Category: Lajme

Dhoma e Përfaqësuesve e Shteteve të Bashkuara miratoi një vendim të rëndësishëm për zgjatjen e ndihmës ushtarake për Ukrainën, duke treguar angazhimin e vazhdueshëm të SHBA për mbështetje në përballjen me agresionin rus. Vendimi u miratua me shumicë të madhe, 353 vota pro dhe 76 kundër.

Paketa e ndihmës përfshin armë, municion, sisteme mbrojtëse, ndihmë logjistike dhe trajnime për ushtrinë ukrainase. Ky hap është parë si një sinjal i fortë se SHBA mbetet e përkushtuar për mbrojtjen e demokracisë dhe sovranitetit të Ukrainës.

Zyrtarët ukrainas e kanë mirëpritur këtë vendim, duke e vlerësuar si thelbësore për ruajtjen e qëndrueshmërisë dhe forcës mbrojtëse të vendit.

Policia e Kosovës ka njoftuar se në Gjilan, një grua kosovare ka raportuar se është viktimë e një akti dhune seksuale.

Sipas njoftimit zyrtar, viktima ka deklaruar se i dyshuari ka kryer marrëdhënie seksuale pa dëshirën e saj.

Rasti dyshohet të ketë ndodhur më 11 korrik të këtij viti, derisa rasti u raportua në Polici gjatë ditës së djeshme.

“Gjilan 11.07.2025 – 14:00. Më 18.07.2025 viktima femër kosovare, ka njoftuar policinë se i dyshuari ka kryer marrëdhënie seksuale pa dëshirën e saj. I dyshuari është arrestuar dhe pas intervistimit me vendim të prokurorit është dërguar në mbajtje”, ka njoftuar policia.

Gjatë një feste në Düsseldorf të Gjermanisë janë plagosur 19 persona, prej të cilëve katër ndodhen në gjendje kritike.

Në mesin e të plagosurve raportohet se është edhe një fëmijë.

Deri më tani nuk ka informacione nëse në grupin e të lënduarve ka shqiptarë, shkraun welt.de.

Disa nga raketat e fishekzjarreve morën drejtim të gabuar, duke fluturuar anash ose shpërthyer në tokë, në mes të njerëzve.

Dëshmitarë okularë konfirmojnë se disa fishekzjarre devijuan nga rruga e tyre dhe shpërthimet u dëgjuan njëkohësisht në ajër dhe në tokë.

Shkaqet e këtij incidenti janë duke u hetuar dhe policia e konsideron ngjarjen një “fatkeqësi tragjike”, ndërsa hetimet do të zbulojnë arsyet e sakta të ngjarjes.

Festa e Rinisë në Düsseldorf tërheq çdo vit qindra mijëra vizitorë dhe zakonisht zgjat deri të dielën.

Policia ka njoftuar se gjatë një ahengu në rrugën “Sheshi i Arbërit” në Prishtinë u shkrep arma e zjarrit.

Sipas njoftimit të policisë, në vendin e ngjarjes u gjetën dhe u konfiskuan 34 gëzhoja, derisa në shtëpinë ku u mbajt festa nuk u gjet asgjë e dyshuar.

“Raportohet se gjatë një ahengu ka pas të shtëna me armë zjarri. Në vendin e ngjarjes kanë dalë njësitë policore ku kanë gjetur dhe konfiskuar 34 gëzhoja ndërsa, gjatë kontrollit në shtëpinë ku është mbajtur ahengu nuk është gjetur asgjë e dyshuar. Rasti nën hetime”, thuhet në raportin e policisë.

Një 40-vjeçar humbi jetën si pasojë e lëndimeve të rënda që mori në një aksident me traktor në Bresanë të Dragashit, konfirmoi Policia e Kosovës

Viktima ishte duke punuar me traktor në zonën malore.

“Sot, më 18 korrik 2025, rreth orës 09:50, Policia është njoftuar nga Qendra e Mjekësisë Familjare në Bresanë, Dragash se një person mashkull, D.A. (40 vjeç), është sjellë në qendër nga vëllai i tij me lëndime të rënda trupore. Pas ofrimit të ndihmës së parë, ai është dërguar me autoambulancë në Spitalin Rajonal të Prizrenit, ku më pas, për shkak të lëndimeve të marra, ka vdekur”, tha zëdhënësi i Policisë në rajonin e Prizrenit, Shaqir Bytyqi.

Sipas informatave fillestare, viktima ishte duke punuar me traktor në zonën malore të fshatit Bresanë, Dragash në momentin e incidentit. Rrethanat e ngjarjes janë ende të paqarta.

Policia ka reaguar menjëherë, ka dalë në vendin e ngjarjes, ka siguruar zonën dhe ka njoftuar njësitet përkatëse hetimore.

“Në vendngjarje është angazhuar edhe prokurori kujdestar, me urdhër të të cilit rasti është iniciuar si “Vdekje e dyshimtë”, ndërsa trupi pa jetë është dërguar në Institutin e Mjekësisë Ligjore në Prishtinë”, shtoi tutje Bytyqi.

Një zyrtar policor në Gjakovë është suspenduar për 72 orë.

Siç njofton policia rajonale e kësaj komune, suspendimi i tij u bë nën dyshimin për rrjedhje të informatës zyrtare.

Bëhet e ditur se lidhur më rastin të gjitha veprimet e mëtejme do të merren në koordinim dhe bashkëpunim të ngushtë me institucionet kompetente duke përfshirë Inspektoratin Policor të Kosovës.

Për shkak të temperaturave të larta në sallën e gjykimit është anuluar seanca ndaj 6 të akuzuarve për shpërthimin në lokalin “Sekiraqa”, ku kishin mbetur të vdekur dy persona.

Ata akuzohen se më 24 shtator 2007 pretendohet se kishin vendosur dhe shpërthyer një mjet plasës në objektin e lokalit “Sekiraqa”, në bulevardin “Bill Clinton” në Prishtinë.

Si pasojë e këtij shpërthimi kishin vdekur N.M dhe P.S dhe ishin lënduar disa persona të tjerë.

Njëra anë e autostradës Prishtinë–Prizren është bllokuar për shkak të punimeve që po zhvillohen në këtë aks rrugor.

Si pasojë e këtyre punimeve, janë shkaktuar disa kolona që në pikun e mëngjesit.

Ndërkohë, autoritetet kanë kërkuar nga qytetarët që të ndjekin shenjat e vendosura për qarkullim alternativ, në mënyrë që të shmangin bllokimet në rrugë.

I dyshuari për spiunazh, Bojan Jevtiq, është sjellë të premten në Pallatin e Drejtësisë në Prishtinë, ku pritet që Gjykata të vendosë për caktimin e masës së paraburgimit ndaj tij.

Prokuroria Speciale e Republikës së Kosovës ka njoftuar se të enjten është zhvilluar një aksion i koordinuar me Inspektoratin Policor të Kosovës (IPK) dhe Agjencinë e Kosovës për Inteligjencë (AKI), në kuadër të hetimeve për veprimtari të dyshuar të spiunazhit.

Gjatë këtij operacioni është arrestuar Bojan Jevtiq, zyrtar policor nga komuna e Kamenicës.

“Gjatë bastisjes në shtëpinë e të dyshuarit në një fshat të Kamenicës, janë sekuestruar prova materiale si: dokumente konfidenciale të Policisë së Kosovës, disa telefona të mençur, USB, një armë e shkurtër, municion, para të gatshme në vlerë prej 10.000 eurosh, 2 milionë dinarë serbë (rreth 17.072 euro), 600 franga zvicerane dhe prova të tjera të cilat do të ekzaminohen gjatë procedurës hetimore”, thuhet në komunikatën e përbashkët të Prokurorisë dhe IPK-së.