Category: Lajme

Ka dështuar edhe përpjekja e 45-të për konstituimin e Kuvendit të Kosovës.

Seanca e mbajtur të premten zgjati vetëm pak minuta, ndërsa deputetët nisën punimet me një minutë heshtje për viktimat e Masakrës së Srebrenicës, derisa në sallë nuk ishte e pranishme Lista Serbe.

Kryesuesi i seancës Avni Dehari ua ndërpreu fjalën përfaqësuesve të ish-opozitës. Në sallë ishin të pranishëm 93 deputetë, ndërsa propozimi i Lëvizjes Vetëvendosjes për krijimin e një komisioni që do të mundësonte zhdehjen e kryetarit të Kuvendit me votim të fshehtë, mori vetëm 49 vota.

Seanca u ndërpre, ndërsa tentimi i radhës është caktuar të mbahet të dielën më 13 korrik.

Pas ndërprerjes së seancës nga kryesuesi, partitë e ish-opozitës vazhduan qëndrimin në sallën e Kuvendit, duke e akuzuar Lëvizjen Vetëvendosje për refuzimin e zbatimit të Aktgjykimit të Gjykatës Kushtetuese.

Instituti i Psikiatrisë Forenzike ka përfunduar ekzaminimin psikiatrik të Naim Murselit, të akuzuar për organizimin e vrasjes së bashkëshortes së tij, Liridona Ademajt.

Sipas ekspertizës mjekësore, tek Murseli nuk është konstatuar asnjë çrregullim mendor apo ndonjë gjendje që do të ndikonte në aftësinë e tij për të kuptuar veprën apo për ta kontrolluar sjelljen.

Raporti vlerëson se ai është plotësisht i përgjegjshëm për veprimet e tij dhe i aftë të marrë pjesë në procesin gjyqësor.

Murseli ishte dërguar për ekzaminim katër javë më parë, me kërkesë të mbrojtjes.

Ai është deklaruar i pafajshëm në gjykatë, ndërsa sipas aktakuzës, dyshohet se e organizoi vrasjen për hakmarrje dhe përfitim financiar nga sigurimi jetësor. Vrasja e Liridona Ademajt ndodhi më 29 nëntor të vitit 2023 në Prishtinë dhe fillimisht ishte paraqitur si një grabitje e inskenuar.

Kryeministri në detyrë i Kosovës, Albin Kurti, ka udhëtuar për në Bosnje dhe Hercegovinë, ku sot do të marrë pjesë në ceremoninë përkujtimore të 30-vjetorit të gjenocidit në Srebrenicë. Ceremonia do të mbahet në Qendrën Memoriale të Srebrenicës në Potoçari.

Kryeministri Kurti po udhëheq delegacionin zyrtar të Kosovës, i cili përfshin zëvendëskryeministren dhe ministren në detyrë të Punëve të Jashtme dhe Diasporës, Donika Gërvalla, si dhe zëvendëskryeministren e tretë në detyrë, Emilija Rexhepi, e cila vjen nga radhët e komunitetit boshnjak në Kosovë, bën të ditur Kryeministria përmes një njoftimi.

Vitin e kaluar, Qeveria e Republikës së Kosovës datën 11 korrik e ka shpallur ditë përkujtimore për gjenocidin e Srebrenicës.

Sot, në sallën e sportit të Pallatit të Rinisë dhe Sporteve në Prishtinë, do të mbahet ceremonia e diplomimit të gjeneratës së 62-të të Policisë së Republikës së Kosovës.

Ngjarja pritet të nisë në ora 10:00, ndërsa në këtë ceremoni do të marrin pjesë përfaqësues të institucioneve vendore e ndërkombëtare, eprorë të lartë të Policisë, si dhe familjarë të zyrtarëve policorë që do të diplomojnë.

Policia e Kosovës ka ftuar mediat që të marrin pjesë dhe ta përcjellin nga afër këtë ngjarje me rëndësi për institucionin dhe për të diplomuarit.

Presidentja e Kosovës, Vjosa Osmani, ka deklaruar se ka “informacione të besueshme” se presidenti amerikan, Donald Trump, ka luajtur një rol kyç në parandalimin e një përshkallëzimi të mundshëm të situatës nga Serbia ndaj Kosovës, këtë vit.

Duke folur në një ligjëratë në Universitetin “Johns Hopkins” në Uashington, Osmani tha se ky veprim ka ndodhur “së voni”, por pa dhënë më shumë detaje për momentin apo natyrën e ndërhyrjes.

“Sipas informacioneve të sigurisë që marr çdo ditë, kemi kuptuar se presidenti Trump ka parandaluar një përshkallëzim të mundshëm të situatës – nëse mund ta quaj kështu – kohëve të fundit. Nuk po flasim për vitin 2023, nuk po flasim për vitin 2020, po flasim për zhvillime shumë, shumë të vona”, tha Osmani.

Ajo përmendi gjithashtu edhe sulmin e shtatorit të vitit 2023 në Banjskë, të cilin e cilësoi si një “akt agresioni” të organizuar nga Serbia, ku një grup i armatosur serbësh sulmuan Policinë e Kosovës, duke lënë të vrarë rreshterin Afrim Bunjaku.

“Ndaj, nuk duhet ta mohojmë mundësinë, sepse ka ndodhur më parë”, tha Osmani, duke e lidhur këtë me rrezikun e përsëritjes së akteve të tilla.

Sipas saj, parandalimi dhe frenimi i këtyre kërcënimeve nuk mund të mbështetet vetëm në praninë ushtarake, por kërkon udhëheqje të fortë politike dhe koordinim të ngushtë me partnerët ndërkombëtarë.

“Meqenëse ka ndodhur edhe më parë, parandalimi dhe frenimi janë thelbësorë. Dhe, ndonjëherë, parandalimi dhe frenimi kërkojnë më shumë sesa vetëm praninë e ushtrisë. Kërkojnë edhe udhëheqje politike. Duhet një telefonatë, një paralajmërim, dhe kjo është pikërisht ajo që ndodh kur Amerika merr një rol udhëheqës”, u shpreh presidentja.