Category: Lajme

Një 34 vjeçar me inicialet E.S është arrestuar sot në Tiranë gjatë një operacioni të koduar “The Van”.

I njëjti dyshohet se posedonte armatim, thuajse sa për një ushtri.

” Sekuestrohen 23 armë zjarri (5 prej tyre me snajper), 1 silenciator, 17 krehra me municion luftarak, celularë dhe pajisje për shpërthime në distancë, paisje për bllokimin e valëve, uniforma si të Policisë dhe sende të tjera të kundërligjshme”, thuhet në njoftimin e Policisë së Shtetit, transmeton Klankosova.tv.

Në njoftim thuhet se janë shpallur në kërkim edhe dy persona të tjerë.

Krejt çka u gjet në rrugën “Myslym Shyri” të kryeqytetit shqiptar:

-12 armë zjarri pistoletë të markave “Beretta”, “Glock”, “Rex Delta”, “Ruger-57” dhe “Tanfoglio”;

-6 armë zjarri automatike;

-5 armë zjarri me tytë të gjatë (me shënjestër optike, të ngjashme me snajper);

-1 silenciator;

-17 krehra për armë zjarri të ndryshme;

-pjesë të ndryshme armësh zjarri;

-15 000 fishekë;

-17 kuti me pranga të ngjashme me ato që përdoren nga Policia;

-12 celularë dhe pajisje që përdoren për shpërthime në distancë;

-pajisje elektronike gjurmuese (GPS);

-pajisje për bllokimin e valëve;

-pajisje për numërimin e kartëmonedhave;

-3 komplete uniformash të ngjashme me ato të Policisë.

Ambasadori i Gjermanisë në Kosovë, Rainer Rudolph, ka vizituar selinë e KFOR-it, ku është pritur nga komandanti i KFOR-it, gjeneralmajori Ozkan Ulutash.

Rudolph ka theksuar se KFOR-i mbetet shtyllë kyç e sigurisë, stabilitetit dhe bashkëpunimit në Ballkanin Perëndimor.

“Gjatë takimit të tyre, Rudolph shprehu vlerësimin e tij për punën e jashtëzakonshme që KFOR-i vazhdon dhe i falënderoi ata për shërbimin e tyre në promovimin e paqes dhe stabilitetit në Kosovë”, thuhet në postimin e ambasadës gjermane në Facebook.

Gjatë vizitës, ambasadori gjerman është takuar edhe me komandantin e kontingjentit gjerman në kuadër të KFOR-it, kolonel Muller, nga i cili është njoftuar më gjerësisht për kontributin e ushtarëve gjermanë që shërbejnë në këtë mision.

Një aksident trafiku zingjiror në mes të katër automjeteve ka ndodhur në orët e hershme të mëngjesit të sotëm, në rrugën Gjilan-Prishtinë, saktësisht në fshatin Parallovë.

Lajmin e ka konfirmuar zëdhënësi i Policisë për rajonin e Gjilanit, Ismet Hashani.

Hashani bëri të ditur se nga ky aksident, fatmirësisht s’ka persona të lënduar.

“Nga hetues të trafikut rajonal po hetohen rrethanat e këtij aksidenti.”, tha ai tutje.

Presidentja e Kosovës, Vjosa Osmani, gjatë qëndrimit në Riad, ku po merr pjesë me ftesë të Princit të Kurorës së Arabisë Saudite, Muhamed bin Salman, në Forumin “Future Investment Initiative” (FII), është takuar me presidentin e Bullgarisë, Rumen Radev.

Osmani ka theksuar se presidenti Radev është mik i Kosovës dhe mbështetës i fuqishëm i aspiratave euroatlantike të vendit.

“Në takimin tonë në Riad, në qendër të bisedës ishin largimi i masave të padrejta ndaj Kosovës dhe avancimi i aplikimit për statusin e vendit kandidat në Bashkimin Evropian, si pjesë e përpjekjeve tona të përbashkëta për të forcuar stabilitetin rajonal dhe për të thelluar bashkëpunimin ndërmjet vendeve tona në kuadër të partneritetit evropian dhe euroatlantik”, ka shkruar Osmani në Facebook.

Togeri Florent Korrani i FSK-së ka diplomuar në trajnimin bazik për Inxhinieri Ushtarake, në Fort Leonard Ëood, të Shteteve të Bashkuara të Amerikës.

Forca e Sigurisë së Kosovës njofton se trajnimi ka për fokus përgatitjen e liderëve të rinjë për planifikim, udhëheqje dhe drejtim të operacioneve të inxhinierisë ushtarake.

“Togeri Korrani është shpërblyer me certifikatë për arritje akademike të dalluar (Honor Graduate) e cila ju ndahet ushtarakëve që arrijnë rezultate të larta në akademi gjatë trajnimit”.

Ish-presidenti francez, Nicolas Sarkozy, i cili po vuan dënimin në burgun “La Santé”, duket se po gëzon disa privilegje që të burgosurit e tjerë nuk i kanë. Sipas raportimeve të mediumit francez RTL Info, 70-vjeçari, që mban titullin e presidentit të 23-të të Francës, lejohet të pranojë katër vizita familjare në javë, një më shumë se kufizimi ligjor prej tre vizitash që vlen për të burgosurit e tjerë.

Përveç kësaj, oraret e takimeve me familjarët e tij zgjasin më shumë se 45 minutat e përcaktuara nga rregullorja e burgjeve franceze.Mediat lokale shkruajnë se ky trajtim preferencial lidhet me statusin e tij si ish-kreu i shtetit, çka i garanton edhe mbrojtje të vazhdueshme nga dy oficerë të armatosur të policisë, që ndërrrohen çdo 12 orë.

Sarkozy mbahet në izolim për arsye sigurie dhe nuk ka kontakt me të burgosurit e tjerë, megjithëse konsumon të njëjtën ushqim si ta, sipas deklaratave të avokatëve të tij. Ajo që e shqetëson më së shumti ish-presidentin është siguria personale, veçanërisht pas publikimit të një videoje në rrjete sociale ku ai dëgjohet të marrë kërcënime gjatë ditëve të para të paraburgimit.

Nga pesëmbëdhjetë qelitë në izolim, katër janë ndarë për Sarkozin. Njëra në të cilën ai po mbahet, një për oficerët e policisë përgjegjës për sigurinë e tij, ndërsa dy qeli pranë saj mbeten bosh.

Javën e kaluar, bashkëshortja e Sarkozisë, Carla Bruni, e vizitoi atë katër herë, jashtë orarit të rregullt të vizitave, çdo herë e shoqëruar nga një anëtar i administratës së burgut. Sipas informacionit nga Journal du dimanche (JDD), dy deputetë nga partia Franca e Panënshtruar, Danielle Obono dhe Hugo Bernalissi, shkuan në burgun La Santé të hënën pasdite për të vizituar Sarkozinë. Megjithatë, kërkesa e tyre u refuzua, pasi ligji u lejon deputetëve të vizitojnë burgjet, por jo të burgosurit.

Avokatët e Sarkozisë, Christophe Angrand dhe Jean-Michel Darois, e vizitojnë atë çdo ditë në burg dhe kanë paraqitur tashmë një kërkesë për lirim me kusht, e cila pritet të shqyrtohet brenda muajit të ardhshëm. Sipas avokatëve të tij, ish-banori i Elysee ka të ngjarë të lirohet deri në Krishtlindje.

Ministria e Mbrojtjes e Rumanisë është “informuar për rishikimin e një pjese të trupave amerikane të dislokuara në krahun lindor të NATO-s, si pjesë e procesit të rivlerësimit të pozicionit global të forcave ushtarake të SHBA-së”, thuhet në njoftimin e publikuar më 29 tetor.

“Mes elementeve të brigadës që do të ndalojnë rotacionet në Evropë përmenden edhe forcat e destinuara për Rumaninë, të vendosura në bazën Mihail Kogalniceanu”, tha Ministria rumune e Mbrojtjes.

Kjo ministri theksoi se “vendimi ishte i pritshëm, pasi Rumania ka qenë në kontakt të vazhdueshëm me partnerin strategjik amerikan”.

“Rishikimi i forcave amerikane është pjesë e prioriteteve të reja të administratës amerikane, të shpallura që nga muaji shkurt. Vendimi ka marrë parasysh gjithashtu faktin që NATO-ja ka forcuar praninë dhe aktivitetin në krahun lindor, çka i lejon Shteteve të Bashkuara të përshtatin pozicionin e tyre ushtarak në rajon”, u tha në njoftim.

Gjithashtu, ministria rumune theksoi se “vendimi amerikan ka të bëjë me ndërprerjen e rotacionit në Evropë të një brigade që kishte elemente në disa shtete të NATO-s”.

“Afër 1 mijë ushtarë amerikanë do të qëndrojnë të dislokuar në territorin e Rumanisë, duke kontribuar në parandalimin e çdo kërcënimi dhe duke vazhduar të përfaqësojnë një garanci të angazhimit të SHBA-së për sigurinë rajonale”, tha dikasteri i mbrojtjes, njofton rel.

Njoftimi i Ministrisë së Mbrojtjes të Rumanisë vjen pas disa muajsh kur ishte përfolur për një tërheqje të trupave amerikane nga krahu lindor i aleancës ushtarake perëndimore.

Gazeta ukrainase Kyiv Post raportoi të martën në mbrëmje se aleatët e NATO-s u informuan për këtë vendim gjatë kësaj jave dhe se, në diskutimet e brendshme, u morën në konsideratë edhe reduktime të personelit, përfshirë në Poloni, por vendimi përfundimtar preku vetëm Rumaninë.

As autoritetet në Bukuresht, as ato amerikane nuk kanë dhënë deri tani një shifër të saktë të ushtarëve amerikanë në Rumani. Në fillim të vitit 2025, ishin të dislokuar më shumë se 1.700 ushtarë amerikanë, kryesisht në Mihail Kogalniceanu, Deveselu dhe Campia Turzii. Afër 1.400 prej tyre ndodhen në Bazën Ajrore 57 Mihail Kogalniceanu.

Ministri i Mbrojtjes, Ionut Mosteanu, tha për Radion Evropa e Lirë në fillim të tetorit se në “Mihail Kogalniceanu ka afër 2 mijë e ca ushtarë amerikanë”.

“Po presim Strategjinë kombëtare të Mbrojtjes së SHBA-së, e cila do të prezantohet së shpejti. Do të shohim nëse ata do ta ruajnë praninë dhe pozicionin e tyre në krahun lindor, në Evropë… Rumania është e rëndësishme për SHBA-në”, deklaroi ministri Mosteanu.

Gjykata Penale e Parisit ka shpallur fajtorë tetë burra dhe dy gra për ngacmim seksist në internet ndaj zonjës së parë të Francës, Brigitte Macron. Të pandehurit u dënuan me burgim me kusht nga tre deri në dymbëdhjetë muaj, si dhe me gjoba që arrijnë deri në 8 mijë euro.

Ky vendim vjen pas një vale lajmesh të rreme dhe teorish konspirative që kishin vënë në shënjestër gruan e presidentit francez, Emmanuel Macron, duke vënë në pikëpyetje identitetin dhe gjininë e saj. Kjo fushatë online u përhap fillimisht në Shtetet e Bashkuara dhe më pas mori dhenë edhe në Francë e më gjerë.

Çifti presidencial ka ngritur edhe një padi për shpifje në SHBA ndaj një podkasteri të ekstremit të djathtë, autor i serisë së videove “Becoming Brigitte”, e cila sipas tyre ka ushqyer fushatën e urrejtjes dhe dezinformimit. Procesi gjyqësor për këtë rast pritet të zhvillohet më vonë.

Në seancën gjyqësore në Paris, vajza e Brigitte Macron, avokatja 41-vjeçare Tiffin Ozier, dëshmoi se nënës së saj i ishte dashur të përballej me një valë të madhe urrejtjeje dhe dyshimesh për “identitetin dhe integritetin e saj”. Ajo shtoi se fëmijët e familjes Macron madje janë përballur me pyetje shqetësuese si “a është gjyshja jote me të vërtetë grua?”, duke e përshkruar situatën si burim ankthi për të gjithë familjen.

Mes të dënuarve janë persona nga profesione të ndryshme një mësues, një zyrtar lokal, një galerist arti, një shkencëtar kompjuterash dhe madje edhe një fallxhore, të moshës nga 41 deri në 60 vjeç.

Dënimin më të rëndë e mori “Zoé Sagan”, e cila në postimet e saj kishte shkuar aq larg sa të përshkruante diferencën në moshë midis çiftit presidencial si “pedofili”. Ajo u mbrojt duke thënë se postimet kishin “qëllim satirik”, por gjykata vendosi se përmbajtja e tyre kalonte kufijtë e lirisë së shprehjes.

Për shkak të mungesës së vendve të mjaftueshme në burgjet e vendit, autoritetet belg po shqyrtojnë mundësinë që disa të burgosur të vuajnë dënimin e tyre në Kosovë.

Sipas agjencisë belge të lajmeve Belga, qeveria po mendon të marrë me qira ose madje të ndërtojë një burg në Kosovë për personat e dënuar që nuk kanë status të rregullt qëndrimi. Një marrëveshje e ngjashme ekziston tashmë mes Kosovës dhe Danimarkës.

Ministrja belge e Drejtësisë, Annelies Verlinden, së bashku me ministren e Azilit dhe Migracionit, Anneleen Van Bossuyt, vizituan së fundmi Kosovën për të zhvilluar bisedimet e para, raportoi mediumi gjerman n-tv, pjesë e grupit RTL.

Problemi i mungesës së vendit ka nxitur edhe miratimin e një ligji të ri. Burgjet e mbipopulluara janë një sfidë serioze në Belgjikë, ndaj gjatë verës u miratua një rregullore e re që kërkon që gjykatësit të japin një arsyetim të qartë përse një dënim me burg është i domosdoshëm. Aktualisht, vendi ka mungesë afërsisht 2.000 vendeve të burgimit.

Në vitin 2014, Belgjika u shpall fajtor nga Gjykata Evropiane për të Drejtat e Njeriut për kushtet e papërshtatshme në burgjet e saj dhe që nga ajo kohë është kritikuar disa herë, përfshirë nga Këshilli i Evropës. Sipas agjencisë belge Belga, Kosova shpreh interes për mbështetje nga Belgjika në rrugën drejt Bashkimit Evropian, duke qenë ende kandidat potencial për anëtarësim.

Uragani Melissa ka goditur Kubën me erëra që arrijnë 190 km/orë, pasi kaloi Xhamajkën si stuhia më e fortë që ka goditur vendin në vitet e fundit.

Në Xhamajkë, kryeministri Andrew Holness ka shpallur një “zonë fatkeqësie” dhe ka paralajmëruar për “ndikime shkatërruese”.

Shkalla e dëmit në Xhamajkë nuk është bërë ende e qartë, por Holness ka paralajmëruar për dëme në shtëpi dhe spitale.

Pasi të godasë Kubën, uragani pritet të lëvizë në verilindje drejt Bahamas dhe Bermudës.