Category: Lajme

Një rast i murtajës së bagëtive të imta është konfirmuar në një fermë të dhive në fshatin Postribë të Shkodrës.

Autoritetet kanë vendosur në karantinë fermën dhe kanë nisur eliminimin e bagëtive të infektuara.

Drejtori i Shërbimit Veterinar, Sulejman Kullolli, tha se janë vendosur masa të menjëhershme për të ndaluar përhapjen e sëmundjes, përfshirë ndalimin e lëvizjes së kafshëve në Shkodër dhe Malësinë e Madhe.

Zona përreth është izoluar në rreze prej 3 dhe 10 kilometrash.

Ai sqaroi se mishi dhe qumështi i kësaj ferme nuk kanë dalë në treg, ndërsa alarmi për një rast tjetër ka rezultuar i pavërtetë.

Kullolli siguroi se sëmundja nuk transmetohet te njerëzit dhe nuk përbën rrezik për shëndetin publik.

Ministrat e Mbrojtjes së NATO-s janë mbledhur sot në Bruksel për të vendosur mbi objektivat e reja të kapaciteteve ushtarake. Takimi u cilësua si vendimtar nga shefi i aleancës, Mark Rutte, i cili theksoi nevojën për “investime të mëdha” në mbrojtje ajrore, raketa me rreze të gjatë dhe struktura komandimi.

Në fjalën e tij, Rutte tha se vendet duhet të përgatiten për çdo skenar, duke sinjalizuar një plan të ri investimesh në mbrojtje që do të prezantohet së shpejti në Hagë. Ai shtoi se vendimet e sotme do të ndihmojnë në mbylljen e boshllëqeve që ka NATO në kapacitete reale ushtarake.

Në të njëjtën linjë, sekretari amerikan i Mbrojtjes, Pete Hegseth, bëri thirrje që secili shtet të kontribuojë me të paktën 5% për mbrojtjen, duke theksuar se siguria kolektive nuk mund të mbështetet vetëm te SHBA-ja.

Ndërkohë, ministri gjerman i Mbrojtjes, Boris Pistorius, paralajmëroi se Gjermanisë do t’i duhen deri në 60 mijë ushtarë shtesë për të përmbushur këto objektiva të reja. Ai theksoi se vendi duhet të shqyrtojë seriozisht rikthimin e shërbimit ushtarak për të garantuar një forcë të mjaftueshme në vitet që vijnë.

Kryetari i Odës Ekonomike të Kosovës, Lulzim Rafuna, ka bërë të ditur se bizneset së bashku me punëtorët do të protestojnë të mërkurën, më 11 qershor, nëse Qeveria nuk reflekton ndaj vendimit për daljen në tregun e lirë të energjisë elektrike.

Në një konferencë për media pas takimit me përfaqësues të bizneseve, Rafuna theksoi se kërkesa kryesore është sigurimi i një faze tranzicioni përpara hyrjes në tregun e lirë.

“Takimin që e kishim me bizneset të cilat janë të prekur nga dalja në treg të lirë të energjisë, një pjesë e tyre ishin prezent, u pajtuam që t’i bëjmë thirrje qeverisë që të reflektojë, të na jepet mundësia e një faze të tranzicionit që kemi kërku më herët, të përgatitet tregu, të përgatitet një paketë që e përcjell gjatë kësaj faze të tranzicionit për të dalë në treg të lirë dhe biznesi të kalojë në tregun e lirë në datën që do të dakordohemi të gjithë bashkë. Në rast se nuk do të ketë reflektim, atëherë bizneset bashkë me punëtorët ditën e mërkurë do të dalim në shesh në orën 12:00 për ta shpreh pakënaqësinë që e kemi lidhur me këtë vendim dhe për mos reflektimin e qeverisë së Kosovës”, tha Rafuna.

Ai kërkoi nga institucionet që të respektojnë kërkesën e komunitetit të biznesit dhe të shmangin përshkallëzimin e situatës.

“Për këtë arsye, në emër të bizneseve kërkoj nga Qeveria e Kosovës që të respektojë pjesën e tranzicionit për shkak të rrethanave dhe kushteve ku jemi, dhe ta gjejmë një zgjidhje që ta menaxhojmë sa më mirë dhe të mos ketë nevojë që bizneset të dalin në shesh për të protestuar”, shtoi ai.

Përfaqësues të bizneseve kanë alarmuar për pasoja serioze në sektorin prodhues, duke theksuar se shumë fabrika po konsiderojnë mbylljen për shkak të pamundësisë për të përballuar çmimet e larta të energjisë.

Në takim, disa biznese kanë ngritur shqetësimin se po përballen me kërcënime nga KEK për ndërprerje të energjisë.

Kryetari i Aleancës Kosovare të Bizneseve, Agim Shahini, tha se ndikimi është i gjerë dhe prek mijëra kompani dhe punëtorë.

“Kjo është kërkesë e komunitetit të biznesit, të kompanive 1 mijë e 300 që janë prekur. Mbi 143 mijë punëtorë dhe kjo është kërkesë që ditën e mërkurë me datë 11 qershor në orën 11 të protestojmë në qendër të Prishtinës me pronarët dhe punëtorët e kompanive. Që edhe në këtë formë ne të tregojmë se jemi goditur thellë. Bizneset, prodhuesit, shërbyesit nuk po mund ta përballojnë këtë shtrenjtim të energjisë elektrike”, tha Shahini.

Ndërkohë, kryetari i Odës Ekonomike Amerikane në Kosovë, Arian Zeka, përmendi rastet konkrete të ndikimit negativ nga liberalizimi i tregut të energjisë.

“Të gjithë prej nesh jemi të informuar për rastet e dy fabrikave që janë në pronësi të investitorëve të huaj ose të cilat janë kapital të përzier vendor dhe të huaj. Po flasim për 300 punëtorë në njërën prej komunave më të varfra në Kosovë që kanë mbetur pa punë… Gjatë javës së kaluar kur ne kishim një takim të tillë në Këshillin Kombëtar të Ekonomisë dhe Investimeve ishte sjellur njëra prej kompanive që vite më parë ka kaluar në tregun liberal. Ne kemi kërkuar që aty të jetë Feronikeli. Meqë Feronikeli e ka mbyllur edhe furrën e saj të fundit para rreth një muaji. Shembulli i Feronikelit është shembulli më konkret se cili është ndikimi i liberalizimit të tregut të papërgatitur të energjisë elektrike. Tregu në aspektin e furnizimit nuk ka qenë i përgatitur dhe këtu nuk ka asgjë prej neve që mund të bëjmë. Është ZRrE-ja që është dashur të sigurohet para vendimit se tregu është funksional”, tha Zeka.

Ushtarët e Forcës së Sigurisë së Kosovës po marrin pjesë në një stërvitje të përbashkët ushtarake në Fort Johnson të Shteteve të Bashkuara, së bashku me Gardën Kombëtare të Iowa-s dhe forca të tjera amerikane.

Rreth 6 mijë pjesëtarë të ushtrisë amerikane dhe të vendeve partnere janë përfshirë në këtë trajnim, i cili simulon operacione të mëdha luftarake në kushte të vështira terreni.

Qëllimi i stërvitjes, sipas FSK-së është të testojë gatishmërinë për t’u përballur me kërcënime serioze dhe për të bashkëvepruar në misione ndërkombëtare.

Ushtarët e Forcës së Sigurisë së Kosovës po marrin pjesë në një stërvitje të përbashkët ushtarake në Fort Johnson të Shteteve të Bashkuara, së bashku me Gardën Kombëtare të Iowa-s dhe forca të tjera amerikane. Rreth 6 mijë pjesëtarë të ushtrisë amerikane dhe të vendeve partnere janë përfshirë në këtë trajnim, i cili simulon operacione të mëdha luftarake në kushte të vështira terreni.
Qëllimi i stërvitjes, sipas FSK-sw është të testojë gatishmërinë për t’u përballur me kërcënime serioze dhe për të bashkëvepruar në misione ndërkombëtare.

Është dënuar me 5 vjet burgim, agjenti i Shërbimit Sekret Serb (BIA), Aleksandar Vllajiq, i cili pranoi fajësinë për spiunazh dhe armëmbajtje pa leje.

Për spiunazh u dënua me 5 vjet burg derisa për armëmbajtje pa leje me 6 muaj burg që iu zëvendësuan me 1 mijë euro gjobë.

Aktgjykimi dënues është shpallur pak kohë pasi Vllajiq është deklaruar fajtor në seancën e shqyrtimit fillestar që është mbajtur në Gjykatën Themelore në Prishtinë.

Ai do të qëndrojë në paraburgim derisa të bëhet i plotëfuqishëm aktgjykimi.

Sipas aktakuzës së ngritur më 22 maj 2025 nga Prokuroria Speciale, Vllajiq ka vepruar si bashkëpunëtor i Agjencisë së Inteligjencës dhe Sigurisë së Serbisë (BIA), duke mbledhur informacione që rrezikonin rendin kushtetues dhe sigurinë kombëtare të Kosovës, raporton “Betimi për Drejtësi”.

Në aktakuzë thuhet se ai ka incizuar fshehurazi lëvizjet e automjeteve të Policisë së Kosovës dhe prezencës ndërkombëtare në pjesën veriore të vendit, si dhe ka mbledhur të dhëna për qytetarë serbë të dyshuar si bashkëpunëtorë të institucioneve të sigurisë në Kosovë. Më tej, ai ka zbuluar identitetin e një zyrtari të Agjencisë së Kosovës për Inteligjencë (AKI), të cilin e njihte nga periudha kur vetë kishte qenë pjesëtar i Policisë së Kosovës.

Me rastin e arrestimit më 26 qershor 2024 në Mitrovicë, gjatë një bastisjeje në shtëpinë e tij, autoritetet kanë sekuestruar një armë të gjatë pneumatike të modelit “Cverna Zastava” dhe një sprej gaz-lotsjellës.

Avokat i të pandehurit është Lubomir Pantoviq, ndërsa prokuror i çështjes Bekim Kodraliu./ “Betimi për Drejtësi”/