Category: Lajme

Sindikata e Punëtorëve të RTK-së ka njoftuar se greva e cila është mbajtur për disa ditë me radhë do të ndërpritet si rezultat i hapave që çuan në zhbllokim të situatës me buxhetin e transmetuesit publik dhe krijimin e mundësisë për adresimin e çështjeve të mbetura.

Përmes një komunikate për media, kjo sindikatë thotë se veprimi i Qeverisë e cila bëri të ditur sot se do të ndajë mjete nga kategoria e kursimeve, ka qenë i domosdoshëm për stabilitetin e institucionit dhe për ruajtjen e misionit të RTK-së si transmetues publik.

“RTK vazhdon të funksionojë pa Bord, pa Drejtor të Përgjithshëm dhe me pozita kyçe të paplotësuara, përfshirë Kryeredaktorin. Kjo gjendje kërkon veprim urgjent nga legjislatura e re e Kuvendit të Kosovës, për kompletimin e Bordit, zgjedhjen e Drejtorit të Përgjithshëm, emërimin e Kryeredaktorit, si dhe për rritjen e buxhetit, rritjen e domosdoshme dhe të panegociueshme të pagave, miratimin e ligjit të ri dhe zgjidhjen e çështjes së pronës dhe objektit të ri të RTK-së”, thuhet më tej në komunikatë.

“Sindikatës i takon gjithashtu të mirëpresë dhe falënderojë Qeverinë dhe Kryeministrin në detyrë për reflektimin ndaj kërkesave të Sindikatës dhe për ndërmarrjen e hapave që çuan në zhbllokimin e situatës me buxhetin. Ky veprim ka qenë i domosdoshëm për stabilitetin e institucionit dhe për ruajtjen e misionit të RTK-së si transmetues publik”.

Megjithatë, Sindikata e Punëtorëve të RTK-së ka paralajmëruar se nëse gjatë janarit të vitit të ardhshëm hasin sërish në situata të tilla, greva mund të rikthehet menjëherë dhe në çdo formë të nevojshme.

“Në emër të punëtorëve të RTK-së dhe të transmetuesit publik, shprehim mirënjohjen tonë të sinqertë për mbështetjen e vazhdueshme dhe përkushtimin e secilit që qëndroi pranë nesh gjatë kësaj periudhe sfiduese”, përfundon njoftimi.

Presidentja e Kosovës, Vjosa Osmani, ka vizituar sot ushtarët amerikanë në kampin Bondsteel, me rastin e Festës së Falënderimeve.

Në një postim në Facebook, Osmani ka thënë se u ka shprehur mirënjohjen për kontributin e tyre në sigurimin e paqes dhe stabilitetit në Kosovë dhe përtej.

Ajo ka theksuar se ushtarët amerikanë kanë qëndruar gjithmonë pranë Kosovës, si në ditët më të vështira, ashtu edhe në ato më të mira për popullin tonë.

”Ushtarët amerikanë kanë qenë gjithmonë pranë Kosovës, në ditët më të vështira dhe në ditët më të mira për popullin tonë. Sot, në Festën e Falënderimeve, pata nderin t’u bashkohem sërish në kampin Bondsteel për t’ua shprehur mirënjohjen tonë për kontributin e tyre për paqe dhe siguri në Kosovë dhe përtej”, ka shkruar ajo në Facebook.

Deputeti Shaip Kamberi gjatë një debati për buxhetin në Kuvendin e Serbisë foli për problemet që kanë qytetarët në Luginën e Preshevës, si pasivizimi i adresave, diskriminimi institucional ndaj shqiptarëve, moszbatimi i ligjit për përdorimin zyrtar të gjuhëve, etj.

Kamberi përmes një postimi në rrjetin social në Facebook ka bërë të ditur se e ka pyetur Ministrinë e Brendshme pse nuk i ka kthyer përgjigje në kërkesën e tij që komuna e Preshevës të marrë targën e saj të regjistrimit për automjetet motorike.

Gjithashtu Kamberi pyeti Qeverinë pse janë bllokuar paratë për Këshillin Kombëtar Shqiptar nga fondet e Qeverisë së Kosovës, si dhe çfarë po ndodh me iniciativën për një program për pranimin e personave nga pakicat kombëtare shqiptare dhe boshnjake në shërbimin policor në nivel lokal.

Edhe në seancën e kaluar, deputeti shqiptari foli me tone të ashpra në parlamentin serb.

“E dimë se ekziston diskriminim institucional ndaj shqiptarëve në Luginën e Preshevës. E dimë se ekziston praktika e pasivizimit të adresave, përmes së cilës mijëra njerëzve u hiqet e drejta zgjedhore dhe qytetare”, nënvizoi Kamberi.

Për më shumë lexoni të plotë fjalimin e Kamberit:

Para se Serbia të hyjë në BE, ajo më parë duhet të hyjë në Evropën e të drejtave, e jo vetëm në Evropën e tregut.

Zonja dhe zotërinj,

Sot po flas jo vetëm si deputet, por si zëri i dhjetëra mijëra qytetarëve të Preshevës, Bujanocit dhe Medvegjës njerëz, që prej më shumë se dy dekadash, jetojnë mes ligjit dhe padrejtësisë, mes garancive kushtetuese dhe jetës reale.

Para nesh është një Rezolutë që nuk është as ekstreme e as separatiste, por thellësisht, demokratike dhe evropiane.

Ajo kërkon vetëm një gjë: që shqiptarëve në Luginën e Preshevës t’u sigurohet barazia para ligjit dhe realizimin e plotë tëtë drejtave qytetare, politike dhe kombëtare.

Prandaj, kur flasim për këtë Rezolutë, ne flasim për drejtësi, e jo për politikë.

Për besim në institucione, e jo për kërcënime ndaj shtetit.

Për vlera evropiane, e jo për kufij.

Zonja dhe zotërinj,

Të gjithë ne e dimë se ekziston një problem.

E dimë se ekziston diskriminim institucional ndaj shqiptarëve në Luginën e Preshevës.

E dimë se ekziston praktika e pasivizimit të adresave, përmes së cilës mijëra njerëzve u hiqet e drejta zgjedhore dhe qytetare.

E dimë se ka moszbatim të ligjit për përdorimin zyrtar të gjuhëve, mosnjohje të diplomave, mungesë të mbishkrimeve dygjuhëshe, mungesë të përfaqësimit në polici, gjyqësor, prokurori dhe në shërbimet inspektuese.

E dimë edhe që zhvillimi ekonomik i rajonit neglizhohet sistematikisht, ndërsa të rinjtë po largohen sepse nuk shohin të ardhme në një vend ku trajtohen si qytetarë të dorës së dytë.

Prandaj, mos të themi sot se “nuk është momenti”, sepse ky moment pritet tashmë më shumë se njëzet vjet.

Kur kërkojmë ndalimin e pasivizimit të adresave, ne nuk kërkojmë mëshirë, por respektim të së drejtës.

Kur kërkojmë përdorim zyrtar të gjuhës dhe simboleve, ne nuk kërkojmë privilegje, por trajtim të barabartë.

Kur kërkojmë që shqiptarët të jenë të përfaqësuar në mënyrë të barabartë në institucione, ne nuk kërkojmë poste, por përfaqësim të drejtë në shtetin ku edhe ata janë qytetarë.

Kjo Rezolutë bën thirrje për krijimin e një trupi të pavarur parlamentar, i cili, në bashkëpunim me OSBE-në dhe shoqërinë civile, do të hetojë pasojat e pasivizimit dhe do të propozojë masa për kthimin e të drejtave të mijëra njerëzve të privuar nga to.

Ajo bën thirrje që të njihen përfundimisht diplomat dhe kualifikimet arsimore të fituara në Kosovë, që të respektohet e drejta për gjuhën shqipe dhe të sigurohet përfaqësim i barabartë në shërbimet shtetërore.

A nuk është kjo ajo që çdo shtet evropian duhet të bëjë?

Nëse dëshirojmë që Serbia të hyjë në Bashkimin Evropian, ajo më parë duhet të hyjë në Evropën e të drejtave, e jo vetëm në Evropën e tregut.

Zonja dhe zotërinj deputetë,

Që nga viti 2001, nga nënshkrimi i Planit për zgjidhjen e krizës në Preshevë, Bujanoc dhe Medvegjë, përmes marrëveshjeve të viteve 2009 dhe 2013, e deri te Plani i Veprimit i vitit 2022, shtet ii Serbisë është zotuar se do ta integrojë komunitetin shqiptar.

Të gjitha këto zotime ekzistojnë në letër, por në praktikë ato janë thjesht fjalë të vdekura.

Sot, në vitin 2025, funksionarë të Trupit Koordinues publikisht mohojnë edhe ekzistencën e vetë Planit të Veprimit.

Kjo nuk është vetëm papërgjegjësi – është edhe fyerje për ata që besojnë në dialog dhe institucione.

Prandaj sot, Kuvendi Popullor ka mundësinë të marrë përgjegjësinë.

Të tregojë se shteti nuk është armik ndaj qytetarëve të vet, por garantues i të drejtave të tyre.

Të rikthejë besimin që është rrënuar për dekada.

Zonja dhe zotërinj,

Lugina e Preshevës kërkon respektimin e rregullave që tashmë ekzistojnë.

Nuk kërkon premtime të reja, por zbatimin e atyre të dhëna para 20 vjetësh.

Nuk kërkon më shumë, por nuk do të pranojë asgjë më pak se barazinë.

Prandaj, sot, duke mbështetur këtë Rezolutë, ne nuk miratojmë një akt në dobi të shqiptarëve, por një akt në dobi të drejtësisë, demokracisë dhe Serbisë evropiane.

Presidenti i Serbisë, Aleksandar Vuçiq, tha sot se vendi nuk ka marrë asnjë sinjal nga Shtetet e Bashkuara të Amerikës në lidhje me Industrinë e Naftës së Serbisë (NIS) dhe se rafineria do të mbyllet të shtunën ose të dielën.

Serbia ka kërkuar nga Departamenti i Thesarit i ShBA-ve një licencë që lejon NIS-in të operojë edhe pse është nën sanksione për shkak të pronësisë së saj ruse.

Mirëpo, deri më tani ShBA-të nuk kanë kthyer përgjigje.

“Të shtunën ose të dielën, pastaj rafineria ndoshta do të duhet të mbyllet. Nuk kemi marrë asnjë sinjal nga SHBA-të se do të marrim një licencë për të rifilluar prodhimin e derivateve të naftës. Por çfarë duhet të bëjmë”, tha presidenti serb Aleksandar Vuçiq në një fjalim të përbashkët me kryeministrin hungarez Viktor Orban.

Siç shton Vuçiqi, sipas njohurive të Beogradit, Departamenti i Thesarit i ShBA-ve do të merrte një vendim pozitiv për dhënien e licencës, por ky vendim nuk ka ardhur.

“Ende nuk ka një vendim të tillë. Kjo na vë në një pozicion të vështirë. Jemi të përgatitur. Qytetarët nuk kanë pse të shqetësohen për ngrohjen, energjinë elektrike apo pompat. Ne thamë se do të na jepnin kohë për t’i dhënë pronarit të vërtetë [rusëve, v.j] kohë për të shitur pronën e tij, dhe ju keni garancitë tona se gjithçka do të jetë ashtu siç kërkuat. Nëse kjo nuk është e mjaftueshme për ju, atëherë kam frikë se pas gjithë kësaj fshihen disa gjëra të tjera”, tha Vuçiqi.

ShBA-ja vendosi sanksione ndaj Industrisë së Naftës së Serbisë më 1 tetor të këtij viti për shkak të pronësisë ruse të kompanisë. Kompanitë ruse Gazprom Neft dhe Gazprom zotërojnë mbi 50 për qind të aksioneve të NIS-it.

Pak para se Kuvendi Komunal i Prishtinës të mbajë seancën e jashtëzakonshme për të hyrat vetanake dhe buxhetin, transportuesit publik kanë nisur protestën para objektit të Komunës.

Një pjesë e shiritit të rrugës është e bllokuar nga autobusët.

Trafiku Urban dhe operatorët privatë të transportit kanë pezulluar punën si pasojë e mos pagesës. Situata ka shkaktuar kolona të gjata dhe vështirësi për qytetarët në qarkullimin urban.

Asamblistët e Vetëvendosjes kanë thënë do të marrin pjesë në seancën e jashtëzakonshme të Kuvendit Komunal të Prishtinës, dhe do të votojnë pro bartjes së të hyrave vetanake të kryeqytetit.

Një kontroll rutinë në pikëkalimin kufitar në Vermicë ka zbuluar një tentim të shmangies së detyrimeve doganore, ku janë gjetur të padeklaruara 4 iPhone 17 Pro Max dhe pjesë të tjera për telefona, me vlerë mbi 5 mijë euro.

Mallrat janë konfiskuar dhe ndaj personit të përfshirë janë iniciuar procedurat për kundërvajtje doganore.

Dogana e Kosovës njofton se do të vazhdojë forcimin e kontrolleve për të garantuar konkurrencë të drejtë dhe mbrojtje të tregut.

Njoftimi:

Vermice 27 nentor 2025

Gjatë një kontrollit rutinë në pikëkalim kufitar është zbuluar dhe parandaluar një rast i tentim-shmangies së detyrimeve doganore.

Gjatë inspektimit të detajuar, njësitë doganore kanë gjetur 4 telefona të rinj IPHONE 17 PRO MAX, si dhe pjesë të ndryshme për telefona mobil, të cilat ishin të padeklaruara nga pala përgjegjëse.

Vlera totale e mallit të sekuestruar është mbi 5000 mije euro.

Mallrat e padeklaruara janë konfiskuar, ndërsa ndaj personit të përfshirë janë iniciuar procedurat për kundërvajtje doganore, në përputhje me dispozitat ligjore në fuqi.

Dogana e Kosovës mbetet e përkushtuar në forcimin e kontrolleve, mbrojtjen e tregut dhe garantimin e konkurrencës së drejtë, duke parandaluar çdo tentim të shmangies së detyrimeve doganore.

Presidenti francez, Emmanuel Macron, ka njoftuar se mijëra vullnetarë të moshës 18 dhe 19 vjeç do të fillojnë të shërbejnë në ushtri vitin e ardhshëm, ndërsa ka prezantuar një program të ri që synon të forcojë forcat e armatosura të Francës për t’iu përgjigjur shqetësimeve në rritje mbi kërcënimin e Rusisë ndaj vendeve evropiane.

Vullnetarët e rinj do të shërbejnë në uniformë për 10 muaj vetëm brenda territorit të Francës, jo në operacione ushtarake jashtë vendit, ka bërë të ditur Macron në një fjalim në bazën ushtarake Varces, në Alpet Franceze.

“Një shërbim i ri kombëtar do të krijohet gradualisht, duke filluar nga vera e ardhshme”, ka thënë Macron.

“Në këtë botë të pasigurt ku pushteti mbizotëron mbi ligjin dhe lufta është një realitet gjithmonë i pranishëm, kombi ynë nuk ka të drejtë të ketë frikë, panik, papërgatitje ose përçarje”, ka shtuar ai.

Programi do të nisë me 3,000 të rinj që do të zgjidhen verën e ardhshme dhe gradualisht do të rritet në 10,000 në vit deri në vitin 2030. Franca ka ambicie të arrijë deri në 50,000 vullnetarë në vit deri në vitin 2035, një shifër që do të përshtatet në varësi të kontekstit global, ka bërë të ditur Macron.

Vullnetarët do të kenë status ushtarak dhe do të marrin paga dhe pajisje. Pas një trajnimi njëmujor, ata do të caktohen për nëntë muaj në një njësi ku do të kryejnë të njëjtat misione si personeli ushtarak aktiv, ka sqaruar presidenti francez.

Sot, rreth orës 10:05, Policia e Kosovës ka pranuar informacion se një 32-vjeçar në Gjilan ka dalë nga shtëpia rreth orës 07:00 dhe që nga ajo kohë nuk dihet vendndodhja e tij.

Sipas gazetës Sinjali zëdhënësi i Policisë për rajonin e Gjilanit, Valon Osmani bëri të ditur se “gjatë veprimeve të para hetimore, vetura e personit është gjetur në afërsi të pendës së fshatit Livoq.”

“Njësitë policore relevante, së bashku me ekipet e Zjarrfikësve dhe të Emergjencës, kanë dalë menjëherë në vendin e ngjarjes dhe janë duke ndërmarrë të gjitha veprimet e nevojshme për sqarimin e rrethanave dhe gjetjen e personit. Për rastin është njoftuar Prokurori i Shtetit, me vendimin e të cilit është iniciuar rasti “Person i zhdukur”“, tha tutje ai.

Dogana e Kosovës ka njoftuar se, gjatë një kontrollit rutinë në pikëkalimin kufitar në Vërmicë, është zbuluar dhe parandaluar një rast i tentim-shmangies së detyrimeve doganore.

Gjatë inspektimit të detajuar, njësitë doganore kanë gjetur 4 telefona të rinj iPhone 17 Pro Max, si dhe pjesë të ndryshme për telefona mobil, të cilat ishin të padeklaruara nga pala përgjegjëse.

Sipas Doganës, vlera totale e mallit të sekuestruar është mbi 5000 euro.

“Mallrat e padeklaruara janë konfiskuar, ndërsa ndaj personit të përfshirë janë iniciuar procedurat për kundërvajtje doganore, në përputhje me dispozitat ligjore në fuqi.

Dogana e Kosovës mbetet e përkushtuar në forcimin e kontrolleve, mbrojtjen e tregut dhe garantimin e konkurrencës së drejtë, duke parandaluar çdo tentim të shmangies së detyrimeve doganore” thuhet në njoftim.

Në fund të vitit të ardhshëm do t’i kemi plumbat e parë që prodhohen në Kosovë, tha ministri në detyrë i Mbrojtjes, Ejup Maqedonci.

Pas vendimit të qeverisë në detyrë për shpronësimin e pronave të ish-ndërmarrjes “Ereniku” në Gjakovë, Maqedonci tha se atje do të ndërtohet zona industriale e mbrojtjes.

Sipas tij, pritjet janë që deri në fund të vitit të ardhshëm të funksionalizohet fabrika për prodhimin e municioneve, të cilat do t’i shërbejnë për nevoja të ushtrisë, policisë dhe për eksport.

“Forca e Sigurisë së Kosovës është në një dimension krejt tjetër. Është në një zhvillim dhe standard krejt tjetër. Krahasohet me forcat e tjera që i kemi në rajon dhe më gjerë. Është e gatshme që përveç mbrojtjes së territorit, jetës së qytetarëve, të kontribuojë edhe për paqe dhe siguri kudo në botë… Presim që deri në fund të vitit të ardhshëm kjo fabrikë të funksionalizohet dhe të fillojë prodhimin e këtyre municioneve. Në fund të vitit të ardhshëm do t’i kemi plumbat e parë që do të prodhohen në Kosovë nga një fabrikë shtetërore e Kosovës, për nevoja të ushtrisë, policisë dhe nevoja të eksportit”, tha ai, në konferencë për media pas mbledhjes së qeverisë në detyrë.

Duke folur për arrestimin e ish pjesëtarëve të Ushtrisë Çlirimtare të Kosovës në Serbi, Maqedonci tha se këtë çështje e kanë ngritur edhe me aleatët e vendit.

Përkitazi me këtë, Maqedonci akuzoi Serbinë për qasje hegjemoniste ndaj Kosovës.

“Ne si Ministri e Mbrojtjes, duke qenë që përfaqësojmë trashëgiminë ushtarake të popullit tonë, në këtë rast të UÇK-së, jemi të angazhuar dhe diskutojmë sa herë që kemi mundësi me partnerët tanë. Ne ngremë çështjen e arrestimit të pjesëtarëve të UÇK-së. Mirëpo përtej arrestimit të ish pjesëtarëve të UÇK-së, Serbia vazhdon të zbatojë qasje hegjemoniste në raport me vet ekzistencën e shtetit tonë. Nuk është problem vetëm një pjesëtar i UÇK-së, por është problem se Serbia vazhdon të ketë qasje hegjemoniste në raport me vendin tonë”, shtoi Maqedonci.

Në anën tjetër, Maqedonci pas pyetjeve të gazetarëve u përgjigj edhe në lidhje me dezertimin e një ushtari të FSK-së, i cili pas trajnimit në ShBA nuk ishte kthyer në Kosovë.

Ai tha se i njëjti është larguar nga FSK-ja dhe se janë në kontakt me organet në ShBA për kthimin e tij në Kosovë.

Kurse sa i përket dyshimeve se një pjesëtar i FSK-së dyshohet për sulm seksual gjatë një trajnimi në Britani të Madhe, Maqedonci u shpreh më i rezervuar për të komentuar, pasi tha se ende s’ka një verdikt final nga komisionet përkatëse të FSK-së.

“Së pari ky rast që ka qëndruar dhe vazhdon të qëndrojë ai pjesëtari në ShBA, ka ndodhur diku para pesë muajve. Është një rast i izoluar dhe rast që nuk ndodh vetëm te ne, por edhe në shumë vende ku ka lëvizje të ushtarakëve në shtetet e ndryshme. Ne kemi pasur një kontingjent prej më shumë se 130 pjesëtarëve të FSK-së në trajnim në ShBA. Këtë rastin e izoluar e kemi adresuar menjëherë te autoritetet e ShBA-së dhe ambasada jonë. Ai menjëherë është larguar nga FSK. Kemi vendosur kontaktet për kthimin e tij në Kosovë. Në rastin më të mirë për të, ai askund nuk mund ta legjitimojë qëndrimin e tij në ShBA… Kurse për pjesëtarin që dyshohet për sulm seksual në Britani të Madhe, ne kemi ngritur të gjitha komisionet dhe strukturat që merren me këto raste. Ende nuk kemi ndonjë verdikt final”, theksoi ai.