Category: Lajme

Dhoma e Tregtisë dhe Industrisë Kosovë (DhTIK) ka reaguar pas aktvendimit të nxjerrë nga Shkalla e Dytë e Gjykatës Komerciale, duke thënë se situata e krijuar ka sjellë sfida të reja për bizneset, të cilat kanë pritur një vendim “të drejtë dhe meritor”, siç e kishte dhënë Shkalla e Parë e kësaj gjykate.

Sipas DhTIK-së, afati i përcaktuar nga Zyra e Rregullatorit për Energji (ZRrE) deri më 16 gusht për bizneset që të lidhin kontrata për furnizim është “shumë i shkurtër” dhe po shkakton probleme të mëdha për qindra biznese që nuk kanë nënshkruar ende me asnjë kompani të licencuar.

Në reagim thuhet se një numër i madh kompanish janë në pritje të vendimit përfundimtar nga Gjykata Komerciale, ku kanë dorëzuar padi kundër këtij procesi, ndërsa të tjerat janë në procedurë të përgatitjes së ankesës edhe në instancat tjera gjyqësore, përfshirë Gjykatën Kushtetuese të Republikës së Kosovës.

Me këtë rast, DhTIK njofton se i është drejtuar sërish ZRrE-së me një kërkesë për ta pezulluar vendimin për liberalizimin e tregut të energjisë deri në një vendim përfundimtar të instancave gjyqësore.

“E ritheksojmë edhe njëherë se Dhoma e Tregtisë dhe Industrisë Kosovë, i qëndron prapa qëndrimit të saj që Liberalizimin e Tregut të Energjisë Elektrike duhet të pezullohet në tërësi dhe të nisin menjëherë konsultimet publike me të gjitha palët e interesit. Vlerësojmë se forma e zgjedhur nga ZRRE për ta realizuar Liberalizimin e Tregut të Energjisë Elektrikë është tërësisht e gabuar dhe e dëmshme për qytetarët dhe ekonominë e vendit. Nga ky hap, rrezikohen shumë vende pune, ulje të kapaciteteve prodhuese, rënie të konkurrueshmërisë në treg dhe mbyllje të bizneseve”, thuhet në reagimin e DhTIK-së.

ZRrE ka paralajmëruar sot bizneset që ende nuk kanë lidhur kontratë komerciale për furnizim me energji elektrike që ta bëjnë këtë deri më 16 gusht të këtij viti.

Policia e Kosovës, përkatësisht Drejtoria për Hetimin e Krimit të Organizuar dhe Krimeve të Rënda, në koordinim me Prokurorinë Themelore në Pejë dhe me mbështetjen e njësive të tjera policore, më 13 gusht 2025 ka realizuar një aksion të bazuar në urdhëresën e gjykatës kompetente.

Gjatë këtij aksioni janë kontrolluar tri lokacione në Klinë dhe një në Prishtinë, raporton Sinjali.

Në lidhje me rastin, tre persona janë shoqëruar nga Policia mbi dyshimin për kryerjen e veprës penale “Importi, eksporti, furnizimi, transportimi, prodhimi, këmbimi, ndërmjetësimi ose shitja e paautorizuar e armëve apo materieve plasëse”.

Si dëshmi materiale, gjatë kontrollit janë sekuestruar: Një armë e gjatë snajper, dy karikatorë me 40 fishekë të armës, një pistoletë me një karikator dhe 8 fishekë, një pistoletë me dy karikatorë dhe 4 fishekë, një pistoletë me një karikator dhe 14 fishekë, një pistoletë me një karikator dhe 52 fishekë, një pushkë ajrore me 5 fishekë, 14 fishekë të pistoletës me gas, një pushkë gjuetie, një automatik AK-47 me dy karikatorë, tre telefona mobile, një thikë, një shpatë e arteve marciale, dhe një antiplumb.

“Disa nga dëshmitë janë me leje dhe janë sekuestruar me qëllim të verifikimit dhe procedurave të mëtutjeshme.”, thuhet tutje në njoftim.

Në platformën e shërbimeve e-Kosova është hapur aplikimi për paraqitjen e provimit të maturës, në afatin e dytë.

“Të gjithë maturantët e shkollave të mesme të larta që janë të interesuar të marrin pjesë në afatin e dytë të provimit të maturës shtetërore kanë mundësinë të aplikojnë përmes platformës e-Kosova nga data 13 – 22 gusht 2025”, thuhet në njoftim.

Mes tjerash thuhet se – Ky shërbim është krijuar për të lehtësuar procesin e aplikimit, duke ju mundësuar të kryeni të gjitha procedurat online, pa pasur nevojë të paraqiteni fizikisht në shkollë apo institucione tjera.

Të paktën 123 persona kanë mbetur të vdekur si pasojë e sulmeve të fundit izraelite në Rripin e Gazës, të cilat janë intensifikuar teksa grupi militant Hamas po zhvillon bisedime të mëtejshme me ndërmjetësuesit egjiptianë për një armëpushim.

Numri i të vdekurve brenda 24 orëve është më i keqi brenda javës. Kryeministri izraelit, Benjamin Netanyahu, ka lënë të nënkuptohet se fundmi se përpjekjet për armëpushim në Gaza tani janë përqendruar në një marrëveshje gjithëpërfshirëse që do të lironte pengjet e mbetura menjëherë, në vend që kjo të bëhej në faza, siç parashihej deri më tani.

Netanyahu ka përsëritur idenë të propozuar me entuziazëm edhe nga presidenti i SHBA-së, Donald Trump, që palestinezët të largohen nga enklava.

Agjencia për Informim dhe Privatësi u bën thirrje të gjithë qytetarëve të tregohen të kujdesshëm dhe të mos dërgojnë dokumentet e tyre personale (letërnjoftim, pasaportë, numër të kartelës bankare) tek faqe apo platforma të paverifikuara dhe të dyshimta.

AIP thekson se para se të ndani të dhënat tuaja, sigurohuni që faqja apo kompania është zyrtarisht e licencuar për të operuar në Kosovë dhe lexoni me kujdes politikat e privatësisë.

Dërgimi i dokumenteve personale te palë të panjohura mund të shkaktojë:

Vjedhje të identitetit

Mashtrime financiare

Keqpërdorim të të dhënave për aktivitete të paligjshme

AIP tutje thekson se nëse dyshoni se të dhënat tuaja janë keqpërdorur, kontaktoni menjëherë Agjencinë për Informim dhe Privatësi.

“Mbrojtja e të dhënave personale është e drejta juaj – kujdesi fillon nga ju!”, shkruan AIP.

Agjencia për Menaxhim të Emergjencave ka njoftuar sot se gjatë javës së fundit janë raportuar 633 zjarre në gjithë territorin e Kosovës, ndërsa aktualisht nëntë vatra janë aktive.

Në një konferencë për media, drejtori i AME-së, Genc Metaj tha se gjendja është stabile, por e brishtë shkak i temperaturave të larta dhe zjarrëvënieve të qëllimshme.

Ndërsa nga Policia e Kosovës kanë bërë të ditur se deri më sot janë arrestuar 23 persona për zjarrëvënie të qëllimshme.

Zyra e Rregullatorit për Energji ka thënë se që nga 16 gushti, konsumatorët të cilët nuk kanë nënshkruar kontratë komerciale me një nga furnizuesit e licencuar në treg të lirë, do t’u ndërpritet furnizimi me rrymë.

Në një njoftim për media, ZRRE-ja ka njoftuar se e ka marrë aktvendimin e Shkallës së Dytë të Gjykatës Komerciale, që ka refuzuar shtyrjen e liberalizimit të tregut të energjisë elektrike.

ZRrE-ja u bëri thirrje të gjithë konsumatorëve komercialë që duhet të jenë në treg të lirë dhe që ende nuk kanë lidhur kontratë komerciale të furnizimit me energji elektrike, të veprojnë pa vonesë dhe të zgjedhin një nga furnizuesit e licencuar të publikuar në faqen zyrtare.

Në mars të këtij viti, Zyra e Rregullatorit të Energjisë njoftoi për daljen në treg të hapur të energjisë për bizneset e mëdha.

Ky vendim prek mbi 1000 kompani private, të cilat qw nga atwherw kanë vazhduar të ankohen ndaj këtij vendimi.

Sekretarja e përgjithshme e PDK-së, Vlora Çitaku, reagoi pas emërimit të Mentor Hysenit në krye të Administratës Tatimore të Kosovës.

Ajo tha se e vetmja e mirë e Qeverisë Kurti 2 është demistifikimi i Albin Kurtit.

“Albin Kurti paska emëruar militantin partiak, ish-kandidatin për deputet Mentor Hyseni, drejtor të Administratës Tatimore të Kosovës, një prej institucioneve më të rëndësishme në vend. Ja pra, këta që nga opozita bënin betejë kundër nepotizmit e klientelizmit, dhe e kishin gojën plot meritokraci e parime, me të ardhur në pushtet u zhveshën nga çdo vlerë që predikonin. Ende besoj se e vetmja e mirë e Qeverisë Kurti 2 është demistifikimi i Albin Kurtit. Shokët e familjarët vetëm për dasma, apo?”, shkroi në Facebook, Çitaku.

LEXONI EDHE:

Mentor Hyseni bëhet drejtor i ATK-së, ishte kandidat i VV-së për deputet