Category: Lajme

Presidentja Vjosa Osmani ka kujtuar masakrën e Rezallës në 26-vjetorin e shënimit të saj, duke theksuar se nuk do të ndalen së kërkuari drejtësi, raporton Gazeta Sinjali.

Osmani tha se, në një akt çnjerëzor, 98 djem dhe burra nga Rezalla dhe fshatrat përreth u ekzekutuan, ndërsa trupat e 44 prej viktimave u zhdukën për të fshehur gjurmët e gjenocidit.

Ajo shtoi se disa nga këto trupa u gjetën më vonë në varrezat masive në Rudnicë të Rashkës, në Serbi.

“Masakra e Rezallës ishte pjesë e një plani sistematik të shtetit serb për shfarosje , duke dëbuar me dhunë shqiptarët nga toka e tyre, nëpërmjet përndjekjes, vrasjeve masive, dhunimeve, djegieve dhe shkatërrimit. Ne nuk do të ndalemi së kërkuari drejtësi, sikurse as duke i kujtuar dhe nderuar përherë. Lavdi përjetë martirëve të Rezallës!” shtoi ajo.

Një ngjarje e rëndë ka ndodhur sot në fshatin Nabërgjan të Pejës, ku një person është gjetur pa shenja jete në një objekt përcjellës (garazh) të shtëpisë. Viktima e këtij rasti është një grua, ndërsa rasti tashmë po hetohet nga Policia.

Sipas informacioneve të para, ngjarja ka ndodhur rreth orës 10:45, derisa vdekja e viktimës është konstatuar nga ekipet mjekësore në vendin e ngjarjes.

Ndërkaq, në lokacionin ku ka ndodhur rasti kanë dalë edhe njësitet policore, të cilët kanë nisur hetimet për zbardhjen e rrethanave të rastit.

Sot në Ulqin po protestohet nga një numër i madh i banorëve, të cilët janë kundër planit për dhënien me qira dhe privatizimin e hapësirave publike bregdetare, një çështje që ka shkaktuar shqetësim të madh mes qytetarëve të këtij qyteti bregdetar dhe jo vetëm.

Motoja e protestës është “Ulqini nuk është në shitje”, një mesazh i fortë dhe i qartë për ata që po tentojnë të ndërmarrin hapa që mund të dëmtojnë qytetin dhe mjedisin e tij.

Ndërkohë, mbrëmë në një lidhje direkte në emisionin ‘Compass’ në ATV, deputeti shqiptar në Kuvendin e Malit të Zi, Ilir Capini tha se në bazë të marrëveshjes së qeverisë malazeze, Plazhi i Ulqinit synohet t’i jepet vetëm një investitori nga Emiratet e Bashkuara, për 99 vjet.

Për më shumë ndiqni videon e mëposhtme:

Numri i viktimave nga tërmeti i fuqishëm në Mianmar është rritur në mbi 3.300, raportoi media shtetërore më 5 prill, teksa shefi për ndihmë në Kombet e Bashkuara i ka bërë thirrje botës që të ndihmojë Mianmarin.

Tërmeti i 28 marsit rrafshoi ndërtesa dhe shkatërroi infrastrukturë në mbarë shtetin dhe shkaktoi 3.354 viktima dhe 4.508 persona të lënduar. Po ashtu, sipas shifrave të publikuara nga media shtetërore, edhe 220 persona konsiderohen të zhdukur.

Më shumë se një javë nga fatkeqësia, shumë persona në Mianmar janë ende të pastrehë dhe shumë nga ta janë të detyruar që të flenë në rrugë për shkak se shtëpitë e tyre ose janë shkatërruar plotësisht ose ka rrezik që të shemben.

Sipas vlerësimeve të OKB-së, më shumë se 3 milionë persona mund të jenë prekur nga tërmeti 7.7 ballësh.

Zyrtari kryesor në OKB për ndihmë, Tom Fletcher, të shtunën u takua me të prekurit nga tërmeti në qytetin Mandalaj të Mianmarit dhe ai pa nga afër dëmet e shkaktuara në këtë qytet.

“Shkatërrimi është i madh”, shkroi ai në X.

“Bota duhet të ndihmojë popullin e Mianamarit”, shtoi ai, raporton REL.

Që nga puçi ushtarak i vitit 2021, Mianmari udhëhiqet nga junta, duke nxitur një konflikt civil. Junta raportohet se ka kryer dhjetëra sulme që nga tërmeti, përfshirë edhe 16 sulme që kur u shpall një armëpushim i përkohshëm të mërkurën, tha OKB-ja një ditë më parë.

Vite të luftës kanë bërë që ekonomia e Mianmarit dhe infrastruktura të shkatërrohet, duke paraqitur pengesë të madhe për përpjekjet ndërkombëtare për të ofruar ndihmë për këtë shtet pas tërmetit të fuqishëm.

Kina, Rusia dhe India ishin ndër shtetet e para që ofruar mbështetje, duke dërguar ekipe në Mianmar për të ndihmuar në gjetjen e të mbijetuarve.

Shtetet e Bashkuara thanë të premten se po e rrisin ndihmën për Mianmarin, duke bërë që ndihma të arrijë në vlerë prej 9 milionë dollarësh./REL

Posta e Kosovës bëri të ditur se ka nisur shpërndarjen e gjobave digjitale për shkeljet e trafikut. Kjo nismë, sipas Postës, do të rrisë sigurinë dhe përgjegjësinë në vend.

Gjobat dërgohen drejtpërdrejt në adresat e qytetarëve, duke ofruar një mundësi më të përshtatshme dhe më të thjeshtë për të realizuar pagesat.

“Ky hap modernizues e bën procesin më të shpejtë dhe më të thjeshtë për qytetarët, duke siguruar një menaxhim efikas të detyrimeve të tyre”.

Për më tepër, qytetarët mund të paguajnë gjobat në çdo zyrë postare të Postës së Kosovës, duke u dhënë fleksibilitet dhe komoditet.

“Ky shërbim inovativ mbështet angazhimet e Policisë së Kosovës dhe të komunave, duke kontribuar në një trafik më të sigurt dhe një mjedis më të rregullt. Ky është një hap përpara në krijimin e një infrastrukture më të sigurt dhe më të besueshme për të gjithë qytetarët. Posta e Kosovës – besim, shërbim, siguri në çdo hap!”, ka njoftuar Posta e Kosovës.

Brenda NATO-s, askush nuk ushqen iluzione për qëllimet e Rusisë dhe aleanca ushtarake e sheh Rusinë si një kërcënim afatgjatë – edhe pas përfundimit të luftës së Rusisë kundër Ukrainës.

Këtë e tha Sekretari i Përgjithshëm i NATO-s Mark Rutte në një konferencë për shtyp të premten në Bruksel, pas takimit dyditor të ministrave të jashtëm të NATO-s, transmeton Ukrinform.

“Për presidentin Trump që hyn për të thënë ‘Unë dua të bëj maksimumin për ta çuar këtë luftë në një fund të drejtë dhe të qëndrueshëm’, mendoj, është e lavdërueshme. Dhe kjo është ajo që po them. Dhe ata po punojnë pa u lodhur, pa u lodhur për ta bërë këtë. Për NATO-n është e qartë. Për të gjithë NATO-n, Rusia është kërcënimi afatgjatë, edhe nëse Rusia nuk do t’i japë fund kësaj lufte naive. tha Rutte, transmeton KosovaPress.

Ai tha se tani nevojiten përpjekje më të mëdha për të ndihmuar në përfundimin e luftës, për të punuar në koordinim të ngushtë me Ukrainën, për të angazhuar dhe informuar popullsinë. evropiane dhe për të mbështetur përvojën dhe udhëzimet shumë praktike të ofruara nga Mbretëria e Bashkuar në lidhje me hapat që mund të pasojnë pasi të arrihet përfundimisht një armëpushim ose marrëveshje paqeje.

“Unë mendoj se kjo është pikërisht mënyra se si Aleanca duhet të funksionojë, duke punuar së bashku, duke u përpjekur t’i kryejë gjërat. Duke u siguruar dhe duke pranuar, se ky nuk është vetëm një konflikt evropian, por me Kinën dhe Korenë e Veriut dhe Iranin që janë të përfshirë këtu, duke mbështetur përpjekjet luftarake të Rusisë, është një sulm ndaj Ukrainës. Dhe se është me të vërtetë një çështje globale,” shtoi Rutte.

Ai shprehu besimin se regjimet autoritare në mbarë botën po vëzhgojnë nga afër se si përfundon lufta në Ukrainë — veçanërisht udhëheqja e Kinës, e cila gjithashtu ka çështje të pazgjidhura territoriale me fqinjët e saj.

Ministrat e jashtëm të NATO-s u takuan në Bruksel për të diskutuar mënyrat për të forcuar mbrojtjen dhe qëndrimin parandalues të NATO-s dhe për të rritur ndihmën për Ukrainën.

Më 3 prill, Këshilli NATO-Ukrainë u mblodh me pjesëmarrjen e ministrit të Jashtëm të Ukrainës Andrii Sybiha.

Një ndërtesë industriale në rajonin e Mordovias në Rusi është goditur nga dronët e Ukrainës më 5 prill, tha guvernatori i këtij rajoni përmes një deklarate në Telegram.

Guvernatori Artyom Zdunov tha se ekipet emergjente kanë dalë në vendngjarje, por ai nuk tregoi se cila ndërtesë industriale është sulmuar apo nëse ka viktima nga sulmi.

Baza, një kanal në Telegram që ka lidhje me forcat ligjzbatuese ruse, tha se është sulmuar një fabrikë e fibrave optike në qytetin Saransk, 820 kilometra larg nga kufiri me Ukrainën.

Në këtë kanal u publikua edhe një video që tha se shfaq sulmet me dronë ndaj kësaj fabrike.

Ndërkohë, autoritetet në Kiev thanë se mbrojtjet ajrore ukrainase kanë rrëzuar 51 nga 92 dronët që Rusia lëshoi gjatë natës.

Përmes një deklarate, Forcat Ajrore ukrainase thanë se 31 dronë të tjerë “u humbën” – referencë për përdorimin e pajisjeve elektronike për të penguar operimin e dronëve, raporton REL.

Ukraina, që po përballet me luftën e nisur nga Rusia që nga viti 2022, tha se si pasojë e sulmeve të fundit ruse janë shkaktuar dëme në rajonet e Kievit, Zhytomirit, Sumit dhe Dnipropetrovskit.

Njoftimet për sulme të reja në Ukrainë dhe Rusi vijnë një ditë pasi forcat e Moskës kryen sulme vdekjeprurëse në Ukrainë.

Sot shënohen 26 vjet nga masakra e tmerrshme e Rezallës së Skenderajt, e cila ndodhi më 5 prill të vitit 1999, ku forcat serbe ekzekutuan 98 shqiptarë, banorë të Rezallës dhe fshatrave përreth.

Ata nuk u ndalën me kaq, pasi pas ekzekutimeve, forcat serbe edhe zhdukën kufomat e të vrarëve, duke lënë pas një tragjedi të madhe.

Një pjesë e trupave të viktimave u gjetën më vonë në Rudnicë të Rashkës, në shtetin serb, dhe iu dorëzuan familjarëve.

Ky akt barbar dhe i pafalshëm ka shënuar një nga episodet më të dhimbshme të luftës në Kosovë, dhe masakra e Rezallës mbetet një ndër ngjarjet më të rënda të periudhës së luftës.

Më 5 prill 1999, serbët rrethuan shtëpitë e këtyre familjeve dhe qëlluan pa mëshirë mbi burrat dhe djemtë e rinj, duke lënë pas një shkatërrim të tmerrshëm dhe një tragjedi të pashlyeshme në historinë e Kosovës.