Category: Lajme

Struktura e Posaçme kundër Korrupsionit dhe Krimit të Organizuar ka bërë bilancin lidhur me krimet zgjedhore në Shqipëri gjatë zgjedhjeve parlamentare të 11 majit. Të dhënat janë deri me 11 Maj ora 19:00.

SPAK informon se janë 156 materiale të administruara, ku mes tyre 39 procedime penale të regjistruara, raporton ATSH.

Nga procedimet penale të regjistruara: 21 janë iniciuar mbi bazën e referimeve nga Policia e Shtetit; 1 është referuar nga Shërbimi i Kontrollit të Brendshëm të Burgjeve; 8 janë nisur kryesisht nga SPAK; 3 kanë ardhur si rezultat i kallëzimeve nga shtetas të ndryshëm; 3 janë referuar nga Prokuroritë e Rretheve Gjyqësore; 3 janë bazuar në kallëzimet e subjekteve politike.

Krimet Zgjedhore – 156 materiale të administruara:

39 materiale kallëzuese kanë kaluar në fazën e hetimit (janë regjistruar si procedime penale); 25 janë vendime për mosfillim të hetimit penal; 24 materiale kallëzuese janë dërguar për kompetencë në prokuroritë e rretheve gjyqësore; 17 materiale janë dërguar për verifikim në Drejtorinë Vendore të Policisë. (për informacion shtesë ose për kryerje të veprimeve të para); 1 material është bashkuar me një çështje tjetër ekzistuese.

Krimet Zgjedhore – Veprat penale për 39 procedimet:

33 procedime janë regjistruar për veprën penale të nenit 328 (korrupsionit aktiv në zgjedhje); 4 procedime janë regjistruar për të dy nenet, respektivisht, sipas nenit 328 me nenin 328/b (korrupsioni aktiv/pasiv në zgjedhje); 1 procedim është regjistruar sipas nenit 328/a (përdorimi i funksionit publik për qëllime politike); 1 procedim është regjistruar për nenin 328/a (përdorimi i funksionit publik për qëllime politike dhe nenin 248 (shpërdorimi i detyrës); 50 materiale (denoncime/sinjalizime) kanë ardhur në mënyrë elektronike (në portalin Denonco Krimin Zgjedhor dhe e-mail [email protected]); 5 sinjalizime kanë ardhur në numrin e gjelbër.

Organizatat e dala nga lufta kanë bërë edhe një reagim tjetër për vizitës e Ekaterina Trendafilova. Sipas tyre kjo vizitë është e papranushme dhe fyerje e rëndë ndaj “atyre që sakrifikuan për lirinë e këtij vendi.

“Vizita e paralajmëruar e Kryetares së Trupit Gjykues të Gjykatës Speciale, znj. Ekaterina Trendafilova, në Kosovë është jo vetëm e papranueshme, por edhe një fyerje e rëndë ndaj të gjithë atyre që sakrifikuan për lirinë e këtij vendi. E paralajmëruar të mbahet nën një perde të trashë të fshehtësisë, pa praninë e qytëtarëve dhe kamerave, kjo vizitë nuk ka asgjë të përbashkët me drejtësinë apo transparencën,përkundrazi, është përpjekje për të ikur nga llogaridhënia dhe për të vazhduar një agjendë të njëanshme politike.”

Në reagim thuhet se Gjykata Speciale ka heshur për krimet serbe mbi civilët shqiptare.

“Kjo qasje arrogante dhe fyese nuk është gjë tjetër veçse vazhdim i padrejtësisë që po u bëhet krerëve të UÇK-së në Hagë. E njëjta gjykatë që heshti për krimet serbe mbi civilët shqiptarë, sot vjen në Kosovë si “autoritet drejtësie”, por nuk ka guxim të përballet me opinionin publik. Kjo është hipokrizi e pastër!”

Këto organizata kanë kërkuar nga institucionet e Kosovës “që të mos bëhen pjesë e kësaj fasade”.

“Ne, OVL, SHIL dhe SHFD, ritheksojmë kundërshtimin tonë të plotë dhe të palëkundur ndaj kësaj vizite. Kërkojmë nga institucionet e Kosovës që të mos bëhen pjesë e kësaj fasade, dhe i ftojmë të gjithë qytetarët, shoqatat e dala nga lufta dhe mediat e pavarura, të qëndrojnë në krah të së vërtetës dhe sakrificës sonë të përbashkët. Historia nuk fshihet me dyer të mbyllura, poashtu as e vërteta nuk trembet nga sytë e publikut.”

Qytetarë të shumtë, bashkëluftëtarë dhe të afërm bënë homazhe të varri i njërit nga komandantët e Ushtrisë Çlirimtare të Kosovës, Agron Rrahmani, në 26-vjetorin e rënies së tij, raporton EO.

Edhe kryeministri në detyrë, Albin Kurti, bëri homazhe. Ai tha se vrasja e Agron Rrahmanit pas asaj të Bahri Fazliut, ishte një goditje e madhe për luftën çlirimtare, duke kujtuar se të dy kishin qenë bashkë në burg gjatë viteve ’89–’90 dhe më vonë u bashkuan në organizimin e UÇK-së.

“Pesë ditë pas vrasjes së Bahri Fazliut është vrarë edhe Agron Rrahmani. Këto dy vrasje të heronjve tanë, të luftëtarëve të paepur të njerëzve aq të dashur, kanë qenë goditje shumë të mëdha për luftën e Ushtrisë Çlirimtare të Kosovës. Agron Rrahmani ka pasur edhe të njëjtën moshë me Bahri Fazliun. Gjatë viteve ‘89-‘90 kanë qenë të dy në burg në kohën e demonstratave dhe më pastaj janë organizuar bashkërisht me UÇK. Agron Rrahmani dhe të gjithë dëshmorët e kombit e përbëjnë historinë e kombit”, tha Kurti.

Agron Rrahmani ka rënë gjatë luftimeve të zhvilluara kundër policisë serbe në mëngjesin e 12 majit të vitit 1998 në Lagjen e Muhaxherëve në Prishtinë.

Deputetja e Lidhjes Demokratike të Kosovës, Hykemete Bajrami dhe anëtari i kryesisë së LDK-së, Visar Azemi, kanë dorëzuar sot në Zyrën e Rregullatorit të Energjisë Elektrike, kërkesën e deputetëve të LDK-së dhe deputetëve tjerë mbështetës për anulimin apo shtyrjen e vendimit të ZRrE-së për largimin e rreth 1300 bizneseve nga tregu i rregulluar i energjisë elektrike.

Me të njëjtën shkresë, është kërkuar edhe anulimi i vendimit për rritjen e çmimit të energjisë për ekonomitë familjare.

Ata kanë bërë të ditur edhe kërkesat e deputetëve nënshkrues, të cilat përveç anulimit për së paku një vit, në mesin e tyre ishin edhe zbatimi i konsultimeve të hapura dhe publike, në përputhje me ligjin, për çdo vendim me ndikim të madh, përfshirë tarifat e energjisë, dorëzimi i analizës së plotë në Kuvend, menjëherë pas konstituimit të tij, së bashku me vendimin për liberalizim të tregut dhe anulimi i vendimit për rritjen e çmimit të energjisë elektrike për ekonomitë familjare, me zotimin për të gjetur alternativa që nuk rëndojnë qytetarët.

LDK thotë se ky është vetëm një hap për të mbrojtur interesin e qytetarëve përballë një vendimi që do të ketë pasoja në vështirësimin e jetës së secilit qytetar e biznes në Kosovë.

Deputetët e LDK-së, paralajmërojnë edhe veprime të tjera, sapo të themelohen institucionet e dala nga zgjedhjet e 9 shkurtit.

Ministria e Financave ka njoftuar se është funksionalizuar aplikimi elektronik për njohjen e statusit dhe rivlerësimin e personave me aftësi të kufizuara dhe atyre me dëmtim të shikimit. Ky zhvillim vjen pas lansimit të aplikimit online për personat paraplegjikë dhe tetraplegjikë.

Sipas MF-së, pas miratimit të akteve nënligjore përkatëse, tashmë është mundësuar një procedurë e thjeshtuar që shmang burokracinë e mëhershme dhe u ofron qytetarëve më shumë lehtësi dhe efikasitet në procesin e aplikimit.

“Qytetarët mund të aplikojnë përmes platformës zyrtare eKosova, duke ndjekur këto hapa: klikoni në “Shërbimet”, pastaj zgjidhni kategorinë “Familja”, ku do të gjeni formularët përkatës. Formulari i njëjtë shfrytëzohet si për aplikim të ri, ashtu edhe për rivlerësim të statusit ekzistues. Ky hap përfaqëson një avancim të rëndësishëm drejt dixhitalizimit të shërbimeve publike dhe përfshirjes më të madhe të personave me aftësi të kufizuara në proceset institucionale”, thuhet në njoftim.

Njësia policore së bashku me njësinë e Doganës, te Dheu i Bardhë kanë ndaluar një veturë që drejtohej nga një serb.

Gjatë kontrollit, sipas policisë u gjet dhe u sekuestrua një shufër policore, një sprej dhe një elektroshok.

“Njësia policore së bashku me njësinë e doganës gjatë kontrollit të përbashkët të një veture që drejtohej nga një mashkull shtetasi Serbisë, ka gjetur dhe sekuestruar një shufër policore, një sprej dhe një elektroshok. Në konsultim me prokurorin pas inicimit të rastit i dyshuari është liruar në procedurë të rregullt”, thuhet në raportin e policisë.

Shtetet e Bashkuara të Amerikës dhe Kina kanë vendosur që të ulin tarifat në 115%, njofton The Guardian.

“Të dyja palët do t’i ulin tarifat me 115%”, tha sekretari i Thesarit të Shteteve, Scott Bessent, gjatë bisedimeve në Gjenevë.

Vendimi vjen pasi dy vendet ishin pajtuar për një pauzë 90-ditore në lidhje me tarifat.

Kjo marrëveshje shënon një de-përshkallëzim të rëndësishëm të luftës tregtare që shpërtheu muajin e kaluar. Para kësaj dite, SHBA-ja e kishte rritur tarifën ndaj Kinës në 145% (duke përfshirë një tarifë shtesë prej 20% për të trajtuar importet e fentanilit në SHBA), ndërsa Pekini kishte reaguar me tarifa prej 125% ndaj importeve amerikane.

Bessent u tha gazetarëve se “të dyja palët treguan respekt të madh” gjatë bisedimeve dhe se “të dy kemi interes për tregti të balancuar”.

Pala amerikane sugjeroi gjithashtu se kanë rënë dakord për një “mekanizëm shumë të mirë” për të shmangur përshkallëzimet me Kinën lidhur me tregtinë në të ardhmen.

Kryetarja e Dhomave të Specializuara të Gjykatës Speciale, Ekaterina Trendafilova, do ta vizitojë Kosovën nga e hëna deri të mërkuren e kësaj jave, raporton Ekonomia Online.

Këtë e ka bërë të ditur Policia e Kosovës, e cila ka njoftuar se përkohësisht mund të mbyllen edhe segmente rrugore gjatë vizitës së saj.

Njoftimi i plotë:

Me datën 12-14 maj 2025, në Republikën e Kosovës, do të qëndrojë për vizitë kryetarja e Dhomave të Specializuara të Gjykatës Speciale, znj. Ekaterina Trendafilova.

Me këtë rast, Policia e Kosovës, në bashkërendim me autoritetet kompetente ndërkombëtare, gjatë kësaj vizite, e cila realizohet në Republikën e Kosovës, do të angazhohet për ruajtjen e rendit dhe qetësisë publike.

Për të mundësuar qarkullim të lirë sipas itinerarit të lëvizjes si dhe zhvillimin e aktiviteteve apo takimeve të personaliteteve sipas agjendës, Policia e Kosovës do të bëjë ndërprerje të përkohshme të qarkullimit të trafikut (në intervale të shkurtra kohore) të disa segmenteve rrugore, ku edhe mund të ketë riorientim të trafikut në rrugë alternative, andaj Policia e Kosovës kërkon mirëkuptim të plotë nga ana e qytetarëve dhe pjesëmarrësve në trafik.

Mbi dy milionë euro pasuri janë sekuestruar gjatë hetimeve në rastin “Mati”, nën dyshimet për shpëlarje parash, njoftuan autoritetet e Kosovës të hënën, më 12 maj.

Në kuadër të hetimeve intensive të zhvilluara nga Prokuroria Speciale e Republikës së Kosovës, ishin arrestuar tre persona, gjatë muajit shtator të vitit të kaluar.

“PSRK njofton opinionin publik se në kuadër të këtyre hetimeve, deri tash pasuria e sekuestruar kap vlerën rreth 2,286,054.00 Euro”, thuhet në komunikatën e përbashkët nga Prokuroria Speciale dhe Policia e Kosovës.

Sipas njoftimit, kjo pasuri shtesë është identifikuar gjatë hetimeve në bashkëveprim dhe mbikëqyrje të ngushtë me prokurorin e lëndës nga Prokuroria Speciale, në emrin e të dyshuarit Sh.C.

Në njoftim thuhet se janë sekuestruar: njëzet njësi banesore në sipërfaqe të tërësishme 1788.41 m², me vlerë të përafërt të tregut në lartësi 1,788,410.00 Euro; dy lokale afariste me sipërfaqe të tërësishme 167.54 m², me vlerë të përafërt të tregut në lartësi 335,080.00 Euro; shtatëmbëdhjetë vendparkingje (garazha) me sipërfaqe të tërësishme 241.96 m², me vlerë të përafërt të tregut 145,176,00 Euro; gjashtë depo me sipërfaqe të tërësishme 28.87 m², me vlerë të përafërt të tregut 17,388.00 Euro.

Rasti është nën hetime në drejtim të veprës penale “Shpëlarja e Parasë”./KP