Category: Lajme

Ministrja në detyrë e Ekonomisë, Artane Rizvanolli, në emisionin CONTEXT në ATV, ka folur për rastin e Martin Berishajt dhe akuzat për përfitime nga shitja e energjisë, duke i cilësuar ato si sulme politike pa asnjë fakt konkret.

Ajo tha se nuk do të vazhdonte detyrën e saj si ministre po të kishte edhe një arsye të vetme për të besuar se dikush ka përfituar qëllimshëm nga kriza energjetike.

“Jo, jo dhe jo, sikur të kishte një fakt – jo fakt, po akuzë – për këtë çështje, unë nuk do të isha ministre, dhe nuk do të isha këtu duke folur për energji. Sikur të mendoja, sikur të kisha arsyen më të vogël për të menduar se dikush ka bërë diçka me qëllim për të përfituar prej krizës energjetike, nuk do të isha këtu duke biseduar me ty. Kjo duhet të dihet”, tha Rizvanolli.

Ajo e cilësoi të gjithë rastin si një sulm të qëllimshëm politik, duke thënë se energjia është bërë cak për shkak të ndjeshmërisë së situatës dhe krizës botërore.

“Ka qenë një sulm politik. Pse është fokusuar sulmi politik te energjia? Besoj që ka qenë sepse kjo është pika ku jemi më të ndjeshëm, se na kanë lënë një bombë të kurdisur në dorë… Emrat që përmenden, si në rastin e Nagip Krasniqit, të cilit ia kanë shkatërruar karrierën dhe ndoshta edhe jetën, nuk ka asnjë fakt, asnjë arsye me besu që asnjëri prej tyre kanë fituar asnjë cent prej trajtimit të energjisë elektrike”, u shpreh Rizvanolli.

Deklaratën e plotë të Artane Rizvanollit në CONTEXT, e gjeni në videon më poshtë:

Ministrja në detyrë e Ekonomisë, Artane Rizvanolli, në emisionin CONTEXT në ATV, tha se edhe pas më shumë se një dekade nga privatizimi i distribucionit, Kosova vazhdon të ketë humbje të mëdha të energjisë dhe raste të vjedhjes së saj.

Ajo tha se nuk është bërë monitorimi i investimeve të raportuara nga operatori, ndërsa humbjet mbesin shumë më të larta sesa standardet ndërkombëtare.

“Dua të cek një çështje, për të cilën jemi jashtëzakonisht të brengosur, e këto janë humbjet në distribucion. Fakti është që ne nuk kemi një zgjidhje afatgjatë për humbjet. 11 vjet nga operimi pas privatizimit të distribucionit, ne ende i kemi humbje të larta. Sigurisht që ka pasur ulje, mirëpo jemi larg normave të lejuara teknike rreth pesë për qind që janë në shtetet e zhvilluara”, tha Rizvanolli.

Sipas saj, raportet nga terreni tregojnë se shumë prej investimeve të raportuara si të realizuara nuk janë bërë fare, ndërsa mungesa e kapaciteteve në ZRRE ka pamundësuar mbikëqyrjen.

“Në Kosovë ende vidhet energjia. Monitorimi i investimeve nuk është bërë kurrë. Në raportimet që ZRRE-ja i ka pasur në Kuvend, veçanërisht nga Grupi Parlamentar i Lëvizjes Vetëvendosje, ka pasur pyetje të vazhdueshme përse nuk janë monitoruar investimet. Përgjigja e ZRRE-së ka qenë se nuk kanë pasur kapacitete. Realisht, në terren, investimet që KEDS-i ka raportuar si të realizuara, nuk janë bërë”, u shpreh Rizvanolli.

Deklaratën e plotë të Artane Rizvanollit në CONTEXT, e gjeni në videon më poshtë:

Ministrja në detyrë e Ekonomisë, Artane Rizvanolli, në emisionin CONTEXT në ATV, tha se Qeveria i ka propozuar ZRRE-së vendosjen e një tarife të re për konsumatorët që shpenzojnë mbi 800 kilovatë orë energji elektrike në muaj.

Ajo tha se tarifa aktuale për konsumuesit e këtij blloku nuk është e drejtë, pasi e njëjta aplikohet edhe për ata që shpenzojnë shumë më tepër.

“E konsiderojmë që nuk është e drejtë që tarifa e lartë për bllokun mbi 800 kilovat orë të jetë e njëjtë sikur për dikë që i shpenzon 1000 kilovat orë, sikur për dikë që i shpenzon 5000 kilovat orë”, tha Rizvanolli.

Sipas saj, ky propozim është pjesë e një analize më të gjerë për të zbutur rritjen e tarifave dhe për të shpërndarë më drejt barrën e konsumit.

“Ne kemi propozuar tek ZRRE-ja disa ndryshime… E para është që të zbutet rritja, të ulen të hyrat e lejuara të kompanive dhe rrjedhimisht edhe të zbutet rritja në masën që është e mundshme… kemi kërkuar që kjo të reflektohet në uljen e tyreve të lejuara dhe rrjedhimisht edhe në tarifa”, tha Rizvanolli.

Deklaratën e plotë të Artane Rizvanollit në CONTEXT, e gjeni në videon më poshtë:

Ministrja në detyrë e Ekonomisë, Artane Rizvanolli, në emisionin CONTEXT në ATV, tha se Qeveria i ka propozuar ZRRE-së që të ketë një rritje më të butë të çmimit të energjisë elektrike, përmes uljes së të hyrave të lejuara të kompanive.

Sipas saj, Qeveria ka dhënë argumente konkrete që e justifikojnë këtë propozim, përfshirë edhe shtimin e kapaciteteve prodhuese nga Kosova B.

“Ne kemi propozuar tek ZRRE-ja disa ndryshime… E para është që të zbutet rritja, të ulen të hyrat e lejuara të kompanive dhe rrjedhimisht edhe të zbutet rritja në masën që është e mundshme… Pas intervenimeve që do të bëhen në Bllok B gjatë kësaj pranvere dhe vere, prej fundit të tetorit do të shtohet kapaciteti për pesëmbëdhjetë megavat, që do të thotë se për tridhjetë e nëntë gigavat orë në periudhën tetor-dhjetor do të rritet prodhimi i termocentralit Kosova B, dhe kjo nënkupton që diku rreth gjashtë milionë, së paku, do të ketë import më pak”, tha Rizvanolli.

Ajo tha se kërkuan edhe më shumë sqarime për propozimin aktual të ZRRE-së, pasi sipas saj, ka diskrepanca të mëdha krahasuar me vitin e kaluar.

“E kemi parë se përgjatë vitit të kaluar ka pasur njëfarë stabilizimi të kërkesës… çmimi ka qenë përafërsisht i njëjtë, por në fundvit ka qenë më i lartë… Prodhimi i KEK-ut ka qenë shtatë për qind më i lartë në vitin 2024 në krahasim me vitin 2023… Ka një diskrepancë shumë të madhe në propozime, prandaj kemi kërkuar më shumë sqarime shtesë”, tha Rizvanolli.

Deklaratën e plotë të Artane Rizvanollit në CONTEXT, e gjeni në videon më poshtë:

Përgatiti: Arian Hajdaraj

Lule-radhiqet që janë prej të parave lule që dalin në pranverë, kanë mbirë në stadiumin e Gjilanit.

Por, në këtë hapësirë, me shumë mundësi do të dalin e do të vyshken të gjitha lulet e stinës pa u luajtur asnjë ndeshje, meqenëse procedura për ndërtimin e stadiumit, përfundoi sërish në OSHP.

Vetëm disa ditë pasi ministria e kulturës e rekomandoi për kontratë operatorin ekonomik BM group SHPK, në organin shqyrtues të prokurimit u dorëzuan 2 ankesa, bazuar në të cilat u pezullua procedura.

Ankuesi i parë, Conex SHPK, kërkon që lënda të kthehet në rishqyrtim, meqenëse sipas tyre, autoriteti kontraktues Ministria e Kulturës, I ka shkelur hiç më pak se 7 nene të Ligjit për Prokurimin Publik. Conex shpk, poashtu pretendon se ofertuan për 500 mijë euro më lirë sesa operatori ekonomik i rekomanduar nga ministria, andaj për kaq para do të kursehej buxheti i shtetit.

Pezullim të procedurës kërkon edhe operatori i dytë ekonomik, RAF II shpk. Ky operator ekonomik pretendon se jo 7, por rrafsh 13 nene të LPP-së, u shkelën nga autoriteti kontraktues, në këtë rast ministria e kulturës.

Procedura për ndërtimin e këtij stadiumi kishte filluar qysh në fitin 2017. Aso kohe, projekti ishte iniciuar nga komuna e Gjilanit. Por, për shkak të prolongimit disavjeçar, procedura kaloi në duar të Ministrisë së Kulturës në fund të vitit 2024. Megjithatë, as ky autoritet kontraktues nuk arriti që suksesshëm të procedojë projektin që pritet të kushtojë afro 15 milionë euro.

Përgatiti: Pranvera Krasniqi

Vetëm rreth 1 përqind e territorit të Kosovës mbulohet me ujë. Por as edhe kjo sasi e vogël ujore, nuk po trajtohet siç duhet.

Andaj, Ministria e Mjedisit bashkë me ekspert të fushës nga vende të ndryshme, kanë hartuar një strategji qindra faqesh që specifikon problemet e sistemit ujor dhe zgjidhjet eventuale.

Në këtë dokument konstatohet se resurset ujore janë nën presion, kryesisht në aspektin e sasisë dhe cilësisë.

Përveç Ibrit, problematika të të njëjtit lloj janë specifikuar edhe në planin për menaxhimin e pellgut të lumit Lepenc, dhe Morava e Binçës.
Dokumentet, aktualisht janë në konsultim publik.

Menjëherë pas mbarimit të kësaj procedure rekomandohet të nis puna në teren.

“Strategjitë janë shumë të mira nëse nuk mbesin vetëm në letër, i dimë çështjet e lumenjve ndër vite dhe situatën që gjenden…”, tha Besnik Shabiu, ambientalist.

Reshjet me intensitet e kohëzgjatje të ndryshme në vend në fillim të pranverës, kanë ngritur nivelin e disa prej lumenjve. Andaj, meqë situatë e njëjtë pritet të përsëritet ditëve në vijim, instituti meteorologjik, bazuar në gjendjen aktuale të pellgjeve, druan se do të ketë vërshime.

Strategjitë për menaxhimin e pellgut të lumit Ibër, Lepenc dhe Morava e Binçës, janë në konsultim publik deri më 5 gusht, 2025.