Category: Lajme

Kryeministri Edi Rama, në një prononcim të shkurtër për mediat së bashku me Presidentin e Këshillit Evropian, Antonio Costa, në prag të konferencës së katërt ndërqeveritare BE-Shqipëri për hapjen e një tjetër grupkapitulli, u shpreh se janë të përkushtuar për të përmbushur të gjitha detyrat për të mbyllur negociatat brenda vitit 2027.

“Sot është ditë e mirë për ne sepse kemi një tjetër konferencë dhe çelim kapituj të tjerë, ndërkohë që me Presidentin jam shumë mirënjohës për kohën që më ka kushtuar për një bisedë rreth përparimit në këtë proces dhe më pas për samitin e ardhshëm të Komunitetit Politik Evropian, i cili është aktivitet i rëndësishëm në përgjithësi, por ka rëndësi të posaçme në këtë moment. Do të flasim edhe për rajonin, ndaj të cilit Presidenti është veçanërisht i përkushtuar. Në përgjithësi jam i inkurajuar nga këto zhvillime dhe jemi tej mase të përkushtuar për të përmbushur të gjitha detyrat e kalendarit, që është shumë ambicioz, për të përmbyllur të gjitha negociatat brenda 2027”, tha Rama para mediave, shkruan A2.

Ndërkohë, Presidenti i Këshillit Evropian, Antiono Costa, vlerësoi progresin e Shqipërisë në rrugëtimin evropian dhe duke u ndalur te grupkapitulli që pritet të hapet sot në Luksemburg, Costa tha se ambicia është që të hapin edhe të tjerë brenda këtij viti.

“Zgjerimi drejt Ballkanin Perëndimor është përparësi e qartë për BE dhe investimi më i rëndësishëm gjeostratregjik për paqen, begatinë dhe stabilitetin e kontinentit tonë. Është inkurajuese të shohësh progresin që ka bërë Shqipëria në këtë rrugëtim. Sot çelim grupkapitullin tjetër dhe ambicia jonë është të çelim edhe të tjerë gjatë këtij viti. Kjo është e rëndësishme për BE dhe Shqipërinë, por mendoj se është shenjë për të gjithë rajonin, se mënyra më e mirë për të garantuar mirëqenien dhe paqen në Ballkanin Perëndimor është BE dhe anëtarësimi në të. Ja pse do të vizitoj personalisht rajonin në mes të muajit maj, për të vizituar të 6 vendet e rajonit, për të rritur bashkëpunimin dhe përpjekjet tona të përbashkëta për të pasur rezultate të mira të anëtarësimit. Kjo është mundësi e mirë për të folur për samitin e Komunitetit Politik Evropian që do të mbahet më 16 Maj. Evropa është më shumë se BE, por gjithmonë e më shumë është më e rëndësishme që të jemi të gjithë së bashku sepse kështu jemi më të fortë dhe bota ka nevojë për një Evropë më të fortë”, u shpreh Costa.

Kryetari i Partisë për Liri, Drejtësi dhe Mbijetesë nga komuniteti serb, Nenad Rashiq, tha se nuk është optimist, që më 15 prill – kur është caktuar seanca për konstituimin e Kuvendit të Kosovës – të mund të formohet edhe ekzekutivi i ri.

Këto deklarata ai i bëri pasi u regjistrua si deputet i legjislaturës së nëntë në Kuvendin e Kosovës.

“Nuk jam optimist që nesër do të votojmë për Qeverinë”, tha Rashiq.

Në seancën e 15 prillit, në rend dite është betimi i deputetëve dhe zgjedhja e kryetarit dhe nënkryetarëve të Kuvendit. Rashiq tha se do të marrë pjesë në seancë dhe se do të votojë për kryeparlamentarin – që duhet të propozohet nga Lëvizja Vetëvendosje – “nëse ka ndonjë propozim që është i arsyeshëm”.

Rashiq, që aktualisht është ministër në detyrë për Kthim dhe Komunitete, tha se procesi i formimit të institucioneve të reja të dala nga zgjedhjet parlamentare të 9 shkurt, është një proces i gjatë.

“Nuk është hera e parë që mund të ndodhë një ngërç i shkurtër. Ju rikujtoj se më 2014 kemi pasur një situatë të tillë, atëherë po ashtu kam qenë deputet, por pas dy-tre muajsh u zgjidh ajo krizë. Në këtë rast, po konsideroj që varianti më i mirë do të ishte që partia më e madhe të formojë qeverinë sepse çdo opsion tjetër do ta komplikonte procesin, qoftë të demokratizimit, qoftë të udhëheqjes qeveritare, qoftë të afrimit të Kosovës drejt BE-së. Prandaj, opsioni më i mirë në këtë moment është që partia më e madhe të marrë përgjegjësinë e udhëheqjes”, tha Rashiq.

Ai ka fituar një ulëse nga dhjetë sa janë të rezervuara në Kuvendin e Kosovës për komunitetin serb. Nëntë të tjerat i ka fituar Lista Serbe, partia e serbëve në Kosovë që gëzon mbështetjen e Beogradit.

Lëvizja Vetëvendosje, partia fituese e zgjedhjeve të 9 shkurtit, fillimisht ka deklaruar se preferon të krijojë institucionet e reja me komunitetet joserbe, por së voni e ka pranuar se i duhet bashkëpunimi edhe me partitë shqiptare që kanë fituar ulëse në Kuvend.

Deputetët e Listës Serbe nuk janë deklaruar nëse do të marrin pjesë në seancën konstituive të Kuvendit të Kosovës dhe as nëse do të votojnë për zgjedhjen e kryetarit të Kuvendit, raporton KP.

Pas përfundimit të procedurave të regjistrimit si deputetë të rinj, ata kanë refuzuar të përgjigjen pyetjeve të gazetarëve.

Deputetët e Listës Serbe mbërritën në Kuvendin e Kosovës për të kryer procedurat e nevojshme të regjistrimit si deputetë.

Gjatë ditës së sotme pritet regjistrimi i deputetëve të rinj të Kuvendit të Kosovës nga radhët e koalicionit AAK-Nisma.

Sipas rezultatit zgjedhor të 9 shkurtit, ky koalicion ka siguruar gjithsej tetë ulëse në Kuvendin e Kosovës, me pesë deputetë nga Aleanca për Ardhmërinë e Kosovës (AAK) dhe tre nga Nisma Socialdemokrate.

Regjistrimi pritet të kryhet deri në orën 16:00.

Javën e kaluar këtë proces e kanë përfunduar Vetëvendosje, PDK-ja e LDK-ja, ndërsa nesër pritet të mbahet seanca konstituive e Kuvendit të Kosovës.

Përfaqësuesja e lartë e BE-së, Kaja Kallas, arriti në takimin e Këshillit të Ministrave të Jashtëm të BE-së, që po mbahet në Luksemburg.

Ajo para gazetarëve foli edhe për Ballkanin Perëndimor.

“Kemi pasur një darkë të mirë dje duke diskutuar me miqtë nga Ballkani Perëndimor. Ne shohim tensione që rriten dhe definitivisht duhet të vazhdojmë me procesin e zgjerimit sepse kjo është diçka vërtetë e prekshme dhe ne vërtetë kemi nevojë për storie suksesi”, tha Kallas.

Shtoi se në këtë takim do të diskutohet për “shumë tema”, fillimisht do të flasin për Ukrainën.

“Janë bërë një muaj që kur Ukraina u pajtua për armëpushim pa kushte, por se kemi parë këtë nga ana e Rusisë”, tha ajo.

“Këtë vit shtetet evropiane kanë arritur ndihmat në 23 miliardë euro, më shumë se vitin e kaluar. Por duhet të bëjmë më shumë presion ndaj Rusisë që të ndalet lufta”, shtoi Kallas.

Pas aksidentit të djeshëm në Jagodë të Klinës, ku treni goditi një veturë dhe la një të vdekur dhe tre të tjerë u lënduan, Kompania Trainkos bëri të ditur se sipas raportit fillestar aksidenti ka ndodhur për shkak të mosrespektimit të shenjave të komunikacionit nga drejtuesi i veturës.

“Komunikacioni hekurudhor rregullohet me ligje dhe sinjalizime specifike, të cilat obligohemi t’i respektojmë në përpikëri. Rregullat dhe sinjalizimi i trafikut rrugor janë obligative për të gjithë përdoruesit e rrugës, përfshirë drejtuesit e mjeteve rrugore,” thuhet në kumtesën e Trainkosit.

Trainkos bëri thirrje për kujdes maksimal dhe për respektim të rregullave të komunikacionit rrugor, me qëllim që të parandalohet përsëritja e rasteve të tilla tragjike.

Në kumtesë po ashtu shprehet keqardhje e thellë për humbjen e jetës, duke i shprehur ngushëllime familjes së viktimës.

Sot me fillim nga ora 09:00 e deri në ora 16:00, do të bëhet regjistrimi i deputetëve nga radhët e Aleancës për Ardhmërinë e Kosovës dhe NISMA-s.

Sipas rezultatit zgjedhor të 9 shkurtit, ky koalicion ka siguruar gjithsej 8 ulëse në Kuvendin e Kosovës, me pesë deputetë AAK-ja derisa tre Nisma Socialdemokrate.

Derisa javën e kaluar, procesin e regjistrimit e kanë përfunduar tri subjekte politike.

Ajo e Lëvizjes Vetëvendosje, Partisë Demokratike të Kosovës dhe Lidhjes Demokratike të Kosovës.

Kurse, nesër me fillim nga ora 10:00 është caktuar të mbahet seanca konstituive e Kuvendit të Kosovës.

Presidentja e Kosovës, Vjosa Osmani ka takuar presidentin e Indonezisë, Praboëo Subianto, gjatë Forumit Diplomatik të mbajtur në Turqi.

Ajo ka thënë se i ka uruar atij për mandatin e ri duke shprehur gatishmërinë për rritje të bashkëpunimit në të ardhmen.

“Në #ADF2025 , përgëzova Presidentin e ri të Indonezisë, Prabowo Subianto, për mandatin e tij dhe i urova atij dhe popullit të mrekullueshëm të Indonezisë çdo të mirë. Mezi presim të rrisim bashkëpunimin tonë në të ardhmen e afërt”, ka shkruar Osmani në X.