Category: Lajme

Sot në Ferizaj po shënohet Dita e Dëshmorëve të Komunës, e njohur edhe si Epopeja e Jezercit, një ditë për nder të të rënëve për lirinë e Kosovës.

Aktivitetet fillojnë nga ora 10:00, me homazhe në varrezat e dëshmorëve.

Pastaj me homazhet pranë varrit të Gjeneralit Imri Ilazi- Komandant Ferri, nga ora 10:30.

Nga ora 11:00, në Teatrin “Adriana” do të mbahet Akademia Përkujtimore, me pjesëmarrjen e përfaqësuesve institucionalë, familjarëve të dëshmorëve dhe qytetarëve.

Po ashtu në orën 11:00, në fshatin Mollopolc të Shtimës, do të zhvillohet një garë në motocross, si pjesë e aktiviteteve përkujtimore.

Në orën 13:00, do të bëhet përurimi i rrugës në Devetak të Shtimës, duke vazhduar me agjendën e aktiviteteve të planifikuara.

Ndërkohë, në orën 18:00, do të zhvillohet finalja e turneut memorial në futsall, në Sallën e Sporteve “Bill Clinton” në Ferizaj, për të përmbyllur ditën përkujtimore në nder të dëshmorëve të komunës.

Gjashtë persona janë arrestuar nën dyshimin se janë përfshirë në rrahje mes vete.

Dy dyshohet se janë lënduar nga mjete të mprehta dhe kanë pranuar tretman mjekësor.

Dy prej të dyshuarve janë dërguar në mbajtje, ndërsa katër të tjerë janë liruar në procedurë të rregullt.

“LËNDIM I LEHTË TRUPOR- Gremnik, Klinë / 27.09.2025-17:10. Janë arrestuar gjashtë (6) të dyshuar meshkuj kosovarë nën dyshimin se të njëjtit për motive (ende) të panjohura janë përfshirë në rrahje në mes veti, ku dy prej të dyshuarve kanë pësuar lëndime dyshohet nga mjete të mprehta. Të lënduarit, kanë pranuar tretman mjekësor në QKMF-Klinë e pastaj në spitalin rajonal në Pejë. Pas intervistimit me vendim të prokurorit dy të dyshuar janë dërguar në mbajtje, ndërsa katër të tjerë janë liruar në procedurë të rregullt”, thuhet në raportin 24 orësh të policisë.

Policia e Kosovës ka publikuar raportin ditor me të dhëna të përgjithshme për 24 orët e fundit, duke përfshirë statistikat e aksidenteve në trafik, arrestimet dhe gjobat e shqiptuara.

Sipas raportit, në këtë periudhë nuk është shënuar asnjë aksident trafiku me fatalitet, ndërsa janë regjistruar 26 aksidente me të lënduar dhe 32 të tjera me dëme materiale.

Policia ka vazhduar zbatimin e rregullave në komunikacion, ku brenda një dite ka shqiptuar gjithsej 2002 gjoba trafiku.

Në 24 orët e fundit policia ka arrestuar19 persona, prej të cilëve 5 i ka dërguar në mbajtje dhe 1 në vuajtje të dënimit.

Sot në kryeqytet do të mbahet Maratona Ndërkombëtare Prishtina 2025, e cila pritet të sjellë pjesëmarrës nga vendi dhe jashtë tij.

Për të garantuar mbarëvajtjen e ngjarjes dhe sigurinë e pjesëmarrësve, Drejtoria Rajonale e Policisë në Prishtinë ka ndërmarrë masa të veçanta për menaxhimin e trafikut.

Si pasojë, do të ketë bllokime të përkohshme dhe devijime të qarkullimit rrugor në disa segmente kyçe të rrugëve.

Prej orës 09:00 e deri në përfundim të garës, do të bllokohet për qarkullim rruga Prishtinë – Fushë Kosovë në drejtim të Pejës dhe anasjelltas, deri te nyja me autostradën “Ibrahim Rugova”.

Udhëzime për rrugët alternative:

Ngasësit nga Peja që udhëtojnë për në Prishtinë – të përdorin rrugën: Sllatinë – Magurë – Lipjan pastaj lidhen me rrugën nacionale Ferizaj – Prishtinë.

Ngasësit nga Peja që udhëtojnë për në Fushë Kosovë – përmes: Sllatinë – Bardh i Vogël – Kuzmin – Fushë Kosovë.

Ngasësit nga Prishtina ose Veterniku që udhëtojnë për në Pejë/Aeroport – rruga: Prishtinë – Lipjan – Rufc i Ri – Poturoc – Magurë – Aeroport.

Ngasësit që udhëtojnë nga Mitrovica për në Pejë/Aeroport – të përdorin autostradën nga Mazgiti në drejtim të Shkupit, të dalin në Lipjan, pastaj të vazhdojnë: Rufc i Ri – Poturoc – Magurë – Aeroport.

Ngasësit që udhëtojnë nga Mitrovica për në Ferizaj – do të kenë lëvizje të lirë pa ndalesa në rrugën nacionale.

Transporti publik (autobusët) në relacionet Prishtinë – Fushë Kosovë – Aeroport – Pejë, nuk do të lejohet të qarkullojë gjatë kohës së garës, dhe duhet të ndjekë rrugët alternative të lartpërmendura.

Policia e Kosovës apelon te qytetarët dhe ngasësit që të respektojnë udhëzimet dhe sinjalizimet e përkohshme në rrugë, si dhe të bashkëpunojnë me zyrtarët policorë në terren, në mënyrë që të mundësohet një organizim i sigurt dhe i qetë i maratonës.

Të dielën parashikohet të mbajë mot kryesisht i vranët dhe herë pas here me reshje lokale shiu. Reshjet më të intensfikuara parashihen të jenë gjatë orëve të pasditës dhe mbrëmjes, të cilat lokalisht do të jenë në formë të rrebesheve, të shoqëruara me shkarkesa rrufesh.

Era do të fryjë drejtimesh të ndryshme, me shpejtësi prej 10-32 km/h.

Temperaturat do të pësojnë ulje të mëtejshme, me minimale që do të lëvizin prej 11 deri në 13°C, ndërsa ato maksimale prej 11 deri në 17°C.

Përdorimit të ujit të pijshëm për ujitje, ia panë sherrin plot qytetarë në Prishtinë e rrethinë.

Shumë lagje të kryeqytetit e vende të tjera, po përballën me mungesë të ujit gjatë tërë natës, pothuajse që prej fillimit të sezonit të verës.

Krejt kjo shkak i shpenzimit enorm të ujit, që zbrazi rezervuarët, njoftuan nga kompania rajonale e ujësjellësit “Prishtina”.

“Problemet më të mëdha kanë qenë në rrugën B, rrugën Ndue Përlleshi, lagjja mati 1, por kjo ka qenë për shkak ë shpenzimit enorm të ujit të pijshëm nga ana e qytetarëve dhe rënia e nivelit të ujit në rezervuare ka qenë e madhe pasi disa zona nuk furnizohen direkt nga liqeni por nga rezervuarët”, tha Arjeta Mjeku, zëdhënëse e KRU “Prishtina”.

Vetëm gjatë muajve të verës, janë evidentuar qindra raste të keqpërdorimit të ujit, përfshirë edhe lidhjet ilegale jashtë ujëmatësit.

“Rreth 300 e disa raste që i kemi zënë duke e ujitur përmes lidhjeve ilegale jashtë ujëmatësit përveç që i kemi shkyçur nga sistemi i ujësjellësit, lëndët e tyre janë dërguar edhe në gjykatat kompetente”, tha Mjeku.

Me probleme të njëjta, janë edhe shumë lagje të Mitrovicës me regjion.

Pa dhënë shifra, nga kompania rajonale e Ujësjellësit “Mitrovica”, thanë se gjatë tërë verën vazhdimisht kanë bërë kontrolle, dhe kanë gjobitur qindra qytetarë që janë zënë duke keqpërdorur ujin.

Sidoqoftë problemi me furnizim me ujë, pritet të evitohet tash me uljen e temperaturave, kur shpenzimi bie, meqë uji nuk përdorën më për ujitje.

Instituti Kombëtar i Shëndetësisë Publike të Kosovës (IKShPK) njofton se monitorimet e fundit të cilësisë së ujit të pijshëm në zonën e furnizimit PR03 nga Ujësjellësi i Badocit kanë treguar ulje të dukshme të vlerave të manganit.

Sipas analizave laboratorike të realizuara gjatë tri ditëve të fundit në Laboratorin e parametrave bazik dhe Laboratorin analitik – ICPMS, vlerat më të larta të përqendrimeve të manganit kanë variuar nga 0.012 mg/l deri në 0.037 mg/l, të gjitha brenda kritereve të përcaktuara me Udhëzimin Administrativ (UA) nr. 10/2021 – “Cilësia e ujit të destinuar për konsum nga njeriu”.

“Bazuar në këto rezultate laboratorike dhe në përputhje me UA 10/2021, uji në zonën e furnizimit PR03 nga Liqeni i Badocit është i sigurt për pije,” thuhet në njoftimin e IKShPK.

Instituti bën të ditur se, në bashkëpunim me institucionet përkatëse, do të vazhdojë monitorimin e rregullt dhe të vazhdueshëm të cilësisë së ujit, duke garantuar transparencë dhe informim të saktë për qytetarët.