Category: Lajme

Profesori universitar, Artan Nimani është shprehur i tronditur nga tragjedia në Jabllanicë të Gjakovës, ku vdiqën tre të rinj në një objekt të pabanuar në këtë fshat, raporton Ekonomia Online.

Nimani në Facebook ka shkruar se kjo është një dhimbje e madhe për familjet, shkollën dhe gjithë komunitetin.

“Ramë Mehmeti, Ideal Rama, Veton Morina, do të mbeteni gjithmonë në zemrat tona”, ka shkruar Nimani.

Kryetari i Lidhjes Demokratike të Kosovës, Lumir Abdixhiku u ka shprehur ngushëllime familjeve të tre fëmijëve që humbën jetën nga shembja e një shtëpie të pabanueshme në Jabllanicë të Pejës, raporton EO.

“Me rastin e ngjarjes tragjike në Jabllanovicë të Gjakovës, ku humbën jetën tre fëmijë, kryetari i LDK-së, Lumir Abdixhiku ju shpreh ngushëllime familjeve dhe qëndron me ta në këto momente të rënda”, thuhet në njoftimin e LDK-së.

“Me dhimbje e pikëllim të thellë morëm lajmin tragjik për humbjen e tre fëmijëve në tragjedinë në Jabllanicë të Gjakovës. Në emër të gjithë anëtarësisë së LDK-së, ju shpreh ngushëllimet e sinqerta familjeve, ndërsa në këto momente të vështira, qëndrojmë pranë tyre dhe lutemi që ta përballojnë këtë humbje të madhe. Po ashtu lus që të gjitha organet kompetente të zhvillojnë hetim të plotë dhe të shpejtë për të sqaruar rrethanat e kësaj tragjedie”, thotë Abdixhiku.

Përparim Ademaj, familjar i fëmijëve që vdiqën tragjikisht pas shembjes së një objekti në Jabllanicë të Gjakovës tha se trupat e pajetë i gjetën rreth katër orë kërkimi.

“Kjo tragjedi ka ndodhë në këtë objekt të pabanueshëm. Rreth orës 10 e gjysmë në mbrëmje. Më herët kanë dalë si rinia tu lujtë, shokë”, tha ai në një prononcim për Indeksonline.

“Kur kemi kuptu që janë këtu, i kemi thirr Policinë. Kanë ardhë Policia shumë shpejt, zjarrfikësit, ambulanca. I kemi gjetë pa shenja jete diku pas 4 orësh”, tha ai.

Në bazë të kamerave, ai tha se shtëpia e pabanuar ku gjendeshin fëmijët u rrëzua rreth orës 16:30 të shtunën pasdite.

Ish-ministri i Jashtëm i Kosovës dhe kandidati për deputet nga PDK, Enver Hoxhaj, ka reaguar pas tragjedisë së rëndë që ndodhi në fshatin Jabllanicë të Gjakovës, ku tre fëmijë humbën jetën si pasojë e shembjes së një shtëpie të pabanuar.

Përmes një mesazhi ngushëllimi, Hoxhaj shprehu dhimbjen e tij për këtë ngjarje të rëndë, duke e cilësuar atë si një tragjedi që ka tronditur të gjithë.

“Lajmi për humbjen tragjike të tre fëmijëve në Jabllanicë na ka tronditur të gjithëve. Një ngjarje e rëndë që ka marrë jetët e pafajshme të të rinjve, duke lënë pas dhimbje dhe pikëllim të thellë. U shpreh ngushëllimet më të sinqerta familjeve të tyre dhe gjithë Gjakovës,” ka shkruar ai.

Sipas të dhënave të marra nga policia, rasti është duke u hetuar për rrethanat e ngjarjes.

Kryetari i Sindikatës së Pavarur të Sektorit Privat, Jusuf Azemi, ka kritikuar premtimet e fushatave elektorale të politikanëve për rritje të pagave, duke i quajtur ato “parealizueshme” dhe “humbje kohe”.

Në një intervistë për Ekonomia Online, Azemi theksoi se paga minimale në sektorin privat aktualisht është 264 euro, ndonëse premtohej rritje më e madhe.

“Fatkeqësisht merremi me fushata nga pas lufta dhe këto më shumë se 80 për qind janë për neve janë çështje të parealizueshme, për neve janë si humor, për vetë faktin që në Kuvendin e Kosovës na ka larguar 14 punëtore ku të gjitha deputet që po dëshirojnë votën e popullit dhe po premtojnë dhe realisht i kanë larguar punëtoret dhe nuk kanë bërë asgjë. Fushatat janë një obligim ligjor por është një humbje e kohës është shpenzim i kohës dhe duke nisur nga e kaluara realizimi i premtimeve është fare e pa përmbushur”, ka shkruar Azemi.

Azemi shtoi se shumë punëtorë në sektorin privat nuk kanë kontrata pune, nuk përfitojnë nga Trusti Pensional dhe sigurimi shëndetësor, dhe se për këtë çështje asnjë qeveri nuk ka marrë masa të dukshme.

“Paga minimale në sektorin privat sot është 264 euro, Kurti vetëm ka nxjerrë një vendim sa për popullzim sepse kjo pagë nëse ka nevojë ne mund të adresojmë në emër secilën kompani që nuk e bënë zbatimin e kësaj page. Premtimet elektorale janë fushata, por po i përmendi disa, paga minimale në shtetin e Kosovës është 234 euro jo 350 qysh e ka premtuar në fillim të mandatit, rreth 30 përqind të punëtorëve të sektorit privat i kemi pa kontrata punë. Rreth 50 për qind prej këtyre punëtore nuk kanë fare trus pensional punojnë dhe në fund nuk marrin asgjë nga Trusti. Rreth 70 për qind e punëtorëve të sektorit privat nuk është deklaruar komfort pagës që e merr, 90 për qind të punëtorëve në sektorin privat nuk kanë sigurim shëndetësor, të gjitha këto ish qeveritë dhe kjo e fundit kanë premtuar mrekullia dhe nuk kanë bërë asgjë”, ka thënë ai për Ekonomia Online.

Ai kërkoi që punëtorët e sektorit privat të kenë më shumë benefita nga buxheti i Kosovës, dhe i bëri thirrje për realizimin e premtimeve reale.

“Ne e kemi obligim që të tregojmë se çdo qeveri në mandatin e tyre çfarë ka punuar përndryshe ne në asgjë rast nuk do të propozojmë që ta votojmë këtë apo atë, vet kurrizi i punëtorëve e dinë më mirë se a iu është lehtësuar gjatë kësaj qeverie apo jo, do të thotë a kanë pasur beneficione. Përderisa shumat e mjeteve që ne derdhim në buxhetin e Kosovës jashtëzakonisht sepse jemi 300 mijë punëtorë, dhe beneficionet janë ndarë për të tjerët por në asnjë rast për punëtorit e sektorit privat”, tha Azemi për Ekonomia Online.

Kryetari i AAK-së, Ramush Haradinaj, ka reaguar pas rastit tragjik në Gjakovë ku tre fëmijë vdiqën nga shembja e një objekti, raporton Ekonomia Online.

Ai i ka shprehur ngushëllime familjeve të viktimave.

“I tronditur nga tragjedia në Jabllanicë të Gjakovës. Bashkëndjejmë me familjet Rama, Mehmeti e Morina, që humbën fëmijët. Zoti ju lehtësoftë dhembjen.”, ka shkruar ai.

Ekspertët e sigurisë në vend kanë paralajmëruar se Beogradi zyrtar mund të tentoj që të përdorë Kosovën si një mjet për të devijuar vëmendjen nga problemet e tij të brendshme, kjo pas protestave masive që janë duke u mbajtur atje kundër qeverisë së Vuçiqit, dhe të ndikoj në fushatën elektorale në Kosovë, raporton Ekonomia Online.

Por, sipas tyre, praktikisht kjo nuk do të ndodhë në një nivel të rrezikshëm, për shkak të gatishmërisë së institucioneve të sigurisë.

Profesori universitar Fatmir Çollaku, ka thënë për Ekonomia Online se vlerëson se situata e sigurisë në Kosovë mbetet e stabilizuar, pavarësisht përpjekjeve të ndryshme për të krijuar pasiguri.

Sipas tij, Serbia tradicionalisht ka tentuar të zhvendosë vëmendjen nga krizat e saj të brendshme drejt Kosovës, por në këtë rast, strukturat e sigurisë janë të përgatitura për të përballuar çdo provokim të mundshëm.

“Në përgjithësi situata e sigurisë është e qëndrueshëm është stabile përkundër shumë përpjekjeve që të jetë ndryshe. Përpjekjeve nga fqinja veror dhe interpretimeve të shumë folëseve publike se do të ketë sulme për vitin e ri, pas viti të ri, pas festave, megjithatë nuk ndodhi asgjë dhe mirë që nuk ndodhi. Unë mendoj që do të jetë stabile edhe ne vazhdimësi situata e sigurisë sepse sistemi i sigurisë është në përformanc cilësore, është i konsoliduar mirë dhe tani organet e sigurisë e në veçanti policia kanë një përvojë të konsiderueshëm në rastet që ishin sulet terroriste, janë referenca të mjaftueshëm për policinë që të ketë një vigjilencë më të lartë një mobilizim më të mirë me stabil dhe një operacionalitete të cilësisë së lartë”, ka thënë ai për Ekonomia Online.

Ai thekson se, ndonëse teorikisht ekziston mundësia për tensione të shkaktuara nga Serbia për të devijuar vëmendjen nga problemet e saj të brendshme, praktikisht kjo nuk do të ndodhë në një nivel të rrezikshëm, për shkak të gatishmërisë së institucioneve të sigurisë.

“Teorikisht janë të mundshme, por praktikisht jo, sepse teorikisht janë të mundshëm sulmet ose provokimi serioz i situatës nga ana e Serbisë për të hequr vëmendjen nga problemet të thelluara të brendshme nga pakënaqësia tashme e akumuluar e popullatës atje kundër Vuçiqit, prandaj këtu praktika kanë qenë të dukshëm edhe me herët kur Serbia ka probleme të theksuara përpiqet të zhvendos vëmendjen e opinionit të vetë të brendshëm ndaj Kosovës sepse Kosova është kauza që i bashkon të gjitha rrymat atje. Por në rastin konkret praktikisht nuk do të jetë e mundshme për faktin se policia, KFOR edhe organet e sigurisë janë në nivel të kënaqeshim të detyrës dhe e llogarisin mundësit eventuale për ndonjë provokim. Prandaj provokimi mund të ndodh por jo me peshë sepse rezistenca do të jetë që në start e fuqishme dhe zmbrapse”, ka thënë ai.

Në lidhje me sigurinë në tubimet e mëdha elektorale, Çollaku thekson se në çdo vend, periudhat zgjedhore sjellin një rritje të rrezikut për incidente, por deri më tani nuk ka pasur asnjë problem serioz që do të rrezikonte sigurinë kombëtare.

“Në çdo fushat në të kaluarën te ne por edhe në vendet e tjera, vigjilenca e organeve të sigurisë publike do të duhej që t jetë me e lartë për faktin që mundësi për të manipuluar, për të keqpërdorura, mundësi për të bërë ndonjë shkelje ligjore, pak është me e madhe sepse behet fjalë për dalje masovike të njerëzve nëpër tubime, prandaj prezenca me e madhe e njerëzve është një mundësi reale për një skandal, që deri me tani nuk ka pasur një incident serioz për sigurinë kombëtare dhe nacionale”, ka thënë ai për Ekonomia Online.

Eksperti i sigurisë Drizan Shala për Ekonomia Online thekson nevojën për analizë më të thelluar të sigurisë gjatë fushatës zgjedhore.

Ai vlerëson se situata deri më tani ka qenë normale.

“Sa i përket procesit zgjedhor që jemi ne duhet të duhet të analizojmë aspektin e sigurisë. Pa dyshim çështja e tubimeve kryesore që mbahen nëpër komuna të caktuar ne deri më tani shohim një rrjedhe normale të aktiviteteve politike. Por që do të duhej që të bëjmë një pyetje krucila e cila është sa i përket çështjeve të sigurisë të personave të cilët tani më gëzojnë mbrojtje nga policia e Kosovës që janë kreret e partive politike, mandej edhe kryeministri i Kosovës ku dihet që qytetaret e ndryshëm mund të hyjnë në objekte përkatëse sallat e ndryshme dhe kontrolli i tyre nuk behet në mënyrë të detajuar dhe kjo mund ta ngris potencialin të përdorimit të akterve të tretë”, ka thënë ai për Ekonomia Online.

Ai thekson gjithashtu se Ballkani Perëndimor është në një periudhë të tensionuar politike dhe nuk përjashton mundësinë që Serbia të ketë plane të detajuara për të destabilizuar procesin zgjedhor në Kosovë.

“Ne e dimi që jemi në një situatë kaotike pulitke në rajonin e Ballkanit Perëndimorë dhe ndoshta mund të ketë ndonjë plan të detajuar nga ana e Serbisë për ta destabilizuar procesin politik i cili është duke rrjedhur në mënyra normale në kontekstin e suazave të përcaktuar politike. Kjo mund të ndikoj drejt për drejt në cenimin e sigurisë publike edhe të procesit zgjedhor por madje mund të ketë efekte edhe në sigurinë nacionale”, ka thënë ai për Ekonomia Online.

Avokati i Popullit, Naim Qelaj, ka deklaruar se ligji për mbrojtjen ndaj diskriminimit nuk po zbatohet në praktikë, për shkak të mungesës së mekanizmave të qartë ligjor për raportimin e shkeljeve.

Në një intervistë për Ekonomia Online, Qelaj ka bërë të ditur se është realizuar një hulumtim mbi punësimin e grave në sektorin publik, i cili tregon rritje të përqindjes së grave në këtë sektor, por një mungesë të përfaqësimit të tyre në pozitat vendimmarrëse.

“Nuk ka raportim për zbatim të ligjit për mbrojtjen ndaj diskriminimit, fatkeqësisht në mungesë të mekanizmave të qarta ligjore që bëjnë përgjegjëse autoritetet publike për të raportuar. Megjithatë e kemi bërë një hulumtim në lidhje me punësimin e grave në sektorin publik sepse në sektorin privat e kemi të pa mundur të bëjmë një vlerësim dhe një analizë të tillë, na ka dalë se në përqindje ka rritje, thjesht është përtej pritjeve që ne kemi pasur, por kjo nuk është e njëtrajtshme në të gjitha pozitat. Përderisa, numri i grave në sektorin publik është rritur numri i grave që janë pjesë vendimmarrëse, gjithmonë është më i vogël se burrat dhe këto vërehet një diskriminim”, ka thënë Qelaj.

Ai gjithashtu potencon se nuk ka mundësi për të vlerësuar diskriminimin në sektorin privat, duke kërkuar forcimin e mekanizmave raportues dhe rritjen e vetëdijes së qytetarëve.

“Mund të ketë edhe në sektorë të tjerë, por e kemi të pamundur të dimë në secilin rast individual kur nuk ka raportim, prandaj qëllimi është që të rriten dhe të fuqizohen mekanizmat raportues dhe të rritet vetëdija e qytetarëve që të raportohet, secili rast i diskriminimit. Në anën tjetër është përgjegjësi dhe detyrim i autoriteteve të vlerësojnë situatën në raport me barazinë para ligjit dhe respektimin e parimit të mos diskriminimit në secilën rast ku shtrojnë politika dhe hartojnë politika që do të zbatohen në interes të përgjithshëm”, ka theksuar ai.

Qelaj ka theksuar se pranon 80-100 ankesa për diskriminim çdo vit, kryesisht lidhur me punësimin dhe shërbimet sociale.

“Në institucionin e Avokatit të Popullit pranon një numër të konsiderueshëm të ankesave për shkak të diskriminimit 80-100 është numri i rasteve të kësaj natyre, që nënkupton diku 8-10 për qind të rasteve, Kryesisht dominojnë ankesat në raport me vendin e punës dhe avancimin dhe procesin e rekrutimin dhe pastaj janë çështjet pronësore dhe ka çështje të tjera që lidhen me marrjen e shërbimeve sociale e shëndetësore ku kohëve të fundit kemi pasur një vërshim të madh të numrit të ankesave kryesisht për shkak të trajtimit të pa barabartë dhe aplikimin e programeve mbështetëse që ka zbatuar Qeveria”, ka thënë Qelaj për Ekonomia Online.

Ai ka theksuar se, megjithëse ekziston një kornizë ligjore e fortë për mbrojtjen e barazisë, zbatimi i saj mbetet një problem.

“Megjithatë, ajo që është me rëndësi se ne kemi një kornizë ligjore shumë të fuqishme në mbrojtjen e parimit të barazisë dhe mos diskriminimit por fatkeqësisht si ligjet e tjera edhe ky ligj nuk po zbatohet në praktikë”, tha Qelaj.