Një person është arrestuar në Podujevë pasi e ka therë me thikë një person tjetër.
Viktima është dërguar në QKUK, ndërsa i dyshuari në mbajtje.
“Rr. Ilir Konushefci, Podujevë 03.05.2025 – 12:13.Është arrestuar i dyshuari mashkull kosovar, pasi që i njëjti ka therë me thikë viktimën mashkull kosovar. Viktima është dërguar për tretman mjekësor në QKUK, ndërsa i dyshuari pas intervistimit me vendim të prokurorit është dërguar në mbajtje.”
Vetëm për katër muaj, mjetet e Fondit të Kursimeve Pensionale të Kosovës (Trustit) kanë shënuar një rënie drastike mbi 103 milionë euro, duke ngjallur shqetësime për mënyrën se si menaxhohen fondet e pensionistëve të ardhshëm.
Kryetari i Odës Ekonomike të Kosovës, Lulzim Rafuna, në intervistë për Ekonomia Online, shprehu shqetësim për këto ecuri , por tha se humbjet nuk varen vetëm nga menaxhimi i brendshëm i Trustit.
Ai përmendi ndikimin e zhvillimeve ndërkombëtare, veçanërisht politikave të ndërmarra në SHBA.
“Është shqetësuese, nuk është diçka që varet vetëm prej Trustit. Këto janë edhe bursa të huaja, janë edhe investime nëpër organizata të ndryshme që ato kanë qenë të afektuara për shkak të politikave që kanë ardhur së pari nga Shtëpia e Bardhë, politikave të Trumpit. Kështu që nuk është afektuar vetëm Kosova apo vetëm Trusti, por janë afektuar edhe vendet e tjera me shpresë që do të stabilizohet. Pritet për t’u parë”, tha ai.
Rafuna sugjeroi që Qeveria e Kosovës të ndërhyjë me një qasje strategjike ndaj mjeteve të Trustit, duke kërkuar një ligj të veçantë për orientimin e këtyre fondeve drejt investimeve të brendshme zhvillimore, në vend të mbështetjes te tregjet e jashtme.
Ai përmendi si shembull ndërtimin e një termocentrali me gaz, duke e cilësuar atë si projekt për vendin.
“Te Trusti kur jemi, Qeveria e Kosovës duhet ta mendojë një plan, një ligj që këto mjete të Trustit me normën e njëjtë me sigurinë e plotë juridike, nëpërmjet një ligji të kaluar në Kuvendin e Kosovës, mund t’i marrë këto mjete edhe t’i kthejë në investime për projekte konkrete zhvillimore dhe të mos i lejojë që këto të investohen në tregjet e huaja dhe të jenë të varura nga ndryshimet që ndodhin në bursa. Në qoftë se do t’i kishim investuar në projekte, për shembull kishte me qenë një prej projekteve kapitale që ka Kosova nevojë urgjente, kishte me qenë për shembull ndërtimi i një termocentrali me gaz, në kuptimin e kthimit të qymyrit në gaz dhe për prodhimin e energjisë elektrike. Një pjesë e madhe e këtyre mjeteve mund të merren. Përveç borxhit publik mund të merren edhe prej Trustit dhe të investohen”, tha ai.
Rafuna tha se duhet garantuar siguria e mjeteve të qytetarëve, pasi ato janë investime private dhe çdo model i ri duhet të garantojë kthimin e fitimit.
“Trustit ose qytetarëve të Kosovës t’u sigurohet, se këto janë investime private dhe nëpërmjet një ligji që investimi i tyre të kthehet në fitim në Trust, siç ndodh investimi nëpër organizata të ndryshme ndërkombëtare”, tha ai për EO.
Në evidencën e Trustit për datën 31 dhjetor 2024, figuronin 3.181.841.318 euro, ndërsa më 16 prill 2025, kjo shumë kishte rënë në 3.077.975.659 euro.
Një grua ka raportuar se derisa ka qenë duke udhëtuar me tren dikush ka hedhur gurë në drejtim të trenit dhe viktima është qëlluar në kokë.
“LËNDIM I LEHTË TRUPOR- Fsh. Grabovc, Obiliq 03.05.2025 – 17:51. Viktima femër kosovare, ka njoftuar policinë se derisa ka qenë duke udhëtuar në tren (drejtimi Prishtinë–Pejë), dikush ka hedhur një guri në drejtim të trenit, ku ankuesja është qëlluar në kokë. Viktima pas pranimit të trajtimit mjekësor është liruar. Rasti në hetime.”
Në Ditën Ndërkombëtare e Zjarrfikësve, Komuna e Prishtinës do të mbajë aktivitete nga ora 09:00 deri në 14:00.
“09:00- 14:00-Komuna e Prishtinës mban aktivitet për shënimin e “Dita Ndërkombëtare e Zjarrfikësve”. Në orën 11:00, aktivitetit do t’i bashkohet edhe kryetari i Kryeqytetit, Përparim Rama. (Sheshi Zahir Pajaziti)”
Dje për herën e dhjetë dështoi konstiuimi i kuvendit pasi VV kërkoi prapë votim të fshehtë për ta zgjedhur kryeparlamentarin.
Seanca do të vazhdojë nesër nga ora 11:00.
PDK, LDK dhe AAK e kanë bërë të qartë se nuk do ta votojnë Albulena Haxhiun për kryetare të kuvendit, ndërsa VV ka thënë se nuk do e ndërrojnë kandidaten.
Pas votimit të kryekuvendarit është e përcaktuar të procedohet me votim të nënkryetarëve.
Votimi i kryeparlamentarit dhe nënkryetarëve do t’i hapte rrugë formimit të Qeverisë së re të Kosovës. LVV-së, si fituese të zgjedhjeve, i takon që e para të propozojë mandatarin për ekzekzutivin. Nëse brenda 15 ditësh nuk e formon ekzekutivin, atëherë presidentja Vjosa Osmani, ka të drejtë të mandatojë cilëndo parti që ia garanton se i ka 61 votat për Qeverinë e re të Kosovës.
Nëse edhe mandatari i dytë dështon të formojë ekzekutivin, atëherë Osmani shpall mbajtjen e zgjedhjeve të reja.
Presidenti i Ukrainës, Volodymyr Zelensky, ka deklaruar se biseda e tij me ish-presidentin amerikan Donald Trump, e zhvilluar muajin e kaluar në Vatikan, ishte më e mira deri më tani mes tyre, raporton Gazeta Sinjali.
Dy liderët u takuan shkurtimisht në margjinat e funeralit të Papa Françeskut, në një moment vendimtar për Ukrainën, mes pasigurive për mbështetjen e mëtejme të SHBA-ve.
Zelensky u shpreh optimist pas takimit, duke e përshkruar bisedën si më përmbajtjesoren, edhe pse ishte më e shkurtra.
“Unë besoj se patëm bisedën më të mirë me Presidentin Trump nga të gjitha ato që kanë ndodhur më parë,” u tha Zelensky gazetarëve të premten, në një deklaratë të publikuar të shtunën nga zyra presidenciale e Ukrainës.
“Mund të ketë qenë më e shkurtra, por ishte më përmbajtjesorja”.
Në fokus të diskutimit ishin sanksionet e SHBA-së dhe mbështetja ushtarake për Kievin. Zelensky tha se komentet e Trump mbi sanksionet ishin “shumë të forta” dhe theksoi rëndësinë e forcimit të mbrojtjes ajrore të Ukrainës.
“I tregova për sasinë dhe ai më tha se do të punonin për këtë, se këto gjëra nuk janë falas”, shtoi Zelensky.
Të dy liderët ranë dakord se një armëpushim 30-ditor do të ishte një hap i duhur përpara në përpjekjet për paqe.
“Ne do të ecim në këtë drejtim”, përfundoi presidenti ukrainas.
Të mërkurën, Uashingtoni dhe Kievi nënshkruan një marrëveshje të rëndësishme për mineralet – një marrëveshje që të dyja palët ishin përpjekur ta arrinin që kur Trump u kthye në Shtëpinë e Bardhë në janar.
Kryeministri australian, Anthony Albanese, ka siguruar një tjetër mandat trevjeçar, duke hyrë në histori si lideri i parë në 20 vitet e fundit që fiton dy zgjedhje të njëpasnjëshme. Votimet e përgjithshme që u mbajtën të shtunën u zhvilluan nën hijen e krizës së kostos së jetesës, por rezultuan në një triumf të qartë për të majtët.
Partia Laburiste, e udhëhequr nga Albanese, pritet të ketë një shumicë të fortë në parlamentin federal, ndërsa rivali i tij konservator, Peter Dutton nga Partia Liberale, ka pranuar humbjen.
Në fjalimin që mbajti para mbështetësve në Sydney, Albanese u shpreh se Australia do të udhëhiqet me unitet dhe vendosmëri përballë sfidave ndërkombëtare.
“Australianët kanë zgjedhur të përballen me sfidat globale në mënyrën australiane – duke u kujdesur për njëri-tjetrin ndërsa ndërtojnë për të ardhmen. Ne nuk kemi nevojë të lypim, të marrim hua apo të kopjojmë nga të tjerët. Frymëzimin tonë e gjejmë te vlerat tona dhe te njerëzit tanë”, tha ai me entuziazëm.
Ai theksoi gjithashtu se rezultati ishte një votë për vlerat thelbësore të shoqërisë australiane, si drejtësia dhe barazia e mundësive.
“Në këtë kohë pasigurie globale, australianët kanë zgjedhur optimizmin dhe vendosmërinë”, u shpreh Albanese, teksa përfundoi fjalimin nën brohoritjet e përkrahësve.
Kjo fitore konsiderohet si konfirmim i mbështetjes së qytetarëve për politikat sociale dhe ekonomike të Albaneses, në një periudhë me sfida të shumta brenda dhe jashtë vendit.
Një arritje e rëndësishme shkencore është shënuar nga autori nga Kosova, Prof.asoc. Kujtim Thaçi, specialist i biokimisë klinike, i cili ka publikuar punimin e tij si autor i parë në bashkëpunim me prestigjiozen Harvard Medical School. Punimi është botuar në revistën shkencore ndërkombëtare Glycoscience & Therapy, të botuar nga Chinese Academy of Sciences, një ndër institucionet më të njohura kërkimore në botë.
Punimi hedh dritë për herë të parë mbi rolin kritik të glikozilimit të immunglobulinës IgG në zhvillimin e qasjeve të reja diagnostike dhe terapeutike për zbulimin e hershëm dhe menaxhimin pre dhe postnatal të Hemokromatozës neonatale, një sëmundje e rrallë, por serioze tek të sapolindurit.
Ky kontribut shkencor, me një qasje inovative dhe përmbajtje të thellë akademike, ka tërhequr vëmendjen e komunitetit shkencor ndërkombëtar, duke u përzgjedhur për botim nga një revistë me standarde të larta të vlerësimit shkencor.
Autori rekomandon që ky punim të lexohet gjerësisht nga profesionistët shëndetësorë dhe studiuesit, në veçanti nga imunologët, pediatrit dhe reumatologët, si një burim i rëndësishëm për avancimin e dijeve dhe praktikës klinike në këto fusha.
Planet e detajuara të ushtrisë amerikane për një paradë në ditëlindjen e presidentit të Shteteve të Bashkuara, Donald Trump, parashikojnë më shumë se 6,600 ushtarë, të paktën 150 automjete, 50 helikopterë, shtatë grupe muzikore dhe disa mijëra civilë, raporton The Guardian.
Në të njëjtën kohë, Fox News ka raportuar se data e paradës është miratuar përfundimisht dhe do të mbahet më 14 qershor. Kjo datë simbolizon edhe 250-vjetorin e themelimit të Ushtrisë së Shteteve të Bashkuara si dhe ditëlindjen e Trumpit, i cili do të mbushë 79 vjeç.
Përveç ushtarëve në detyrë, parada do të përfshijë aktorë, pajisje dhe elementë nga një sërë ngjarjesh historike amerikane, që nga lufta për pavarësi deri te lufta civile, dy luftërat botërore dhe konfliktet më të fundit në Vietnam, Irak dhe Afganistan.
“Presidenti po planifikon një festim historik për 250-vjetorin e ushtrisë që do të nderojë brezat e amerikanëve që kanë rrezikuar gjithçka për lirinë tonë”, ka thënë Vince Haley, drejtor i Këshillit për politikën e brendshme në Shtëpinë e Bardhë.
Sot, në sallën e konferencave të Stacionit Policor “Qendra”, u mbajt Kuvendi i V-të Zgjedhor i Rregullt i Sindikatës së Policisë së Kosovës, në të cilin u zgjodhën organet e reja drejtuese të këtij mekanizmi të rëndësishëm sindikal.
Në njoftimin për media bëhet e ditur se Avdi Hoti u zgjodh me shumicë votash si kryetar i ri i Sindikatës së Policisë së Kosovës, ndërsa Edita Azemi u zgjodh nënkryetare.
Me këtë rast, të pranishmëve iu drejtua kryetari i BSPK-së, Atdhe Hykolli, i cili theksoi rolin thelbësor të sindikatës në fuqizimin e pozitës së pjesëtarëve të Policisë, në avancimin e të drejtave të tyre, si dhe në ndërtimin e një ambienti profesional, dinjitoz dhe të sigurt për të gjithë.
Kryetari i zgjedhur, Avdi Hoti tha kuvendi zgjedhor është dëshmi e demokracisë së brendshme sindikale dhe e përkushtimit për të avancuar të drejtat dhe mirëqenien e punonjësve të Policisë së Kosovës.
“Përmes këtij forumi ne jo vetëm që reflektojmë mbi arritjet dhe sfidat, por gjithashtu nderojmë rrugën për të ardhmen – një të ardhme të sigurt, më të drejtë dhe më të denjë për të gjithë pjesëtarët e Policisë së Kosovës. Jemi të vetëdijshëm për sfidat me të cilat përballet policia jonë, qoftë në aspektin e punës, ashtu edhe në atë social-ekonomik, por jemi po aq të vendosur që përmes organizimit dhe zërit sindikal t’i realizojmë të gjitha kërkesat e punonjësve të Policisë së Kosovës”, tha ai.