Category: LAJME

Një person është arrestuar në Rahovec, nën dyshimin se u ka kërkuar dhe marrë ryshfet pronarëve të bizneseve, në këmbim të moskontrollimit të lokaleve të tyre apo shmangies së ndëshkimeve.

Rasti është zbuluar pasi Policia e Kosovës kishte pranuar informacione se i dyshuari, në periudha të ndryshme kohore, u kishte kërkuar ryshfet bizneseve. Pas pranimit të informacionit, Policia ka nisur menjëherë trajtimin e rastit.

Gjatë hetimeve janë siguruar dëshmi se i dyshuari ka pranuar ryshfet në shuma prej 300 deri në 500 euro, në disa raste të ndara, nga pronarë biznesesh.

“Me të gjitha veprimet e kryera, personi i dyshuar ka konsumuar veprën penale ‘marrja e ryshfetit’ neni 421 i KPRK-së”, thuhet në njoftimin e PK-së.

Të enjten, Policia ka kontrolluar edhe ambientin e punës, si dhe veturat të cilat i dyshuari i kishte nën shfrytëzim.

“Të gjitha veprimet hetimore policore kanë qenë të koordinuara me prokurorin përgjegjës të rastit ku pas intervistës, me aktvendim të prokurorit, i dyshuari është ndaluar për 48 orë dhe nga i njëjti është sekuestruar një telefon celular”.

Gjykata e Posaçme Kundër Korrupsionit dhe Krimit të Organizuar ka lënë në fuqi masën e sigurisë “arrest në shtëpi” ndaj ish-drejtoreshës së SHISH-it, Vlora Hyseni.

Hyseni u paraqit këtë të enjte në GJKKO, ku u njoh me masën e sigurisë të caktuar ndaj saj në kuadër të procedimit penal nr. 20/1.

Para hyrjes në ambientet e GJKKO-së, ajo pati edhe një përplasje verbale me gazetarët, duke bërë një deklaratë lidhur me pretendime për takime me agjentë serbë.

Me vendimin e 21 shtatorit, GJKKO caktoi ndaj Hysenit masën “arrest në shtëpi” dhe “pezullim të ushtrimit të një detyre a shërbimi publik”, pas kërkesës së Prokurorisë së Posaçme.

Tre zyrtarë policorë të Stacionit të Policisë në Podujevë janë nderuar me medalje për shpëtimin e jetëve, pas veprimeve të tyre të guximshme në dy raste të rënda.

Në mesin e tyre është edhe polici Skender Fetahu, i cili më 2 korrik kishte intervenuar në një incident të rëndë në Podujevë, ku mbetën të plagosur tre persona.

Në një situatë të rrezikshme, Fetahu kishte vepruar me guxim dhe vetëmohim, duke arritur ta çarmatoste njërin nga të dyshuarit dhe të parandalonte përshkallëzimin e mëtejmë të situatës.

Në anën tjetër, dy zyrtarët e tjerë policorë, Nazimi dhe Shqiproni, me intervenimin e tyre kishin arritur të parandalonin një tragjedi edhe më të madhe, duke ia shpëtuar jetën një vajze.

Për veprimin e tre policëve ka shprehur krenari edhe togerja Antigona Çitaku-Dibrani, e cila ka vlerësuar guximin, përkushtimin dhe profesionalizmin e tyre në shërbim të qytetarëve.

“Sot, tre heronj të Stacionit tonë u nderuan me medalje për shpëtim jete. Krenare për ju dhe për guximin, përkushtimin dhe profesionalizmin që dëshmoni çdo ditë në shërbim të qytetarëve. Urime dhe respekt të pafund për ju!”, ka shkruar ajo.

Policia e Kosovës ka njoftuar se më 23 shtator, zyrtarët policorë të Stacionit Policor në Shtime kanë identifikuar dhe ndëshkuar një shofer për kundërvajtje në trafik.

Sipas Policisë, 22-vjeçari me inicialet A.H., duke drejtuar një motoçikletë të markës Yamaha, ka kryer veprime të rrezikshme në rrugën “Komandant Kumanova” në Shtime.

Ndaj tij është shqiptuar gjobë prej 500 eurosh, tri pikë negative dhe masa mbrojtëse – ndalimi i drejtimit të mjetit për tre muaj, pasi nuk posedonte kategorinë përkatëse për drejtimin e motoçikletës.

Policia Rajonale e Ferizajt ka bërë të ditur se do të vazhdojë kontrollet dhe aktivitetet e intensifikuara në trafik, me qëllim të rritjes së sigurisë rrugore dhe zbatimit të ligjit.

Në Banjskë të Zveçanit është vendosur gurthemeli i obeliskut kushtuar heroit të Policisë së Kosovës, Afrim Bunjaku, në trevjetorin e rënies së tij në krye të detyrës.

Para vendosjes së gurthemelit, ushtruesja e detyrës së presidentes, Albulena Haxhiu, ministri i Punëve të Brendshme, Xhelal Sveçla, dhe drejtori i Përgjithshëm i Policisë së Kosovës, Gazmend Hoxha, kanë bërë homazhe te varri i Bunjakut.

Ata kanë nderuar kujtimin e rreshterit të Policisë së Kosovës, i cili u vra më 24 shtator 2023 gjatë sulmit në Banjskë të Zveçanit.

Deputeti i PDK-së, Enver Hoxhaj, ka kujtuar rreshterin Afrim Bunjaku në trevjetorin e sulmit terrorist në Banjskë të Zveçanit.

Hoxhaj ka thënë se më 24 shtator 2023, Serbia, përmes grupeve të armatosura, tentoi aneksimin e veriut të Kosovës, ndërsa rreshteri Afrim Bunjaku ra heroikisht në mbrojtje të atdheut.

“Më 24 shtator 2023, tri vjet më parë, Serbia, përmes grupeve të armatosura, tentoi aneksimin e veriut të Kosovës. Atë ditë ra heroikisht rreshteri Afrim Bunjaku. Aty u mbrojt atdheu ynë, një dhe i pandashëm”, ka shkruar Hoxhaj në Facebook.

Ai ka theksuar se sulmi në Banjskë dëshmoi gatishmërinë e Policisë së Kosovës për ta mbrojtur vendin, por edhe synimet e vazhdueshme të Serbisë ndaj territorit të Kosovës.

“Banjska dëshmoi se Policia e Kosovës është e gatshme të japë jetën në mbrojtje të vendit dhe se Serbia nuk ka hequr dorë kurrë nga planet për pushtimin e territorit tonë”, ka deklaruar Hoxhaj.

“Lavdi e përjetshme heroit Afrim Bunjaku!”, ka përfunduar ai.

Deputetja e Lidhjes Demokratike të Kosovës (LDK), Janina Ymeri, ka kritikuar Qeverinë e Kosovës për mënyrën se si, sipas saj, po funksionojnë mekanizmat e kontrollit të çmimeve dhe furnizimit me produkte bazë e terapi shëndetësore.

Ymeri ka deklaruar se, përveç Doganës, përmes së cilës mblidhen të ardhurat nga importi, në Kosovë mungojnë mekanizmat e mjaftueshëm të kontrollit të çmimeve për produkte si nafta, energjia elektrike dhe gruri.

“Paguajmë aq sa shkruhet në import nga kushdo që shkruhet”, ka thënë Ymeri, duke kritikuar institucionet përgjegjëse për mbikëqyrjen e tregut.

Ajo ka kundërshtuar edhe arsyetimet për funksionimin e tregut të lirë, duke pretenduar se Autoriteti i Konkurrencës nuk është funksional në nivelin e nevojshëm.

“Mos u arsyetoni në dokrrat e Tregut të Lirë kur si parti nuk keni funksional as Autoritetin e Konkurrencës”, është shprehur deputetja e LDK-së.

Sipas saj, problemet nuk kufizohen vetëm te çmimet e produkteve bazë, por shtrihen edhe te furnizimi me terapi shëndetësore.

“Për terapitë shëndetësore as që bëhet fjalë: nuk ka as sasi të mjaftueshme”, ka deklaruar Ymeri.

Në fund, deputetja ka ngritur pyetjen se çfarë po qeveris në të vërtetë Qeveria e Kosovës, duke e lidhur kritikën e saj me gjendjen ekonomike të qytetarëve.

“Çfarë po qeveris në të vërtetë Qeveria VV? Varfërinë pra”, ka thënë Ymeri, duke pretenduar se institucionet janë fokusuar kryesisht në mbledhjen e të hyrave përmes Doganës dhe kontrolleve tatimore.

Postimi i plotë:

Kosova, përveç Doganës nga ku sigurohen të ardhurat e qeverisë për xhipa dhe naftë, praktikisht nuk ka asnjë mekanizëm kontrolli për çmimet e produkteve si:

1) ​Nafta

2) ​Energjia elektrike

3) ​Gruri

Paguajmë aq sa shkruhet në import nga kushdo që shkruhet.

Mos u arsyetoni në dokrrat e Tregut të Lirë kur si parti nuk keni funksional as Autoritetin e Konkurrencës.

Ne po paguajmë produkte në treg pa asnjë kontrollë.

​Për terapitë shëndetësore as që bëhet fjalë: nuk ka as sasi të mjaftueshme.

Këtu shtrohet pyetja: çfarë po qeveris në të vërtetë Qeveria VV?

VARFËRINË pra, duke mbajtur hapur vetëm derën e Doganës me parimin: “paguaj këtë, këtë dhe këtë para se ta shesësh mallin”, e pastaj edhe një kontroll tatimor nga ATK-ja.

Kryeministri i Kosovës, Albin Kurti, i ka kërkuar Bashkimit Evropian që të mos e vonojë më trajtimin e aplikimit të Kosovës për anëtarësim dhe t’i japë vendit statusin e shtetit kandidat.

Kurti e ka ngritur këtë çështje gjatë drekës së organizuar në New York nga Përfaqësuesja e Lartë e BE-së për Politikë të Jashtme dhe Siguri, Kaja Kallas, me përfaqësuesit e shteteve të Ballkanit Perëndimor. Takimi është zhvilluar në kuadër të qëndrimit të Kurtit në New York për Javën e Nivelit të Lartë të Asamblesë së Përgjithshme të OKB-së.

Sipas Kurtit, dhënia e statusit të vendit kandidat do të ishte përgjigje ndaj, siç ka thënë ai, besnikërisë së Kosovës ndaj vlerave demokratike dhe orientimit të saj euroatlantik, si dhe një shtysë për vazhdimin e reformave.

“Statusi i shtetit kandidat për anëtarësim pa vonesa të mëtejme, përveçse i merituar, do të duhej të ishte përgjigjja e Bashkimit Evropian për besnikërinë e Kosovës ndaj vlerave demokratike dhe përcaktimit të qartë strategjik euroatlantik”, ka shkruar Kurti.

Ai ka kritikuar gjithashtu mosprocedimin e aplikimit të Kosovës për anëtarësim në BE, i cili është dorëzuar në dhjetor të vitit 2022 në Pragë.

Kurti ka thënë se mbajtja “në sirtar” e aplikimit, ndërkohë që Kosova është e linjëzuar me politikën e jashtme dhe të sigurisë të BE-së, përbën, sipas tij, padrejtësi ndaj vendit dhe mund të inkurajojë aktorët destabilizues në rajon.

“Republika e Kosovës nuk duhet dhe nuk mund të mbetet peng i fqinjit të saj verior”, ka deklaruar ai.

Në postimin e tij, kryeministri ka akuzuar Serbinë se mbron dhe shpërblen persona të dënuar për krime, glorifikon të dënuar për krime të kryera gjatë luftërave në ish-Jugosllavi dhe refuzon të bashkëpunojë për zbardhjen e fatit të personave të zhdukur me dhunë.

Ai gjithashtu ka përsëritur akuzat ndaj Beogradit për shkeljen e të drejtave të shqiptarëve në Luginën e Preshevës, duke e cilësuar politikën atje si “spastrim etnik administrativ”.