Category: Lajme

Presidentja e Meksikës, Claudia Sheinbaum, u ngacmua seksualisht të martën pasdite nga një burrë i panjohur, i cili iu afrua, tentoi ta puthte dhe e preku ndërsa turma përreth nuk reagoi menjëherë.

Ngjarja ndodhi teksa Sheinbaum po ecte nga Pallati Kombëtar drejt Ministrisë së Arsimit në Mexico City.

Ngacmimi përfundoi vetëm kur ndërhyri Juan José Ramírez Mendoza, shefi i Drejtorisë së Përgjithshme të Shërbimeve të Presidentes.

Incidenti u filmua nga kalimtarët dhe ka rihapur debatin mbi nivelin e mbrojtjes së krerëve të shtetit, veçanërisht pasi Sheinbaum, si paraardhësi i saj Andrés Manuel López Obrador, ka refuzuar idenë e një garde presidenciale.

Sipas statistikave, 45% e grave meksikane kanë përjetuar ngacmime në rrugë. Sheinbaum, pas incidentit, iu drejtua bashkëpunëtorit të saj duke thënë: “Mos u shqetëso.”

Kodi Penal Federal e klasifikon kontaktin fizik pa pëlqim si ngacmim seksual, të dënueshëm me deri në pesë vjet burg. Disa media raportuan se agresori ishte arrestuar, por autoritetet nuk e kanë konfirmuar.

Organizatat për të drejtat e grave e quajtën incidentin dëshmi të normalizimit të dhunës seksiste dhe apeluan që presidentja ta përdorë rastin për të dërguar një mesazh të fortë kundër këtij fenomeni. Ministria e Grave deklaroi se: “Asnjë grua, pavarësisht pozitës, nuk është e përjashtuar nga ngacmimet seksuale dhe raportimi i tyre është thelbësor për drejtësinë dhe ndryshimin kulturor.”

Aktivistja Diana Luz Vázquez shtoi: “Nëse një burrë guxon ta bëjë këtë ndaj një presidenteje, imagjinoni çfarë përjetojmë ne të tjerat.”

Gjatë kontrolleve të zhvilluara në orët e fundit në Pikën e Kalimit Kufitar Vërmicë, zyrtarët doganorë kanë evidentuar dy raste të tentativave për kalim të mallrave pa deklarim doganor.

Siç njofton Dogana e Kosovës, të dy automjetet janë ndaluar, ndërsa drejtuesit e tyre kishin deklaruar se nuk posedonin mallra për deklarim.

Megjithatë, gjatë kontrolleve të detajuara janë zbuluar sasi të konsiderueshme mallrash të padeklaruara, në vlerë totale rreth 8,000 euro, raporton Gazeta Sinjali..

Mallrat e padeklaruara përfshinin: Veshmbathje dhe tekstil: trenerka, xhaketa, peshqira, mbulesa krevati, fustane etj, produkte kozmetike dhe farmaceutike: kremra, vajra, pika për sy, mjaltë mjekësor, ilaçe të ndryshme, vegla pune elektrike: sharra elektrike, trapanë, aku-veglash të markave të ndryshme, pajisje ndërtimi, produkte elektronike dhe aksesorë për automjete: pajisje audio, kamera, drita LED, ndëgjuese, mbajtëse telefoni, jastëkë automjeti etj, artikuj të ndryshëm: çanta, parfume, libra, sete pedikyri, pajisje pastrimi etj.

Mallrat janë ndaluar përkohësisht, ndërsa ndaj personave të përfshirë janë nisur procedurat për kundërvajtje doganore për mosdeklarim të mallit, në bazë të nenit 244 të Kodit Doganor dhe të Akcizave të Kosovës (KDAK).

Kombet e Bashkuara kritikuan mungesën e llogaridhënies lidhur me shembjen e strehës së betonit në stacionin hekurudhor në Novi Sad të Serbisë, një vit pas tragjedisë që nxiti protesta masive.

Shefi për të drejtat e njeriut në OKB, Volker Turk, kërkoi që të bëhen përpjekje të reja për të hetuar për përgjegjësinë në këtë ngjarje, duke argumentuar se kjo është thelbësore për të rikthyer besimin e publikut në institucione dhe për të respektuar sundimin e ligjit, transmeton Radio Evropa e Lirë.

“Nuk ka pasur një proces domethënës për të zbuluar të vërtetën dhe për të kërkuar drejtësi për tragjedinë që rezultoi me vdekjen e 16 personave në stacionin hekurudhor të Novi Sadit. Kjo, pavarësisht kërkesave të vazhdueshme nga dhjetëra mijëra persona që kanë dalë në rrugë duke kërkuar drejtësi”, tha Turk përmes një deklarate.

“Për më tepër, shumë pretendime për sulme të dhunshme dhe arrestime arbitrare të protestuesve paqësorë dhe gazetarëve gjatë demonstratave nuk janë hetuar dhe mbesin të pandëshkuara. Përkundrazi, incidente të tilla vazhdojnë të ndodhin”, shtoi ai.

Të shtunën, më shumë se 100.000 serbë shënuar përvjetorin e parë të incidentit në Novi Sad, që tronditi këtë shtet në Ballkanin Perëndimor.

Disa javë pas renovimit të ndërtesës, streha prej betoni në stacionin hekurudhor u shemb më 1 nëntor 2024, një aksident që kritikët e cilësuan si simbol të korrupsionit në Serbi, që më pas çoi në rrezmin e qeverisë.

Në protestat e së shtunës, protestuesit kërkuan mbajtjen e zgjedhjeve të reja.

Nëna e njërit nga viktimat e aksidentit po mban grevë urie para Parlamentit serb që nga e diela, dhe qindra njerëz po shkojnë për ta vizituar dhe për t’i ofruar mbështetje.

Turk bëri thirrje për hetime të menjëhershme, transparente, të pavarura dhe efektive për aksidentin, pasi procedurat kundër përgjegjësve të dyshuar kanë ngecur, u tha në deklaratë.

Ai po ashtu bëri thirrje për hetime të ngjashme për të gjitha pretendimet për arrestime arbitrare dhe përdorim të tepruar të forcës nga polica gjatë protestave.

“Respektimi i lirisë së shprehjes dhe tubimeve paqësore janë themelore për funksionimin e një shoqërie demokratike dhe bëhen veçanërisht jetike në një mjedis thellësisht të polarizuar”, u shpreh Turk.

Komisionari i lartë për të drejtat e njeriut theksoi rëndësinë e pavarësisë së gjyqësorit, të lirë nga presioni politik.

“Kjo është mënyra e vetme për të ruajtur besimin e njerëzve në sundim të ligjit”, tha ai.

Serbia është shtet kandidat për anëtarësim në Bashkimin Evropian dhe përmes Raportit të Progresit të publikuar të martën, Komisioni Evropian i rekomandoi Beogradit “të ulë ndërhyrjet politike në gjyqësor dhe në prokurori”./REL

Kryetari i PD-së në Shqipëri, Sali Berisha, ka paralajmëruar protesta deri në rrëzimin e Edi Ramës.

Me një ton jo fort të butë, Berisha madje është shprehur se do përballen “dhëmbë për dhëmbë” deri në rrëzimin e këtij të fundit.

“Do përballemi dhëmbë për dhëmbë me Edi Ramën. Koha është e guximtarëve”, theksoi Berisha në konferencë për media.

Ai ka thënë madje se ‘protestat e PD-së e çuan Erion Veliajn në burg’.

“Ju garantoj unë ju, se po të mos ishin protestat e udhëhequra nga Belind Këlliçi, 46 javë në cdo lloj moti, Erion Veliaj do të ishte në zyrë sot. Në vlerësimin tim, ndër më eficentet dhe më të rëndësishmet që ka bërë PD. Ai përbënte një rrezik madhor për vendin me karakterin e tij, në cdo aspekt, me të ne shpëtuam vendi nga gjysma e zezë e Edi Ramës”, tha Berisha.

Gjykata Themelore në Ferizaj ka caktuar masën e paraburgimit prej një muaji ndaj personit me inicialet A.N., i cili dyshohet se ka kanosur një gjyqtar të kësaj gjykate gjatë ditës së hënë, më 3 nëntor.

Sipas njoftimit të gjykatës, masa u caktua pas kërkesës së Prokurorisë Themelore të Ferizajt, ndërsa vendimin e mori gjyqtarja e procedurës paraprake, Hakile Ilazi, pas mbajtjes së seancës dëgjimore dhe shqyrtimit të provave në dosje.

Bazuar në hetimet fillestare, i pandehuri A.N., pas refuzimit për të pranuar aktgjykimin me të cilin ishte shpallur fajtor, kishte kërkuar takim me gjyqtarin I.B., por pasi kërkesa iu refuzua, ai kishte shpërthyer në tone kërcënuese dhe ofenduese në prani të stafit të gjykatës dhe praktikantëve.

Në njoftim thuhet se i dyshuari kishte kanosur me fjalë gjyqtarin, duke thënë: “Veç mos e zafsha në udhë qat I.”, dhe kishte përdorur shprehje të tjera ofenduese, me ç’rast tek i dëmtuari ishte shkaktuar ankth dhe ndjenjë pasigurie.Prokuroria e ngarkon të pandehurin me veprën penale “Kanosje”.

Të paktën 85 persona kanë humbur jetën dhe qindra mijëra të tjerë janë detyruar të braktisin shtëpitë e tyre pasi një nga tajfunët më të fuqishëm të këtij viti, Kalmaegi, ka goditur Filipinet qendrore, kanë njoftuar autoritetet.

Tajfuni ka shkaktuar përmbytje masive në ishullin Cebu, ku ndodhen 49 nga viktimat, ndërsa 26 persona të tjerë rezultojnë të zhdukur, ka bërë të ditur një zyrtar i mbrojtjes civile.

Pamjet nga terreni tregojnë njerëz të strehuar në çati, teksa rrugët janë përfshirë nga ujërat që kanë bartur makina e kontejnerë transporti.

Mes viktimave janë edhe gjashtë anëtarë të ekuipazhit të një helikopteri ushtarak që u rrëzua në ishullin Mindanao gjatë operacioneve të ndihmës. “Komunikimi me helikopterin u humb, gjë që menjëherë nxiti nisjen e një operacioni kërkim-shpëtimi,” thanë Forcat Ajrore Filipinase, duke shtuar se trupat e ekuipazhit janë gjetur më vonë.

Tajfuni, i njohur nga banorët si Tino, është dobësuar pas zbarkimit në tokë, por ka vazhduar të sjellë erëra me shpejtësi mbi 130 km/h, duke u zhvendosur drejt rajonit Visayas dhe Detit të Kinës Jugore.

Sipas agjencisë kombëtare të katastrofave, mbi 400 mijë persona janë zhvendosur nga përmbytjet. Jel-an Moira Servas, një banore e qytetit Mandaue, i tha BBC-së se brenda pak minutash shtëpia e saj u përmbyt plotësisht: “Tani për tani, shiu ka pushuar dhe dielli ka dalë, por shtëpitë tona janë ende të mbushura me baltë dhe gjithçka brenda është në rrënoja,” tha ajo.

Sot bëhen plot pesë vite nga arrestimi i ish-krerëve të Ushtrisë Çlirimtare të Kosovës, Hashim Thaçi, Kadri Veseli, Rexhep Selimi dhe Jakup Krasniqi, të cilët po mbahen në paraburgim në Hagë nën akuzat për krime lufte.

Në këtë përvjetor, Organizata e Veteranëve të Luftës së UÇK-së (OVL-UÇK) ka organizuar një aksion simbolik përballë objektit të EULEX-it në Prishtinë, si shenjë revolte ndaj asaj që e cilësojnë “padrejtësi të organizuar ndërkombëtare”.

Në duart e pjesëmarrësve u panë pankarta me mbishkrime të tilla si:
“Pesë vjet padrejtësi e organizuar” dhe “Pesë vjet turp ndërkombëtar”.

Përmes një reagimi në Facebook, OVL-UÇK tha se këto pesë vite përbëjnë një periudhë padrejtësie ndaj luftëtarëve të lirisë, të cilët po mbahen larg familjeve të tyre dhe vendit për të cilin luftuan.

“Sot bëhen 5 vite nga arrestimi i krerëve të Ushtrisë Çlirimtare të Kosovës. Pesë vite padrejtësi, pesë vite që heronjtë e lirisë mbahen larg familjeve dhe vendit për të cilin luftuan. Ne nuk harrojmë dhe nuk dorëzohemi përballë kësaj padrejtësie historike,” thuhet në reagimin e organizatës.

Krahas protestës së sotme në Prishtinë, OVL-UÇK ka kujtuar se gjatë këtyre viteve janë mbajtur protesta në disa qytete të Kosovës, Shqipërisë dhe diasporës evropiane, për të kërkuar lirimin e ish-krerëve të UÇK-së dhe drejtësi për luftën çlirimtare të Kosovës.

Në Klinikën e Kirurgjisë Torakale të Qendrës Klinike Universitare të Kosovës është realizuar me sukses një ndërhyrje e ndërlikuar kirurgjikale për largimin e një tumori me përmasa rreth 16 centimetra.

Sipas njoftimit të QKUK-së në Facebook, pacientja F. D., e lindur në vitin 1956, ishte diagnostikuar me këtë tumor, i cili ndodhej në mes të mushkërive dhe shumë afër strukturave vitale të gjoksit, çka e bënte rastin tejet delikat dhe me rrezik të lartë gjatë ndërhyrjes.

“Pas ekzaminimeve të nevojshme, ekipi i mjekëve torakal me asistencë edhe nga mjekët e Klinikës së Anestezionit dhe ekipi i infermierëve dhe stafit tjetër profesional, kryen operacionin me sukses.

Tumori është larguar plotësisht, ndërsa pacientja pas operacionit është në gjendje të mirë shëndetësore, derisa po monitorohet nga afër nga stafi i klinikës”, thuhet në postim.

Kryetari i Lidhjes Demokratike të Kosovës, Lumir Abdixhiku në një konferencë tha se çdo zvarritje e qëllimshme nga Lëvizja Vetëvendosje është zgjatje e krizës dhe se zgjidhja e vetme janë zgjedhjet.

Abdixhiku theksoi para gazetarëve në këto rrethana edhe mandatari i dytë, Glauk Konjufca duhet të jetë i sinqertë dhe të konstatojë se nuk e ka shumicën.

“Partitë serioze do të duhej të i kishin menduar me kohë propozimin tonë. Përveçse jemi vonë, qeveri të pakicës nuk mund të ketë më në Kosovë. Nga viti 1989, nga 23 dhjetori 1989 në Kosovë vendos shumica. LDK e rikujton se në demokraci pakica nuk mund të vendos për shumicën, për populloni. Në demokraci pakicës i thonë opozitë, jo qeveri. S’mund të jesh qeveri pakicë. Ose je opozitë, ose je qeveri shumicë. Në demokraci pakica nuk e ndanë buxhetin, nuk kalon ligje, nuk imponon politika dhe nuk mund ta bllokojë vullnetin qytetarë të shprehur me votë të lirë, e as me zvarritje si kjo me mandatarin e dytë. Çdo Qeveri legjitime duhet të përfaqësojë shumicën qytetare, kur kjo shumicë nuk ekziston, vendi duhet t’i kthehet sovranit. Ajo çka sot na propozohet më shumë se demokracisë i ngjanë monarkisë. Në monarki mandati trashëgohet nga i babai te i biri, nga Albin te Glauki. Në monarki mandati mund të trashëgohet e në demokraci mandati sigurohet, tha Abdixhiku në konferencën për media.Ai tha se Konjufca duhet ta kuptojë sa më parë që nuk ka vota.“Në këto rrethana Glauk Konjufca me mandat të trashëguar në rrethana të tanishme politike duke kuptuar qartë dhe saktë vullnetit të qytetarëve, duhet të jetë i sinqertë më vetën më shumë dhe shumë më shumë se kryetari i tij dhe të konstatojë sa më parë aq më mirë se nuk ka shumicë”, theksoi ai.