Për vdekjen e Bajram Qerkinit, ka ngushëlluar edhe kryetari i LDK-së, Lumir Abdixhiku.
Nëpërmjet një postimi në Facebook, Abdixhiku thotë se humbja e bacës Bajram thellohet edhe më shumë, kur ai u nda nga kjo jetë pa mësuar për fajtin e djalit të tij dhe shumë të zhdukurve të tjerë.
“Por trashëgimia e tij për drejtësi dhe lufta e palodhur për të gjithë të zhdukurit, do të mbeten në histori për breza të tërë. I lehtë të qoftë dheu i Kosovës!”, përfundon postimi.
Ndërmarrja “Trepça” ka larguar nga puna një punëtor që dyshohet se ka shkaktuar dëme financiare prej mbi 27 mijë euro.
Sipas njoftimit të kompanisë, sot komisioni disiplinor ka vendosur masën e “ndërprerjes së marrëdhënies së punës” për punëtorin në fjalë.
Njoftimi i plotë:
Me datën 24.02.2025 Komisioni Disiplinor ka mbajtur shqyrtimin publik lidhur me rastin e z.Sh.S. Pas mbajtjes së shqyrtimit publik Komisioni Disiplinor ka vërtetuar se i njëjti ka kryer shkelje të rendë të detyrave të punës nga neni 10 paragrafi 1 nën paragrafi 1.1, 1.5, 1.13 dhe 1.52 i Rregullores nr.prot: 2906 dt. 30.07.2020 për përgjegjësinë disiplinore dhe materiale të punëtorëve të Trepça Sh.A, për shkak se i njëjti i ka shkaktuar dëm financiar Ndërmarrjes Trepça Sh.A., mbi 27,472.00 euro, dhe i njëjti ka qenë recidivist i shkeljeve të rënda të detyrave të punës dhe në disa raste të tjera e gjithë kjo e bazuar në raportin 983 nga komisionet përkatëse.
Andaj, Komisioni disiplinor ka sjellur vendim me nr.prot: 1198 të dt. 24.02.2025 dhe ka shqiptuar masën disiplinore ndërprerja e marrëdhënies së punës për z.Sh.S.
Vullkani Etna në Itali sërish ka filluar të nxjerrë llavë.
Sipas informacionit që AA ka siguruar nga burimet lokale, rrjedha e llavës e cila nisi një çarje në skajin jugor të kraterit Bocca Nuova në një lartësi prej rreth 3.300 metra më 8 shkurt, mbrëmjen e kaluar ka shpërthyer sërish, raporton Anadolu.
Në informacionin e ndarë me mediat nga Instituti Kombëtar i Gjeofizikës dhe Vullkanologjisë (INGV), thuhet se përveç rrjedhjes së llavës në vullkan, kishte edhe një aktivitet të dobët të nxjerrjes së hirit.
Raportet tjera mediatike thanë se udhëtimi ajror nuk është ndikuar negativisht nga aktiviteti vullkanik në Etna dhe se Aeroporti Ndërkombëtar i Catanias “Vincenzo Bellini”, pranë vullkanit, është gjithashtu i hapur për trafikun ajror.
Aktivitetet vullkanike në Etna janë vërejtur që nga 8 shkurti.
Në muajt e verës së vitit 2024 në vullkanin Etna në ishullin e Siçilisë i cili është vullkani më i lartë aktiv në Evropën kontinentale u shënuan aktivitete vullkanike të tilla si shpërthime të fuqishme të hirit dhe llavës.
Në kuadër të karnavalit të Venecias në urën “Ponte degli Scalzi” në Venecia të Italisë u mbajt një protestë në mbështetje të Ukrainës.
Në protestë tërhoqën vëmendjen kostumet shumëngjyrëshe të karnavalit, raporton Anadolu.
Gjithashtu në pamje vërehen flamujt e Ukrainës të varur mbi urë, njerëzit që marshojnë me flamuj ukrainas në duar si dhe ata që ecin nëpër rrugica me kostume historike.
Sot shënohet tre vjetori nga agresioni ushtarak i Rusisë në Ukrainë.
Rusia nisi pushtimin në shkallë të plotë të Ukrainës më 24 shkurt 2022 dhe presidenti rus Vladimir Putin priste të pushtonte të gjithë vendin brenda pak ditësh, por ajo që ndodhi në vend të kësaj ishin tri vjet luftime intensive falë qëndresës së armatosur ukrainase me ndihma që vinin nga aleatët perëndimorë.
Asamblistët e opozitës në Kuvendin e Novi Sadit u penguan të hyjnë në ndërtesë dhe të marrin pjesë në seancën në të cilën do të zgjidhet kryetari i ri i komunës. Qytetarët hodhën vezë ndaj punonjësve të policisë, ndërsa asamblistët tentuan të çajnë kordonin para hyrjes. Një numër i madh i policëve, të cilët kishin qenë brenda që në mëngjes herët, dolën nga ndërtesa e Kuvendit dhe pastruan pllatonë para Kuvendit të Novi Sadit.
Siç është paralajmëruar edhe më herët, seanca për zgjedhjen e kryetarit të Novi Sadit është caktuar për në orën 10:00.
Policia me pajisje për thyerjen e demonstratave, me mburoja dhe helmeta dhe qen policie, mbërriti me autobus dhe makina të shumta policie, raporton N1.
Që herët në mëngjes, rreth orës 6:30, në ndërtesën e Kuvendit kanë nisur të mbërrijnë efektivë të policisë. Sipas videove të postuara në rrjetin social “X” nga gazetari Zarko Bogosavljeviq, policët ishin të veshur me pajisje të plota në hyrje të parlamentit të qytetit.
Rreth orës shtatë, makinat e policisë kanë mbërritur para Kuvendit të Novi Sadit. Menjëherë pas kësaj, një grup tjetër oficerësh policie mbërriti në ndërtesën e parlamentit të Novi Sadit. Vetëm 15 minuta më vonë, siç njoftoi gazetari Bogosavljeviq në llogarinë e tij X, mbërritën edhe shumë makina tjera policie.
Njëzet e katër subjekte, koalicione apo kandidatë të pavarur, që garuan në zgjedhjet e 9 shkurtit në Kosovë, nuk e kaluan pragun zgjedhor prej 5 për qind.
Në mesin e tyre janë katër që përfaqësojnë komunitetin shumicë shqiptar dhe në total- sipas rezultateve preliminare – këto numërojnë gati 21 mijë vota, apo 2 për qind. Por, çka ndodh me këto vota?
Komisioni Qendror i Zgjedhjeve i certifikon rezultatet e tyre por votat nuk shpërndahen apo nuk i shkojnë ndonjë partie tjetër që ka marrë më shumë se 5 për qind.
Ligji për Zgjedhjet e Përgjithshme thotë se 120 ulëset në Kuvendin e Kosovës ndahen në bazë të numrit të përgjithshëm të votave të vlefshme që i ka fituar secili subjekt politik, në mesin e subjekteve politike që përfaqësojnë komunitetin shumicë të cilat kanë fituar së paku pesë për qind nga numri i përgjithshëm i votave të vlefshme në zgjedhjet për Kuvend dhe subjekteve politike që përfaqësojnë komunitetet që nuk janë shumicë.
Në Kuvendin e Kosovës, 20 ulëse janë të garantuara për komunitetet jo shumicë – 10 për serbët dhe të tjerat për pakicat jo serbe.
Zëdhënësi i KQZ-së, Valmir Elezi thotë për KosovaPress se ky institucion i certifikon rezultatet e secilit subjekt politik apo kandidatë që ka marr pjesë në zgjedhje, edhe kur nuk e kalojnë pragun, derisa shton se ligji përcakton se në ndarjen e mandatave për Kuvendin e Kosovës përfshihen vetëm subjektet politike të cilat e kanë kaluar pragun zgjedhor.
“Komisioni Qendror i Zgjedhjeve i certifikon rezultatet për secilin subjekt politik dhe kandidatët e certifikuar për pjesëmarrje në zgjedhje. Pra, KQZ certifikon rezultatet e subjekteve politike, ku përfshihet numri dhe përqindja e votave të fituara edhe në rastin kur ato nuk e kalojnë pragun e paraparë prej 5%. Sipas ligjit, në ndarjen e mandatave për Kuvendin e Kosovës përfshihen vetëm subjektet politike të cilat e kanë kaluar pragun zgjedhor”, thotë Elezi.
Vullnet Bugaqku nga Instituti Demokratik i Kosovës thotë se votat e subjekteve politike që nuk e kanë kaluar pragun zgjedhor nuk kanë asnjë rëndësi në përcaktimin e ulëseve të reja në Kuvend.
“Votat e subjekteve që nuk e kanë kaluar pragun nuk shpërndahen tek subjektet tjera që kanë hyrë në Parlamentin e Kosovës sepse në momentin kur ti e kalon pragun prej 5%, me automatizëm ty të ndahet formula e ndarjes në parlament. Dikush i ka 5.5%, i merr 7 ulëse, dikush 25% i merr ndoshta 30 deputetë. Kjo ndarja e 100 vendeve bëhet për subjektet që e kanë kaluar pragun zgjedhor, jo për ato që nuk e kanë kaluar pragun zgjedhor”, thotë ai. Profesori i çështjeve juridike, Mazllum Baraliu kujton se më herët ishte praktikë që votat e subjekteve politike që nuk e kanë kaluar pragun zgjedhor prej 5% të shpërndahen te partitë që kanë arritur të jenë pjesë e Kuvendit të Kosovës.
“Ato që nuk e kanë kaluar pragun zgjedhor, partitë pra, apo kandidatët e pavarur ose subjektet politike….me ligjin paraprak para këtij plotësim-ndryshimi janë rivendosur dhe janë dhënë dhuratë sipas sistemit të rotacionit prej partisë më të madhe, të dytës, të tretës partive politike që kanë marr mandate. Por është deklaruar se tani më ato vota nuk mund të llogariten”, thotë Baraliu.
Më 9 shkurt në Kosovë u zhvilluan zgjedhjet e rregullta parlamentare, ku morën pjesë mbi 40% e qytetarëve me të drejtë vote.
Sipas rezultateve aktuale, në këto zgjedhje parlamentare partia fituese është Lëvizja Vetëvendosje, në koalicion me Guxo dhe Alternativa me 40.90 %, pas saj renditet Partia Demokratike e Kosovës me 22.03 %, pasuar nga Lidhja Demokratike të Kosovës me 17.64 %. Koalicioni AAK-NISMA ka marr 7.46 % të votave, ndërsa Lista Serbe me 4.60%./KP
Sekretarja e shtypit e Shtëpisë së Bardhë Karoline Leavitt ka deklaruar se presidenti Donald Trump ka besim në aftësinë e tij për të arritur një marrëveshje me Rusinë për t’i dhënë fund konfliktit në Ukrainë, duke sugjeruar se fundi i luftës trevjeçare mund të vijë që në fillim të kësaj jave.
“Presidenti, ekipi i tij janë shumë të përqendruar në vazhdimin e negociatave me të dyja palët e kësaj lufte për t’i dhënë fund konfliktit dhe presidenti është shumë i sigurt se mund ta arrijmë këtë këtë javë”, tha Leavitt.
Bëhet e ditur se komentet vijnë pasi Trump sugjeroi se presidenti ukrainas Volodymyr Zelensky “nuk është i rëndësishëm për të qenë pjesë e negociatave”, shkruajnë mediat e huaja.
Leavitt përmendi se Këshilltari i Sigurisë Kombëtare Matt Waltz do të punonte “rreth orës” këtë fundjavë për një marrëveshje dhe tha se Sekretari i Thesarit Scott Bessent ka qenë i përfshirë në diskutimet rreth një marrëveshjeje të propozuar me ukrainasit për shfrytëzimin e mineraleve të rralla.
“Kur bëhet fjalë për mineralet kritike, kjo është një pjesë e rëndësishme për presidentin. Është shumë e rëndësishme, sepse do të rikuperojë dollarët e taksave amerikane”, tha sekretarja.
“Dhe gjithashtu do të jetë një partneritet i madh ekonomik midis Shteteve të Bashkuara të Amerikës dhe për popullin ukrainas, që edhe ata të rindërtojnë vendin e tyre pas kësaj lufte brutale”, shtoi ajo.
Diçka po ndodh në Lombardi që nuk mund të shpjegohet. Ky ishte titulli i një gazete italiane në ditët pas zbulimit të rastit të parë evropian të Covid-19 në Spitalin Codogno, shkruan salute.eu.
Që atëherë, një vorbull lajmesh dramatike, deklaratash të guximshme dhe disa shfrytëzime pushtuan debatin publik. Të gjithë papritmas u bënë ekspert në epidemiologji, virologji, modele parashikimi dhe masa parandaluese.
Midis tyre, disa ishin efektive (maska dhe teste kontakti), të tjera ishin të padobishme, si matja e temperaturës së trupit etje.
Kanë kaluar pesë vjet që kur pandemia goditi rëndë Italinë dhe në veçanti Lombardinë me dy shpërthime kryesore në zonat Lodi dhe Bergamo (me degëzime në zonën Lecco). Në ato ditë u përhap ideja se Rajoni kishte paguar një çmim më të lartë për kujdesin shëndetësor për shkak të joefikasitetit në sistem.
Grupi ynë kërkimor, me studime rigoroze epidemiologjike, ka demonstruar në vend të kësaj se ndikimi i dukshëm më i madh ishte për shkak të kombinimit të një popullate më të vjetër (dy herë më të vjetër se në rajonet e tjera evropiane) dhe qarkullimit të hershëm dhe të pavërejtur të virusit në popullatë.
Shërbimet Shëndetësor Europiane u vunë në provë dhe reaguan me një qëndrueshmëri të jashtëzakonshme, duke arritur të dyfishojnë shtretërit e kujdesit intensiv në vetëm gjashtë javë, duke garantuar shtrimin në spital në pak ditë për të gjithë atyre që kishin nevojë për kujdes.
Sot, me një mekanizëm befasues largimi, Covid-i duket se është pothuajse i harruar. Edhe individët më të rrezikuar heqin dorë nga doza përforcuese, shpesh pa marrë rekomandimin adekuat nga mjekët e tyre.
Megjithatë, shkenca ka bërë përparim të jashtëzakonshëm: zhvillimi i një vaksine efektive në vetëm pak muaj ishte një sukses i paprecedentë dhe ndarja në kohë e të dhënave shkencore ka përmirësuar reagimin global ndaj emergjencave shëndetësore.
Shërbimet Shëndetësore Kombëtare, nga ana tjetër, janë dobësuar. Listat e pritjeve janë zgjatur për shkak të mos rikuperimit të shërbimeve të humbura gjatë pandemisë,
Mungesa e personelit shëndetësor, si mjekë ashtu edhe infermierë, është më serioze se kurrë, ndërkohë që burimet për sistemin shëndetësor vazhdojnë të jenë të pakta.
Pesë vjet më vonë, pyetja është e pashmangshme: ”a e kemi mësuar vërtet mësimin tonë?
Çfarë kemi mësuar pas pesë vjetësh? Cilat gabime nuk duhet të përsërisim në rast të një pandemie të mundshme të ardhshme?
Prokuroria Themelore në Pejë dhe Policia e Kosovës kanë konfirmuar për Ekonomia Online se janë arrestuar dy të dyshuarit për plagosjen që ndodhi mbrëmë në Komunën e Klinës.
Sipas informatave katër viktimat janë vëllezër, por që arsyet që kanë çuar deri të konflikti ende nuk janë të ditura për Prokurorin e Policinë.
Zëdhënësi i Prokurorisë Themelore në Pejë, Shkodran Nikçi, ka konfirmuar për Ekonomia Online se pas një operacioni intensiv janë lokalizuar dhe arrestuar të dyshuarit.
Ai theksoi se hetimet janë në fazën fillestare dhe se viktimat do të intervistohen pasi të marrin trajtimin mjekësor.
“Lidhur me këtë çështje dyshohet se ka pasur të shtëna me armë zjarri ku në vendin e ngjarjes ka dal Policia e Kosovës, ku në vendin e ngjarjes ka dal menjëherë Policia e Kosovës ku ka hasur në njërën nga viktimat. Ku më pas në spitalin Rajonal të Pjesë kanë kërkuar ndihmë mjekësore dhe janë duke u trajtuar edhe tre persona të tjerë, ndërkaq përsonat e dyshuar janë larguar nga vendi i ngjarjes. Pas një punë operative policore intensive janë lokalizuar dy personat e dyshuar dhe më pas janë arrestuar dhe të njëjtit pas intervistimit nga hetuesit në praninë e avokatëve mbrojtës me urdhër të prokurorit të shteti janë ndaluar për 48 orë dhe brenda afatit ligjor prokurori i shtetit do të parashtroj kërkesë për caktimin e masës së paraburgimit”, ka thënë Nikçi.
Nikçi ka thënë se të dy personat janë në procedurë penale.
“Është fazë shumë e hershme për të folur për dyshimet. Ajo çka është relevante është se dy persona i kemi në procedurë penale dhe njëkohësisht janë duke u trajtuar viktimat dhe ku me pas do të intervistohen, do të intervistohen edhe personat e mundshme të tjerë që mund të kenë informata dhe gjithashtu do të sigurohen provat që do të shërbejnë në procedurë penale”, ka thënë ai.
Zëdhënësi i Policisë së Kosovës për rajonin e Pejës, Fadil Gashi, tha se policia ka sekuestruar armën që dyshohet se është përdorur në rast si dhe një mjete të mbrehtë.
“Do të thotë mbrëmë rreth orës 22:40 minuta polica është njoftuar se në rrugën Ilir Merkuri në Klinë ka të shtëna me armë zjarri. Policia me kërkesë ju kanë përgjigjur me të arritur në vend të ngjarjes ka takuare një person të lënduar të cilin e ka transferuar për në emergjencë të spitalit rajonal në Pejë. Gjithashtu edhe tre personat të janë dërguar për në emergjencën e spitalit rajonal në Pejë. Të dyshuarit janë larguar nga vendi i ngjarjes, pas pak kohë polica ka arritur të identifikoj lokacionin dhe t’i arrestoj dy të dyshuar lidhur me rastin. Pas intervistimit me urdhër të prokurorit të dyshuarit janë dërguar në mbajtje. Vlen të cekët se arma e cila dyshohet se është përdorur në rast është sekuestruara nga njësit kompetente. Gjithashtu është konfiskuar nië mjet i mbrehtë”, ka thënë ai.
Agjencia Kombëtare e Punësimit dhe Aftësive (AKPA) bën të ditur se në 2024-ën janë punësuar në vendin tonë mbi 13 mijë shtetas të huaj me një kontratë të rregullt pune.
“Rritja e numrit të të huajve ka si arsye rritjen ekonomike që ka pësuar vendi. Në vitin 2024 janë të regjistruar 700 mijë të punësuar në listëpagesat tona, ku rreth 13 mijë janë të huaj që kanë aplikuar për t’u punësuar në Shqipëri”, shprehet drejtoresha e Shërbimit të Tregut të Punës, Gertiola Çepani në një intervistë në media.
Të huajt në tregun e punës dominohen nga italianët, turqit dhe indianët, por nuk mungojnë edhe nga shtetet e tjera, ATSh.
Sektorët kryesorë ku janë siguruar kontratat e punës renditen shërbimi, akomodi, ndërtimi, tregtia dhe industria përpunuese.
Ligji parashikon që të gjithë shtetasit e huaj duhet të sigurojnë një kontratë pune, për të aplikuar më pas për leje qëndrimi në vendin tonë.