Category: LAJME

Ministrja e Drejtësisë, Donika Gërvalla, ka bërë të ditur se Projektligji për Byronë Shtetërore për Verifikimin dhe Konfiskimin e Pasurisë së Pajustifikueshme është dërguar në Kuvendin e Kosovës, duke e cilësuar atë si një nga elementet kryesore të reformës në sistemin e drejtësisë, raporton Ekonomia Online.

Gërvalla ka thënë se projektligji është hartuar dhe rishikuar në disa faza, është vlerësuar nga Komisioni i Venecias dhe është shqyrtuar nga Gjykata Kushtetuese, ndërsa më pas është ndryshuar dhe është rihapur për konsultim publik.

“Një lajm po ashtu jashtëzakonisht i mirë është që po dërgojmë në Kuvend edhe ligjin për Byronë. Që nga mandati i kaluar ky ligj ka pësuar disa ndryshime të lehta dhe është dërguar edhe një herë në konsultime publike. Projektligji që kemi dërguar në Kuvend duhet parë si rezultat i një procesi të tërë. Ai ka kaluar nëpër disa faza të hartimit dhe rishikimit, është vlerësuar nga Komisioni i Venecias, është shqyrtuar nga Gjykata Kushtetuese, është ndryshuar në bazë të gjetjeve të saj dhe është rihapur për konsultim publik ku janë marrë parasysh në masë mjaft të madhe edhe komentet e shoqërisë civile”, tha Gërvalla.

Ajo ka theksuar se iniciativa zyrtare për krijimin e këtij mekanizmi daton nga viti 2020 dhe ka qenë pjesë e reformave në drejtësi, sundimin e ligjit dhe luftën kundër korrupsionit.

“Qëllimi ka qenë që Kosovës t’i jepet një instrument shtesë për trajtimin e rasteve kur ekziston një mospërputhje e konsiderueshme ndërmjet pasurisë së një zyrtari publik dhe të ardhurave të tij të ligjshme, por kur mekanizmat ekzistues të ndjekjes penale nuk janë të mjaftueshëm për të mundësuar konfiskimin e kësaj pasurie”, tha ministrja.

Gërvalla ka thënë se gjatë hartimit të projektligjit është synuar ruajtja e balancës ndërmjet interesit publik për luftimin e pasurisë së pajustifikueshme dhe mbrojtjes së të drejtave individuale.

“Që nga fillimi kemi qenë të vetëdijshëm se bëhet fjalë për një mekanizëm të ri dhe të ndjeshëm, i cili duhet të vendosë balancën e duhur ndërmjet interesit publik për luftimin e pasurisë së pajustifikueshme dhe mbrojtjes së të drejtave individuale. Pikërisht ruajtja e kësaj balance ka qenë një prej parimeve kryesore që e ka udhëhequr hartimin e këtij projektligji”, u shpreh ajo.

Ministrja ka sqaruar se Byroja, sipas projektligjit, nuk do të ketë kompetencë për të konfiskuar pasurinë, ndërsa vendimi përfundimtar do të merret nga gjykata.

“Ky ligj nuk më krijon një mekanizëm penal dhe Byroja nuk konfiskon pasuri. Projektligji parashikon një procedurë civile që zhvillohet para gjykatës, me standarde të përcaktuara të provës dhe me të drejtë ankese. Byroja ka rol përgatitor dhe analitik. Ajo mbledh, analizon dhe verifikon të dhënat dhe kur vlerëson se plotësohen kushtet ligjore e paraqet çështjen para gjykatës. Byroja vetë nuk merr vendim për konfiskim. Vendimin përfundimtar, përfundimtar për konfiskimin e pasurisë e merr ekskluzivisht gjykata”, tha Gërvalla.

Sipas saj, personi ndaj të cilit zhvillohet procedura do të ketë të drejtë të paraqesë prova, të kundërshtojë pretendimet dhe provat e Byrosë dhe të përdorë mjetet juridike të përcaktuara me ligj.

Gërvalla ka thënë se qytetarët e presin këtë ligj për shkak të nevojës për trajtimin e pasurisë së pajustifikueshme dhe luftimin e korrupsionit.

“Por pse po pritet kaq me padurim nga qytetarët e Republikës sonë ky ligj? Sepse Kosova nuk mund ta tolerojë pasurinë e pajustifikueshme që ajo të bëhet normë. Që korrupsioni të fitojë mbi shtetin ligjor, që pasuria publike të përfundojë në xhepat privatë, që i drejti dhe i sinqerti në fund të jetë humbës”, tha ajo.

Gërvalla e ka cilësuar Projektligjin për Byronë si një nga shtyllat e reformës në sistemin e drejtësisë.

“Ligji për Byronë Shtetërore për verifikimin dhe për konfiskimin e pasurisë së pajustifikueshme do të jetë një prej garancive të forta për këtë. Me këtë ligj jam e sigurt që kemi vënë themelin e reformës më të thellë në sistemin e drejtësisë në Republikën e Kosovës”, përfundoi Gërvalla.

Forca e Sigurisë së Kosovës (FSK) dhe Ushtria e Republikës së Turqisë kanë zhvilluar trajnim të përbashkët në fushën e kërkim-shpëtimit urban, kërkim-shpëtimit në terrene malore dhe operacioneve me qen të kërkim-shpëtimit K9.

Sipas njoftimit të FSK-së, trajnimi është zhvilluar në kuadër të bashkëpunimit me Ushtrinë e Republikës së Turqisë dhe kishte për qëllim avancimin e njohurive dhe aftësive profesionale të pjesëmarrësve, forcimin e bashkëpunimit ndërmjet ekipeve, si dhe shkëmbimin e përvojave praktike në operacionet e kërkim-shpëtimit.

Gjatë trajnimit janë zhvilluar ushtrime teorike dhe praktike, përfshirë teknikat e kërkimit dhe shpëtimit në ndërtesa të dëmtuara, operacionet në terrene malore, përdorimin dhe angazhimin e qenve të kërkim-shpëtimit K9, si dhe procedurat e koordinimit dhe reagimit në situata emergjente.

FSK-ja ka bërë të ditur se trajnimi ka kontribuar në rritjen e kapaciteteve profesionale, gatishmërisë operacionale dhe ndërveprueshmërisë së ekipeve me partnerët në fushën e kërkim-shpëtimit.

Kryeministri në detyrë i Kosovës, Albin Kurti, ka përkujtuar 28-vjetorin e masakrës së familjes Deliu në Abrinë e Epërme të Drenasit, ku më 26 shtator 1998 u vranë 23 anëtarë të kësaj familjeje.

Kurti, përmes një postimi, ka përmendur viktimat e masakrës, nga foshnja që ndodhej në barkun e nënës së saj, deri te viktima më e moshuar, 94-vjeçari Fazli Deliu.

“Nga foshnja në barkun e nënës Luljetë, të cilën ajo do ta quante Malësor ose Malësore, te Mihanja e cila një ditë më parë kishte mbushur 28 vjet dhe i biri i saj Valmiri, i cili kishte pesë ditë që i kishte mbushur dy vjet, te Lumnija dhe foshnja e saj në javën e gjashtë të jetës Dituria, e cila i mbijetoi masakrës por vdiq 54 ditë më vonë, tek Antigona dhe Mihanja 14 dhe 16 vjeçe, e deri te më i vjetri, Fazli Deliu, 94 vjeç”, ka shkruar Kurti.

Sipas tij, përmasat dhe mënyra e kryerjes së krimeve ndaj familjes Deliu përbëjnë dëshmi të krimeve të luftës, krimeve kundër njerëzimit dhe gjenocidit.

“Përmasa dhe llojet e krimeve çnjerëzore që aparati shtetëror i Serbisë kreu ndaj 23 anëtarëve të familjes Deliu nga Abria e Epërme e Drenasit, më 26 shtator 1998, janë dëshmia e pamohueshme e krimeve të luftës, krimeve kundër njerëzimit dhe gjenocidit të Serbisë ndaj shqiptarëve në luftën e fundit në Kosovë”, ka deklaruar ai.

Kurti ka përmendur edhe mënyrën e vrasjes së disa prej viktimave, duke e cilësuar atë si dëshmi të mizorisë ndaj popullsisë civile shqiptare.

“Prerja e barkut të një shtatëzëne, vrasja e një nëne tjetër bashkë me fëmijën dy vjeç dhe e tjetrës që mbante në duar foshnjën 40 ditëshe, dhunimi e masakrimi i vajzave 14 e 16 vjeçe, sikurse gjymtimi që iu bë kufomave pasi fillimisht ishin qëlluar me plumb në kokë, janë dëshmia e mizorisë dhe barbarisë, si dhe rezultati i urrejtjes së mbjellë ndaj shqiptarëve për dekada nga akademia serbe, ideatores që fshihet prapa perdes teksa sheh frytet e politikës së saj fashiste, shoviniste e ekspansioniste”, ka shkruar Kurti.

Ai ka kujtuar edhe masakrën e kryer po atë ditë në fshatin Golluboc të Malishevës, ku, sipas tij, aparati shtetëror i armatosur i Serbisë kishte lidhur dhe torturuar civilë shqiptarë para se t’i ekzekutonte.

Kurti ka kërkuar drejtësi për viktimat dhe familjet e tyre, duke bërë thirrje për rritje të trysnisë ndërkombëtare ndaj Serbisë.

“Drejtësia është detyrim dhe më e pakta që duhet bërë për viktimat dhe familjet, andaj trysnia ndërkombëtare ndaj fqinjit verior duhet të jetë më e madhe se kurrë më parë”, ka thënë Kurti.

Shtatë persona, përfshirë një 14-vjeçar, janë vrarë në Kiev nga sulmet ruse me dronë, ndërsa 46 të tjerë janë plagosur, bëri të ditur kryebashkiaku i kryeqytetit ukrainas, Vitali Klitschko. Më vonë, autoritetet raportuan se numri i të plagosurve në Kiev ishte rritur në 59.

Ministria e Jashtme e Izraelit tha se 14-vjeçari kishte shtetësi izraelite, ndërsa nëna e tij ishte mes të plagosurve.

Presidenti ukrainas, Volodymyr Zelensky, tha se një depo e përdorur nga rrjeti amerikan i restoranteve McDonald’s ishte gjithashtu në shënjestër pranë Kievit.

Ndërkohë, një person u vra në rajonin e Odesës, në jugperëndim të Ukrainës, gjatë një sulmi ndaj një ndërtese të operatorit postar, sipas autoriteteve ukrainase.

Sulmet prekën edhe Zaporizhian, ku zjarrfikësit dhe ekipet mjekësore u detyruan të evakuonin shtatë pacientë nga një spital pasi një sulm me dron dëmtoi ndërtesën dhe shkaktoi zjarr. Dy persona u plagosën.

Sulmet ruse kanë vijuar me intensitet, ndërsa presidenti rus, Vladimir Putin, ka lënë të kuptohet se Moska po e rishikon qëndrimin për rifillimin e bisedimeve të paqes me Ukrainën.

Kryetarja e Akademisë së Shkencave dhe Arteve të Kosovës (ASHAK), Justina Shiroka-Pula, ka deklaruar se institucioni që ajo drejton është i gatshëm të ndihmojë në hulumtimin dhe interpretimin e të dhënave dhe fakteve që lidhen me luftën në Kosovë.

Këtë qëndrim ajo e ka bërë të ditur në një reagim pas vendimit të fundit ndaj katër ish-drejtuesve të Ushtrisë Çlirimtare të Kosovës në Dhomat e Specializuara në Hagë.

“Institucioni që unë e drejtoj është gjithmonë në dispozicion për të ndihmuar proceset e hulumtimit, të kërkimit dhe të interpretimit të të dhënave dhe të fakteve lidhur me luftën në Kosovë”, ka shkruar Shiroka-Pula.

Në reagimin e saj, kryetarja e ASHAK-ut ka shprehur edhe rezerva ndaj mënyrës se si është konceptuar dhe funksionon Specialja, duke thënë se drejtësia duhet të perceptohet si e barabartë, gjithëpërfshirëse dhe e paanshme.

Ajo ka theksuar se proceset penale ndaj individëve nuk duhet të shndërrohen në gjykim të përgjithshëm të një lëvizjeje apo të një periudhe historike.

Shiroka-Pula ka bërë thirrje për transparencë, llogaridhënie dhe debat të argumentuar publik lidhur me institucionet e drejtësisë.

NGA AKADEMIK. PROF. ANASTAS ANGJELI

Mbërritja e Xi Jinping në Uashington shënon një moment të rëndësishëm në marrëdhënien më vendimtare dhe njëkohësisht më delikate të ekonomisë botërore. Donald Trump e priti homologun kinez personalisht në bazën ajrore Andrews, një gjest i pazakontë që i dha vizitës një peshë të veçantë simbolike. Xi, nga ana e tij, deklaroi se Kina dhe Shtetet e Bashkuara “duhet të jenë partnere, jo rivale” dhe se fuqizimi i Kinës mund të ecë paralelisht me ambicien e Trumpit për ta bërë Amerikën përsëri të madhe. Por ceremonia nuk duhet ngatërruar me pajtimin. Trump dhe Xi nuk u takuan për t’i dhënë fund konkurrencës mes dy vendeve. Ky takim, shënon një përpakje në vazhdim për të përcaktuar kufijtë e saj, në mënyrë që rivaliteti ekonomik, teknologjik dhe ushtarak të mos kthehet në një krizë që as Uashingtoni, as Pekini nuk mund ta kontrollojnë.Prandaj dhe thenia “në se bashkpunojmë, fitojmë te gjithë” duket kuptimplote dhe nga ky takim.

ÇFARE U ARRIT?

Rezultati më i rëndësishëm ishte arritur që përpara se dy presidentët të uleshin në tryezën e bisedimeve. Sekretari amerikan i Thesarit, Scott Bessent, dhe zëvendëskryeministri kinez He Lifeng ranë dakord ta zgjasin deri më 10 janar 2027 armëpushimin tregtar që përfundonte në nëntor. Marrëveshja ruan përkohësisht uljen e tarifave dhe ndalon vendosjen e kufizimeve të reja tregtare.

Ky vendim nuk përbën një marrëveshje të re të madhe tregtare. Është më shumë një shtyrje e përplasjes. Megjithatë, për tregjet dhe kompanitë ndërkombëtare, edhe kjo ka rëndësi sepse gjatë përshkallëzimit të mëparshëm, tarifat reciproke kishin kaluar nivelin 100 %, duke kërcënuar furnizimet, prodhimin dhe çmimet në shumë vende.

Presidenti Trump mund ta paraqesë zgjatjen si provë se presioni i tij ndaj Pekinit funksionon. Xi mund ta paraqesë si dëshmi se Kina nuk u detyrua të tërhiqej dhe se dialogu në nivel të barabartë është mënyra e vetme për të menaxhuar marrëdhënien. Të dy fitojnë politikisht nga qetësia e përkohshme, por secili i flet një publiku të ndryshëm.

Takimi i Uashingtonit është vazhdim i drejtpërdrejtë i bisedimeve të 14-15 majit në Pekin. Atje, dy udhëheqësit shpallën synimin për të ndërtuar një marrëdhënie “konstruktive të stabilitetit strategjik”. Pas këtij formulimi diplomatik qëndronte ideja e thjeshtë se SHBA dhe Kina do të vazhdojnë të konkurrojnë, por duhet të mbajnë të hapura kanalet politike, ekonomike dhe ushtarake që parandalojnë një konflikt të pakontrolluar. Në Pekin u krijuan një Bord i Tregtisë dhe një Bord i Investimeve. Kina u zotua, sipas Shtëpisë së Bardhë, të blinte 200 avionë Boeing dhe të paktën 17 miliardë dollarë produkte bujqësore amerikane në vit deri më 2028. U diskutuan gjithashtu hapja më e madhe e tregut kinez, investimet kineze në sektorë amerikanë jo të ndjeshëm, furnizimi me minerale të rralla dhe kufizimet amerikane mbi mikroçipat e avancuar.

Pekini ishte i rëndësishëm edhe sepse krijoi skenarin e takimit të fundit. Trump e ftoi publikisht Xi-në në Shtëpinë e Bardhë më 24 shtator, ndërsa të dyja palët e paraqitën vazhdimin e dialogut si pjesë të një procesi dhe jo si një ngjarje të vetme. Megjithatë, jo të gjitha zotimet e majit janë kthyer në rezultate të matshme. Përvojat e marrëveshjeve të mëparshme kanë treguar se shifrat e shpallura për blerjet kineze mund të mos realizohen plotësisht. Për këtë arsye, suksesi i Uashingtonit nuk duhet matur vetëm me vlerën e kontratave të reja, por edhe me mekanizmat që do të kontrollojnë zbatimin e tyre.

Pavarësisht viteve të tarifave dhe thirrjeve për “shkëputje”, ekonomitë amerikane dhe kineze mbeten të lidhura. Në vitin 2025, tregtia dypalëshe e mallrave arriti rreth 414.6 miliardë dollarë. Deficiti amerikan me Kinën ra në rreth 202.7 miliardë dollarë, ose 31.8 % më pak se një vit më parë, por u ulën edhe eksportet amerikane drejt tregut kinez.

Kjo tregon kufirin e politikës tarifore. SHBA-ja importon më pak drejtpërdrejt nga Kina, por një pjesë e prodhimit dhe e tregtisë është zhvendosur në vende të treta, jo domosdoshmërisht në fabrikat amerikane. Në të njëjtën kohë, kompanitë kineze po kërkojnë tregje të reja dhe eksportet e Kinës drejt pjesës tjetër të botës kanë vazhduar të rriten. Në thelb, dy fuqitë po ndjekin strategji të kundërta sigurie ekonomike. Uashingtoni dëshiron të zvogëlojë varësinë nga Kina për mikroçipat, bateritë, mineralet kritike dhe produkte të tjera strategjike. Pekini dëshiron të zvogëlojë varësinë e vet nga teknologjia amerikane dhe të ruajë avantazhin që ka në prodhim dhe në përpunimin e mineraleve të rralla. Pikërisht për këtë arsye, ndarja e plotë e dy ekonomive është shumë e kushtueshme, ndërsa kthimi te marrëdhënia e vjetër e bashkëpunimit të pakufizuar është politikisht i pamundur. Takimi i Uashingtonit kërkon një rrugë të ndërmjetme: tregtia vazhdon, por sektorët strategjikë mbeten të mbrojtur.

DHE ME TEJ…

Inteligjenca artificiale është një nga çështjet e reja qendrore. Shtetet e Bashkuara dëshirojnë të ruajnë epërsinë në mikroçipat më të avancuar dhe në sistemet e inteligjencës artificiale. Kina kundërshton kufizimet që pengojnë kompanitë e saj të blejnë teknologji amerikane dhe kërkon shtyrjen ose lehtësimin e disa prej tyre. Një kompromis i gjerë teknologjik është pak i mundshëm, sepse të dyja palët e shohin inteligjencën artificiale si burim fuqie ekonomike dhe ushtarake.

Megjithatë, Uashingtoni dhe Pekini mund të krijojnë një mekanizëm komunikimi për incidente të rënda ose rreziqe të përbashkëta të inteligjencës artificiale. Një marrëveshje e tillë nuk do ta ndalte garën, por mund të ulte rrezikun e keqkuptimeve.

Mineralet e rralla përbëjnë kartën më të fortë ekonomike të Pekinit. Kina kontrollon një pjesë shumë të rëndësishme të përpunimit global të këtyre materialeve, të nevojshme për elektronikën, automjetet elektrike dhe sistemet e mbrojtjes. SHBA kërkon vazhdimësi në furnizime; Kina kërkon në këmbim më pak presion mbi kompanitë dhe teknologjinë e saj. Kjo varësi reciproke është një arsye kryesore pse asnjëra palë nuk dëshiron t’i rikthehet luftës së hapur tregtare. Nëse tregtia është tema më e dukshme, Tajvani mbetet tema më e rrezikshme. Gjatë takimit të majit, Xi i tha Trumpit se Tajvani është çështja më e rëndësishme në marrëdhëniet kino-amerikane dhe paralajmëroi se një menaxhim i gabuar mund të çojë në përplasje.

Pekini e konsideron ishullin pjesë të Kinës dhe nuk e përjashton përdorimin e forcës për bashkim. Kina dëshiron që Trump të deklarojë se SHBA “kundërshton” pavarësinë e Tajvanit, një formulim më i fortë se qëndrimi tradicional amerikan se Uashingtoni “nuk e mbështet” atë. Për Pekinin ky nuk është ndryshim i vogël gjuhësor, por një sinjal politik. Për Tajvanin dhe aleatët e SHBA në Azi, çdo ndryshim do të ngrinte pyetjen nëse siguria e ishullit mund të përdoret si monedhë shkëmbimi në negociatat tregtare.

Nuk pritet që Trump të ndryshojë zyrtarisht politikën amerikane. Megjithatë, edhe pa një marrëveshje, mënyra se si ai flet për pavarësinë e Tajvanit, shitjet e armëve dhe rolin e SHBA-së mund të ndikojë në llogaritjet e Pekinit. Në këtë fushë, paqartësia mund ta parandalojë konfliktin, por mund edhe të ushqejë keqkuptime. Në tryezë ishin dhe u diskutuan edhe Irani, Ngushtica e Hormuzit, Ukraina dhe Koreja e Veriut. Në Pekin, Trump dhe Xi ranë dakord se Irani nuk duhet të ketë armë bërthamore dhe se Ngushtica e Hormuzit duhet të mbetet e hapur për lëvizjen e energjisë. Kina, si blerëse e madhe e naftës iraniane, ka ndikim ekonomik, por nuk dëshiron të shfaqet si zbatuese e strategjisë amerikane.

Këto mosmarrëveshje tregojnë se rivaliteti SHBA–Kinë ka kaluar kufijtë e tregtisë. Ai lidhet me cështjen se kush përcakton rregullat ndërkombëtare, kontrollon teknologjitë e së ardhmes dhe ushtron ndikim mbi rajonet strategjike. Uashingtoni dëshiron ta ruajë epërsinë e rendit të krijuar nën udhëheqjen amerikane; Pekini kërkon një rend ku fuqia kineze të njihet dhe të kufizohet më pak.

Takimi i 24 shtatorit duhet vlerësuar, dhe Rrezultati i tij më realist është ruajtja e qetësisë, pra zgjatja e armëpushimit tregtar, disa ulje të kufizuara tarifash, blerje të reja bujqësore, komunikim më i mirë ushtarak dhe ndoshta fillimi i dialogut mbi sigurinë e inteligjencës artificiale.

Çështjet strukturore do të vazhdojnë të mbeten të pazgjidhura. Kontrollet amerikane mbi teknologjinë, epërsia kineze në mineralet kritike, statusi i Tajvanit dhe konkurrenca për ndikim global nuk mund të zgjidhen në një takim të vetëm. Edhe nëse vizita të tilla prodhojnë deklarata të ngrohta, të dyja qeveritë do të vazhdojnë të përgatiten për një rivalitet afatgjatë. Takimi në Uashington, mes SHBA dhe Kinës, shënon një përpjekje për ta kthyer një përplasje të mundhme në një rivalitet të administrueshëm. Arritja kryesore nuk është zgjidhja e problemeve, por pranimi se kostoja e humbjes së kontrollit do të ishte shumë më e madhe për të dyja palët dhe njëkohësisht edhe për pjesën tjetër të botës. Prandaj nga ky takim dhe bashkëpunim, përfitojnë të gjithë, e gjithë bota.

Ministrja e Drejtësisë, Donika Gërvalla ka deklaruar se projektligji për Byronë Shtetërore për Verifikimin dhe Konfiskimin e Pasurisë së Pajustifikueshme është përcjellë në Zyrën e Kryeministrit.

Përmes një postimi në rrjetin social Facebook, Gërvalla ka theksuar se institucionet do të vazhdojnë me procedurat për jetësimin e kësaj nisme.

“Ligjin për Byronë e nisëm për në Zyrën e Kryeministrit. Nuk ka rrugë tjetër. Byronë Shtetërore për Verifikimin dhe Konfiskimin e Pasurisë së Pajustifikueshme duhet dhe do ta jetësojmë!”, ka shkruar Gërvalla.

Ajo ka ritheksuar kështu qëndrimin për krijimin e mekanizmit shtetëror që synon verifikimin dhe konfiskimin e pasurisë së pajustifikueshme. /Telegrafi/

Dogana e Malit të Zi njoftoi më 25 shtator se ka ndaluar në Portin e Tivarit një kontejner me mish të ngrirë gjedhi me afat të skaduar, të destinuar për kompaninë “Apetit SHPK” nga Kosova.

Ky kontejner, sipas njoftimit, përmbante mbi 24 tonë peshë të përgjithshme të mishit, të shpërndarë në rreth 1.300 pako.

Sipas autoriteteve malazeze afati i përdorimit të mishit kishte skaduar më 14 maj të këtij viti.

Radio Evropa e Lirë ka kontaktuar kompaninë “Apetiti SHPK” për të marrë koment lidhur me këtë çështje, por deri në publikimin e këtij artikulli nuk ka marrë përgjigje.

Ky është rasti i dytë i njoftuar nga autoritetet doganore malazeze, pas ndalimit paraprak të tre kontejnerëve me mish gjedhi, me peshë bruto prej rreth 77.8 tonësh.

Në rastin e mëparshëm, sipas Doganës malazeze, “etiketat origjinale që tregonin afatin e skaduar ishin hequr dhe zëvendësuar me etiketa që shënonin një afat tjetër përdorimi”.

Sipas Doganës, mishi nga këta tre kontejnerë do të asgjësohet pas përfundimit të procedurave ligjore.

Vetëm në shtatë muajt e parë të këtij viti, mbi 50 milionë euro mish gjedhi dhe pule janë importuar në Kosovë nga Brazili.

Ndërkaq nga 3 shtatori, Bashkimi Evropian i ka vënë kufizime importit të një pjesë e eksporteve me origjinë shtazore nga Brazili

Arsyeja lidhet me rregullat e BE-së për përdorimin e antimikrobikëve te kafshët që përfundojnë në zinxhirin ushqimor./REL

Prokuroria Themelore në Gjakovë ka paraqitur kërkesë për caktimin e masës së paraburgimit prej 30 ditësh ndaj dy personave me inicialet S.S. dhe J.N., të dyshuar për veprën penale “Fajdeja”.

Sipas Prokurorisë, ekziston dyshimi i bazuar se të dyshuarit, nga gushti i vitit 2026 e në vazhdimësi në Rahovec, në bashkëkryerje dhe me qëllim të përfitimit të kundërligjshëm të pasurisë, kanë shfrytëzuar gjendjen e rëndë financiare të një personi me inicialet E.A..

I dëmtuari, për shkak të vështirësive financiare, dyshohet se kishte marrë nga S.S. shumën prej 1 mijë eurosh. Sipas kërkesës së prokurorisë, fillimisht atij i ishte kërkuar që të kthente 3 mijë euro, më pas 5 mijë euro dhe në fund 8 mijë euro.

Sipas Prokurorisë, i dëmtuari ishte kërcënuar se, nëse nuk i kthente paratë, duhej të dorëzonte veturën e familjes.

“Më datë 24.09.2026 ditën kur i dëmtuari E.A. takohet me të pandehurin S.S. për të ia dorëzuar paratë, konkretisht shumën prej 8,000 € (tetë mijë euro), paraqitet edhe i pandehuri J.N. i cili pasi paraprakisht ishte marrë vesh me të pandehurin S.S. i thotë të dëmtuarit se 500 € (pesë qind euro) nga borxhi i marrë ishin të tij dhe se tashmë duhej të paguante shumën prej 8,000 € (tetë mijë euro) pasi kamata ishte rritë”, thuhet në njoftim.

Gjatë realizimit të masave të veçanta hetimore, të ndërmarra në kuadër të veprimeve të koordinuara me Policinë e Kosovës, pas dorëzimit të parave, të dyshuarit janë arrestuar nga zyrtarët policorë. Sipas Prokurorisë, paratë e pranuara nga i dëmtuari janë gjetur tek të dyshuarit.

Me këto veprime, Prokuroria dyshon se S.S. dhe J.N., në bashkëkryerje, kanë kryer veprën penale “Fajdeja”.

Ndërkohë, gjatë kontrollit në shtëpinë e të dyshuarit S.S., janë gjetur dhe sekuestruar edhe 9 fishekë të kalibrit 7.62×39 mm. Sipas Prokurorisë, dyshohet se ai nuk kishte leje valide për posedimin e tyre.

Për këtë rast, S.S. dyshohet edhe për veprën penale “Mbajtja në pronësi, kontroll ose posedim të paautorizuar të armëve”.

Të dyshuarit, që nga 24 shtatori 2026, me vendim të Prokurorit të Shtetit, ndodhen nën masën e ndalimit prej 48 orësh.

Kryetarja e Kuvendit të Kosovës, Albulena Haxhiu, ka bërë të ditur se Kryesia e Kuvendit ka vendosur që seanca e radhës të mbahet të hënën në orën 11:00, ku pritet të shqyrtohet edhe një deklaratë lidhur me procesin në Hagë dhe vendimin e Gjykatës Speciale.

Haxhiu tha se mbledhja e sotme e Kryesisë ishte e para e kësaj legjislature dhe se ajo ishte zhvilluar pas një diskutimi të gjatë.

“Pas një mbeldhje të gjatë dhe aspka të lehtë sot mbajtëm mbledhjem e parë të kësaj legjislature. E kam thënë edhe më herët arsyesja se pse nuk kemi thërrit mbledhje të kryesisë ka qenë se Kuvendi dhe Qeveria ishin kontestuar nga PDK në Gjykatën Kushtetuese. Kryesia e Kuvendit vendosi sot që seanca e Kuvendit të mbahet të hënën në orën 11:00. Miratimin e një deklarate që lidhet me procesin në Hagë, përkatësisht me vendimin e padrejtë të Gjykatës Speciale. Të jetë një qëndrim i Kuvendit dhe Kuvendit ta ketë një qendrim në raport me këtë vendim përmes një deklarate”.

Kryetarja e Kuvendit ka reaguar edhe ndaj kritikave se nuk kishte thirrur seancë të jashtëzakonshme pas vendimit të Hagës.

Ajo sqaroi se kryetarja e Kuvendit nuk ka kompetencë që vetë të thërrasë një seancë të jashtëzakonshme, duke theksuar se një kërkesë e tillë duhet të bëhet nga të paktën 40 deputetë.

“Janë bërë kritika në emrin tim se pse nuk kam thërrit një seancë të jashtëzakonshme pas vendimit të Hagës. Nuk ka pasur asnjë kërkesë që është proceduar në Kuvendin e Kosovës…Kryetarja e Kuvendit nuk ka të drejtë të thërras seancë të jashtme. Ata që kanë të drejtë ta bëjnë këtë janë 40 deputetë nënshkrues dhe menjëherë sapo të më vij edhe sot e kësaj dite një kërkesë e tillë do ta aprovoja…”.

Duke folur për projektligjin e iniciuar nga Grupi Parlamentar i PDK-së, Haxhiu tha se nuk dëshiron ta paragjykojë nismën, por kërkoi që çdo veprim institucional pas vendimit të Hagës të jetë i menduar dhe i konsultuar.

“Tani më lejoni të sqaroj një gjë që konsideroj që është e rëndësishme dhe këtu pa paragjykim për projektligjin që është proceduar nga ana e grupit parlamentar të PDK-së. Mendoj që është shumë e rëndësishme secili veprim i institucioneve dhe grupeve parlamentare pas vendimit të Hagës. Refuzoj të mbështes çfarëdo iniciative që ka për qëllim vetëm me u duk që po bëjmë diçka. Nuk po dua me paragjyku nismën e Partisë Demokratike të Kosovës, por i ftoj të gjitha grupet parlamentare që mos të bëjmë propozime vetëm sa për t’u dukur që megjithatë po bëjmë diçka dhe që nuk kanë ndonjë peshë. Pra, në këtë fazë, pas vendimit të padrejtë të shkallës së parë, mendoj që secili nga ne duhet të jemi të kujdesshëm në kuptim të ndërmarrjes së veprimeve të duhura në kohë, por edhe vendime të drejta”, tha ajo.

Ajo ka kërkuar që, para ndërmarrjes së iniciativave ligjore, të konsultohen ekspertët e fushës dhe ekipet mbrojtëse të ish-krerëve të UÇK-së, duke thënë se, sipas informacioneve që ka, ekipet mbrojtëse nuk janë konsultuar për këtë projektligj

“Sa i përket projektligjit u munduam ta pyesim Tahirin se me kë jeni konsultuar, sepse mendoj që shumë më e drejtë të ishte që çfarëdo të bënim të vinim bashkërisht në Komisionin për Legjislacion dhe të draftonin një ndryshim-plotësim të ligjit. Ose që paraprakisht të paktën konsultohen ekspertët e fushës dhe ekipet e mbrojtjes. Nuk mendoj se bëjmë mirë nëse nuk i konsultojmë ekipet mbrojtëse për çfarëdo iniciative ligjore. Sipas informacioneve, ekipet mbrojtëse nuk janë konsultuar dhe është gabim”

Haxhiu ka bërë të ditur se projektligji tashmë është në procedurë parlamentare dhe se, pas pranimit të tij, është proceduar për mendim në Qeverinë e Kosovës.

“Megjithatë, tashmë ligjin e kemi në procedura kuvendore. Pra, në momentin kur unë kam pranuar projektligjin, ne e kemi proceduar për mendim në Qeveri. Ju e dini që sipas ligjit për nismat legjislative, çfarëdo nisme që procedohet në Kuvendin e Republikës së Kosovës, kërkohet mendim paraprak nga Qeveria. Me ligj, Qeveria ka të drejtë 30 ditë ta shqyrtojë në dispozicion. Në qoftë se nuk i shfrytëzon ato 30 ditë, ligji procedohet në seancë pa mendimin e Qeverisë.Ne kemi qenë në komunikim, unë personalisht, kam qenë në komunikim me kryeministrin Kurti, u zotova edhe sot në mbledhjen e kryesisë që sërish do ta adresojmë, që ky projektligj të trajtohet nga ana e Qeverisë me prioritet, sidomos kur tani i kemi ditët e numëruara nëse flasim për vendimin e Gjykatës Kushtetuese”, tha Haxhiu. /Telegrafi/