Category: Lajme

Tre adoleshentë humbën jetën në fshatin Jabllanicë të Gjakovës pasi u shemb një objekt. Familjarët që po i kërkonin arritën të lokalizojnë viktimat vetëm përmes dridhjeve të telefonit, kur u afruan te vendi i ngjarjes.

Një ngjarje e rëndë tronditi Kosovën mbrëmjen e së shtunës, ku tre adoleshentë humbën jetën pasi një objekt i braktisur në të cilën po luanin u shemb në rrethana ende të panjohura, duke i zënë poshtë tij.

Rasti ndodhi në fshatin Jabllanicë të Gjakovës, ndërsa viktimat janë Ramë Mehmeti, Ideal Ramaj dhe Veton Morina të gjithë të moshës 13 dhe 15-vjeçare.

Objekti njëkatësh ishte djegur gjatë luftës, ndërsa për më shumë se dy dekada e gjysmë nuk ishte rikonstruktuar asnjëherë.

Kamerat e sigurisë të vendosura pranë shtëpisë më të afërt kanë fiksuar kohën 16:35 minuta si momentin kur është shembur objekti, që dikur shërbente si market i lagjes. Trupat e pajetë të tre të rinjve u nxorën rreth orës 23:00.

Familjarët filluan kërkimet për fëmijët menjëherë sapo ata nuk po lajmëroheshin në telefonat e tyre.

Megjithatë, pikërisht dridhja e telefonit bëri që të ndihmojë fshatarët të identifikonin vendin se ku ishin tre të rinjtë.

“Telefoni iu bënte por nuk e hapshin, edhe ky objekti kur e kanë pa mbrëmë rreth orës 22:00 që është shembur kemi ardhur këtu edhe kur kemi thirr ne telefona kanë bërë telefonat nën gërmadha”, u shpreh Përparim Ademaj, familjar i viktimave

Banorët e fshatit u mobilizuan për të gjetur tre të rinjtë dhe për orë të tëra vijuan kërkimet deri në momentin kur kuptuan se situata është më e rëndë dhe kërkuan ndihmën e policisë.

“Njëri prej tyre e kishte zënë në këmbë, shumë të dëmtuar, trupat i kemi hipur në urgjencë, me një veturë, dy me një tjetër edhe janë çuar për Gjakovë”, deklaroi Bajrush Brahimaj, banor i fshatit.

Familjarët të dielën kishin hapur dyert për ngushëllime, ndërsa reagime për rastin kanë shprehur edhe krerët e shtetit si dhe të gjitha institucionet qendrore dhe lokale. (A2 Televizion)

Kryetari i AAK-së, Ramush Haradinaj, ka shkuar për ngushëllime te familjet e fëmijëve që vdiqën dje nga shembja e një objekti në fshatin Jabllanicë të Gjakovës, raporton Ekonomia Online.

“Me zemer të thyer te familjet që humbën më të dashurit e tyre në Jabllanicë. Ngushëllime, Zoti ju dhashtë force”, ka shkruar Haradinaj.

Ai ka publikuar fotografi nga vizita.

Bedri Hamza u ka shprehur ngushëllime familjeve Rama, Mehmeti dhe Morina për vdekjen tragjike të tre fëmijëve në Jabllanicë të Gjakovës.

Përmes një deklarate për Klan Kosova, Hamza bashkëndjen me familjet në këtë tragjedi.

”Me dhimbje të madhe e mora lajmin për vdekjen tragjike të tre fëmijëve në Jabllanicë të Gjakovës. Bashkëndjejmë me familjet dhe u shpreh ngushëllimet e mia më të sinqerta. Nuk ka fjalë që mund ta lehtësojë dhimbjen e humbjes së jetës së tre fëmijëve, por shpresojmë që familjet do të gjejnë forcë duke u mbështetur tek njëra-tjetra dhe duke e ditur që e gjithë Kosova po bashkëndjen me to në këto momente tepër të rënda”, ka thënë Hamza.

Policia në raportin 24-orësh ka thënë se objekti është shembur në rrethana të panjohura, ndërsa tre djemtë, dy 15 vjeç dhe tjetri 14 vjeç, ishin brenda kur u zunë nga pllaka.

Një person në Gjakovë derisa ishte duke punuar në oborrin e tij ka hasur në një mjet të dyshimtë. Njësia për deminim e FSK’së e ka tërheqhr mjetin e pashpërthyer të kategorisë D-9, raporton Ekonomia Online.

“GJETJE E MJETIT TË PASHËRTHYER- Rr. Gj.N. Kazazi, Gjakovë 01.02.2025, 09:40.Raportohet se deri sa ishte duke punuar në oborrin e tij ankuesi m/k kishte hasur në një mjet të dyshimtë të pashpërthyer. Njësia për deminim i FSK-së, ka bërë tërheqjen e mjetit të pa shpërthyer të kategorisë D-9. Nuk raportohet për ndonjë incident”, njofton Policia.

Komisioni Qendror i Zgjedhjeve ka filluar fazën e radhës të programit të trajnimit, në të cilën përfshihet trajnimi i anëtarëve të Këshillave të Vendvotimit, të cilët do të angazhohen në ditën e zgjedhjeve më 9 shkurt 2025, raporton Ekonomia Online.

Gjithashtu, për herë të parë do të mbahet programi i trajnimit për anëtarët e Këshillave të Vendvotimit të cilët do të angazhohen për votimin jashtë Kosovës më 8 shkurt 2025 në vendvotimet që do të hapen në përfaqësitë diplomatike.

Në këtë fazë të trajnimit do të përfshihen më shumë se 15 mijë anëtarë të Këshillave të Vendvotimit, të cilët janë emëruar nga KQZ dhe që u përkasin të gjitha komunave të Republikës së Kosovës.

Qëllimi i këtij trajnimi është që anëtarët e Këshillave të Vendvoitmit të përfitojnë njohuri mbi legjislacionin, rregulloret zgjedhore dhe procedurat zgjedhore që do t’i zbatojnë në ditën e zgjedhjeve për temat të ndryshme, si në vijim:

• Votimi dhe numërimi i fletëvotimeve në vendvotim;
• Votimi me kusht;
• Votimi për persona me nevoja të veçanta;
• Numërimi i fletëvotimeve në Qendrat Komunale të Numërimit;
• Procedurat për pranimin dhe dorëzimin e materialeve zgjedhore.

Sipas vendimit të KQZ-së, numri i vendvotimeve në të cilat do të zhvillohet procesi i votimit në Republikën e Kosovës është 2,533 vendvotime, ndërkaq numri i vendvotimeve për votimin jashtë Kosovës, në përfaqësi diplomatike, është 43 vendvotime.

Qindra studentë në Serbi, të përkrahur edhe nga qytetarë tjerë, e kanë kaluar natën në afërsi të Urës së Lirisë në Novi Sad, në kuadër të bllokadës 24-orëshe. Bllokada ka nisur më 1 shkurt, në tremujorin e incidentit në këtë qytet, ku kanë vdekur 15 persona, si pasojë e shembjes së një strehe betoni në stacionin hekurudhor të qytetit.

Studentët besojnë se incidenti është pasojë e korrupsionit qeveritar në një projekt të madh infrastrukturor me një kompani shtetërore të Kinës.

Në nisje të protestës më 1 shkurt, protestuesit kanë bllokuar për tri orë edhe dy urat tjera të Novi Sadit, Varadin dhe Zhezhel.

Në mbrëmjen e së shtunës, figura të njohura publike dhe kulturore kanë folur para protestuesve. Protestuesit kanë qëndruar në afërsi të urës, nga frika se ajo mund të mbingarkohej. Bllokada 24-orëshe në Urën e Lirisë pritet të përfundojë në orën 15:00 të së dielës, mirëpo mund të zgjatet, nëse ashtu merren vesh protestuesit.

Studentëve në Novi Sad u janë bashkuar edhe kolegët e tyre prej Beogradit, të cilët kanë ecur për dy ditë prej kryeqytetit. Në protestë ka pasur edhe qytetarë prej rajoneve tjera të Serbisë.

Prej incidentit të 1 nëntorit në Serbi, mijëra njerëz kanë protestuar rregullisht nëpër rrugë.

Protestat e vazhdueshme kanë rezultuar me dorëheqjen e kryeministrit serb, Millosh Vuçeviq, më herët gjatë javës, dhe një mori koncesionesh të bëra nga Qeveria populiste, e cila bën përpjekje të qetësojë rezistencën.

Megjithatë, studentët kanë insistuar se do ta vazhdojnë protestën deri në realizim të kërkesave të tyre.

Kërkesat e studentëve për ndalimin e bllokadave përfshijnë publikimin e dokumentacionit të plotë për rindërtimin e stacionit hekurudhor të Novi Sadit, për të përcaktuar përgjegjësinë për aksidentin e 1 nëntorit, 2024.

Ata gjithashtu kërkojnë që sulmuesit e demonstruesve nëpër Serbi, gjatë protestave që pasuan aksidentin, të identifikohen dhe të përballen me përgjegjësi penale.

Kërkesat përfshijnë edhe lirimin e aktivistëve të arrestuar gjatë protestave, ndalimin e procedurave penale kundër tyre, si dhe rritjen e buxhetit për universitetet.

Autoritetet, në anën tjetër, pretendojnë se i kanë plotësuar të gjitha kërkesat.REL

Izraeli liroi sot 183 palestinezë nga burgjet e tij në kuadër të raundit të katërt të shkëmbimit të të burgosurve sipas marrëveshjes së armëpushimit me Hamasin.

Fillimisht, 32 nga të burgosurit e liruar nga Bregu Perëndimor i pushtuar iu dorëzuan Kryqit të Kuq Ndërkombëtar nga objekti i Burgut Ofer pranë Ramallahut, në përputhje me kushtet e armëpushimit të 19 janarit.

Qindra palestinezë u mblodhën pranë Pallatit Kulturor në Ramallah për të mirëpritur të burgosurit e liruar, duke valëvitur flamuj palestinezë dhe duke brohoritur në mbështetje të rezistencës dhe Gazës.

Pavarësisht paralajmërimeve, turma u mblodh për të pritur të burgosurit, të cilët ngritën simbole fitoreje në kundërshtim me urdhrat izraelitë.

Shumë nga të burgosurit e liruar dukeshin me shëndet të dobët dhe trupa të dobët, me disa mezi në gjendje të ecnin. Ata u dërguan në spitalet në Ramallah për kontrolle mjekësore dhe trajtim, shtoi korrespondenti i Anadolus.

Duke komentuar shëndetin e dobët të të burgosurve të liruar, Hamasi tha se konfirmoi “brutalitetin” e asaj që palestinezët durojnë në burgjet izraelite.

Hamasi i përshkroi këto shkelje si “krime lufte dhe krime kundër njerëzimit që kërkojnë ndërhyrje të menjëhershme nga komuniteti ndërkombëtar, OKB-ja dhe grupet e të drejtave”.

Ndërkohë, stafi i Kryqit të Kuq Ndërkombëtar është shprehur “i zemëruar” për mënyrën sesi Izraeli liroi të burgosurit palestinezë sot, ndërsa ata u nxorrën jashtë në pranga me duart e tyre pas kokës, sipas të përditshmes izraelite Haaretz.

Më vonë, 143 të burgosur palestinezë të liruar mbërritën në Rripin e Gazës të shoqëruar nga Kryqi i Kuq. Shumë u dërguan në Spitalin Evropian në Khan Younis.

Midis tyre, 111 ishin arrestuar nga ushtria izraelite në Gaza gjatë luftës së saj që filloi më 7 tetor 2023.

Qindra palestinezë, përfshirë familjet e të burgosurve, u mblodhën jashtë në Khan Younis për të mirëpritur ish-të burgosurit.

Gjithsej, 183 palestinezë u liruan sot nga burgjet izraelite.

Prokuroria Themelore në Gjakovë ka njoftuar se me vendim të Prokurorit të Shtetit, trupat e pajetë të fëmijëve që vdiqën tragjikisht në Jabllanicë, janë dërguar për obduksion në Institutin e Mjekësisë Ligjore (IML), si dhe është inicuar rasti “Shkaktimi i rrezikut të përgjithshëm”, raporton Ekonomia Online.

“Prokuroria Themelore në Gjakovë, në lidhje me ngjarjen tragjike që ka ndodhur në fshatin Jabllanicë, Komuna e Gjakovës, informon publikun se dje në mesnatë nga Policia e Kosovës, jemi njoftuar se është shembur një objekt i pabanuar, duke rezultuar me humbjen e jetës së tre (3) personave të mitur, të cilët
fatkeqësisht ndodheshin brenda tij në momentin e shembjes”, thuhet në njoftim.

“Në vendin e ngjarjes kanë dalë Kryeprokurori, prokurori kujdestar, të gjitha njësit përkatëse të Policisë së Kosovës, si dhe ekipi mjekësor që ka konfirmuar vdekjen e fëmijëve. Me vendim të Prokurorit të Shtetit, trupat e pajetë janë dërguar për obduksion në Institutin e Mjekësisë Ligjore (IML), si dhe është inicuar rast ‘Shkaktimi i rrezikut të përgjithshëm’”.

Po ashtu bëhet e ditur se Prokurori i Shtetit, në koordinim të ngushtë me Policinë e Kosovës, po ndërmerr të gjitha veprimet e nevojshme për zbardhjen e këtij rasti.

Kryeministri izraelit, Benjamin Netanyahu, është planifikuar të niset të dielën për në Uashington, për të marrë pjesë në një seri takimesh me zyrtarë të lartë amerikanë, duke përfshirë një takim me presidentin amerikan Donald Trump.

Edhe pse zyrtarisht Netanyahu është planifikuar të qëndrojë në Uashington deri të enjten, vizita pritet të zgjatet.

Ndërsa takimi me Trumpin do të zhvillohet të martën, me diskutimet që pritet të fokusohen në negociatat e vazhdueshme, lirimin e pengjeve, kërcënimin iranian, normalizimin e marrëdhënieve me Arabinë Saudite dhe situatën në Siri dhe Liban.

Bëhet e ditur se zyrtarët izraelitë që u takuan këtë javë me Steve Witkoff, të dërguarin special të Trumpit në Lindjen e Mesme, morën përshtypjen se presidenti i SHBA-së po shtynte për një fazë të dytë në marrëveshjen e pengjeve.

Sipas kësaj faze, më shumë pengje do të liroheshin në këmbim të zgjatjes së armëpushimit dhe lirimit të të burgosurve palestinezë.

Hamasi, megjithatë, po kërkon një ndalim të plotë të luftës si kusht për avancimin e marrëveshjes.

Netanyahu e ka bërë të qartë se nuk do ta pranojë një kërkesë të tillë, shkruajnë mediat e huaja.

Për shkak të boshllëqeve të konsiderueshme mes palëve, një nga opsionet në diskutim është një zgjatje e fazës aktuale, e cila aktualisht shtrihet në 42 ditë.

Negociatat e marrëveshjes së pengjeve

“Ideja është që mund të ketë raunde shtesë lirimesh pengjesh në këmbim të një armëpushimi të zgjatur”, tha një zyrtar izraelit i njohur me negociatat.

“Por supozimi është se në një moment, edhe nëse bisedimet për një fazë ndërmjetëse – nganjëherë e quajtur – janë të suksesshme, Hamasi përfundimisht do të ndalojë negociatat sepse lufta nuk do të ndalet dhe Izraeli do të rifillojë luftimet”, shtoi ai.

“Vendimet në lidhje me negociatat do të merren vetëm pasi të kthehem nga Uashingtoni”, tha Netanyahu.

Irani dhe bashkëpunimi ushtarak

Irani pritet të jetë një tjetër temë qendrore e diskutimit mes Netanyahut dhe Trumpit.

Kryeministri po kërkon mbështetjen e Trumpit për veprime të mundshme ushtarake kundër objekteve bërthamore të Iranit, duke përfshirë sigurimin e bombave bunker-buster të furnizuara nga SHBA, të cilat janë kritike për goditjen e vendeve të fortifikuara nëntokësore.

Trump, megjithatë, kohët e fundit ka folur për ndjekjen e përpjekjeve diplomatike për të zgjidhur tensionet me Teheranin.

Por, ka një skepticizëm të thellë nëse diplomacia mund ta zgjidhë vërtet çështjen.

Normalizimi me Arabinë Saudite

Një tjetër pikë kyçe e rendit të ditës është shtytja për normalizim midis Izraelit dhe Arabisë Saudite, një qëllim diplomatik që Trump ndoqi gjatë mandatit të tij të parë, por nuk e arriti plotësisht.

Të martën, Witkoff zhvilloi bisedime në Arabinë Saudite, ku u informua se Riadi po kërkon ende një armëpushim në Gaza dhe një vizion të qartë diplomatik nga Netanyahu si parakusht për përparimin në bisedimet e normalizimit.

Të dyja këto kërkesa janë aktualisht politikisht të parealizueshme për Netanyahun, kanë treguar zyrtarët izraelitë.

Gjatë vizitës së tij, kryeministri izraelit është planifikuar të takohet edhe me Sekretarin e Shtetit të SHBA-së, Marco Rubio, Këshilltarin e Sigurisë Kombëtare, Mike Waltz dhe Sekretarin e Mbrojtjes Pete Hegseth, si dhe me anëtarë të lartë të Senatit dhe Dhomës.

Takimet do të fokusohen në bashkëpunimin strategjik midis Izraelit dhe Shteteve të Bashkuara, sfidat e vazhdueshme të sigurisë në rajon dhe politikën e administratës amerikane ndaj Izraelit dhe Lindjes së Mesme.abcnews.al