Category: Lajme

Luan Hasanaj është aktivist i angazhuar që nga rinia, me përvojë të gjerë në fushën e shoqërisë civile, veçanërisht në çështje mjedisore, rinore dhe të angazhimit qytetar.

Së fundmi, Hasanaj ishte i ftuar në emisionin “Libero” në ATV, ku foli për jetën e tij personale dhe për angazhimin e tij si aktivist.

Gjatë bisedës, Luani tregoi se në praninë e tij askush nuk guxon të hedhë mbeturina, dhe se shpesh është fjalosur me njerëz për këtë arsye.

“Në praninë time nuk guxon askush me hedh mbeturina. Shumë herë kam udhëtuar për orë të tëra nga Istogu në Prishtinë, dhe ka qenë e rrallë dita që nuk kam parë dikë duke hedhur kanaçe apo pako cigare nga vetura. E përjetoj shumë keq, madje jam fjalosur shumë herë me njerëz. Ka ndodhur që edhe i kam zbritur nga makina ime vetëm pse kanë hedhur një filtër cigare… nuk jam i mëshirshëm në këtë çështje – ata që më njohin, e dinë mirë,” tha Hasanaj.

Vlen të theksohet se Hasanaj është i njohur për organizimin e fushatave të mëdha vetëdijësuese dhe aksioneve vullnetare në nivel kombëtar dhe ndërkombëtar. Ai është drejtor ekzekutiv i organizatës “Let’s Do It Kosova – Ta Pastrojmë Kosovën”, si dhe drejtor rajonal për Evropën në Let’s Do It World.

Për ta dëgjuar intervistën e plotë të Luan Hasanaj, klikoni linkun e mëposhtëm:

Yulia Svyrydenko, ekonomistja 39-vjeçare dhe ish-zëvendëskryeministrja e parë, është konfirmuar si kryeministrja e re e Ukrainës nga parlamenti ukrainas, kanë bërë të ditur ligjvënësit.

Svyrydenko ka luajtur një rol kyç në negociatat me Shtetet e Bashkuara të Amerikës lidhur me marrëveshjen për mineralet e rralla, dhe sipas agjencisë së lajmeve Reuters, “nominimi i saj i dërgon mesazh të qartë Washingtonit se Kievi i ka për prioritet marrëdhëniet”.

Ajo ka zëvendësuar kryeministrin e mëparshëm, Denys Shmyhal, i cili kishte shërbyer në këtë post për 5 vjet, mandati më i gjatë në historinë e Ukrainës.

Kryeministri në largim pritet të marrë një post të ri në kabinetin qeveritar, atë të ministrit të Mbrojtjes, duke e zëvendësuar ministrin aktual, Rustem Umerov.

Prokuroria Speciale e Republikës së Kosovës, në bashkëpunim me Agjencinë e Kosovës për Inteligjencë (AKI) dhe Inspektoratin Policor të Kosovës, ka zhvilluar një operacion në lidhje me dyshimet për kryerjen e veprës penale të spiunazhit.

Gjatë operacionit, është arrestuar një polic, ka konfirmuar ministri në detyrë i Punëve të Brendshme, Xhelal Sveçla.

Sveçla e ka cilësuar aksionin si një hap të rëndësishëm për rritjen e sigurisë në vend.

Ndërkohë, Hetimet janë ende në zhvillim dhe Prokurori i Shtetit do të ndërmarrë veprimet e nevojshme në përputhje me ligjin.

Lulzim Brokshi, qytetar nga Mitrovica dhe ish-pjesëtar i Ushtrisë Çlirimtare të Kosovës, ka protestuar sot para Kuvendit të Kosovës, pak para fillimit të seancës së 48-të konstituive.

I veshur me uniformën e UÇK-së dhe duke mbajtur një pankartë, Brokshi ka shprehur pakënaqësinë për zvarritjen e procesit të konstituimit të Kuvendit, duke paralajmëruar grevë urie nëse nuk ndërmerren hapa konkretë për formimin e institucioneve.

“Shteti nuk ndërtohet me uzurpim, por me bashkim. Votat i kanë marrë nga populli, nuk kanë të drejtë ta mbajnë peng Kosovën,” deklaroi Brokshi.

Rusia dhe Ukraina kanë realizuar një tjetër shkëmbim trupash të ushtarëve të vrarë gjatë luftës, në kuadër të një marrëveshjeje të arritur në rundin e dytë të negociatave për paqe në Stamboll, një muaj më parë.

Zyrtari i lartë i Kremlinit dhe njëherësh kreu i delegacionit rus në këto bisedime, Vladimir Medinsky, ka njoftuar në Telegram se Rusia i ka dorëzuar Ukrainës trupat e mbi 1,000 ushtarëve të saj të rënë, ndërsa ka riatdhesuar 19 trupa të ushtarëve rusë në këmbim.

Agjencia shtetërore ruse e lajmeve, RIA, duke cituar një burim, ka raportuar se Moska planifikon të dorëzojë trupat e 3,000 ushtarëve ukrainas, duke theksuar se shkëmbimi i fundit është vetëm fillimi i këtij procesi.

Që nga rifillimi i negociatave për paqe në muajin maj në Turqi, të dyja palët kanë ndërmarrë disa shkëmbime të të burgosurve të luftës dhe trupave të të rënëve, duke thyer kështu heshtjen e gjatë që kishte karakterizuar procesin e dialogut për më shumë se tre vjet.

Presidentja e Kosovës, Vjosa Osmani, do të mbajë sot një konferencë për media.

Konferenca është planifikuar të mbahet në ora 16:30, sipas njoftimit të Presidencës.

Kjo konferencë vjen pas reagimit të Richard Grenell, Dërguarit të Posaçëm të Presidentit amerikan për Misione të Posaçme, i cili e ka akuzuar Presidenten Osmani për manipulim të fjalëve të Presidentit amerikan, Donald Trump, në një reagim të saj.

Grenell e ka cilësuar si “manipulim të fjalëve të Donald Trump” deklaratën e Presidentes Osmani, ku ajo kishte thënë se Trumpi, “javët e fundit”, kishte parandaluar një konflikt mes Kosovës dhe Serbisë.

“Grenell ka thënë se ‘është absurde’ të pretendohet se ka pasur diçka të re dhe se fjalët e Trump janë të lidhura me kohën e Marrëveshjes së Washingtonit”, thuhet në reagimin e tij.

Ai ka shtuar se: “Turp për Vjosa Osmanin që manipuloi fjalët e Presidentit Donald Trump.”