim Ramadani, platforma që e lidh lagjen Arbëria me Pallatin e rinisë”, tha Zogaj.

Ndërkohë kryetari i komunës së Vushtrrisë, Ferit Idrizi e vlerëson bashkëpunimin me qeverinë. Megjithatë thotë se institucionet qendrore dëmtuan buxhetin e kësaj komune përmes kontratës kolektive.

“Në kuptimin institucional të them të drejtën e kam pasur një bashkëpunim me të gjitha, kemi respektuar vijën institucionale, nuk kemi pasur problem. Por problemi më i madh ka qenë kontrata kolektive që na ka dëmtuar me mjete, llogarit 6 milion euro nëse i kishim shti në projekte do të kishte ndryshuar e gjithë pamja komunës. Kemi pas plan shumë çerdhe, kanalizime e rrugë”, tha Idrizi.

E dëmtuar në këtë aspekt është edhe komuna e Vitisë, e cila e konsideron të papranueshme ndërhyrjen e nivelit qendror në punët e komunave.

“Qëndrimi ynë është institucional. Ne i kemi dy pushtete. Niveli lokal funksionon mbi ligjin vetëqeverisjes lokale, por ndërhyrja është e papranueshme ndërsa e pranueshme është bashkëpunimi. Në përgjithësi ne i respektojmë hierarkinë mbi bazën e ligjeve dhe legjislacionit në fuqi”, tha kryetari i Komunës së Vitisë, Sokol Haliti.

Ndërkohë, komunat e Kosovës gjatë vitit të shkuar kanë pasur në dispozicion rreth 290 milionë euro për projekte kapitale, derisa nuk kanë shpenzuar mbi 50 milionë.

Më shumë detaje i gjeni në Edicionin Qendror të lajmeve në videon më poshtë:

Përgatiti: Sara Mulliqi

Institucioni i Avokatit të Popullit ka publikuar për herë të parë raportin vjetor “Zbatimi i Ligjit për Mbrojtjen nga Diskriminimi”.

Avokati i popullit, Naim Qelaj gjithashtu ka kërkuar më shumë bashkëpunim institucional rreth të dhënave të sakta ndaj diskriminimit.

“Ne i kemi ditur pak a shumë sfidat dhe problematikat që na përcjellë kjo fushë, e para që del si konstatim dhe si shqetësim i ngritur nga unë si avokat është mungesa e të dhënave që do të thotë institucionet e Kosovës, nuk arrijnë të mbledhin dhe të fusin në informata të sakta ndaj diskriminimit të cilat i pa mundësojnë Avokatit të Popullit ta përmbushë ligjin”, tha Qelaj.

E për të parandaluar diskriminimin sipas zëvendës shefes së zyrës së BE-së në Kosovë, Eva Palatova, duhet të mbështeten vlerat fundamentale.

“Barazia, pavarësitë nga origjina, seksualiteti, etnia apo aftësitë e kufizuara duhet jetuar si shoqëri që i mbron këta njerëz dhe e mbështet diversitetin duke mbrojtur vlerat fundamentale. Bashkimi Evropian ka ndërmarrë shumë veprime për të siguruar që mbrojtja kundër diskriminimit të funksionojë”, tha Palatova.

Raporti në mes tjerash u vlerësua si hap i rëndësishëm drejt ndalimit të diskriminimit në vend.

“Ky raport do të shtrojë themel të fortë dhe rekomandimin e masave për të përmirësuar ligjin dhe zbatimin e tij”, tha Mary Ann Hennesy, shefe e Zyrës së Këshillit të Evropës.

Raporti është publikuar me mbështetjen financiare të Bashkimit Evropian dhe të Këshillit të Evropës si rezultat i projektit “Lufta kundër diskriminimit dhe urrejtjes”.

Më shumë detaje i gjeni në Edicionin Qendror të lajmeve në videon më poshtë:

Përgatiti: Benita Zeneli

Dëshmitari, Naser Krasniqi, ka vazhduar dëshminë në Hagë. Në seancën e së martës u prezantua një dokument të cilin vet Krasniqi ia kishte dhënë Prokurorisë.

“Ashtu qysh shihet edhe nga paragrafi i parë i shkresës kishte të bënte me inkasimin e të hyrave për luftën e UÇK-së për mërgimtarët që nuk i kishin financuar në botën e jashtme, përkatësisht nuk i kishin shlyer obligimet atje dhe na ishte dhënë detyrë që t’i verifikonin dhe këto obligime t’i shlyenin në vend do të thotë në Kosovë”, deklaroi Krasniqi.

Krasniqi shtoi se shuma e kontributeve ishte sipas shteteve dhe të gjitha ishin të specifikuara në vendim dhe varionte nga 1 mijë deri në 2 mijë marka ose franga zvicerane. Derisa tregoi se çfarë ndodhte me ata që nuk e kryenin obligimin.

“Do të duhej t’i merrej pasaporta deri sa t’i shlyente obligimet”, deklaroi Krasniqi.

Derisa ka treguar se një person i quajtur Sabit Shala është arrestuar me urdhër të Sokol Dobrunës, gjatë dëshmisë së tij, Krasniqi i cili është dëshmitari i 118-të, konfirmoi se kishte Gjykatë Ushtarake në UÇK.

“Ai tha se unë kam ardhur që unë të rri në vend të djalit dhe djali të lirohet. Atëherë unë i shpjegova që nuk është në kompetencat e mia një gjë e tillë dhe pasi pyeti unë i tregova që është në kompetencën e Gjykatës Ushtarake dhe ai kërkoi që të takohej me kryetarin e Gjykatës Ushtarake për ta diskutuar të njëjtën kërkesë të tij. Meqenëse Bajram Gashi administrator i togut të Policisë Ushtarake e njihte paraprakisht Habibin, atëherë ne së bashku vendosëm që të ia bëjmë një favor dhe vendosëm që së bashku të shkojmë në Divjakë për ta takuar zotin Sokol Dobruna”, deklaroi Krasniqi.

Ndërkohë aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020, derisa të gjithë janë deklaruar të pafajshëm për akuzat që u vihen në barrë.

Më shumë detaje i gjeni në Edicionin Qendror të lajmeve në videon më poshtë:

Paneli Zgjedhor për Ankesa dhe Parashtresa ka dënuar sërish subjektin Koalicioni për Familje për shkelje të Kodit të Mirësjelljes. Ajo është gjobitur me 7,000 euro.

Kundër saj u ankuan organizata joqeveritare Dulberizim dhe Qendra për Barazi Gjinore. Konkretisht kundër kandidatit për deputet, Eman Rrahmani, për shkak të postimit të tij publik: “Nuk ka martesa me burrë me burrë”. Por, në ankesë janë përmendur edhe kandidatë të tjerë të këtij subjekti.

Këto organizata kanë thënë se përfaqësues të Koalicionit për Familje kanë nxitur urrejtje e përçarje ndaj komunitetit LGBT+, “duke përdorur terma denigruese që bien ndesh me respektin për tolerancën, mjedisin demokratik zgjedhor e sundimit të ligjit dhe legjislacionin zgjedhor në fuqi”.

Më herët, Koalicioni për Familje është gjobitur dy herë në shumë të përbashkët prej 9,500 eurosh për gjuhë denigruese e të urrejtjes kundër komunitetit LGBT+.

Vendimi i plotë

Dorëheqja e kryeministrit të Serbisë, Millosh Vuçeviq, pas protestave masive atje po konsiderohet si hapi i parë i rënies së regjimit të presidentit, Aleksandër Vuçiq. Protestat antiqeveritare që po zgjasin tash e dy muaj, po kualifikohen si zhvillime “tektonike” që mund të përmbysin presidentin Vuçiq. Megjithatë, analistët politikë në Kosovë vlerësojnë se Vuçiq përmes dorëheqjes së kryeministrit Vuçeviq dëshiron ta largojë përgjegjësinë nga vetja dhe të zgjasë pushtetin e tij.

Për më shumë se dy muaj në Serbi, mijëra studentë dhe qytetarë të tjerë po kërkojnë përgjegjësi penale dhe politike për tragjedinë në qytetin e Novi Sadit, ku më 1 nëntor të vitit të kaluar, 15 persona humbën jetën nga shembja e strehës në stacionin hekurudhor.

Politologu dhe njohësi i zhvillimeve rajonale, Milazim Koci, thotë për KosovaPress, se protestat në Serbi nuk mund të mposhten lehtë nga Vuçiq, pavarësisht dorëheqjes së kryeministrit Vuçeviq.

Sipas tij, tani është rasti i parë pas dhjetë viteve që po luhatet seriozisht pushteti i presidentit serb, Aleksandër Vuçiq.

“Lëvizjet në Serbi kësaj radhe janë tektonike. Nuk janë lëvizje at-hoc të cilat mund të mposhten lehtë nga Vuçiqi. S’po them se atje shpejt studentët do të përmbysin Vuçiq, por as ai nuk do të ketë lehtë t’i mposhtë. Lëvizja studentore atje nuk është e lidhur me opozitën e cila shpesh atje ka ditur të bëjë lojëra me pushtetin. Ata po mbajnë në distancë opozitën dhe besoj se në tre apo gjashtë muajt e ardhshme do të shohim betejë të ashpër mes studentëve dhe pushtetin të Vuçiq. Është rasti i parë pas dhjetë viteve që do të luhatet pushteti seriozisht dhe nuk përjashtojë mundësinë që e gjitha të përfundojë me largimin e Vuçiq ashtu si Asadi në Siri”, thekson Koci.

Në anën tjetër, analisti, Albinot Maloku, thotë për KosovaPress, se regjimi i Vuçiq ka nisur të bie, mirëpo fuqia politike e tij është ende e madhe në Serbi.

Ai shton se dorëheqja e Vuçeviq është një tentim i Vuçiqit për të hequr përgjegjësinë nga vetja për tragjedinë në Novi Sad si dhe zgjatjen e pushtetit të tij.

“Dorëheqja e kryeministrit të Serbisë, Millosh Vuçeviq është tentim i Aleksandër Vuçiqit për të hequr përgjegjësinë nga vetja. Ky nuk është një faktor i rëndësishëm, pavarësisht se është kryetar partie, pasi prej fillimi ka qenë vegël e pastër e Vuçiqit. Ai provon që me tërheqjen e tij nga pozicioni i kryeministrit të mbajë një pozicion të vetin për të dhënë një lloj përgjegjësie për protestat. Tentimi për të ndryshuar regjimi autoritar në Serbi po vjen nga masa apo populli, jo që është organizuar nga opozita….Probaliteti i mundësisë për të ndodh një partneritet i ardhshëm për të kaluar në një proces zgjedhor apo formuar një qeveri teknike, kjo është një prej opsioneve. Nuk konsideroj se me largimin apo dorëheqjen e kryeministrit Vuçeviq kemi ardhur te situata ku mund të lëkundet fuqishëm pozicioni i Aleksandër Vuçiqit në fuqinë e vet politike në Serbi. Gjithsesi është në nisje mirëpo nuk mendoj se tani është mundësia për të parë një ndryshim të regjimit në Serbi”, thekson Maloku.

Kryeministri i Serbisë, Millosh Vuçeviq dha dorëheqje të martën pas protestave masive të studentëve dhe qytetarëve për tragjedinë në qytetin e Novi Sadit, ku, më 1 nëntor të vitit të kaluar, 15 persona humbën jetën nga shembja e strehës në stacionin hekurudhor./kp

Ministrja e Ekonomisë, Artane Rizvanolli ka njoftuar se janë ndarë katër milionë euro për energjinë e pastër në Kosovë, mbështetur nga marrëveshja e bashkëpunimit bilateral mes Kosovës dhe Danimarkës.

Sipas Ministrisë së Ekonomisë, kjo marrëveshje mundëson mbështetje për mbi 200 familje në nevojë me masa të efiçiencës së energjisë, mbështetje për ndërmarrjet e vogla dhe të mesme (NVM), gratë ndërmarrëse dhe inovacionin, si dhe mbështetje institucionale për një tranzicion të drejtë energjetik.

Ministrja Rizvanolli, ka falënderuar Qeverinë daneze, United Nations Development Programme (UNDP) dhe të gjithë partnerët e përfshirë në këtë projekt të rëndësishëm për mirëqenien e qytetarëve, ekonominë dhe mjedisin e vendit në Kosovë.

Programi do të fillojë implementimin nga data 1 shkurt 2025.