Ka përfunduar protesta e organizuar nga Dhoma e Tregtisë dhe Industrisë dhe Oda Ekonomike e Kosovës, në sheshin “Skënderbeu” në Prishtinë, kundër vendimit të Zyrës së Rregullatorit për Energji për kalimin në tregun e lirë.
Bizneset kërkuan shtyrjen e vendimit që ka hyrë në fuqi më 1 qershor, duke theksuar se mungesa e përgatitjes dhe informimit të duhur po i vë në vështirësi serioze financiare. /atvlive.tv
Presidentja e Kosovës, Vjosa Osmani, ka caktuar datën 12 tetor për mbajtjen e zgjedhjeve lokale në vend. Vendimi është marrë pas analizës së propozimeve nga subjektet politike dhe në përputhje me afatet kushtetuese e ligjore.
Në njoftimin e Presidencës thuhet se kjo datë u jep kohë të mjaftueshme institucioneve përgjegjëse që të përgatiten për një proces zgjedhor gjithëpërfshirës dhe sipas standardeve më të larta.
Sipas Osmanit, data e caktuar mundëson organizimin teknik dhe logjistik të zgjedhjeve, përfshirë edhe procedurat e votimit brenda dhe jashtë vendit.
Ajo u ka bërë thirrje subjekteve politike dhe shoqërisë civile që t’i qasen këtij procesi me përgjegjësi të plotë, për të garantuar një garë të drejtë dhe demokratike. /atvlive.tv
Në Los Anxhelos janë përshkallëzuar protestat, pas vendimit të Donald Trump për dislokimin 2 mijë trupave të Gardës Kombëtare, pa pëlqimin e guvernatorit të Kalifornisë. Vendimi i tij ka shkaktuar zemërim të madh në opinionin publik dhe reagime të ashpra nga autoritetet lokale.
Protestuesit kanë bllokuar autostradën 101, ku kanë djegur disa makina vetëdrejtuese dhe janë përplasur me forcat e rendit. Policia ka përdorur gaz lotsjellës, plumba gome dhe mjete shpërthyese për të shpërndarë turmën.
Guvernatori Gavin Newsom dhe kryetarja e bashkisë Karen Bass e kanë quajtur këtë ndërhyrje të Trumpit si një “shkelje të sovranitetit të shtetit të Kalofornisë” dhe kanë kërkuar tërheqjen e trupave. Ata paralajmëruan se vendimi i Trumpit rrezikon të ndezë tensione të mëtejshme.
Ndërkohë, Trump përmes një reagimi në platformën Truth Social, ka kërkuar arrestimin e protestuesve që mbulojnë fytyrat me maska.
Sipas autoriteteve, mbi 100 persona janë arrestuar, përfshirë edhe dhjetëra emigrantë që ndodheshin në zonat ku po zhvilloheshin protestat.
Protestat kanë hyrë në ditën e tretë dhe po krahasohen me trazirat e mëdha që ka përjetuar qyteti në të kaluarën. Ndërkohë, pritet që situata të mbetet e tensionuar edhe në ditët në vijim. /atvlive.tv
Në Gjykatën Themelore në Prishtinë po vazhdon gjykimi ndaj tre të akuzuarve për rastin “Banjska”, ku shtatorin vitit 2023 u vra rreshteri i Policisë së Kosovës, Afrim Bunjaku.
Të akuzuarit Vlladimir Tolliq, Bllagoje Spasojeviq dhe Dushan Maksimoviq janë deklaruar të pafajshëm për akuzat për terrorizëm, financim të terrorizmit dhe vepra të tjera të rënda penale.
Në këtë seancë ka dëshmuar edhe polici i plagosur në sulm, Alban Rashiti, i cili ka rrëfyer momentet e përballjes me grupin e armatosur në veri të vendit.
Ndërkohë, përveç këtyre treve, në këtë rast janë të përfshirë mbi 40 të akuzuar të tjerë, shumica në arrati, për të cilët gjykata ka njoftuar se nuk mund të zhvillohet procesi në mungesë.
Sipas Prokurorisë, grupi i armatosur i udhëhequr nga Millan Radojiçiq, nëpërmjet përdorimit të dhunës me armatim të rëndë, ka tentuar që “ta shkëpusë pjesën veriore të territorit të Republikës së Kosovës, respektivisht komunat e banuara me shumicë serbe, dhe këtë pjesë të territorit t’ia bashkojë Republikës së Serbisë”. /atvlive.tv
Avokati Arianit Koci, gjatë protestës së sotme para Kuvendit, ka reaguar për arrestimin e një ish-pjesëtari të Njësisë Speciale nga autoritetet serbe. Ai kërkoi reagim urgjent nga institucionet e Kosovës, përfshirë edhe Presidenten e vendit.
Koci deklaroi se ka qenë vetë në Serbi deri në orët e vona për të ndjekur zhvillimet e këtij rasti, ndërsa theksoi se po mungon çdo interesim zyrtar nga ana e autoriteteve kosovare.
Para nisjes së përpjekjes së 29-të për konstituimin e legjislaturës së re, avokati Arianit Koci ka protestuar sërish para ndërtesës së Kuvendit.
Ai ka kërkuar nga gazetarët që të mos u japin hapësirë deputetëve për deklarata, duke thënë se “s’kanë zgjidhur asgjë në 29 tentime”. Ai shtoi se “të mërkurën bëhet hera e 30-të”, ndërsa i bëri thirrje klasës politike të gjejë zgjidhje.
Në një moment, Koci u përplas verbalisht me deputetët Armend Zemaj dhe Xhevahire Izmaku, të cilëve u kërkoi të mos flasin para mediave pa veprime konkrete. /atvlive.tv