Category: Lajme

Nënkryetarja e Komunës së Leposaviqit, Marina Bogojeviq, është arrestuar dje, pasi që dyshohet se në objektin e komunës, ka sulmuar fizikisht një grua që kishte kërkuar vendim mbi largimin nga puna.

Policia ka bërë me dije se e njëjta është liruar pas intervistimit.

“SULM -Leposaviq 17.09.2025-11:45. Është arrestuar e dyshuara femër kosovare- zëvendës kryetare e komunës, pasi që dyshohet se në objektin e komunës, ka sulmuar fizikisht viktimën femër kosovare, e cila kishte kërkuar vendim mbi largimin nga puna. Me vendim të prokurorit, pas intervistimit palët janë liruar dhe rasti shkon në procedurë të rregullt”, thuhet në raport.

Komandanti i Forcës së Sigurisë së Kosovës (FSK), gjenerallejtënant Bashkim Jashari, ka marrë pjesë në Konferencën e 28-të të Kartës së Adriatikut A5, e mbajtur në Tiranë, ku u diskutua për forcimin e sigurisë rajonale dhe sfidat e përbashkëta të Ballkanit Perëndimor.

Konferenca u udhëhoq nga komandanti i Komandës Amerikane për Evropë (EUCOM) dhe njëkohësisht komandanti suprem i Forcave Aleate për Evropë (SACEUR), ndërsa bashkëkryesohej nga Shqipëria dhe Bosnjë e Hercegovina.

Në punimet e saj morën pjesë shefat e mbrojtjes të vendeve të rajonit dhe adjutantët e përgjithshëm të gardave kombëtare të shteteve partnere.

Në adresimin e tij, gjeneral Jashari theksoi nevojën e anëtarësimit të plotë të Kosovës në këtë nismë, duke vlerësuar se ky hap do të sillte më shumë paqe dhe siguri në Ballkanin Perëndimor.

Në kuadër të konferencës, ai zhvilloi takime bilaterale me komandantin e EUCOM-it dhe SACEUR-in, gjeneral Alexus G. Grynkewich, si edhe me shefin e Shtabit të Përgjithshëm të Forcave të Armatosura të Shqipërisë, gjenerallejtënant Arben Kingjin.

Në përfundim, shtetet pjesëmarrëse u pajtuan se nisma të tilla janë të domosdoshme për forcimin e bashkëpunimit dhe adresimin e sfidave të përbashkëta të sigurisë në rajon.

Franca po përgatitet për njërën prej protestave më të mëdha të viteve të fundit, ndërsa sindikatat po tregojnë unitet të rrallë për t’i bërë presion kryeministrit të ri që të rishikojë shkurtimet buxhetore dhe të marrë masa për pagat, pensionet dhe shërbimet publike.

Sipas të dhënave të policisë, sot pritet që rreth 800 mijë njerëz të dalin në rrugë në marshime në mbarë vendin, ndërsa shkollat, transporti hekurudhor dhe ajror do të preken nga kjo protestë.

Në terren do të dislokohen gjithsej 80 mijë policë. Kjo ditë protestash vjen në një kohë krize politike në Francë, pasi Emmanuel Macron javën e kaluar emëroi aleatin e tij të ngushtë, Sebastien Lecornu, si kryeministrin e tretë brenda vitit – pas rrëzimit të dy paraardhësve, nga parlamenti për shkak të mosmarrëveshjeve të ashpra buxhetore.

Protesta e sotme pritet të jetë më e madhja që nga viti 2023, kur turma të mëdha njerëzish dolën kundër vendimit për të rritur moshën e pensionit në 64 vjeç, përmes fuqive ekzekutive dhe pa votim në parlament.

Presidenti amerikan, Donald Trump pritet të takohet sot me kryeministrin e Britanisë së Madhe, Keir Starmer në rezidencën e tij të enjten, teksa vizita shtetërore e tij kalon nga parada mbretërore në bisedime politike.

Udhëheqësit parashihet të mbajnë një konferencë të përbashkët për shtyp pas takimit.

Gjatë një organizimi mbretëror mbrëma, Trumpi u prit dje në Windsor nga Mbreti, Mbretëresha dhe një sërë anëtarësh të lartë të familjes mbretërore.

Ai tha se vizita e dytë shtetërore ishte një nga “nderimet më të larta të jetës së tij, ndërsa Mbreti vlerësoi “angazhimin personal të presidentit për të gjetur zgjidhje për disa nga konfliktet më të vështira në botë”.

Tre persona janë arratisur gjatë orëve të para të mëngjesit të së mërkurës nga Qendra e Mbajtjes për Emigrantë në fshatin Vranidoll.

Policia ka bërë të ditur se personat e arratisur janë shtetas të huaj, konkretisht dy prej tyre me origjinë nga Bangladeshi dhe njëri nga Maroku.

Sipas njoftimit zyrtar, shkaqet që i kanë shtyrë tre personat të ndërmarrin këtë veprim janë ende të panjohura për hetuesinë.

Rasti është duke u hetuar në mënyrë intensive për të kuptuar se si ka ndodhur arratisja dhe për të lokalizuar vendndodhjen e tre personave të larguar.

Policia ka bastisur shtëpinë e një personi të dyshuar për vrasje në tentativë, duke sekuestruar një sasi të konsiderueshme armatimi dhe pajisjesh.

Operacioni policor u zhvillua të mërkurën në Prishtinë, si pjesë e hetimeve intensive lidhur me një rast që kishte ndodhur disa muaj më parë.

Gjatë kontrollit në pronën e të dyshuarit, njësitet hetimore kanë gjetur dhe konfiskuar një armë automatike AK-47.

Sipas Policisë, kjo armë dyshohet të jetë përdorur në rastin e vrasjes në tentativë që ndodhi më 12 maj të këtij viti në rrugën “Bardhyl Qaushi” në kryeqytet.

Përveç armës së zjarrit, janë gjetur edhe dy jelekë anti-plumb, një helmetë dhe një palë pranga.

Britania e Madhe do ta njohë zyrtarisht shtetin e Palestinës këtë fundjavë, pasi presidenti i SHBA-së, Donald Trump të përfundojë vizitën e tij shtetërore, raportoi të mërkurën “The i Paper”, duke cituar burime qeveritare, transmeton Anadolu.

Në korrik, kryeministri Keir Starmer tha se Mbretëria e Bashkuar do ta njohë shtetësinë palestineze në Asamblenë e Përgjithshme të OKB-së në New York në shtator, nëse Izraeli nuk ndërmerr “hapa thelbësorë” për të adresuar situatën humanitare në Gaza dhe për të rënë dakord për një armëpushim.

Arsyeja për shtyrjen e njoftimit deri pas largimit të Trumpit nga Mbretëria e Bashkuar është sepse “mund të kishte rrezikuar thellimin e tensioneve me Washingtonin, pasi Trump dhe sekretari i Shtetit, Marco Rubio ofruan mbështetje të fortë për ofensivën tokësore të Izraelit në Gaza”, thuhet në raport.

Zëdhënësi i kryeministrit tha se njohja ishte hartuar për të mbrojtur qëndrueshmërinë e një zgjidhjeje me dy shtete.

“Shtetësia është e drejtë e patjetërsueshme e popullit palestinez dhe është absolutisht thelbësore në mbrojtjen e qëndrueshmërisë së një zgjidhjeje me dy shtete që ta bëjmë të qartë këtë të drejtë të patjetërsueshme”, shtoi ai.

Vitin e kaluar, Irlanda, Norvegjia dhe Spanja iu bashkuan një liste prej 147 vendesh që tani e njohin zyrtarisht Palestinën.

Franca njoftoi planet për të njohur shtetin palestinez gjatë Asamblesë së Përgjithshme të OKB-së, duke u bërë shteti i parë anëtar i G7-ës, një forum joformal i shtatë vendeve dhe demokracive kryesore të industrializuara, që e bën këtë.