Category: Lajme

Policia e Himarës ka proceduar penalisht një 51-vjeçar, banor i fshatit Borsh, nën dyshimin se ndezi zjarr të qëllimshëm për pastrim, duke shkaktuar djegien e një sipërfaqeje me bimësi kullotë dhe ferra.

Në njoftimin e Policisë së Shtetit theksohet: “Si rezultat i punës hetimore dhe i veprimeve të shpejta për identifikimin dhe nxjerrjen përpara përgjegjësisë penale të autorëve të zjarrvënieve, specialistët për Hetimin e Krimeve të Komisariatit të Policisë Himarë identifikuan shtetasin M. K., i cili dyshohet se ka ndezur zjarr për pastrimin e barit… dhe si pasojë e përhapjes së flakëve, është djegur një sipërfaqe toke kullotë, me shkurre dhe me ferra”.

Pas procedimit penal në gjendje të lirë, materialet janë referuar në Prokurorinë pranë Gjykatës së Shkallës së Parë në Vlorë për veprime të mëtejshme ligjore.

Nga Rexhep Hasani

Për të evituar bllokadën e mëtutjeshme të konstituimit të Kuvendit, partitë politike duhet të përmbushin detyrat e tyre. Prandaj, nuk është e drejtë dhe detyrë e PDK-së dhe AAK-së të caktojnë apo propozojnë kandidatë për kryetar, sepse kjo është e drejtë ekskluzive dhe detyrë e VV-së. Partitë politike, sipas Aktgjykimit të fundit të Gjykatës Kushtetuese, kanë për detyrë të zgjedhin njërin opsion të votimit (pro, kundër apo të abstenojnë).

Propozimi im ka të bëjë me vendosjen për njërën prej dy mënyrave të votimit

(me votë të hapur apo të fshehtë). Vendimi sipas mendimi duhet të merret me votim të hapur, dhe cila mënyrë të ketë shumicën, ajo duhet zbatuar. Duke vepruar kështu, mendoj se nuk ka shmagie nga pika e tretë e rendit të ditës, siç deklarojnë deputetët që nuk marrin pjesë në votim, sepse bëhet fjalë për mënyrën e realizimit apo përmbushjes së kësaj pike.

Tri partitë e para, Lista serbe dhe grupi i minoriteteve tjera, kanë gjithashtu detyrë të propozojnë kandidatët e tyre për nënkryetarë, me ç’rast as VV-ja nuk ka të drejtë të ndërhyjë në të drejtën e tyre ekskluzive për propozime, por ka detyrë të votojë. Për të arsyetuar veprimet e tyre, deputetët që nuk marrin pjesë në votim, tentojnë që të bëjnë dallim ndërmjet funksionit të kryetarit dhe të nënkryetarit. Kur dihet se në mungesë të kryetarit, detyrën e tij, me detyra dhe përgjegjësi të njëjta, e ushtron nënkryetari, argumentimi i tillë është i pabazuar, sepse, siç dihet, vota e nënkryetarit ka peshë të njëjtë me votën e kryetarit, përkatësisht e barabartë me votën e deputetëve tjerë.

Kaq e thjeshtë dhe e lehtë është procedura për konstituimin e Kuvendit. Prandaj, nuk është e rastit që për konstituim përpiluesi i tekstit të dispozitës që rregullon procedurën e konstituimit (neni 67.2) nuk ka paraparë as diskutim dhe as afat, por vetëm propozim dhe votim. Bllokimi deri në apsurd është si pasojë e mosrespektimit të të drejtave dhe të detyrimeve të subjekteve politike, në kundërshtim me rregullat për konstituimin e Kuvendit.

Janë pikërisht veprimet e tilla arbitrare shkelje e këtyre rregullave, sepse me mosvotim pengojnë konstituimin, duke dëmtuar në këtë mënyrë interesin e shtetit, partisë përkatësisht elektoratit të tyre dhe madje edhe interesin e tyre personal.

Për të dalë nga një bllokadë e tillë e paparë, një ditë e më parë, duhet përmbushur detyrat për konstituim, pa pasur nevojë që kjo fazë të ndërlidhet me fazën e formimit të qeverisë. Kjo aq më parë kur të kihet parasysh se janë të njëjtit deputetë që në pikën e dytë të rendit të ditës, në dy raunde, nuk votonin madje as vetëverifikimin, përkatësisht verifikimin e mandatit e tyre personal të deputetit. Ja deri ku shkon absurdi, dhe nuk përfundon aty, por, siç shihet në serinë e vazhdimeve që nuk u shihet fundi, vazhdohet me avazin e njëjtë si në pikën e dytë të rendit të ditës. Ndërlidhja e dy fazave, në rrethanat e tilla të sjelljeve joracionale, do të zvarriste edhe më tepër konstituimin e Kuvendit, pa të cilin nuk mund të kalohet në fazën tjetër, por edhe në zgjedhje të sërishme.

Kur të kalohet në fazën e dytë të formimit të qeverisë, parashikohen afate dhe hapësirë për diskutime e kompromise, sepse praktikisht nuk mund të ketë dy shumica parlamentare. Nëse një shumicë e tillë nuk sigurohet në afat prej 15 ditësh, në tentimin e parë, mbetet edhe një afat shtesë prej 10 ditësh, për një tentim të dytë. Kuptohet, nëse edhe në këtë rast propozimi për qeveri nuk merr 61 e më tepër vota të deputetëve, përmbushen kushtet për përsëritjen e zgjedhjeve, edhe pse mendoj se këto do të duhej shmangur në rrethanat ekzistuese.

Kam përshtypjen se përsëritja e zgjedhjeve nuk ju konven as subjekteve politike, kështu që të njëjtat, me vullnet dhe mirëbesim, duhet të tejkalojnë këtë bllokim absurd.

Komisioni Qendror i Zgjedhjeve ka publikuar raportet e shpenzimeve të partive politike për periudhën prill – qershor 2025.

Sipas këtij raporti, Lëvizja Vetëvendosje ka shpenzuar rreth 500 mijë euro, ku rreth 238 mijë janë shpenzuar për paga, 65 mijë për qira dhe rreth 50 mijë euro për dreka zyrtare.

Ndërsa, Lidhja Demokratike e Kosovës, gjatë këtij tremujorshi ka shpenzuar rreth 230 mijë euro, përfshirë rreth 110 mijë euro për paga dhe rreth 49 mijë euro për informim publik.

Një person i kërkuar me dy urdhëresa aktive nga gjykata për veprën penale “Vjedhje e rëndë” është ekstraduar sot nga Austria në Kosovë.

Pritja e tij është bërë në orët e para të mëngjesit në Aeroportin Ndërkombëtar të Prishtinës nga njësitet relevante të Policisë së Kosovës.

Ekstradimi i tij u realizua rreth orës 01:00 të mëngjesit, si rezultat i një bashkëpunimi të suksesshëm mes autoriteteve austriake dhe atyre vendore të sigurisë.

Personi në fjalë ishte shpallur në kërkim ndërkombëtar, pasi ndaj tij ishin lëshuar dy urdhërarreste nga gjykatat vendore.

Menjëherë pas përfundimit të procedurave standarde, personi i ekstraduar është dërguar për vuajtjen e dënimit me burgim në kohëzgjatje prej 1 vit e 6 muaj.

Një incident është raportuar dje në rrugën “Lumni Surdulli” në Vushtrri, ku një person dyshohet se ka kërcënuar me armë një qytetar, për motive ende të paqarta.

Viktima, një burrë 44-vjeçar, ka raportuar në polici se një person që po kalonte me veturë, e kishte ndalur papritur dhe e kishte kërcënuar verbalisht, duke i drejtuar armën.

Policia ka identifikuar dhe arrestuar të dyshuarin me inicialet H.S., rreth 55-vjeçar, dhe gjatë kontrollit në veturën e tij është gjetur një armë zjarri, një karikator dhe 9 fishekë.

Pas kontrolleve në banesën e tij, po ashtu janë gjetur dhe sekuestruar dy karikatorë të tjerë dhe gjashtë fishekë.

I dyshuari është ndaluar për 48 orë dhe ndaj tij është iniciuar rasti për veprat penale “Kanosje” dhe “Mbajtje në pronësi, kontroll ose posedim të paautorizuar të armëve”.

Në Gjakovë, Policia ka identifikuar pesë persona, përfshirë dy të mitur, për mbajtje të paautorizuar të armëve.

Rasti u zbulua dje, pasi hetuesit siguruan video-incizime ku të dyshuarit shfaqeshin duke pozuar me armë zjarri.

Gjatë kontrollit, Policia ka sekuestruar një armë e gjatë dhe dy pistoleta me gaz. Po ashtu, janë konfiskuar edhe disa karikatorë dhe fishekë, të cilat ishin në posedim tek të dy prej të dyshuarve.

Pas intervistimit të dyshuarit janë liruar në procedurë të rregullt, ndërsa në koordinim me Prokurorin Kujdestar, është hapur rasti për “Mbajtje në pronësi, kontroll ose posedim të paautorizuar të armëve”.

Një person është arrestuar dje në kryeqytet, pas realizimit të një urdhër-arresti të lëshuar nga gjykata për veprën penale “Posedim të paautorizuar të narkotikëve”.

I dyshuari me inicialet K.A., rreth 44-vjeç, kishte marrë një dënim me gjobë prej 300 euro, por për shkak të mosshlyerjes së saj, ajo iu shndërrua në 15 ditë burgim efektiv.

Pas përfundimit të procedurave të nevojshme, i dyshuari është dërguar në Qendrën e Paraburgimit në Hajvali për vuajtje të dënimit, ndërsa rasti është mbyllur me realizim të plotë të urdhëresës gjyqësore.

Kryeministri izraelit, Benjamin Netanjahu njoftoi sot se është arritur një marrëveshje për armëpushim në Siri.

Sipas deklaratës së tij, është vendosur një politikë e qartë: çmilitarizimi i zonave në jug të Damaskut dhe mbrojtja e “vëllezërve tanë” druzi.

“Ne kemi krijuar një politikë të qartë: demilitarizimin e zonës në jug të Damaskut dhe mbrojtjen e vëllezërve tanë, Druzëve. Unë i dhashë udhëzime IDF-së të veprojë me forcë, sepse regjimi i Damaskut dërgoi ushtrinë e tij në jug të kryeqytetit dhe masakroi druzët. Si rezultat i veprimeve tona të intensifikuara, është vendosur një armëpushim dhe forcat siriane janë tërhequr përsëri në Damask”, tha ai.

Më herët, ai kishte urdhëruar ushtrinë izraelite të vepronte fuqishëm pasi “regjimi” në Damask kishte dërguar ushtrinë e vet dhe kishte “masakruar” druzët, një grup fetar arab që i përmbahen besimit druz.
Ai beson se sulmi izraelit çoi në vendosjen e armëpushimit dhe tërheqjen e ushtrisë siriane drejt Damaskut, sipas Jerusalempost.
Më herët gjatë ditës, qeveria e presidentit sirian Ahmed al-Sharaaa kishte njoftuar tërheqjen e ushtrisë nga zonat ku jetojnë druzët.

Agjencia Reuters ka raportuar gjithashtu se udhëheqësi fetar i druzëve, sheiku Yousef Jarbou, kishte deklaruar se druzët sirianë kishin arritur një marrëveshje me qeverinë siriane, e cila do të hynte në fuqi menjëherë.