Category: Lajme

Përfaqësuesja e lartë e BE-së, Kaja Kallas, sot në takimin e Këshillit të Ministrave të Jashtëm të BE-së, që do të mbahet në Luksemburg do të informojë lidhur me procesin e dialogut Kosovë – Serbi, si dhe për vizitën që ajo pati në Shqipëri, Mal të Zi dhe Bosnjë e Hercegovinë.

Takimi fillon në mëngjes në orën 08: 00 dhe do të udhëhiqet nga përfaqësuesja e lartë e Bashkimit Evropian për Politikë të Jashtme dhe Siguri, Kaja Kallas.

Pikë kryesore e takimit do të jetë agresioni rus kundër Ukrainës, derisa ministrave të Jashtëm të BE-së do t’u drejtohet përmes një videokonference, ministri Jashtëm i Ukrainës, Andrij Sybiha.

Ministrat e Jashtëm të Bashkimit Evropian, gjithashtu, do të diskutojnë edhe raportet me vendet e Ballkanit Perëndimor, përfshirë edhe procesin e dialogut midis Kosovës dhe Serbisë.

“Vendet partnere të Bashkimit Evropian nga Ballkani Perëndimor janë: Shqipëria, Bosnja e Hercegovina, Kosova, Mali i Zi, Maqedonia e Veriut dhe Serbia. Bashkimi Evropian mbështet perspektivën evropiane të vendeve partnere nga Ballkani Perëndimor. Shumë prej tyre tashmë janë në rrugë për t’u bërë anëtare të Bashkimit Evropian në kuadër të procesit të zgjerimit të BE-së me vendet e reja anëtare”, theksohet në faqen e Këshilli Evropian.

Sot shënohet Dita Memoriale e të Mbijetuarve të Dhunës Seksuale gjatë Luftës së Fundit në Kosovë. Përmes shënimit të kësaj dite përkujtohen vuajtjet dhe traumat e atyre që kanë përjetuar dhunë seksuale gjatë luftës në Kosovë.

Kjo ditë synon të njohë padrejtësinë e përjetuar dhe traumën si pasojë e krimeve të tilla dhe njëkohësisht të rrisë ndërgjegjësimin për drejtësinë e vonuar dhe luftën kundër stigmës.

Në shënimin e kësaj dite, këtë të diel më 14 prill 2025, Qendra Kosovare për Rehabilitimin e të Mbijetuarve të Torturës (QKRTM), njofton se në Ditën Memoriale të të Mbijetuarve të Dhunës Seksuale gjatë Luftës së fundit në Kosovë, për herë të parë, një burrë i mbijetuar do të ndajë publikisht rrëfimin e tij.

“Një rrëfim që sfidon frikën, stigmën dhe harresën. Një akt guximi që hap një kapitull të ri për drejtësinë dhe të vërtetën”, njofton QKRTM.

Ndryshe me propozim të Presidentes Vjosa Osmani, qeveria, 14 prillin e ka caktuar Ditë e të Mbijetuarve të Dhunës Seksuale gjatë luftës së fundit në Kosovë.

Ky vendim do t’i kontribuojë ruajtjes së memories kolektive, ndërsa ka përmendur nevojën e solidarizimit me të mbijetuarit e dhunës seksuale.

Sot mbi Kosovë do të mbajë mot kryesisht i vranët dhe vende-vende me riga shiu.

Sipas parashikimit të Institutit Hidrometeorologjik të Kosovës, temperaturat minimale do të lëvizin ndërmjet 5 deri 8 gradë Celsius, ndërsa maksimalet e ditës parashihen të lëvizin ndërmjet 15 dhe 18 gardë Celsius.

Do të fryjë erë nga jugperendimi me shpejtesi 1 deri në 7 metër për sekond.

Pavarësisht pretendimeve të shpeshta nga presidenti serb Vuçiq se Serbia është një “tigër ekonomik” i rajonit, të dhënat më të fundit nga ‘Eurostat’ agjencia statistike e Bashkimit Evropian – tregojnë një realitet krejtësisht tjetër, Serbia është ndër vendet më të varfra në Evropë.

Sipas statistikave të publikuara, Prodhimi i Brendshëm Bruto (GDP) real për banor në Serbi është ndër më të ulëtit në kontinent. Ky tregues mat rezultatin ekonomik mesatar për person, duke marrë parasysh edhe inflacionin dhe pikërisht inflacioni në Serbi është ndër më të lartët në Evropë, gjë që e përkeqëson edhe më shumë gjendjen ekonomike të qytetarëve.

Ndërsa zyrtarët serbë shpesh theksojnë se rritja e përgjithshme e GDP-së në vitin 2024 ishte ndër më të lartat në Evropë, ata rrallë e përmendin faktin se kjo rritje nuk reflektohet në standardin e jetesës së qytetarëve të zakonshëm.

Ekspertët theksojnë se GDP-ja reale për banor është një nga treguesit më të rëndësishëm të mirëqenies së vërtetë ekonomike, pasi merr parasysh edhe rritjen e çmimeve, pra inflacionin, i cili në Serbi e zvogëlon ndjeshëm fuqinë blerëse.

Presidenti amerikan Donald Trump ka në plan të dëbojë një milion emigrantë brenda vitit 2025.

Sipas një raportimi nga “Washington Post”, që citon burime federale të njohura me planet e kreut të Shtëpisë së Bardhë, ky objektiv do të përbënte një rritje të jashtëzakonshme krahasuar me nivelet e mëparshme të dëbimeve. Rekordi aktual mbahet nga administrata e Barack Obamës, kur rreth 400,000 emigrantë u dëbuan brenda një viti.

Trump dhe ekipi i tij synojnë ta përmbushin këtë plan ambicioz që në vitin e parë të mandatit të tij të dytë, pasi e opati premtuar këtë gjatë fushatës së zgjedhjeve presidenciale. Këshilltari i tij i ngushtë, Stephen Miller, po bashkëpunon çdo ditë me zyrtarë të Departamentit të Sigurisë Kombëtare dhe agjenci të tjera për të përgatitur infrastrukturën ligjore dhe logjistike të nevojshme për këtë operacion të gjerë.

Një pjesë e strategjisë përfshin edhe transferimin e tyre në disa vende që nuk janë vendet e origjinës së emigrantëve. Sipas “Washington Post”, në mesin e këtyre shteteve janë Libia, Ruanda, Benini, Moldavia, Mongolia dhe Kosova. Qëllimi i këtyre marrëveshjeve është që të pranojnë emigrantë të dëbuar që nuk janë domosdoshmërisht shtetas të këtyre vendeve, një praktikë që ka ngritur shqetësime të mëdha ligjore dhe etike.

Pavarësisht këtyre planeve, analistët mbeten skeptikë. Ata theksojnë se një objektiv kaq i lartë është praktikisht i paarritshëm për shkak të mungesës së stafit, fondeve dhe pengesave ligjore. Shumica e emigrantëve kanë të drejtë për një seancë gjyqësore para dëbimit, çka e ngadalëson dhe ndërlikon procesin.

Presidenti francez, Emmanuel Macron ka komentuar sulmin e Rusisë në Sumy – dhe e quajti sulmin një “mospërfillje të hapur për jetët njerëzore”.

Ai gjithashtu ka bërë thirrje për masa të forta për të vendosur një armëpushim ndaj Rusisë.

“Mëngjesin e sotëm, dy raketa ruse goditën zemrën e qytetit Sumy në Ukrainë, duke shkaktuar viktima të shumta civile, duke përfshirë edhe një herë fëmijë. Të gjithë e dinë: këtë luftë e nisi vetëm Rusia. Dhe sot, është e qartë se Rusia e vetme zgjedh ta vazhdojë atë – me shpërfillje të hapur për jetët njerëzore, ligjin ndërkombëtar dhe përpjekjet diplomatike të Presidentit Trump. Nevojiten masa të forta për të vendosur armëpushim ndaj Rusisë. Franca po punon pa u lodhur drejt këtij qëllimi, së bashku me partnerët e saj”, shkroi Macron në X.

Derisa poashtu shkroi se: “Për viktimat, të plagosurit dhe gjithë Ukrainën që vazhdon të rezistojë: solidariteti ynë, respekti ynë, angazhimi ynë i palëkundur”.

Një person ka humbur jetën dhe tre të tjerë janë lënduar rëndë, si pasojë e një aksidenti të rëndë në fshatin Jagodë të Klinës, ku një tren ka goditur një veturë.

Në vendin e ngjarjes ndodhen njësitë e Policisë dhe zjarrfikësit, të cilët po merren me hetimin dhe menaxhimin e situatës.

Policia e Maqedonisë së Veriut ka arrestuar sot edhe 23 persona të tjerë, dyshohet se janë përfshirë në operacionin ilegal të një klubi nate në qytetin e Koçanit, në të cilin zjarri shpërtheu në orët e para të 16 marsit, duke vrarë 61 persona, shumica e të cilëve të rinj dhe duke plagosur rreth 200 të tjerë.

Në periudhën paraprake, policia e Maqedonisë së Veriut kishte arrestuar 33 persona të cilët janë të ndaluar përkohësisht. Në mesin e të arrestuarve sot janë tre ish-ministra të ekonomisë dhe drejtuesit aktual dhe të mëparshëm të Drejtorisë së Mbrojtjes Civile. Ky i fundit është aktualisht ministër pa portofol, përgjegjës për integrimin dhe zbatimin e Strategjisë së Përfshirjes së Romëve 2022-2030.

Të arrestuarit janë sjellë para gjykatësit hetues në Koçan, i cili do të vendosë nëse do t’i ndalojë ose jo përkohësisht. Të gjithë ministrat e ekonomisë të vendit u arrestuan me përjashtim të atij aktual.

Tre ish-ministrat e ekonomisë të arrestuar sot vijnë nga radhët e partisë më të madhe dhe më të spikatur opozitare shqiptare BDI në Maqedoninë e Veriut, e udhëhequr nga Ali Ahmeti.

Nga radhët e kësaj partie vjen edhe një tjetër ish-ministër i Ekonomisë i vendit, i cili u arrestua në ditët e para pas ngjarjes tragjike në Koçan. Në thelb, u arrestuan të gjithë ministrat e ekonomisë në vend që nga viti 2012, kur funksiononte klubi i natës, por jo ai aktuali, i cili mori detyrën në qershor 2024 dhe vjen nga radhët e koalicionit bashkëqeverisës shqiptar “VLEN”.

Ministria e Ekonomisë lëshon licenca operimi për funksionimin e dyqaneve shëndetësore. Klubi Pulse në Kotsani ku ka rënë zjarri funksiononte me leje të falsifikuar, por me vulë të mirëfilltë nga Ministria e Ekonomisë. Partia e Ali Ahmetit, duke komentuar arrestimet e anëtarëve të saj, foli për një sulm të paprecedentë ndaj shqiptarëve në Maqedoninë e Veriut, duke fajësuar kryeministrin e vendit, Hristian Mickoski dhe ministrin e Brendshëm për incidentin, me qëllim që, siç deklaroi partia, të heqin dorë nga përgjegjësitë e tyre për incidentin e klubeve të natës dhe margjinalizimin e shqiptarëve në vendin e vendit.

BDI-ja shtoi se do të marrë të gjitha masat e nevojshme për të parandaluar vazhdimin e këtij sulmi kundër shqiptarëve dhe për të siguruar drejtësi për popullin shqiptar në vend. Partia e Ali Ahmetit ka marrë pjesë në të gjitha qeveritë e koalicionit të vendit gjatë 20 viteve të fundit. Në zgjedhjet e fundit parlamentare të mbajtura në Maqedoninë e Veriut në maj 2024, koalicioni VLEN fitoi 14 vende, ndërsa koalicioni nën partinë BDI të Ali Ahmetit siguroi 18 vende.

Megjithatë, kryeministri i vendit dhe lideri i partisë së djathtë VMRO-DPMNE, Hristian Mickoski, zgjodhi koalicionin VLEN si partner të tij në qeveri nga blloku politik shqiptar, duke pretenduar se BDI, e cila kishte marrë pjesë në qeveritë e koalicionit të vendit për 20 vitet e mëparshme, ishte kthyer në një “regjim” të gjerë të korruptuar në vend.

Ministrja në detyrë e Punëve të Jashtme dhe Diasporës, Donika Gërvalla, ka udhëtuar për në Luksemburg, ku do të marrë pjesë në darkën e përbashkët të Ministrave të Jashtëm të Bashkimit Evropian dhe vendeve të Ballkanit Perëndimor.

Kjo darkë pune do të zhvillohet në margjinat e takimit të rregullt të Këshillit të Punëve të Jashtme të BE-së, ku ndër temat e agjendës është edhe procesi i zgjerimit me vendet e BP-së.

“Ky takim joformal është organizuar me ftesë të Përfaqësueses së Lartë të BE-së për Punët e Jashtme dhe Politikën e Sigurisë, znj. Kaja Kallas, dhe synon të ofrojë një platformë për një shkëmbim të hapur dhe të drejtpërdrejtë mes shefave të diplomacisë së vendeve të BE-së dhe atyre të rajonit”, thuhet në njoftimin për media të lëshuar nga MPJD-ja.

Ndër të tjera, kryediplomatja kosovare, pritet të mbajë edhe takime bilaterale me një numër ministrash të jashtëm të vendeve anëtare të Bashkimit Evropian, me të cilët do të diskutojë zhvillimet e fundit në rajon, rrugën evropiane të Republikës së Kosovës si dhe rëndësinë e përfshirjes së barabartë të të gjitha vendeve të Ballkanit Perëndimor në proceset integruese.