Category: Lajme

Zgjidhjen e ngërçit politik në vend, Lidhja Demokratike e Kosovës e sheh përmes një qeverie tranzicionale por kjo parti tani do të merret me zgjedhjet lokale, tha të enjten më 8 maj kryetari i LDK-së, Lumir Abdixhiku.

“Kohë për të humbur më nuk kemi. Zgjidhje dhamë; zgjidhja jonë aty mbetet – kurdo që janë të gatshëm të tjerët”, shkroi ai në Facebook.

Por deri atëherë, sipas Abdixhikut, LDK-ja do të merret me proceset që i ka përpara.

“Deri atëherë, përtej gjithë bllokadës që na shërbehet pa vizion, përtej mbledhive repetitive 48 orëshe pa ndonjë qëllim, LDK do të merret me proceset e veta përpara, aty ku s’mund të na kurthojnë. Do të merret me Zgjedhjet Lokale. Prandaj, sot kam thirrur në takim të gjithë kryetarët e degëve të LDK-së, për të nisur procesin konsultativ e përgatitor mbi Zgjedhjet Lokale 2025 që do të mbahen këtë vjeshtë”, tha Abdixhiku.

Ai bëri të ditur se nga sot do të nisin konsultimet e brendshme për kandidatët për kryetarë të komunave e për këshilltarë lokalë.

Lumir Abdixhiku propozoi një qeveri tranzicionale deri në zgjedhjen e presidentit më 2026, sipas tij, si zgjidhje për të dalë nga situata aktuale politike.

Kuvendi ka mbetur në ngërç pasi Lëvizja Vetëvendosje – në koalicion me Guxo dhe Alternativa – nuk po arrin të sigurojë 61 vota për të zgjedhur Albulena Haxhiun kryeparlamentare.

Këshilli Gjyqësor i Kosovës në mbledhjen e sotme ka miratuar propozimin për pushim bllok në sistemin gjyqësor nga 21 korrik deri më 20 gusht për periudhën verore, dhe nga 24 dhjetori deri më 8 janar për periudhën dimërore. Në këtë propozim përjashtohen kujdestaritë lidhur me trajtimin e lëndëve me prioritet ligjor dhe rasteve emergjente, raporton KosovaPress.

Po në këtë mbledhje, u miratua edhe draft Kodi i Mirësjelljes dhe Etikës Profesionale për Nëpunësit në Administratën e Sistemit Gjyqësor, si dhe draft vendimit për vlerësimin e performancës së anëtarëve të KGjK-së.

Këshilli Gjyqësor i Kosovës në mbledhjen e sotme e ka votuar edhe propozimin për pushim vjetor në bllok në sistemin gjyqësor.

Muaji qershor, korrik si dhe fundi i dhjetorit dhe fillimi i janarit po konsiderohen problematik për organizim të punës për shkak të fluksit të madh të pushimeve nga stafi, prandaj është propozuar që nga 25 korrik e deri më 20 gusht si dhe nga 24 dhjetori e deri më 8 janar gjykatat të ketë pushimin zyrtar.

Kjo nuk vlen për kujdestaritë dhe trajtimin e rasteve emergjente dhe me prioritet ligjor.

“Kur flasim për muajin korrik dhe gusht vërehet një efikasitet pak më i ulët i gjykatave në nivel vendi. Po ashtu edhe fundi i muajit dhjetor dhe fillimi i muajit është një prej periudhave kur efikasiteti i gjykatave bie për shkak të shfrytëzimit të pushimeve. Po ashtu statistikat tregojnë se gjatë kësaj periudhe kemi edhe numër të madh të seancave të shtyra dhe të seancave jo produktive numri më i madh i seancave janë mungesa e avokatëve, mungesa e prokurorëve, mungesa e stafit dhe çështjeve të tjera…gjykatat të pushojnë në pushim zyrtar atë duke filluar nga data 25 korrik deri më 21 gusht për periudhën verore, dhe 24 dhjetor e deri më 8 janar të vitit kalendarik ky është rekomandimi i Këshillit. Pezullohen të gjitha seancat gjyqësore dhe propozohet që në rastin konkret që gjatë kësaj periudhe që pjesa më e madhe e pushimeve të shfrytëzohen gjatë kësaj periudhe kohore. Përjashtimisht nga ky rekomandim janë kujdestaritë lidhur me trajtimin e lëndëve me prioritet ligjor dhe rasteve emergjente”, theksoi ai.

Kryesuesi i Këshillit Gjyqësor të Kosovës, Albert Zogaj tha se pushimi në bllok i gjykatave do të ndikonte që puna e sistemit gjyqësor gjatë periudhës tjetër të vitit të jetë më efikase dhe më e mirëfilltë.

“Mos të caktohen seanca që do të dështojnë sepse e theksuam se ka pas numër të madh të seancave që kanë dështuar dhe do të mbahen seanca që përfshihen në listën esenciale të shërbimeve…Kjo do të nënkuptonte që në periudhën tjetër gjykata do të ishte shumë më efikase dhe puna në gjykata do të organizohej në mënyrë më të mirëfilltë. Tek lista esenciale e shërbimeve bashkë me zyrën ligjore të përfshihet edhe veprimet që lidhen me procedurën paraprake për masat e hetimit dhe vëzhgimit sepse mund të jenë procedura që mund ta diktojnë procedurën e hetimeve në raste të caktuara”, deklaroi Zogaj.

Kryetarja e Komisionit për hartimin e këtij Kodi, Drita Rexhaj, Drita Rexhaj tha se përmes këtij Kodi synohet ruajtje e dinjiteti dhe imazhit të sistemit gjyqësor si dhe rritja e besimit qytetar në këtë institucion.

“Është një dokument që përbën rregulla të detajuara, objektiva të cila kanë për qëllim të përcaktojnë rregullat e etikë së nëpunësve në administratën e sistemin gjyqësor me qëllim me e ruajtur dinjitetin dhe imazhin e sistemit gjyqësor duke rritur edhe besimin e qytetarëve në punën e gjyqësorit i cili draft është i hartuar me Njësinë e Inspektimit Gjyqësor dhe Zyrën Ligjore… Dispozitat e këtij kodi janë të detyrueshme për gjithë nëpunësit në administratën e sistemit gjyqësorë, i cili përfshirë nëpunësit civil e punësuar në Këshill, nëpunësit civil të punësuar në sekretariat dhe për ata në PZAP dhe për të gjithë nëpunësit në gjykatat e Kosovës”, theksoi ajo.

Kryesuesi i KGjK-së, Albert Zogaj shpreson që ky kod do të kontribuoj në rritjen e integritetit të sjelljes gjyqësore.

“E kisha quajtur reformë në administratën gjyqësorë ka rëndësi për shkak se ne përveç që kemi një numër të madh të punësuarve në administratë kemi po ashtu një numër të zyrtarëve të ri që janë bërë pjesë e administratës dhe që realisht nuk kanë marr njohuri të duhura për mirësjelljen në administratën gjyqësore. Shpresoj që ky kod ka me i kontribua rritjes se integritetit të sjelljes gjyqësore në përgjithësi por njëkohësisht edhe të përgjegjësisë dhe efikasitetit në gjykata”, theksoi Zogaj.

Në mbledhjen e sotme të Këshillit Gjyqësor të Kosovës është miratua dhe draft vendimi për vlerësimin e performancës së anëtarëve të KGjK-së si dhe janë themeluar komisionet përkatëse.

Kryetarja e Komisionit për hartimin e këtij draf-vendimi, Drita Rexhaj tha se vlerësimi i performancës së anëtarëve të KGJK-së ka impakt në rritjen e transparencës dhe llogaridhënies.

“Edhe si komision, kemi ardhur në konkludim që duhet të kemi një vendim i cili përmban vlerësimin e perfomancës së krejt kategorive të anëtarëve të KGJK-sën për përudhen e vlerësimit të performancës po ashtu përmban burimet e informacionit, kriteret e këtij vendimi i bashkëngjiten edhe formularët në të cilët janë të përcaktuar qartë kriteret e vlerësimit të perfomancës duke përfshirë edhe poentimin. Edhe shkallët e vlerësimit edhe kriteret janë në një linjë harmonike edhe me vlerësimin e përfomancës gjyqtarëve në sistemi gjyqësor”, theksoi ajo.

Kryesuesi i këtij institucioni të drejtësisë, Albert Zogaj u shpreh se vlerësimi i performancës është në harmoni me kërkesën e Këshillit të Evropës.

Në mbledhjen e sotme është miratuar edhe draft rregullorja për Arkivat në Sistemin Gjyqësor.

Anëtarja e Këshillit Gjyqësor të Kosovës, Drita Rexhaj tha se drafi i rregullores për Arkivat në sistemin gjyqësor synon ta rregulloj procedurën dhe standardet e operimet në arkivat e sistemit gjyqësor.

Ky draft parasheh edhe transparencën dhe llogaridhënien derisa është përcaktuar edhe dorëzimi i lëndëve.

Anëtari i KGjK-së, Fahret Vellija tha se po planifikohet se disa gjykata që kanë lëndë me afat të ruajtjes së përhershme të dorëzohen në Agjencinë për Arkiva të Kosovës.

“Është dakorduar që disa lënda që e kanë afatit të ruajtjes së përhershme të dorëzohen pranë kësaj agjencie dakordimi është që të gjitha lëndët deri në vitin 2000 të dorëzohen pranë kësaj agjencie. Çka është qëllimi këtu të vazhdojmë edhe më tutje me rregullimin e arkivave në sistemin gjyqësor i cili është një prej prioriteteve për këtë vit dhe vitin e ardhshëm”, theksoi ai.

Kjo draft rregullore është mirëpritur edhe nga kryesuesi i Këshillit Gjyqësor të Kosovës, Albert Zogaj i cili kërkoi nga të gjitha gjykatat të mobilizohen për zbatimin e strategjisë për arkivat.

“Ne kemi arkiv, dhe kemi material arkivor më shumë se secili institucion në fakt nuk kemi pas një rregullore që adreson çështjen e arkivës dhe ky dokument ndërvepron edhe me aktet tjera që janë miratuar dhe kërkoj nga të gjitha gjykatat që me pas mobilizim për zbatim e strategjisë për arkivat në tre drejtime, lëndë arkivore në tri lëndë arkivore në arkivin e shtetit, lëndë edhe në arkivat në objektet që ka vendos KGJK risistemim dhe regjistrimit e secilës dosje përfshirë edhe mostrat e sigurisë“, tha ai.

Këshilli Gjyqësor i Kosovës në mbledhjen e sotme e ka miratuar edhe draft Udhëzimin Administrativ për Vula në Sistemin Gjyqësor si dhe ka shpall konkursin për administratorë të Gjykatës Supreme të Kosovës, Dhomës së Posaçme të Gjykatës Supreme, Gjykatës Komerciale, Gjykatës Themelore në Prizren, Pejë, Gjilan dhe Ferizaj./kp

Kryeministri në detyrë i Republikës së Kosovës, Albin Kurti, ka bërë sot homazhe në varrezat e dëshmorëve në Landovicë, në nderim të 25-vjetorit të rënies së Ekrem Rexhës- komandant Drinit, raporton KosovaPress.

Kurti e vlerësoi Rexhën si një figurë të shquar të luftës dhe të mendimit strategjik për çlirimin e vendit.

“Ekrem Rexha, komandant Drini ka qenë veprimtar intelektual e luftëtar i paepur i cili me pushkë në dorë dhe me strategji në mendje u përball me armikun e okupatorit serb dhe sot shënojmë 25 vjetorin e vrasjes së tij. Më ç’rast bëmë homazhe këtu tek varri tij dhe shprehem mirënjohjen tonë të thellë tek familja tij që e dhanë një bir kaq të vlefshëm për kombin shqiptar”, ka thënë Kurti.

Ndërkaq në ora 11:00, Kurti do të bëjë homazhe te memoriali në lagjen Bazhdarhane – Shtëpia e Bardhë.

Aleksandar Vuçiq po përpiqet në vazhdimësi të përfitojë edhe nga Shtetet e Bashkuara, edhe nga Rusia, thotë eksperti i sigurisë, Avni Islami, derisa flet për vizitën që presidenti serb po zhvillon në Moskë.

Vuçiq do të marrë pjesë në Paradën e Fitores në Sheshin e Kuq më 9 maj, pavarësisht kundërshtimit të Bashkimit Evropian.

Komisionarja për Zgjerim e bllokut, Marta Kos tha ditë më parë se nëse Vuçiq shkon në Moskë, ajo do ta ketë shumë më të vështirë t’i ndihmojë Serbisë të qëndrojë e përkushtuar në rrugën evropiane.

Më 9 maj, Rusia shënon 80-vjetorin e fitores kundër fashizmit në Luftën e Dytë Botërore.

“Duke ditur që Aleksandër Vuçiq në kohën e Millosheviq ishte zëdhënës i propagandës dhe informacionit, ai edhe pse sot është president i Serbisë, ende jeton me të kaluarën dhe përpiqet që përmes propagandës dhe gënjeshtarëve të tij të arrijë sukseset e tij. U pa që mediat, të cilat janë nën kontroll të tij në Serbi, e proklamuan se presidenti Vuçiq do të takohet me Donald Trump në Amerikë dhe se e tëra kjo ishte lojë. Kjo tregon se ai është i pasinqertë dhe kjo tregon se në SHBA nuk është pritur një lojë e tillë e tij, sepse në fakt ai nuk ishte i sëmurë. Biseda ose takimi me Donald Trump do t’i shërbente si trampolinë që ai të shkojë drejt Moskës, ku do të merr pjesë së bashku me presidentin Putin në një paradë atje. Kjo tregon se ky përpiqet në vazhdimësi të përfitojë nga Lindja dhe Perëndimi, nga Rusia dhe SHBA-ja”, potencon Islami.

Përveç tjerash, profesori i shkencave të sigurisë, Avni Islami thotë se Vuçiq po përpiqet përmes shtetit serb ta luajë rolin e ndërmjetësuesit mes SHBA-së dhe Rusisë.

“Matematikat e fuqive të mëdha janë të mëdha. Pa dyshim që ky (Vuçiq) është dashur që të ndëshkohet. Duhet theksuar edhe një fakt, se ky përpiqet që përmes shtetit serb ta luajë një rol si një lloj ndërmjetësuesi në mes SHBA-së dhe Rusisë. Por, faktikisht amerikanët dhe rusët nuk janë të interesuar për ndërmjetësues, sepse ata flasin dhe bisedojnë në mënyrë diplomatike me diplomatë e vet”, thotë Islami.

Para Moskës, Vuçiq udhëtoi për në Amerikë dhe kishte planifikuar të takohej me zyrtarë të lartë të Partisë Republikane, si dhe me presidentin amerikan, Donald Trump.

Mediat në Beograd më pas raportuan se Vuçiq u shtrua në Spitalin ushtarak në Beograd.

Ish-diplomati serb Nebojsha Vujoviq, tha se Vuçiq peshkoi veten e tij, pasi mendoi “të bëjë një foto me Trumpin për të zbutur kërcënimin nga Evropa dhe për të shkuar në Moskë”.

Islami ndër të tjera flet edhe për arrestimin e fundit të një personi të dyshuar për spiunazh.

Prokuroria Speciale njoftoi se pas hetimeve disamujore ka arrestuar H.S, i dyshuar për spiunazh. Sipas njoftimit, aksioni dhe arrestimi u zhvillua në bashkëpunim me Policinë e Kosovës, si dhe me asistencë të Agjencisë së Kosovës për Inteligjencë (AKI).

Islami thotë për KosovaPress se institucionet e sigurisë në Kosovë kanë prova të mjaftueshme për personin e arrestuar, por edhe për të tjerë që i shërbejnë BIA-s serbe.

“Arrestimi i djeshëm i një të dyshuari ku mendohet se ka prova të mjaftueshme se ishte bashkëpunëtor i BIA-s dhe se në të njëjtën kohë i njëjti kishte qenë në Siri dhe është akuzuar për terrorizëm. Unë besoj se institucionet e sigurisë së Kosovë kanë prova të mjaftueshme jo vetëm për këtë, por edhe për disa të tjerë. Kur merret parasysh që brenda një viti janë arrestuar pesë bashkëpunëtorë ose agjentë të BIA-së, kam theksuar se ky është vetëm fillimi dhe se në Kosovë vlojnë bashkëpunëtorë e agjentë të BIA-së”, thotë Islami./kp

Kardinalët katolikë romanë janë kthyer të enjten në Kapelën Sistine, për ta rifilluar votimin për zgjedhjen e papës së ri në konklavën më të madhe dhe gjeografikisht më të shumëllojshme në historinë e tyre.

Kardinalët e nisën të mërkurën punën thellësisht rituale dhe të fshehtë për emërimin e një udhëheqësi të ri për 1.4 miliardë katolikët në mbarë botën.

Por, në mbrëmje tym i zi doli nga oxhaku në çatinë e kapelës, gjë që tregoi se nuk u zgjodh papa i ri në votimin e parë, shkruan Radio Evropa e Lirë.

Kardinalët pritej ta nisnin votimin e dytë sot rreth orës 9 të mëngjesit, sipas asaj që ka njoftuar më herët Vatikani.

Tym i bardhë do të tregojë se Kisha Katolike ka zgjedhur udhëheqësin e ri, që do të zëvendësojë Papa Françeskun, i cili ndërroi jetë muajin e kaluar.

Nëse votimi i parë të enjten rezulton vendimtar, zgjedhja mund të shpallet rreth orës 11:00. Në të kundërt, sinjalet me tym do të vijnë më vonë gjatë ditës.

Asnjë papë nuk është zgjedhur në ditën e parë të këshillit, e njohur si konklava e fshehtë, prej shekujsh, prandaj votimi mund të vazhdojë për disa ditë para se ndonjëri nga princat me kapele të kuqe të kishës t’i marrë shumicën e nevojshme prej dy të tretat e votave për t’u bërë papa i 267-të.

Kardinalët, gjatë ditëve të fundit, kanë dhënë vlerësime të ndryshme për atë që kërkojnë tek papa i ardhshëm.

Derisa disa kanë bërë thirrje për vazhdimësi me vizionin e Françeskut për më shumë reforma dhe të qenit të hapur, të tjerë kanë kërkuar rikthim tek traditat e vjetra. Shumë kanë shprehur dëshirën për një papat më të parashikueshëm dhe të matur.

Një rekord prej 133 kardinalësh nga 70 vende do të hyjnë në Kapelën Sistine, në krahasim me 115 nga 48 vende në konklavën e vitit 2013 – një rritje që pasqyron përpjekjet e Françeskut për të zgjeruar ndikimin e kishës në rajone të largëta me pak katolikë.

Ende nuk ka favorit të qartë, megjithëse kardinali italian Pietro Parolin dhe kardinali filipinas Luis Antonio Tagle konsiderohen ndër pretendentët kryesorë.

Ashtu si në kohët mesjetare, kardinalëve do t’u ndalohet komunikimi me botën e jashtme gjatë konklavës, dhe Vatikani ka ndërmarrë masa të teknologjisë së lartë për të siguruar fshehtësinë, duke përfshirë pajisje që bllokojnë sinjalet për të parandaluar përgjimin.

Gjatësia mesatare e dhjetë konklavave të fundit ka qenë pak më shumë se tri ditë, dhe asnjë nuk ka zgjatur më shumë se pesë ditë. Konklava e vitit 2013 zgjati vetëm dy ditë.

Kardinalët do të përpiqen ta mbyllin procesin shpejt edhe këtë herë, për të shmangur përshtypjen se janë të përçarë ose se kisha është pa udhëheqje./REL/

Prokuroria Themelore në Prizren, Departamenti i Krimeve të Rënda, ka ngritur aktakuzë ndaj shtatë personave për keqpërdorim të detyrës zyrtare, lidhur me ndërtimin e shkollës fillore “Vaso Pashë Shkodrani” në fshatin Tërnje të Suharekës.

Në njoftimin e Prokurorisë thuhet se të pandehurit B.K. (menaxher i projektit), A.R. dhe V.K. (mbikëqyrës të brendshëm komunalë), Z.T. (mbikëqyrës i jashtëm i kontraktuar), si dhe A.E., H.B. dhe A.T. (anëtarë të komisionit për kontrollimin e punimeve), akuzohen për shkelje të procedurave zyrtare në periudhën mes tetorit 2018 dhe dhjetorit 2019.

Sipas aktakuzës, këta persona, duke vepruar në pozita të ndryshme, kanë mundësuar përfitime të padrejta për Operatorin Ekonomik të kontraktuar, duke pranuar punë të pakryera si të përfunduara dhe duke bërë ndryshime të paligjshme në projektin ndërtimor.

Prokuroria thekson se në projektin me vlerë mbi 294 mijë euro, është anashkaluar ndërtimi i një pjese të podrumit me sipërfaqe 175 m², e cila ishte zëvendësuar me vetëm 16 m² të një aneksi, duke shkaktuar dëm financiar në buxhetin komunal. Përveç kësaj, ishte lidhur edhe një kontratë shtesë për punime në vlerë prej 29,202 euro.

Të pandehurit po përballen me akuzën për veprën penale “Keqpërdorimi i pozitës apo autoritetit zyrtar”.

Policia e Kosovës ka arrestuar dy të dyshuar për posedim të substancave narkotike në Ferizaj. Sipas Policisë së Kosovës, gjatë kontrollit në veturën dhe shtëpitë e tyre, janë gjetur dhe sekuestruar 1,559.80 gramë substancë e dyshuar narkotike e llojit marihuanë, 6. 256 euro para kesh dhe disa dëshmi tjera relevante për rastin, raporton KosovaPress.

“Fsh. Bibaj, Ferizaj 07.05.2025 – 15:40. Janë arrestuar dy të dyshuar meshkuj kosovar pasi gjatë kontrollit në veturën dhe shtëpitë e tyre janë gjetur dhe konfiskuar: 1559.80 gramë substancë e dyshuar narkotike e llojit marihuanë, 6256 euro para kesh si dhe disa dëshmi tjera relevante për rastin”, thuhet në raportin 24 orësh të policisë.

Policia njofton se me vendim të prokurorit të dyshuarit janë dërguar në mbajtje.

Qytetet ukrainase duken të jenë të qeta mëngjesin e së enjtes, pasi ka hyrë në fuqi një armëpushim treditor i shpallur nga Rusia. Thuhet se nuk ka pasur asnjë sulm me dronë apo raketa mëngjesin e sotëm, pas disa netësh bombardimesh të pareshtura.

Megjithatë, Forcat Ajrore të Ukrainës njoftuan se avionët rusë hodhën dy herë bomba të telekomanduara mbi rajonin Sumi në verilindje të vendit, në orët e para të mëngjesit të së enjtes.

Sulmi i parë ndodhi pothuajse tri orë pasi hyri në fuqi armëpushimi, ndërsa i dyti brenda dy orësh. Nuk ka të dhëna për dëmet e shkaktuara.

Kryeqyteti Kiev është i qetë në orët e para të ditës, por nuk është e qartë nëse luftimet janë ndalur edhe në vijën e frontit.

Presidenti i Rusisë, Vladimir Putin, shpalli armëpushimin 72-orësh për të përkuar me aktivitetet përkujtimore të 80-vjetorit të fitores ndaj Gjermanisë naziste në Luftën e Dytë Botërore.

Ai po i mirëpret në Moskë presidentin kinez, Xi Jinping, dhe liderë të tjerë për festimet e Ditës së Fitores më 9 maj, që përfshijnë edhe një paradë ushtarake në Sheshin e Kuq.

Mes të ftuarve janë edhe kryeministri sllovak, Robert Fico, që ka kritikuar hapur mbështetjen e BE-së për Ukrainën, si dhe presidenti serb, Aleksandar Vuçiq, i cili vizitoi Moskën pavarësisht trysnisë nga BE-ja se kjo vizitë mund të dëmtojë ambiciet e Serbisë për anëtarësim në bllok.

Kremlini njoftoi se Putin do të zhvillojë takime dypalëshe me liderët më 9 maj.

Ukraina nuk e ka pranuar armëpushimin, duke theksuar se Putini e shpalli atë vetëm për ta krijuar një përshtypje se kërkon përfundimin e luftës.

Presidenti ukrainas, Volodymyr Zelensky, deklaroi në një fjalim më 7 maj se alarmet për sulme ajrore kishin rënë në të gjithë vendin pas një nate me sulme të rënda.

“Gjatë natës pati një tjetër sulm rus me raketa dhe dronë – sulme balistike dhe mbi 140 dronë kamikazë vetëm në një natë”, tha Zelensky. “Ishte zhurmë në Kiev dhe në qytete të tjera. Fatkeqësisht ka të plagosur dhe të vrarë.”

Ai theksoi se Ukraina mbetet e përkushtuar ndaj propozimit për një armëpushim 30-ditor në këtë luftë, e cila nisi pasi Rusia e filloi pushtimin e plotë të Ukrainës në shkurt 2022.

Propozimi për armëpushim 30-ditor u bë nga Shtetet e Bashkuara në mars dhe u pranua nga Ukraina.

Rusia ka thënë se një marrëveshje e tillë mund të hyjë në fuqi vetëm nëse vendosen mekanizma për zbatimin e saj.

Të dyja vendet përballen me trysni nga presidenti amerikan, Donald Trump, për t’i dhënë fund shpejt konfliktit më të madh në Evropë që nga Lufta e Dytë Botërore.

Putin ka shprehur gatishmërinë për paqe, por zëvendëspresidenti amerikan, JD Vance, tha se “rusët po kërkojnë shumë”, ndërsa SHBA-ja po përpiqet të sjellë palët në tryezën e bisedimeve.

Vance shtoi se Ukraina nuk duhet të mbetet e fiksuar pas idesë së një armëpushimi 30-ditor, duke thënë se “dallimet janë të thella”, por ai është “mjaft optimist” për mundësinë e përfundimit të luftës.

Kuvendi i Kosovës dështoi të konstituohet edhe në përpjekjen e dymbëdhjetë për shkak të mungesës së marrëveshjes midis partive politike, duke thelluar më tej krizën institucionale.

Lidhja Demokratike e Kosovës (LDK), ka propozuar krijimin e një qeverie tranzicionale, një ide që ka hasur në kundërshtimin e Lëvizjes Vetëvendosje (VV), ndërsa partitë e tjera kanë shprehur gatishmërinë për ta diskutuar.

PDK-ja ka theksuar se është e angazhuar për formimin e një qeverie të re, përbërë nga partitë që kanë qenë në opozitë gjatë mandatit të kaluar.

Sipas PDK-së, ky është opsioni më i mirë për vendin, pasi do të mundësonte rikthimin e Kosovës në rrugën e zhvillimit dhe integrimit euroatlantik.

Ndërkohë, kreu i AAK-së, Ramush Haradinaj, në Debat Plus mbrëmjen e së enjtes, ka theksuar se partia e tij nuk do të marrë pjesë në tryezën për krijimin e një qeverie tranzicioni që përfshin Lëvizjen Vetëvendosje, duke i referuar përpjekjeve të tjera të partive opozitare për të negociuar me Albin Kurtin.

Haradinaj e cilësoi të palogjikshëm nxitimin e Kurtit për të shpallur veten kryeministër kur akoma nuk kishte marrë përgjigje nga LDK-ja pas letrës për koalicion.

Në anën tjetër, Haradinaj ka shprehur gatishmërinë për të komunikuar dhe bashkëpunuar me opozitën, por pa krijuar “ura” me VV-në.

Sot do të mbahet në Shtëpinë e Evropës një ceremoni e organizuar nga Ambasada e Gjermanisë dhe Zyra e BE-së në Kosovë, për të shënuar përfundimin e Luftës së Dytë Botërore në Evropë dhe çlirimin e Gjermanisë.

Ceremonia do të mbahet në ora 18:30.