Category: Lajme

Këshilli i Sigurimit i Kombeve të Bashkuara do të votojë të mërkurën për një rezolutë të re që bën thirrje për një armëpushim të menjëhershëm dhe të përhershëm në Gaza, si dhe për qasjen e pakufizuar të ndihmave humanitare në rajon.

Rezoluta përfshin kërkesën që të gjitha palët të respektojnë pa kushte ndalimin e luftimeve, në një përpjekje për të ndalur përshkallëzimin e mëtejshëm të krizës humanitare.

Dokumenti gjithashtu thekson kërkesën për “lirimin e menjëhershëm, dinjitoz dhe të pakushtëzuar” të të gjithë pengjeve që mbahen nga Hamasi dhe grupet e tjera të armatosura palestineze.

Ky do të jetë votimi i parë i Këshillit të Sigurimit mbi këtë çështje që nga nëntori i vitit të kaluar, kur Shtetet e Bashkuara përdorën veton për të bllokuar një projekt-rezolutë të ngjashme, që kërkonte ndaljen e luftimeve.

Votimi pritet të zhvillohet të mërkurën në orën 16:00 sipas kohës lokale të Kosovës, dhe sytë janë drejtuar kah pozicioni që do të mbajë SHBA – një faktor kyç për fatin e kësaj rezolute.

Presidentja e Kosovës, Vjosa Osmani, pret sot në takim përfaqësuesit e subjekteve politike, me të cilët do të ketë konsultime për caktimin e datës së zgjedhjeve lokale.

Lajmin e ka konfirmuar këshilltari për media i presidentes, Bekim Kupina.

Takimi do të mbahet në ora 14:00.

“Në bazë të kompetencave kushtetuese, Presidentja Osmani ka ftuar subjektet politike në takim të mërkurën, më 4 qershor 2025, për konsultime për caktimin e datës së zgjedhjeve lokale. Menjëherë pas konsultimeve, Presidentja do të caktojë datën e zgjedhjeve,” tha Kupina për Ekonomia Online.

Presidentja e Republikës së Kosovës, Vjosa Osmani Sadriu, është nderuar me medaljen prestigjioze “Faithful and Meritorious Medal for Service to Country” (Medalja për Shërbim Besnik dhe Meritor ndaj Vendit) nga Guvernatori i Përgjithshëm i Antigua dhe Barbuda, Sir Dr. Rodney Williams, sipas autorizimit nga Mbreti Charles III.

Kreu i Shtetit të Antigua dhe Barbuda deklaroi se kjo medalje e lartë shtetërore i është ndarë Presidentes Osmani në shenjë mirënjohjeje për lidershipin e saj të guximshëm, kontributin e jashtëzakonshëm për paqen, demokracinë dhe avancimin e rolit të grave në udhëheqje, si dhe për përkushtimin e saj të palëkundur në forcimin e marrëdhënieve ndërkombëtare.

Në fjalimin e tij të posaçëm gjatë darkës së organizuar mbrëmë për zyrtarët e lartë të shteteve pjesëmarrëse në Forumin për Gratë Paqen dhe Sigurinë, Guvernatori i Përgjithshëm Sir Rodney Williams e cilësoi Presidenten Osmani “shembull frymëzues i udhëheqjes bashkëkohore dhe një zë i palëkundur për drejtësinë dhe barazinë në skenën ndërkombëtare”.

Ai theksoi se: “vizioni dhe integriteti i Presidentes Osmani kanë kaluar kufijtë e shtetit të saj, duke prekur zemrat dhe ndërgjegjen e shumë njerëzve në të gjithë botën, sidomos grave dhe vajzave”.

Presidentja Osmani e cilësoi këtë dekoratë si një nder të jashtëzakonshëm për të gjithë qytetarët e Kosovës.

“Kjo dekoratë është për popullin tim, i cili ka qëndruar gjithmonë me dinjitet dhe vendosmëri në mbrojtje të lirisë”, ka deklaruar Presidentja Osmani gjatë pranimit të Medaljes.

Medalja Zyrtare e Shquar për Shërbim Besnik dhe të Merituar ndaj Atdheut, përfaqëson një nga dekoratat më të larta shtetërore të Antigua dhe Barbuda, që u jepet personaliteteve me merita të veçanta në shërbim të vendit të tyre dhe me ndikim të dukshëm në përparimin e vlerave universale.

Komisionarja për Zgjerim e BE-së, Marta Kos, bëri thirrje për formimin sa më të shpejtë të institucioneve në Kosovë.

“Pas zgjedhjeve të fundit në Kosovë, është thelbësore të formohen shpejt institucionet dhe të ecet përpara me reformat kyçe në gjyqësor, media dhe administratë publike. Një qeveri funksionale dhe kuvend funksional janë thelbësore që Kosova të përfitojë nga Plani Evropian për Rritje”, ka thënë Kos.

Komisionarja evropiane foli në Komitetin për Politikë të Jashtme të Parlamentit Evropian lidhur me proceset integruese të vendeve të rajonit.

Kosova mbetet i vetmi shtet në rajon me perspektivë evropiane për të cilin ende nuk është trajtuar aplikimi për marrjen e statusit të kandidatit.

Presidentja e Republikës së Kosovës ka thirrur një takim të rëndësishëm politik, ku do të diskutohet dhe pritet të merret vendimi për caktimin e datës së zgjedhjeve lokale.

Takimi është planifikuar të mbahet nesër dhe menjëherë pas konsultimeve, Presidentja do të caktojë datën e zgjedhjeve.

”Në bazë të kompetencave kushtetuese, Presidentja Osmani ka ftuar subjektet politike në takim të mërkurën, më 4 qershor 2025, për konsultime për caktimin e datës së zgjedhjeve lokale. Menjëherë pas konsultimeve, Presidentja do të caktojë datën e zgjedhjeve”, bëri të ditur Bekim Kupina, këshilltar për Media i presidentes së Kosovës.