Category: Lajme

Njëri nga anëtarët më të rëndësishëm të Komitetit Ndërkombëtar të Lojërave Mesdhetare, Stavri Bello, i cili është nga Shqipëria dhe që njëkohësisht është edhe kryetar i Komisionit të Koordinimit për Lojërat Mesdhetare ‘Taranto 2026’ ka folur për rëndësinë që ka organizimi i këtyre lojërave në Kosovë në vitin 2030, por edhe për drejtimin që shteti ynë duhet të ndjekë për të mos rrezikuar humbjen e së drejtës për t’i organizuar ato.

Në një intervistë për KosovaPress, Bello ka thënë se marrja e këtij organizimi ishte hap shumë i madh për Komitetin Olimpik të Kosovës (KOK), por edhe për vetë shtetin e Kosovës.

“Pa dyshim, kjo ka qenë një nga lëvizjet më të bukura të Kosovës, në mënyrë të veçantë të Komitetit Olimpik të Kosovës dhe Qeverisë së Kosovës që vendosën t’i organizojnë në vitin 2030, vendosën kandidaturën dhe fituan të drejtën që të organizojnë Lojërat Mesdhetare 2030. Rëndësia e këtij eventi për shtetin e Kosovës dhe jo vetëm, por edhe për Shqipërinë, është e madhe, sepse evidenton jo vetëm vlerat sportive, por një gatishmëri për të ofruar pritshmërinë, për të ofruar mikpritjen e të gjithë sportistëve në vendet mesdhetare. Sigurisht që ka shumë punë për t’u bërë, hapi i parë dhe më i rëndësishëm është që është fituar e drejta e organizimit të tyre. Tani mbetet në dorën e dy vendeve, Kosovës kryesisht por edhe të Shqipërisë që organizimi i këtij eventi kaq madhor të jetë i suksesshëm”, tha Bello.

Ai ka rekomanduar që ndërtimi i infrastrukturës dhe impianteve të reja sportive për këto lojëra të bëhet në koordinim të plotë me federatat ndërkombëtare sportive, duke shmangur ndonjë shkelje të procedurave.

“Ka shumë mundësi për Kosovën për ndërtimin e infrastrukturës sportive, nuk është e lehtë, por mundësia më e mirë është që të ndërtohet një infrastrukturë moderne. Pesë vjet ka kohë nëse sigurohet buxheti i mjaftueshëm që kjo infrastrukturë të mos ndërtohet shpejt e shpejt, dhe të shkelim procedura, por kjo të ndërtohet në kushte normale dhe me miratimin e federatave ndërkombëtare, të cilat kanë kushtet e tyre, në mënyrë që të mos mendohet vetëm për lojërat e 2030-tës, por kjo infrastrukturë të jetë e qëndrueshme edhe për veprimtari pas 2030-tës, që federatat ndërkombëtare mund t’i organizojnë në Kosovë”, tha Bello

Bello ka bërë thirrje që bashkëpunimi ndërmjet Qeverisë së Kosovës dhe KOK-ut të jetë shumë i ngushtë, pasi vetëm kjo rrugë e garanton suksesin.

“Unë mund të them se si procedon Komiteti Mesdhetar se nënshkruesi i kontratës së qytetit mikpritës të lojërave të ardhshme është bashkia e qytetit së bashku me Komitetin Olimpik. Sigurisht, bashkëpunimi me qeverinë është i rëndësishëm, sepse qeveria do të financojë. Pra, rruga më e mirë që do të sugjeroja është bashkëpunimi, mund të duket pak i vështirë, por asnjëherë i pamundur, sepse bëhet për të mirën e përbashkët të të gjithë hapësirës shqiptare kudo që është dhe do të jetë një sukses në radhë të parë i shtetit të Kosovës”, tha Bello.

Për organizimin e këtyre lojërave, Qeveria e Kosovës ka ndarë buxhet prej 250 milionë euro, shifër kjo e cila, sipas Bellos, mund të mos mjaftojë.

“Organizatorët kanë përgatitur një master-plan dhe në bazë të këtij master-plani kanë evidentuar nevojat që kanë për infrastrukturë sportive, kryesisht në ato disiplina sportive, të cilat nuk disponojnë për momentin infrastrukturë të miratuar nga federatat botërore dhe derisa ky buxhet është miratuar, kjo është shumë pozitive, sepse jep mundësinë e fillimit të punës. Sigurisht, gjatë rrugës do të ketë edhe rregullime të buxhetit që nënkupton shtesa të buxhetit, sepse organizimi i lojërave nuk ka vetëm infrastrukturën sportive, por duhet edhe një buxhet tjetër funksional për organizimin dhe funksionimin e Komitetit Organizator”, tha Bello.

Ai gjithashtu tregon se a rrezikon Kosova ta humbë të drejtën e organizimit të kësaj ngjarje të madhe sportive nëse nuk ia del të jetë gati me infrastrukturë sportive.

“Nuk e besoj, por sigurisht kjo është çështje e gjykatave dhe do ta zgjidhin. Unë dëshiroj më të mirën për ecurinë e punimeve dhe zgjidhja gjithmonë brenda marrëveshjes është pozitive, jo vetëm për njërën palë, por për të gjithë bashkë ne. Ekziston një rast kur vetë shteti, për arsye të krizës financiare, ka hequr dorë nga organizimi i lojërave dhe në harkun kohor prej vjetësh i është dhënë një shteti tjetër i cili e ka realizuar me sukses. Por, nuk besoj asnjëherë që do t’i ndodhë kjo Kosovës”, tha Bello.

Punë më intensive në përgatitjet për organizimin e Lojërave Mesdhetare është kërkuar edhe nga Massimo Ferrarese, president i Komitetit Organizativ të Lojërave Mesdhetare ‘Taranto 2026.’

Ferrarese për KosovaPress ka thënë se punimet për ndërtimin e impianteve sportive duhet të fillojnë sa më shpejt dhe bashkëpunimi ndërmjet politikës dhe shtëpive sportive të jetë sa më i ngushtë, pasi në të kundërtën rrezikohen vonesa që sjellin pasoja në mbarëvajtjen e kësaj ngjarje sportive.

Kryeministri Edi Rama, njëherësh kryetar i Partisë Socialiste deklaroi sot se vendi po shkon në drejtimin e duhur dhe këtë e thotë Bashkimi Europian, Komisioni Europian dhe të gjitha organizatat prestigjioze ndërkombëtare, shkruan ATSH.

Në një komunikim të drejtpërdrejt në rrjetet sociale përmes rubrikës “Sy m’sy”, Rama iu përgjigj atyre që kanë reaguar pas sondazheve të fundit lidhur me zgjedhjet e 11 majit, duke i cilësuar si të pavërteta dhe manipulime, përcjell KosovaPress.

“Bashkimi Europian, Komisioni Europian dhe të gjitha organizatat ndërkombëtare, ato që vlerësojnë financat e vendit, luftën kundër korrupsionit, administratën publike, si shpjegohet që të tëra këto japin konkluzione në drejtimin e duhur. Budallenj janë edhe ata? Sajoni dhe pastaj sajesat i ktheni në lajme, lajmet i bëni komente dhe komentet i bëni të vërteta, pastaj habiteni pse populli voton komplet të kundërtën e asaj që thoni”, u shpreh Rama.

Ndërsa i cilësoi komentet shfaqje inatesh e mllefesh të verbra, Rama u kujtoi se populli shqiptar është i mençur dhe nëse do të kishte kampionat botëror për politikë do shpallej kampion bote.

Rama theksoi se këta çdo ditë u tregojnë shqiptarëve akuza, shpifje, sharje ekstrem, e zi nga të katër anët.

Kina ka ekzekutuar një burrë për vrasjen e një djali japonez 10-vjeçar me anë të therjes, në shtatorin e kaluar, ka njoftuar ambasada japoneze në Kinë për BBC-në.

Zhong Changchun u dënua me vdekje në janar për sulmin ndaj djalit, i cili ishte në rrugë për në një shkollë japoneze në qytetin juglindor kinez, Shenzhen.

Rasti shkaktoi tronditje në të dy vendet dhe nxiti tensione diplomatike mes pretendimeve se ishte një sulm me motive ksenofobike.

“Qeveria e Japonisë e konsideron vrasjen e një fëmije plotësisht të pafajshëm si një krim të pafalshëm dhe e marrim këtë ekzekutim me seriozitetin më të madh”, thuhet në deklaratën e ambasadës japoneze për BBC-në. “Në dritën e këtij incidenti, qeveria japoneze do të vazhdojë të ndërmarrë të gjitha masat e mundshme për sigurinë dhe do t’i bëjë thirrje të fuqishme palës kineze të sigurojë mbrojtjen e shtetasve japonezë në Kinë”.

Ambasada shtoi se ishte informuar për ekzekutimin nga Ministria e Punëve të Jashtme të Kinës, sipas BBC News.

Ngjarja rriti frikën mes japonezëve që jetojnë në Kinë dhe bëri që kompanitë japoneze si Toyota të kërkonin nga stafi i tyre që të ishin të kujdesshëm. Të tjera, si Panasonic, ofruan fluturime falas për kthim në atdhe për punonjësit, përcjell KosovaPress.

Vendimi për rastin e Zhong nuk përmendi Japoninë, sipas zyrtarëve japonezë.

Kenji Kanasugi, ambasadori i Japonisë në Kinë, tha se Zhong kishte kërkuar të fliste me familjen e viktimës, por nuk tha nëse ai kishte pasur në shënjestër shtetas japonezë.

Ngjarja gjithashtu vuri në pah nacionalizmin e pakontrolluar në rrjetet sociale kineze, i cili ka ushqyer ndjenjat kundër të huajve vitet e fundit.

Komentuesit në internet vunë në dukje se vrasja e djalit ndodhi në një datë politikisht të ndjeshme – 18 shtator, përvjetori i një incidenti që çoi në pushtimin japonez të Mançurisë në Kinë në fillim të viteve 1930.

Ankesat historike kanë rënduar prej kohësh marrëdhëniet politike mes Kinës dhe Japonisë. Kina ka kërkuar prej kohësh një falje nga Japonia për agresionin e saj kolonial dhe gjatë luftës në fillim dhe në mes të shekullit XX. Ajo gjithashtu ka akuzuar Japoninë se po e zbut historinë e veprimeve të saj ushtarake brutale në Kinë në tekstet shkollore.

Therja ndodhi gjithashtu në një kohë me sulme të shumta ndaj të huajve në Kinë, përfshirë therjen e katër mësuesve amerikanë në Jilin.

Në qershorin e kaluar, një burrë sulmoi një nënë japoneze dhe fëmijën e saj në një stacion autobusi në Suzhou, por përfundoi duke vrarë një grua kineze që po përpiqej t’i mbronte. Ai burrë gjithashtu është ekzekutuar, thanë zyrtarëve japonezë javën e kaluar.

Në Kinë, vdekja e Papa Françeskut u bë menjëherë virale në mediat sociale. Lajmi ishte më i kërkuari në histori për më shumë se 17 orë. Mbi 160 milionë shikime për “perandorin e kishës”, siç quhet Papa në gjuhën kineze, me vdekjen e tij duke u bërë një temë trendi. Postimet varionin nga Papa i thjeshtësisë dhe i të fundit, tek takimet me të fuqishmit e Tokës, tek profecitë mijëvjeçare.

Postimi mes Papës së të thjeshtëve dhe profecive

Në Weibo, Mandarina e dhjetë, njoftimi i vdekjes nga Selia e Shenjtë, bazuar në një ekzaminim të grafikëve, shkaktoi një rritje të kërkimeve me mbi 160 milionë shikime. Ka shumë postime për Jiao Huang (“Perandori i Kishës”). Midis përpjekjeve dhe hapjes ndaj më të dobëtve dhe samiteve të shumta me liderët e vendeve të botës, spikasin postimet që rimëkëmbin Nostradamusin dhe profecitë e tij për të përmendur ardhjen e afërt të fatkeqësive.

Në Kinë 10 milionë katolikë

Figura e Atit të Shenjtë në përgjithësi trajtohet më shumë si ajo e një personi të njohur sesa si kreu i Kishës së Romës. Rreth 10.5 milionë katolikë jetojnë në Kinë dhe vlerësohet se rreth 6 milionë janë anëtarë të Shoqatës Katolike Patriotike Kineze, besnike ndaj Partisë Komuniste.

Global Times për Françeskun

Përpara marrëveshjes së përkohshme të Selisë së Shenjtë-Kinë të vitit 2018 për emërimin e përbashkët, CPCA shuguroi peshkopë nën drejtimin e CCP nën skemën e bashkëjetesës “respektuese” midis besimit dhe partisë. Global Times, tabloidi nacionalist i People’s Daily, i kushtoi një artikull të gjatë në faqen e dytë të versionit të saj Mandarin, duke pranuar se gjatë “mandati të Françeskut, marrëdhëniet midis Vatikanit dhe Kinës janë përmirësuar pjesërisht”.

GT: lajmet e treta më të lexuara

Në shtator 2018, palët nënshkruan marrëveshjen e përkohshme për emërimin e peshkopëve në Pekin, e cila u zgjat për dy vjet përkatësisht në 2020 dhe 2022. Në tetor 2024, Ministria e Jashtme kineze njoftoi një zgjatje të mëtejshme “për katër vjet të tjera”. Në faqen e internetit Global Times, vdekja e Papa Bergoglios është lajmi i tretë më i lexuar.

CCP Daily, lajmet në vendin e gjashtë

Në platformën Sina, llogaria e “People’s Daily”, zëri i CCP, rendit vdekjen e Papës në vendin e gjashtë midis lidhjeve me lajmet kryesore. Është një artikull i gjatë i shoqëruar me foto. Së fundi, ekziston një element mjaft i zakonshëm: për termin vdekje, termi “qushì” përdoret në vend të “shìshì”. Të dyja janë shumë formale, por e dyta është ajo që i kushtohet më shumë liderëve të mëdhenj.

Deputetja nga radhët e Lëvizjes Vetëvendosje Shqipe Selimi, ishte ndër emrat që u përmend nga lideri i AAK-së Ramush Haradinaj, si kandidate e pranueshme për postin e kryeparlamentares.

Haradinaj pas dështimit të seancës së djeshme, tha se po të propozohej Shqipe Selimi apo Saranda Bogujevci për kryeparlamentare, partia që ai përfaqëson, do t’i votonte pa mëdyshje.

Por Shqipe Selimi tha për Indeksonline se secili anëtar që VV e propozon për cilindo post, e pranon dhe e kryen me nder secilën detyrë dhe se kjo është e drejtë vetëm e partisë së cilës ata i përkasin.

Ndërsa, thotë se AAK ka të drejtë të bëjë propozime, por jo në këtë rast. Sipas Selimit vetëm VV ka të drejtë ta bëjë propozimin për kryeparlamentare, gjë të cilën tashmë e ka bërë.

Selimi thotë se partitë opozitare se kanë këtë të drejtë dhe se atyre u mbetet vetëm të votojnë pro, kundër apo të abstenojnë.

“Ne në politikë jemi për shkak se i përkasim një subjekti politik, partisë VV. E VV cilindo anëtarë që e propozon për cilindo post, ne i pranojmë dhe e kryejmë me nder secilën detyrë. Por këtë propozimin e AAK-së normalisht që kanë të drejtë të propozojnë , por jo në këtë rast. Sepse në këtë rast i bjen që VV ta ketë propozimin për kryeparlamentar. Ne e kemi propozuar dhe tashmë e kemi propozimin dhe atë e mbështesim. Kjo është. Atyre u mbetet vetëm të votojnë Për, kunder apo abstenim, siç e përkufizon dhe kushtetuta”, tha ajo.

Trupi i Papa Françeskut është vendosur sot në një arkivol të hapur në Vatikan për ceremoninë e konfirmimit të vdekjes së tij.

Kardinalët po takohen në Vatikan për të filluar planifikimin e funeralit të Atit të Shenjtë dhe ritualet e përpunuara që shënojnë fundin e një pape dhe fillimin e tjetrit.

Në ditët në vijim, kardinalët do të përgatiten për varrimin e tij, do të planifikojnë konklavën për të zgjedhur pasardhësin e tij dhe do të marrin vendime të tjera për drejtimin e Kishës Katolike.

Françesku vdiq dje në moshën 88-vjeçare pasi pësoi një goditje cerebrale në tru që çoi në koma dhe dështim të pakthyeshëm të zemrës.

Kuvendi i Kosovës ka njoftuar zyrtarisht për vazhdimin e seancës konstituive, që do të jetë më 23 prill, ora 10:00.

Kuvendi ka mbetur pa zgjedhur kryeparlamentarin, pasi LVV propozoi Albulena Haxhiun për kryetare të Kuvendit, por e njëjta u votua vetëm nga 57 deputetë.

Seanca e së hënës shënoi dështimin e katërt radhazi për konstituimin e Kuvendit të Kosovës.

Seanca, e cila u hap të hënën, u ndërpre menjëherë pasi kryesuesi Avni Dehari kërkoi nga Lëvizja Vetëvendosje që të propozojë kandidatin për kryetar të Kuvendit.

Deputeti i kësaj partie, Glauk Konjufca, tha se kandidatura mbetet e njëjtë – Albulena Haxhiu.

Ai shtoi se, duke qenë se partitë e tjera janë deklaruar kundër votimit të saj, nevojitet kohë shtesë për konsultime të brendshme dhe ndërpartiake.

“VV, padyshim e ka emrin e njëjtë, Albulena Haxhiu si e propozuar. Ne meqenëse e kemi parë që të gjitha subjektet politike qysh dje kishin paralajmëruar se do të kenë qëndrimin e njëjtë, mendoj se në këtë situatë politike nuk mund të zgjidhet përveç se me një marrëveshje politike…Pa krijimin e një mazhorance këtu në Kuvend për kryetarin e Kuvendit nuk do të mund të themelohet vetë Kuvendi. E njëjta logjikë është edhe për nënkryetarë… Atëherë ne zoti kryesues kërkojmë një kohë shtesë që të mos përsëritet situata e njëjtë që e patëm tri herë radhazi në Kuvend”, tha Konjufca.

Anëtari i Kryesisë së Nismës, Zafir Berisha, ka vlerësuar se deklarimet e zyrtarëve të VV-së pas ndërprerjeve të seancave janë përgatitje për zgjedhje të jashtëzakonshme.

Sipas tij, dështimet për moskonstituimin e Kuvendit janë të qëllimshme.

Në profilin e tij në “Facebook”, Berisha ka shkruar se kjo çështje duhet të adresohet në Gjykatën Kushtetuese.

“Gjykata Kushtetuese i ka dhën të drejtën eksluzive partisë që delën e para në zgjedhje, për me propozu dhe zgjedhën kryetarin e Kuvendit. Mirpo nuk ka tregu, kur partia që ka dalën e para nuk e shfrytëzon këtë të drejtë (siç ndodhi sot) si duhet të veprohet!? Dmth Gjykata Kushtetuese ka ende punë për t,i spjegu gjërat ( nëse i kërkohet) sepse kemi klasë politike, që partin e kanë mbi shtetin. Përndryshe daklaratat e sektit të VV pas dështimit të qëllimshëm për të zgjedhën kryetarin e Kuvendit, janë parapregaditje e analfabetëve të tyre për zgjedhje të jashtëzakonshëme, me forat e vjetra…”, ka shkruar Berisha.

Varrimi i Papa Françeskut do të mbahet të shtunën, më 26 prill, në orën 10:00 në Bazilikën e Shën Pjetrit në Vatikan, njoftoi Vatikani të martën.

Françesku, i lindur si Jorge Mario Bergoglio në Buenos Aires të Argjentinës, vdiq më 21 prill në moshën 88-vjeçare.

Ai vdiq nga sulmi në tru dhe si pasojë nga dështimi i pakthyeshëm i zemrës, tha Vatikani.

Në vitet e fundit, Papa Françesku ishte përballur me disa komplikime shëndetësore.

Më 2021, ai i ishte nënshtruar një operimi në zorrën e trashë, ndërsa më 2023 ka pasur një operim tjetër në abdomen për të trajtuar herninë.

Ai ishte përballur edhe me dhimbje kronike të gjurit dhe shpinës, dhe shpesh kishte përdorur karrige lëvizëse.

Pavarësisht këtyre komplikimeve, ai pati agjendë të ngarkuar, dhe i kreu detyrat e një pape, si dhe udhëtoi nëpër botë.

Në fillim të vitit 2025, ai u shtrua në spital për shkak të një infeksioni në traktin e frymëmarrjes, çka më vonë i rezultoi me pneumoni të dyfishtë. Gjendja e tij ishte e rënduar, duke e detyruar të qëndronte ditë të tëra në spital.

Si Papa i 266-të i Kishës Katolike Romane, ai ishte i pari prej kontinentit amerikan, dhe i pari i lindur jashtë Evropës që u ngjit në krye të Selisë së Shenjtë, në më shumë se një mijëvjeçar.

Bergoglio, i biri i imigrantëve italianë, kishte punuar si teknik kimik para se t’iu bashkohej jezuitëve më 1958.

Ai ishte shuguruar si prift më 1969 dhe ishte bërë udhëheqës superior i jezuitëve të një province të Argjentinës në periudhën 1973-1979.

Më 1988, ai ishte emëruar peshkop i Buenos Airesit. Tre vjet më vonë, Papa Gjon Pali II e kishte ngritur atë në Kolegjin e Kardinalëve.

I zgjedhur Papë më 2013, pas dorëheqjes së Papa Benediktit XVI, ai e zgjodhi emrin Françesk, për të nderuar Shën Françeskun e Asizit, duke pasqyruar angazhimin e tij ndaj përulësisë dhe të varfërve.

Periudha e tij në krye të Selisë së Shenjtë kujtohet për fokusin në mëshirë, në drejtësinë sociale dhe kujdesin mjedisor.