Category: Lajme

Carlo Ancelotti, trajneri aktual i ekipit kombëtar të Brazilit dhe ish-trajner i Real Madridit, është dënuar me një vit burg nga një gjykatë spanjolle për mashtrim tatimor të lidhur me të drejtat e tij të imazhit gjatë periudhës 2014–2015 në Spanjë.

Edhe pse Ancelotti ka shlyer tashmë detyrimin ndaj autoriteteve tatimore në vlerë prej 1.5 milionë eurosh, gjykata vendosi të japë një dënim me burg.

Megjithatë, në përputhje me ligjin spanjoll, dënimet për krime jo të dhunshme nën dy vjet, zakonisht pezullohen nëse i dënuari nuk ka precedentë penalë të mëparshëm, gjë që pritet të ndodhë edhe në këtë rast.

Ati i Shenjtë, Papa Leoni i 14-të, ka pritur të mërkurën presidentin ukrainas, Volodymyr Zelensky, në rezidencën papale të Castel Gandolfo, afër Romës.

Vizita e Zelenskyt u zhvillua në kohën kur lufta në Ukrainë po hyn në një fazë gjithnjë e më të ndërlikuar, me humbje të mëdha në të dyja anët dhe pa një zgjidhje të afërt në horizont.

Përmes një njoftimi zyrtar, Vatikani ka bërë të ditur se gjatë takimit, palët kanë diskutuar rreth situatës së rëndë në Ukrainë dhe domosdoshmërinë për arritjen e një paqeje të drejtë dhe të qëndrueshme.

“Gjatë diskutimeve, rëndësia e dialogut si mënyra më e preferuar për t’i dhënë fund armiqësive është riafirmuar”, thuhet në komunikatën e Vatikanit.

Po ashtu, është theksuar se “Ati i Shenjtë ka përsëritur gatishmërinë e tij për të pritur përfaqësuesit nga Rusia dhe Ukraina në Vatikan, për të zhvilluar negociatat.”

Megjithatë, oferta e Papës për negociata në Vatikan nuk është pritur mirë nga Moska.

Zyrtarë të lartë të Kremlinit kanë refuzuar më herët këtë propozim, duke e cilësuar si të papërshtatshëm. Ministri i Jashtëm rus, Sergei Lavrov, ka deklaruar se “s’është aspak e përshtatshme për dy vende ortodokse që të mbajnë bisedime në tokë katolike.”

Një person është therur me thikë sot në lagjen Ulpiana të Prishtinës.

Ngjarja ka ndodhur mëngjesin e sotëm rreth orës 09:00 në lagjen Ulpiana të Prishtinës.

Zëdhënësja e policisë për rajonin e Prishtinës, Flora Ahmeti, tha se rasti po hetohet dhe është cilësuar si “Lëndim i rëndë trupor”. Hetimet rreth rrethanave të ngjarjes janë në vazhdim.

“Sot rreth orës 09 :00, kemi marrë informatën për një lëndim trupor të ndodhur në lagjen Ulpiana në Prishtinë. Bazuar në të dhënat fillestare, në këtë rast nga një mjet i mprehtë dyshohet të jetë lënduar një person i cili është dërguar për trajtim mjekësor, ndërkohë që policia ka nisur një hetim lidhur me rrethanat e këtij rasti i cili është cilësuar si lëndim i rëndë trupor”, tha Ahmeti.

Nënkryetarja e PDK-së, Vlora Çitaku, ka reaguar ndaj kryeministrit në detyrë, Albin Kurti, i cili tha se antifushata ndaj Policisë është e dëmshme, teksa foli për vdekjen e 27-vjeçarit Agon Zejnullahu të hënën në Lipjan, në të cilin dyshohen të përfshirë pesë policë.

“Për dallim prej teje, ne e kemi respektuar Policinë gjithmonë, si në qeveri ashtu edhe në opozitë”, ka shkruar Çitaku.

Ajo ka kërkuar hetim profesional për rastin e fundit që ka përfshirë Policinë, si dhe përgjegjësi politike.

Sipas saj, nëse Kurti do ta respektonte me të vërtetë Policinë, “nuk do t’i linte pa këpucë e pa uniforma”, do t’u kishte rritur pagat dhe nuk do t’u kishte shkurtuar trajnimet në vetëm tre muaj.

Postimi i plotë:

Jo Albin,

Për dallim prej teje, ne e kemi respektuar Policinë e Kosovës gjithmonë, si në qeveri ashtu edhe në opozitë. Ne i respektojmë institucionet pa kushte dhe pa kalkulime politike.

Ti je ai që dikur ke hedhur gurë e mllef mbi policinë. Sot, ne nuk po kërkojmë asgjë më shumë përveç hetim profesional për rastin, dhe përgjegjësisë politike.

Sa për respektin ndaj policisë, sikur ta kishe me të vërtetë, nuk do t’i lije pa këpucë e pa uniforma. Do t’ua kishe rritur pagat. Dhe mbi të gjitha, nuk do t’ua kishe shkurtuar trajnimet në vetëm tre muaj.

Parlamenti Evropian ka miratuar Rezolutën për Shqipërinë, e cila vlerëson ecurinë e vendit për vitet 2023 dhe 2024 në rrugën drejt anëtarësimit në Bashkimin Evropian.

Ky votim vjen pas miratimit paraprak të raportit më 4 qershor nga Komisioni për Marrëdhënie me Jashtë (AFET) dhe debatit të zhvilluar në seancën plenare të 8 korrikut.

Gjatë diskutimeve, Komisionerja për Zgjerim, Marta Kos, ka theksuar progresin e Shqipërisë në luftën kundër korrupsionit, duke veçuar si arritje punën e Prokurorisë së Posaçme (SPAK).

“Është jetike që Shqipëria të vazhdojë të tregojë progres konkret në fusha kyçe”, deklaroi Kos, duke nënvizuar rëndësinë e vazhdimit të reformave.

Ajo bëri thirrje që reforma në drejtësi të mos cenohet dhe se pavarësia e SPAK duhet të mbrohet në çdo rrethanë.

Lidhur me këtë, ka reaguar edhe kryetarja e Kuvendit të Shqipërisë, Elisa Spiropali, e cila e ka vlerësuar këtë dokument si një hap të rëndësishëm drejt integrimit në Bashkimin Europian, duke theksuar mbështetjen e gjerë që procesi i zgjerimit gëzon në PE.

“Parlamenti Europian miratoi Rezolutën për Shqipërinë”, theksoi Spiropali, duke shtuar se raporti “përbën një vlerësim të rëndësishëm politik dhe institucional të progresit të Shqipërisë në rrugën drejt anëtarësimit në Bashkimin Europian dhe konfirmon mbështetjen e gjerë që procesi i zgjerimit gëzon në Parlamentin Europian”.

Qeveria në detyrë e Kosovës ka miratuar ndarjen e 580 mijë eurove si pjesë e bashkëfinancimit për ndërtimin e shkollës së muzikës dhe muzeut të Preshevës.

Kryeministri në detyrë, Albin Kurti, gjatë mbledhjes së qeverisë theksoi se kjo është një mbështetje financiare, institucionale dhe politike, e planifikuar për t’u vazhduar.

“Mbështetjen financiare, institucionale dhe politike po e vazhdojmë edhe sot me ndarjen e 580 mijë eurove për këto dy projekte. Qëndrueshmëria e kësaj mbështetje do të vijon për bashkëkombasit tanë, qeverinë tonë e kanë dhe do ta kenë përherë në krah.”

Ndërkaq, ministri në detyrë i Kulturës, Hajrulla Çeku, tha se ndarja e këtyre mjeteve është bërë pas kërkesës zyrtare nga Komuna e Preshevës dhe pas konsultimeve me ministritë përkatëse.

“Sipas kërkesës së Komunës së Preshevës dhe pas konsultimeve me ministritë përkatëse kërkoj të miratohet kjo kërkesë për bashkëfinancimin e projektit në fjalë për ndërtimin e shkollës së muzikës dhe muzeut të Preshevës.”