Kryetari i LDK-së, Lumir Abdixhiku, ka folur pas takimit me kreun e LVV-së, Albin Kurti.
“Folëm për stabilitetin e domosdoshëm institucional dhe shmangien e domosdoshme të zgjedhjeve të ardhshme, të katërtat me radhë në më pak se 1 vit e gjysmë”.
“U dakorduam të vazhdojmë tutje me komunikim si formë e vetme për të shmangur zgjedhje të reja”.
Inspektorati Qendror i Mbikëqyrjes së Tregut (IQMT), në bashkëpunim me Administratën Tatimore të Kosovës (ATK), ka vazhduar edhe gjatë ditës së sotme zbatimin e planit operacional të inspektimeve ndaj bizneseve që ushtrojnë veprimtari në fushën e kriptovalutave dhe këmbimoreve në të gjithë territorin e vendit.
Ministria e Ndërmarrësisë, Tregtisë dhe Inovacioni tha se gjatë aksionit të sotëm janë realizuar 14 inspektime.
“Si rezultat i kontrolleve, janë mbyllur edhe dy biznese të tjera për shkak të mungesës së dokumentacionit të nevojshëm për ushtrimin e veprimtarisë, ndërsa dy biznese janë gjobitur për mosrespektim të orarit të punës”.
IQMT tha se çdo subjekt ekonomik që ushtron veprimtari në këtë sektor është i obliguar të përmbushë të gjitha kërkesat ligjore, duke siguruar pëlqimin për kushtet minimale teknike nga Ministria e Industrisë, Ndërmarrësisë dhe Tregtisë (MINT), si dhe licencën përkatëse nga Banka Qendrore e Republikës së Kosovës (BQK), në përputhje me legjislacionin në fuqi.
Ka përfunduar takimi mes kryeministrit në detyrë, Albin Kurti dhe kreut të LDK-së, Lumir Abdixhiku.
Në një konferencë për media pas takimit, Kurti tha se takimi shkoi në një atmosferë konstruktive ku tha të jenë diskutuar shumë çështje të zhvillimeve politike, pastaj të dinamikave institucionale, dhe njëkohësisht edhe orarin përpara për konstituimin e institucioneve.
“Ishte takimi i parë. I kemi edhe katër javë përpara për fillimin e seancës konstituive për të zgjedhur kryetarin apo kryetaren e Kuvendit, kryesinë e më pastaj edhe për qeverinë në mandat të ri dhe presidentin apo presidenten. Kemi diskutuar për të gjitha këto, por ende nuk kemi ndonjë konkluzion apo të arritur që do të mund ta ndanim me ju”.
“Jam optimist për rrugën përpara, jam me shpresë që racionaliteti që po mbizotëron do të vazhdon të ekzistojë në këto takime, prandaj edhe po e theksoj që është takimi i parë, meqë do të ketë edhe takime tjera”, tha Kurti.
Tashmë janë bërë dy orë që nga fillimi i takimit mes liderit të Lëvizjes Vetëvendosje, Albin Kurti, dhe atij të Lidhjes Demokratike të Kosovës, Lumir Abdixhiku.
Përderisa, Kurti është shoqëruar për në takim nga Hekuran Murati, Abdixhiku, ka shkuar në takim nën shoqërinë e ish-presidentes, Vjosa Osmani.
Takimi mes liderëve politikë në vend, po bëhet pas certifikimit të rezultateve zgjedhore, me ftesë të Kurtit, lidhur me formimin e institucioneve të vendit.
Në anën tjetër, Kurti, ditën e sotme ka zhvilluar takim edhe me kryetarin e Partisë Demokratike të Kosovës, Bedri Hamzën.
Këshilli Prokurorial i Kosovës (KPK) të premten ka trajtuar çështjen e ankesës së Blerim Isufajt lidhur me konkursin për pozitën e Kryeprokurorit të Shtetit.
Gjatë mbledhjes, kryesuesi i KPK-së, Arian Gashi, ka propozuar që në rend të ditës të përfshihet edhe autorizimi për drejtorin e përgjithshëm të Sekretariatit të KPK-së, Sami Istrefi, për ta përfaqësuar Këshillin në Gjykatën Kushtetuese lidhur me dhënien e komenteve për ankesën e Isufajt.
Propozimi është miratuar unanimisht nga anëtarët e KPK-së.
“Këshilli autorizoi Drejtorin e Përgjithshëm të Sekretariatit të Këshillit Prokurorial të Kosovës, z. Sami Istrefi, që ta përfaqësojë Këshillin Prokurorial të Kosovës në Gjykatën Kushtetuese për dhënien e komenteve lidhur me ankesën e z. Blerim Isufaj, e cila ka të bëjë me shpalljen e konkursit për pozitën e Kryeprokurorit të Shtetit”, thuhet në njoftimin e KPK-së.
Blerim Isufaj, kryeprokuror i Prokurorisë Speciale të Republikës së Kosovës, kishte dërguar rastin në Gjykatën Administrative pas vendimit të KPK-së për hapjen e konkursit të ri për Kryeprokuror të Shtetit.
Më 18 maj 2026, KPK kishte miratuar shpalljen e konkursit për këtë pozitë me pesë vota për, një kundër dhe një abstenim. Vendimi ishte kundërshtuar nga Isufaj, i cili kishte paraqitur padi duke kërkuar anulimin e tij si të kundërligjshëm.
Në padinë e tij, Isufaj ka pretenduar se KPK nuk ka pasur të drejtë të hapë konkurs të ri, pasi sipas tij ekziston ende vendimi i vitit 2023, me të cilin ai ishte propozuar për dekretim te presidentja e atëhershme.
Sipas tij, ky vendim nuk është shfuqizuar dhe vazhdon të prodhojë efekte juridike, pasi nuk është nxjerrë ndonjë akt formal për tërheqjen ose anulimin e tij.
“Vendimi i KPK-së i datës 18.05.2026 për shpalljen e konkursit të ri, i nxjerrë pa shfuqizim formal të propozimit paraprak, e prek drejtpërdrejtë sferën juridike të paditësit”, thuhet në padinë e Isufajt.
Isufaj ka kërkuar gjithashtu që të shtyhet ekzekutimi i vendimit të KPK-së për shpalljen e konkursit deri në një vendim përfundimtar të gjykatës në këtë çështje administrative.
Megjithatë, Gjykata Administrative më 5 qershor kishte refuzuar kërkesën e tij për masë të sigurisë, ndërsa Gjykata e Apelit e kishte vërtetuar këtë vendim, duke vlerësuar se nuk ishin plotësuar kushtet ligjore për vendosjen e një mase të tillë.
Sipas Apelit, për caktimin e masës së sigurisë duhet të plotësohen në mënyrë kumulative dy kushte: shmangia e një dëmi të rëndë dhe të pakthyeshëm ndaj interesave të propozuesit dhe moscenimi i rëndë i interesit publik.
“Vetëm pretendimi i paditësit se do t’i shkaktohet dëm është argument i pamjaftueshëm për caktimin e masës së sigurisë”, kishte vlerësuar Kolegji i Apelit.
Ndërkohë, më 19 qershor 2026, KPK kishte miratuar pesë kandidaturat për pozitën e Kryeprokurorit të Shtetit. Në garë janë: Atdhe Dema, Naim Abazi, Rafet Halimi, Shqipdon Fazliu dhe Zejnullah Gashi. Kallxo/
Policia ka nisur një hetim për vrasje lidhur me vdekjen e Ann Widdecombe, ndërsa është në zhvillim një operacion për kapjen e autorit të dyshuar.
Policia e Devon dhe Cornwall njoftoi se ish-ministrja konservatore 78-vjeçare, e cila së fundmi ishte zëdhënëse e partisë Reform UK, u gjet e vdekur në shtëpinë e saj në Dartmoor, në qarkun Devon, të enjten në mëngjes, me plagë të rënda.
Ja çfarë dihet – dhe çfarë ende nuk dihet – për hetimin deri më tani, raporton BBC.
Çfarë ka ndodhur?
Policia thotë se Widdecombe u gjet e pajetë, me plagë të rënda, në shtëpinë e saj në Haytor, një fshat në zonën e Dartmoor, të enjten në mëngjes, pasi oficerët u njoftuan nga shërbimi i ambulancës rreth orës 11:40 sipas orës britanike (BST).
Vdekja e saj u njoftua të premten në mëngjes nga ekipi i saj menaxhues, por nuk u dhanë detaje se kur, si apo ku kishte ndodhur vdekja dhe as nuk u përmendën rrethana të dyshimta.
Në deklaratë thuhej, mes të tjerash:
“E dimë se ky lajm do të jetë një tronditje e madhe për kolegët dhe miqtë e shumtë që ajo fitoi gjatë jetës së saj.”
Më vonë, të premten pasdite, policia publikoi një deklaratë duke bërë të ditur se kishte nisur një hetim për vrasje dhe dha detaje për një të dyshuar.
Pas kësaj, ekipi menaxhues i Widdecombe publikoi një deklaratë të dytë, ku tha se ishte “plotësisht i shkatërruar” nga lajmi për hetimin policor, pas “24 orësh shumë traumatike dhe të dhimbshme”.
Forca të shumta policore vazhdojnë të jenë të pranishme pranë banesës së saj. Një korrespondent i BBC-së raportoi se në rrugën jashtë shtëpisë ndodhen disa automjete policie dhe një furgon policor në hyrje të pronës.
Ministrja e Brendshme, Shabana Mahmood, u bëri thirrje qytetarëve “të shmangin spekulimet dhe t’i lejojnë policisë të vazhdojë hetimin”.
Në një postim në platformën X, ajo tha se rrethanat e vdekjes së Ann Widdecombe janë “jashtëzakonisht tronditëse”, duke shtuar se “mendimet e saj janë me familjen dhe njerëzit e afërt të Ann”.
Ndërkohë, një zëdhënës i zyrës së mjekut ligjor për Devon, Plymouth dhe Torbay tha se “hetimet paraprake janë ende në zhvillim”.
Kush është i dyshuari?
Policia është në kërkim të një të dyshuari, për të cilin beson se është një mashkull i bardhë. Sipas autoriteteve, hetimi “po përparon me ritëm të shpejtë”.
Policia u bëri thirrje “kujtdo që mund të ketë parë diçka të dyshimtë në zonën e Haytor Vale ose Haytor, apo që disponon pamje nga kamerat e sigurisë, kamerat e ziles së derës ose kamerat e automjeteve, të kontaktojë hetuesit”.
Autoritetet shtuan se oficerë shtesë me uniformë do të patrullojnë zonën për të ndihmuar hetimet dhe për të qetësuar banorët.
Duke folur për mediat, kryeministri britanik Keir Starmer tha se i dyshuari është “qartazi i rrezikshëm” dhe u bëri thirrje të gjithë atyre që kanë informacion për të “të ndihmojnë policinë që ta arrestojë”.
Kryeinspektorja detektive Ilona Rosson tha:
“Ky është një incident jashtëzakonisht tragjik dhe mendimet tona janë me familjen dhe miqtë e Ann Widdecombe në këtë periudhë të vështirë.
U bëj thirrje të gjithë atyre që mund të kenë çfarëdo informacioni për këtë ngjarje, sado i parëndësishëm të duket, të paraqiten dhe të flasin me ne.”
Si kanë reaguar njerëzit?
Karriera politike e Widdecombe zgjati për dekada. Ajo ishte deputete e Maidstone, në Kent, për 23 vjet dhe shërbeu si ministre në Ministrinë e Brendshme dhe ministre e Punës në qeverinë e John Major nga viti 1994 deri në vitin 1997.
Pas lajmit për hetimin e vrasjes, kryeministri Keir Starmer e cilësoi atë si “një lajm tronditës”, duke shtuar se mendimet e tij janë me familjen e Widdecombe “në këtë moment të tmerrshëm”.
Ai tha se kishte biseduar me Kryetarin e Dhomës së Komunave, Lindsay Hoyle, udhëheqësen e Partisë Konservatore, Kemi Badenoch, liderin e Reform UK, Nigel Farage, si dhe me Andy Burnham, “për t’u bërë thirrje të gjithëve të qëndrojnë të bashkuar”.
Kemi Badenoch tha se ishte “e tronditur” dhe se “e kishte shumë të vështirë të gjente fjalët”.
Ajo shtoi:
“Ann Widdecombe ishte një grua shumë energjike, me karakter të fortë dhe gjithmonë e shprehte hapur mendimin e saj.
Ajo ishte 78 vjeçe. Ishte një grua e moshuar. Nuk e kuptoj si dikush mund t’i bëjë diçka kaq të tmerrshme një personi të moshuar.
Ishte një sulm mizor dhe i tmerrshëm. Zemra ime është me familjen e saj.”
Më tej ajo tha:
“Është një gjë kur dikush vdes, por të mësosh se është vrarë në një mënyrë kaq të tmerrshme është vërtet e dhimbshme.”
Ann Widdecombe lindi në Bath, në Somerset, në vitin 1947. Ajo studioi latinisht në Universitetin e Birminghamit dhe më pas filozofi, politikë dhe ekonomi në Universitetin e Oksfordit.
Pas largimit nga Parlamenti, iu përkushtua botës së spektaklit, duke marrë pjesë në emisionet “Strictly Come Dancing” në vitin 2010 dhe “Celebrity Big Brother” në vitin 2018.
Anton Du Beke, partneri i saj në “Strictly Come Dancing”, tha se vdekja e saj ishte “lajmi më i trishtë”.
“Kaluan një kohë të jashtëzakonshme së bashku,” tha ai në një video të publikuar në platformën X.
Si një mbështetëse e vendosur e largimit të Mbretërisë së Bashkuar nga Bashkimi Evropian, Widdecombe u bë eurodeputete e Partisë Brexit, duke përfaqësuar Anglinë Jugperëndimore në Parlamentin Evropian nga viti 2019 deri në vitin 2020.
Në vitin 2023, ajo iu bashkua partisë Reform UK të Nigel Farage, pasi kjo parti ndryshoi emrin nga Brexit Party, dhe u shfaq disa herë si zëdhënëse e saj për çështjet e emigracionit dhe drejtësisë.
Me një votë për dhe pesë vota kundër, Këshilli Prokurorial i Kosovës (KPK) refuzoi ankesën e kandidatit për Kryeprokuror të Shtetit, Atdhe Dema.
Dema kishte paraqitur ankesë në KPK, duke pretenduar shkelje të dispozitave ligjore në aspektin procedural dhe material si dhe mospërputhje ndërmjet pikëzimit dhe arsyetimit të dhënë nga Paneli vlerësues.
Ai kishte kërkuar që ankesa të aprovohej si e bazuar dhe që Paneli vlerësues ta rishqyrtonte vlerësimin e tij, duke argumentuar se vlerësimi për intervistën dhe koncept-dokumentin nuk ishte mbështetur në fakte konkrete dhe arsyetim të mjaftueshëm.
Gjatë shqyrtimit të ankesës, zëvendëskryesuesi i KPK-së, Dardan Vuniqi, tha se pretendimet e Demës për mungesë të arsyetimit nuk qëndrojnë. Sipas tij, kandidati nuk ka paraqitur prova që mbështesin pretendimet e ngritura dhe ankesa nuk tregon se cili element i vlerësimit duhet të ndryshohet.
“Kam kërkuar dokumente shtesë në ankesë, por nuk kam arritur ta gjej interesin e kandidatit në fjalë, se çfarë ka kërkuar të ndryshohet, pasi të drejtën që e ka kërkuar e ka fituar. Mendoj se diskrecioni ka qenë në përputhje me rregulloren. Ankesa nga kandidati duhet të mbështetet në prova. Ankesën e kemi pranuar vetë, i kam dëgjuar intervistat, por nuk mund të shkojmë tutje nëse nuk kemi interes juridik se çfarë duhet të ndryshohet, ngase ajo për të cilën është atakuar, ajo e drejtë është e fituar. Unë qëndroj në argumentimin tim që e njëjta ankesë të refuzohet”, tha ai.
Vuniqi shtoi se ankesa e Demës nuk specifikon ndonjë shkelje procedurale apo materiale, por shpreh vetëm mospajtim me pikëzimin e marrë.
Gjatë diskutimit, anëtari i KPK-së, Milot Krasniqi, tha se Këshilli duhet ta vlerësojë ankesën vetëm mbi bazën e kritereve dhe shtyllave të përcaktuara në procesin e vlerësimit.
“Sa i përket barrës së provës, konsideroj se është duke u bërë një interpretim i gabuar, sepse kandidati, jo vetëm ky, por edhe të tjerët, nuk kanë se si të sigurojnë prova se çfarë ta mbështesin. Konsideroj se sa i përket barrës së të provuarit nuk mund të kërkohet që kandidatët të dorëzojnë dokumente që mbështesin pretendimet e tyre. Duhet të bazohemi në tri shtylla: vlerësimin e kryer nga paneli, të cilin nuk e kemi sot para vetes, intervistën, ku mund të shohim më së miri kandidatët, dhe e treta është kundërshtimi. Mbi këto baza mund të dalim në një vlerësim më të qartë”, tha ai.
Ndërsa, ushtruesi i detyrës së Kryeprokurorit të Shtetit, Agron Qalaj, tha se për të është me rëndësi të kuptohet se në çfarë mase KPK-ja ka pasur mundësi të ushtrojë kontroll efektiv mbi vlerësimin e bërë nga Paneli vlerësues.
Në të njëjtën mbledhje, me gjashtë vota për u miratua edhe autorizimi i drejtorit të Sekretariatit të KPK-së, Sami Istrefi, për ta përfaqësuar Këshillin para Gjykatës Kushtetuese si dhe për dorëzimin e komenteve lidhur me njoftimin e Gjykatës Kushtetuese të Republikës së Kosovës. /kp/
Legjislatura e re e Kuvendit të Kosovës do të ketë 41 gra deputete, të cilat përbëjnë rreth 34 për qind të përbërjes së përgjithshme të parlamentit, sipas të dhënave të publikuara nga Instituti Demokratik i Kosovës (KDI).
Nga numri i përgjithshëm i grave të zgjedhura në Kuvend, 35 prej tyre kanë siguruar mandatin përmes votave të drejtpërdrejta të qytetarëve, ndërsa 6 deputete kanë hyrë në Kuvend përmes zbatimit të kuotës gjinore.
Në Aleancë janë zëvendësuar tri ulëse (Time Kadrijaj Albana Bytyqi, Teuta Haxhiu), në Partinë Demokratike të Kosovës (PDK) dy ulëse (Eliza Hoxha dhe Ariana Musliu-Shoshi), ndërsa një ulëse është ndryshuar edhe në Listën Serbe(Tanja Vuljoviq).
Sipas të dhënave të KDI-së, gjatë procesit të ndarjes së mandateve nga kuota gjinore ka pasur ndryshime në disa subjekte politike.
Komuna e Prishtinës ka njoftuar se, për shkak të zhvillimit të punimeve infrastrukturore, do të mbyllet përkohësisht për qarkullim një segment i rrugës “Fehmi Lladrovci”.
Sipas njoftimit, mbyllja do të jetë në fuqi nga 10 deri më 18 korrik 2026 dhe përfshin segmentin nga Rrethi i Flamurit deri te Rrethi i Spitalit.
Tutje bëhet e ditur se gjatë kësaj periudhe, trafiku do të menaxhohet dhe ridrejtohet sipas sinjalizimit të përkohshëm të vendosur në terren, ndërsa qarkullimi i këmbësorëve do të mbetet i mundësuar.
Mes tjerash, komuna u ka bërë thirrje qytetarëve dhe të gjithë pjesëmarrësve në trafik që të tregojnë mirëkuptim dhe të planifikojnë lëvizjet e tyre duke shfrytëzuar rrugë alternative deri në përfundimin e punimeve.
Në Komandën e Doktrinës dhe Stërvitjes së Forcës së Sigurisë së Kosovës (FSK) është përmbyllur Kursi Bazik për Xhenierë Luftarakë.
Sipas njoftimit të FSK-së në Facebook, ky kurs kishte për qëllim përgatitjen e pjesëtarëve me njohuri teorike dhe aftësi praktike në fushën e xhenios luftarake, përfshirë ndërtimin e fortifikimeve fushore, demolimet, kalimin e pengesave ujore, zbulimin dhe pastrimin e pengesave, si dhe përdorimin e pajisjeve xheniere.
“Trajnimi u realizua sipas standardeve profesionale, duke u fokusuar në zhvillimin e aftësive teknike, disiplinës, punës ekipore dhe gatishmërisë operacionale të pjesëmarrësve. Përfundimi me sukses i këtij kursi paraqet një hap të rëndësishëm në ngritjen e kapaciteteve profesionale të personelit të FSK-së dhe kontribuon në rritjen e gatishmërisë së njësive për përmbushjen e misioneve të tyre”, thuhet në postimin e FSK-së.