Category: LAJME

Presidenti i Këshillit Evropian, António Costa, ka deklaruar se Bashkimi Evropian do të vazhdojë të mbështesë dhe mbrojë Gjykatën Penale Ndërkombëtare (GJPN), në një kohë kur institucioni përballet me kërcënime për masa të reja ndëshkuese nga administrata amerikane.

Gjatë fjalimit të tij në Asamblenë e Përgjithshme të Kombeve të Bashkuara, Costa theksoi rëndësinë e mbrojtjes së së drejtës ndërkombëtare dhe institucioneve që garantojnë zbatimin e saj.

“Mbështetja e së drejtës ndërkombëtare nuk është një zgjedhje, por përgjegjësi e jona”, deklaroi Costa, duke përmendur në veçanti Gjykatën Ndërkombëtare të Drejtësisë dhe Gjykatën Penale Ndërkombëtare.

Ai tha se BE-ja synon të mbështesë fuqishëm dhe të mbrojë pavarësinë, integritetin dhe aftësinë e GJPN-së për të përmbushur mandatin e saj.

Costa dënoi gjithashtu kërcënimet dhe sulmet ndaj gjykatës, zyrtarëve dhe stafit të saj, duke theksuar se përgjegjësia për shkeljet e së drejtës ndërkombëtare nuk duhet të përcaktohet nga interesat apo kalkulimet politike.

“Përgjegjësia nuk mund të varet nga konsideratat e përshtatshmërisë politike”, tha ai.

Në fjalimin e tij, presidenti i Këshillit Evropian nuk përmendi drejtpërdrejt Shtetet e Bashkuara apo presidentin Donald Trump, por deklaratat e tij vijnë në një kohë kur Gjykata Penale Ndërkombëtare është përballur me presion dhe kërcënime për sanksione nga administrata amerikane.

Costa përsëriti kështu angazhimin e BE-së për ruajtjen e institucioneve ndërkombëtare dhe mbrojtjen e pavarësisë së tyre.

Kryetari i PDK-së, Bedri Hamza, ka deklaruar se sot ka takuar udhëheqësit e Organizatës së Veteranëve të Luftës së UÇK-së.

Ai tha se me ta bashkëbisedoi për sfidat me të cilat po përballet vendi ynë.

“Ne folëm për rëndësinë e ruajtjes së dinjitetit, të së vërtetës për luftën tonë dhe të vlerave për të cilat u sakrifikuan breza të tërë. Veteranët e UÇK-së bartin mbi supe pjesën më të rëndësishme të historisë së vendit tonë. Ata qëndruan në ditët më të vështira dhe sakrifikuan për lirinë”,tha ai.

Hamza po ashtu tha se më 1 tetor, në orën 16:00, në sheshin “Skënderbeu” në Prishtinë, do të jemi bashkë me veteranët, studentët dhe të gjithë qytetarët e vendit tonë.

“Të gjithë bashkë kundër padrejtësisë!”.

Kryeministri i Kosovës, Albin Kurti, ka deklaruar se Kosova ka potencial të madh turistik dhe se përdorimi i teknologjisë dhe inteligjencës artificiale mund të kontribuojë në promovimin e vendit në arenën ndërkombëtare.

Kurti i bëri këto deklarata gjatë hapjes së konferencës “Re: Tourism – Inteligjenca Artificiale në promovimin e turizmit në Kosovë”, të organizuar në kuadër të aktiviteteve për Ditën Botërore të Turizmit.

Ai tha se trashëgimia historike e kulturore, natyra, traditat, gastronomia dhe mikpritja përbëjnë potenciale që, sipas tij, meritojnë të njihen më gjerësisht përtej kufijve të Kosovës.

“Digjitalizimi dhe inteligjenca artificiale po ndryshojnë mënyrën se si informohemi dhe si komunikojmë. Ne duhet t’i përdorim këto mundësi për ta bërë Kosovën më të dukshme, më të qasshme dhe më tërheqëse për vizitorët nga mbarë bota”, ka deklaruar Kurti.

Sipas tij, turizmi në Kosovë është sektor në rritje. Kurti tha se gjatë katër viteve të fundit numri i vizitorëve është rritur për rreth 20 për qind nga viti në vit, ndërsa numri i përgjithshëm i vizitorëve është dyfishuar gjatë pesë viteve të fundit krahasuar me periudhën parapandemike, deri në vitin 2019.

Kryeministri theksoi se rritja e numrit të vizitorëve ka krijuar edhe mundësi të reja punësimi.

“Sipas të dhënave të Agjencisë së Statistikave të Kosovës, rreth 30 mijë persona janë punësuar në sektorët e akomodimit dhe shërbimeve ushqimore, të cilët përbëjnë rreth 7 për qind të fuqisë punëtore në vendin tonë”, tha ai.

Kurti bëri të ditur se Qeveria e Kosovës i ka dhënë turizmit rëndësi të veçantë përmes Strategjisë për Turizmin e Kosovës 2030.

Ai tha se synimi strategjik është zhvillimi i turizmit në të gjitha pjesët e vendit, duke përfshirë investimet në Brezovicë dhe zhvillimin e Dukagjinit si një qendër e re turistike dhe zhvillimore.

“Synimi ynë strategjik është ta zhvillojmë turizmin në çdo cep të vendit tonë, duke investuar edhe në Brezovicë dhe ta shndërrojmë Dukagjinin në një qendër të re turistike e zhvillimore”, u shpreh Kurti.

Presidenti i Koresë së Jugut, Lee Jae Myung, ka kritikuar presidentin ukrainas Volodymyr Zelensky për publikimin e informacionit se dy ushtarë të Koresë së Veriut, të kapur nga forcat ukrainase, janë transferuar në Korenë e Jugut.

Zelensky e bëri të ditur transferimin gjatë fjalimit të tij në Asamblenë e Përgjithshme të OKB-së më 23 shtator, duke thënë se Ukraina së fundmi kishte dërguar dy të burgosur lufte të Koresë së Veriut në Korenë e Jugut. Ai shtoi se njëri prej tyre kishte tentuar të vetëvritej pas kapjes.

Lee tha se publikimi i këtij informacioni ishte në kundërshtim me marrëveshjen për ruajtjen e konfidencialitetit mes Seulit dhe Kievit. Sipas tij, çështja është veçanërisht e ndjeshme për shkak të ndikimit të mundshëm në diplomaci, sigurinë kombëtare dhe situatën në Gadishullin Korean.

Presidenti koreano-jugor tha se qeveria e tij kishte zgjedhur ta mbante transferimin sekret pasi kishte vlerësuar se publikimi mund të sillte pasoja të shumta. Ai hodhi poshtë kritikat se autoritetet po përpiqeshin të fshihnin diçka dhe theksoi se siguria e personave të përfshirë dhe interesat shtetërore ishin konsideruar më të rëndësishme.

“Unë nuk e di se cilat ishin rrethanat nga ana e Ukrainës kur u publikua informacioni, por më vjen shumë keq”, tha Lee, duke iu referuar drejtpërdrejt vendimit të Kievit për ta bërë publik transferimin.

Dy ushtarët koreano-veriorë ishin kapur nga forcat ukrainase në rajonin e Kurskut në janar 2025, pasi ishin dërguar atje për të mbështetur trupat ruse. Ata kishin shprehur më herët dëshirën për të shkuar në Korenë e Jugut, ndërsa Seuli dhe Kievi kishin zhvilluar konsultime për transferimin e tyre.

Zyra presidenciale ukrainase më pas deklaroi se transferimi ishte realizuar përmes komunikimit të drejtpërdrejtë me Seulin. Ndërkohë, autoritetet koreano-jugore kanë shmangur dhënien e detajeve për kohën, mënyrën dhe rrugën e transferimit, duke përmendur sigurinë e personave të përfshirë.

Deputeti i Aleancës për Ardhmërinë e Kosovës (AAK), Besnik Tahiri, ka deklaruar se partia e tij do ta mbështesë çdo iniciativë që, sipas tij, i shërben drejtësisë.

Pas mbledhjes së kryesisë së AAK-së, Tahiri tha se Aleanca do të mbështesë çdo veprim që kontribuon në funksionimin e institucioneve dhe drejtësisë.

“Çdo iniciativë e cila do të ndihmojë drejtësinë, Aleanca do ta mbështesë. Kemi kërkuar që në takim të diskutohet që sa më shpejt të konstituohet Kuvendi”, tha Tahiri.

Ai theksoi se për AAK-në është e rëndësishme që institucionet të funksionalizohen dhe proceset institucionale të ecin përpara.

Prokuroria e Specializuar e Hagës po kërkon rëndimin e rrethanave të ish-Presidentit të Kosovës, Hashim Thaçi. ZPS, në dosjen e saj finale në rastin “12” për pengim të drejtësisë, ka kërkuar që Thaçit të mos i llogaritet koha e kaluar në paraburgim. Sipas organit të akuzës në Hagë, periudha e kaluar në ndalim, Thaçit mund t’i llogaritet vetëm në rastin “06”, aty ku ai u dënua me 25 vjet heqje lirie.

“Sipas Rregullës 163(6), të gjithë të akuzuarit kanë të drejtë që t’u llogaritet koha e kaluar në paraburgim para dënimit. Megjithatë, THAÇI aktualisht mbahet në paraburgim në bazë të dy fletarrestimeve të veçanta që janë në fuqi: (i) që nga nëntori 2020 në Çështjen 6; 1463 dhe (ii) që nga nëntori 2024 në procedurën aktuale. Situata të tilla nuk janë të pazakonta para tribunaleve të tjera, të cilat ndodhen në rrethana të ngjashme, ku një i akuzuar ngarkohet veçmas për pengimin e procedurave themelore kundër tij”.

“Dhoma e Apelit në çështjen Bemba et al. konfirmoi se, “në rrethanat kur një i akuzuar ka kaluar kohë në paraburgim si rezultat i fletarrestimeve të lëshuara në çështje të ndryshme, koha e kaluar në paraburgim mund të merret parasysh vetëm një herë.” Në mënyrë logjike, kjo qasje është e nevojshme për të përmbushur qëllimin kryesor të parandalimit. Asnjë i akuzuar nuk do të dekurajohej nga përfshirja në veprime penguese, nëse do ta dinte se koha e kaluar në paraburgim përfundimisht do t’i zbritej nga dënimi i tij si në çështjen kryesore, ashtu edhe në procedurat për pengim”.

“Prandaj, duke qenë se gjatë tërë këtyre procedurave THAÇI ka qenë gjithashtu i paraburgosur në lidhje me akuzat në Çështjen 6, çdo kreditim për kohën e kaluar në paraburgim duhet të zbritet vetëm nga dënimi i tij në atë çështje”, thotë Prokuroria në kërkesën e saj drejtuar Gjyqtarit vendimmarrës në çështjen 12.

DOKUMENT:

Për Hashim Thaçin, në çështjen 12, Prokuroria e Speciales ka kërkuar gjashtë vjet burg. Në një skenar çfare po kërkon ZPS, të mos llogaritet koha e kaluar në paraburgim, bashkë me dënimin në çështjen “06”, dënimi total ndaj Thaçit në Speciale do të shkonte në 31 vjet burg. Kjo pasi që Prokuroria kërkoi gjashtë vjet dënim për ish-Presidentin në çështjen 12.

Për të akuzuarit tjerë, Bashkim Smakajn ka kërkuar tre vjet burg, Isni Kilajn tre vjet, Fadil Fazliun tre vjet dhe Hajredin Kuçin nëntë muaj.

Deputeti i Partisë Demokratike të Kosovës, Arian Tahiri, ka bërë të ditur se nënkryetari i PDK-së do të propozohet dhe zgjidhet të hënën, raporton Ekonomia Online.

Tahiri ka thënë se kryetari i PDK-së, Bedri Hamza, dhe kjo parti do të ndërmarrin veprimet e nevojshme në frymën e unifikimit, në mënyrë që projektligji i propozuar të marrë mbështetjen e nevojshme në Kuvend.

“Nënkryetari i Partisë Demokratike të Kosovës do të zgjidhet të hënën, do të propozohet dhe do të zgjedhet të hënën. Zotëri Hamza dhe Partia Demokratike e Kosovës do t’i bëjë të gjitha veprimet e saja në frymën e unifikimit, në mënyrë që projektligji ta gjejë mbështetjen e nevojshme në Kuvendin e Republikës së Kosovës, dhe t’i themi jo kësaj padrejtësie historike që është bërë”, tha ai.

Kryeministri i Kosovës, Albin Kurti, ka thënë se bllokada në Kuvend ka pamundësuar miratimin e disa ligjeve të nevojshme për zbatimin e reformave të parapara në kuadër të Planit të Rritjes të Bashkimit Evropian, raporton Ekonomia Online.

Kurti i bëri këto deklarata në mbledhjen e dytë të Këshillit Ministror për Integrim Evropian, në funksionin e tij si Komitet Drejtues për Planin e Rritjes, ku u diskutua për zbatimin e reformave, projektet ekzistuese dhe programet IPA.

Ai tha se deri më 30 qershor janë zbatuar dhe raportuar te Komisioni Evropian 20 hapa të reformave, në vlerë prej 153.3 milionë eurosh.

“Kështu që po e hap mbledhjen e dytë të Këshillit Ministror për Integrim Evropian në funksionin e tij si Komiteti Drejtues për Planin e Rritjes, e në të cilin do të diskutojmë për ecurinë e zbatimit të reformave, për gjendjen e projekteve ekzistuese, si dhe të programeve IPA. Më 15 korrik i kemi dorëzuar Komisionit Evropian raportin e parë zyrtar për zbatimin e agjendës të reformave dhe kërkesën e parë për lirimin e fondeve nga Plani i Rritjes. Deri më 30 qershor kemi zbatuar dhe raportuar te Komisioni Evropian 20 hapa të reformave, në vlerë prej gjithsej 153.3 milionë euro në fonde të Bashkimit Evropian. Aktualisht Komisioni Evropian është duke kryer vlerësimin, e pas vlerësimit Komisioni do ta miratojë vendimin për lirimin e fondeve dhe pastaj Kosova do të përfitojë fondet përkatëse sipas këtij vendimi”, tha Kurti.

Kryeministri njoftoi gjithashtu se në fillim të javës së ardhshme në Kuvend do të përcillen tri marrëveshje ndërkombëtare për programet IPA, përmes të cilave, sipas tij, Kosova pritet të përfitojë 258 milionë euro.

“Ndërkohë, në fillim të javës që vjen, Kuvendit do t’i përcillen tri marrëveshje ndërkombëtare për programet IPA, e ku përfshihen dy amendamente për projektet nga IPA 2021 dhe IPA 2022, si dhe marrëveshja financiare IPA 2026-2027, nga të cilat Kosova pritet të përfitojë 258 milionë euro. Presim nga Zyra Ligjore dhe Ministria e Financave të përfundojnë pa vonesa opinionet që u kërkohen. Marrë së bashku, nga Plani i Rritjes dhe IPA janë mbi 400 milionë euro që Kosova do të përfitojë për qeverisje të mirë e zbatim të reformave drejt anëtarësimit në Bashkimin Evropian”, tha ai.

Kurti tha se nga 13 reformat e parapara për afatin e 30 qershorit, gjashtë nuk janë zbatuar në kohë, duke bërë që Kosova të mos përfitojë mbi 40 milionë euro.

“Në anën tjetër, siç jeni njoftuar edhe nga koordinatori kombëtar, nga 13 reformat e parapara për afatin e 30 qershorit, 6 nuk kanë arritur që të zbatohen në kohë. Për rrjedhojë, nga vlera prej 90.7 milionë euro e paraparë për afatin e qershorit, nuk u përfituan mbi 40 milionë euro”, tha ai.

 Sipas Kurtit, arsyeja e mos-përfitimit të këtyre mjeteve është bllokada në Kuvend, e cila ka pamundësuar miratimin e ligjeve. Ai tha se projektet e parapara për afatin e 30 qershorit do të procedohen në seancën e radhës të Kuvendit.

“Arsyeja e mospërfitimit të këtyre mjeteve është bllokada në Kuvend, e cila pamundësoi miratimin e ligjeve.

Megjithatë, të gjitha projektet e parapara për afatin e 30 qershorit do të procedohen në seancën e rradhës të Kuvendit.

Pra, nga bllokada në Kuvend nuk dështon arritja për realizimin e reformave të parapara në Planin e Rritjes dhe puna e mirë e qeverisë, por do të humbin mjetet e dedikuara për to” tha Kurti.

Kryeministri tha se fokusi tash duhet të jetë te 22 reformat që kanë afat deri në fund të dhjetorit, të cilat kanë një vlerë prej 131.4 milionë eurosh në fondet e BE-së.

“Tani vëmendja duhet të jetë te zbatimi i 22 reformave që skadojnë në fund të dhjetorit të sivjetmë, në vlerë prej 131.4 milionë euro në fondet e BE-së. Mbi 1/3 e këtyre reformave, apo saktësisht 8 sosh, kërkojnë miratim të projektligjeve në Kuvend. Bëhet fjalë për 10 projektligje që skadojnë më 31 dhjetor 2026. Këto projektligje janë duke u finalizuar dhe do t’i miratojmë në Qeveri brenda këtij afati. Në këtë drejtim kemi punuar edhe me Komisionin Evropian që projektligjet, të cilat kanë për afat 31 dhjetorin, ta kryejnë konsultimin me Bashkimin Evropian në afat sa më të shpejtë. Nëse Kuvendi do të jetë funksional, reformat dhe mjetet e dedikuara për to nuk do të humbin. Pra po e përsëris që për shkak të bllokadës në Kuvend nuk do të humbet asnjë reformë e paraparë, por do të humbin mjetet e dedikuara nga Plani i Rritjes për reforma”, tha Kurti.

Në fund, Kurti theksoi përgjegjësinë e Kuvendit në funksionimin e institucioneve dhe miratimin e ligjeve.

“Kuvendi është pushtet i ndarë nga Qeveria, është një nga tri shtyllat e pushtetit në shtet demokratik. Përgjegjësia kryesore e Kuvendit është kalimi i ligjeve dhe mbikëqyrja e Qeverisë. Për të kryer këtë funksion Kuvendi duhet të jetë funksional. Ne jemi shoqëri me pluralizëm shoqëror dhe politik dhe për Kuvendin, si institucioni më i lartë përfaqësues e ligjvënës, kemi përgjegjësi të përbashkëta”, tha ai.

Shefja e Grupit Parlamentar të Vetëvendosjes, Arbërie Nagavci, ka thënë se kanë mbetur vetëm 11 ditë për zgjedhjen e presidentit të Kosovës, në të kundërtën vendi shkon në zgjedhje të reja, raporton Ekonomia Online.

Ajo ka deklaruar se kryeministri Albin Kurti do të bëjë gjithçka që është në mandatin e tij për të siguruar zgjedhjen e presidentit dhe shmangien e zgjedhjeve të reja.

Këto deklarata Nagavci i bëri pas mbledhjes së Kryesisë së Kuvendit, duke theksuar se çështjet e rëndësishme për vendin duhet të adresohen përmes një strategjie shtetërore dhe pa protagonizma.

“Besoj se shumë shpejt kryeministri Kurti do të bëjë të qartë takimet e radhës se si duhet të adresohen. Ju e dini se ka qenë në një diskutim zyrtar ku ka paraqitur edhe qëndrimet e tij e të shtetit të Kosovës në takime të rëndësishme, por besoj që edhe në këtë periudhë të mbetur, ashtu sikurse deri më tani prapa, pra që nga certifikimi i rezultateve të zgjedhjeve, kryeministri Kurti, kryetari i Lëvizjes Vetëvendosje do të bëjë gjithçka që është në mandatin e tij, besoni, që të kemi institucione funksionale të zgjedhim presidentin edhe të shmangim, të shmangim zgjedhjet e reja”, tha ajo.

Nagavci ka theksuar se koha në dispozicion është e kufizuar dhe ka kërkuar që çështjet me rëndësi shtetërore të trajtohen përmes një qasjeje të përbashkët.

“Sikurse thashë, nga sot ne kemi vetëm 11 ditë që të zgjedhim presidentin e vendit, përndryshe do të shkojmë në zgjedhje të reja. Në këtë pikë është tejet e rëndësishme që si shtet çështjet që janë të rëndësishme t’i adresojmë me një strategji të mirëfilltë shtetërore, pa protagonizma”, tha ajo.

Sa i përket projektligjit të iniciuar nga PDK-ja pas aktgjykimit të Gjykatës Speciale, Nagavci ka thënë se deputetët e Vetëvendosjes dhe grupet e tjera parlamentare nuk janë konsultuar për këtë nismë.

“Natyrisht se ne do të japim kontributet tona, por duhet të përmendet që askush, me sa unë jam në dijeni, nga Lëvizja Vetëvendosje, pra qoftë nga deputetët, qoftë nga kolegët bashkëpunëtorët tanë, nuk janë konsultuar në lidhje me këtë nismë të PDK-së. Pra, kjo duhet të jetë një nismë që na bashkon të gjithëve. Dhe ashtu sikurse veç e përmenda, jo vetëm që askush nga partitë, jo vetëm nga Lëvizja, por me sa e kuptova edhe nga partitë e tjera parlamentare nuk janë konsultuar në lidhje me këtë nismë. Me aq sa kam dëgjuar përfaqësuesin e PDK-së ka deklaruar që është një grup i ekspertëve, disa ekspertë, që nuk e di kush janë që kanë dhënë kontributet e tyre. Por, ajo që është e rëndësishme është që, me sa unë jam në dijeni, as ekipet mbrojtëse të katër krerëve të UÇK-së nuk janë konsultuar në lidhje me këtë projektligj”, tha ajo.

Mbi 30 persona janë arrestuar në Ekuador gjatë një operacioni të përbashkët të forcave ekuadoriane dhe amerikane, i cili kishte në shënjestër një grup të dyshuar me lidhje me kartelin meksikan Jalisco New Generation (CJNG).

Operacioni u zhvillua në orët e para të së enjtes në disa qytete të Ekuadorit, ndërsa në të morën pjesë rreth 320 efektivë të policisë ekuadoriane dhe 50 pjesëtarë të Komandës Jugore të SHBA-së.

Ministri i Brendshëm i Ekuadorit, John Reimberg, bëri të ditur se operacioni u zhvillua në bashkëpunim me trupat amerikane dhe Agjencinë Amerikane Kundër Drogës (DEA).

Sipas autoriteteve ekuadoriane, më shumë se 30 shtetas të vendit u arrestuan nën dyshimin se i përkisnin një grupi me lidhje të drejtpërdrejta me CJNG. Rrjeti dyshohet se trafikonte kokainë nga Kolumbia drejt tregjeve ndërkombëtare, duke përdorur portet në jugperëndim të Ekuadorit.

Operacioni është pjesë e bashkëpunimit të zgjeruar mes Ekuadorit dhe Shteteve të Bashkuara në luftën kundër krimit të organizuar dhe trafikut të drogës.

Fushata e autoriteteve ekuadoriane kundër grupeve kriminale ka nxitur edhe kritika nga organizatat e të drejtave të njeriut, të cilat kanë raportuar raste të dyshuara të përdorimit të tepruar të forcës dhe shkeljeve të tjera.

Presidenti i Ekuadorit, Daniel Noboa, i ka kundërshtuar këto kritika, duke argumentuar se vëmendja duhet të përqendrohet te viktimat e shkaktuara nga krimi i organizuar.