Category: Lajme

Një ngjarje e rëndë ka ndodhur në lagjen nr. 17 të qytetit të Durrësit, ku një 76-vjeçar ka tentuar të vriste bashkëshorten e tij duke e goditur me një send të fortë.

Shërbimet e Komisariatit të Policisë Durrës, pas marrjes së njoftimit për rastin e dhunës në familje, shkuan menjëherë në vendngjarje, duke parandaluar përshkallëzimin e mëtejshëm të dhunës me pasoja fatale për jetën.

Në bashkëpunim me Specialistët për Hetimin e Krimeve ndaj Personit në Drejtorinë Vendore të Policisë Durrës, u arrestua në flagrancë shtetasi A. R., 76 vjeç, i dyshuar si autor i ngjarjes.

Sipas veprimeve të para hetimore, gjatë një konflikti për motive të dobëta, 76-vjeçari ka ushtruar dhunë fizike ndaj bashkëshortes së tij, shtetases F. D., 70 vjeçe, duke e goditur me një shkop druri në kokë. Ndërhyrja e menjëhershme e Policisë parandaloi përshkallëzimin e dhunës me pasoja të rënda për jetën.

Si pasojë e goditjeve, 70-vjeçarja ka pësuar dëmtime të rënda fizike dhe u transportua menjëherë në Spitalin e Traumës Tiranë për ndihmë mjekësore.

Grupi hetimor, nën drejtimin e Prokurorisë, vijon punën për sqarimin e plotë të rrethanave të ngjarjes.

Nëntogerja e Forcës së Sigurisë së Kosovës, Lirijona Bajraktari ka zënë vendin e parë në trajnimin ndërkombëtar ushtarak të mbajtur në Abu Dhabi të Emirateve të Bashkuara Arabe.

Ceremonia e trajnimit ushtarak organizuar nga Shkolla Ushtarake për Femra “Khawla Military School”, e që zgjati dy muaj u mbajt të premten.

Lidhur me këtë arritje të Kosovës ka shkruar edhe ambasadori i vendit tonë në Abu Dabi, Xhabir Hamiti.

“Fotoja e Nëntogerës sonë, Lirijona Bajraktari, teksa pranon çmimin e vendit të parë në kursin dymujor ushtarak në Abu Dhabi, është shpërndarë gjerësisht në mediat shtetërore dhe rrjetet sociale të Emirateve të Bashkuara Arabe. Krenarë me ty, Lirijona!”, shkroi ai.

Kosova në këtë aktivitet ndërkombëtar u përfaqësua nga tre oficere të Forcës së Sigurisë së Kosovës, ndërsa Shkolla Ushtarake “Khaëla Military School” vepron nën patronazhin e Sheikha Fatima bint Mubarak.

Një rast dhunimi ndaj një të miture dyshohet se ka ndodhur në Malishevë.

Policia e Kosovës tha se viktima e mitur në prezencë të punëtorit për punë sociale, ka raportuar se para disa muajsh ka qenë në lidhje me një person dhe kanë pasur marrëdhënie seksuale.

“DHUNIM – Malishevë 05.12.2025 – NN. Viktima femër kosovare- e mitur në prezencë të punëtorit për punë sociale, ka raportuar se para disa muajsh ka qenë në lidhje me një person dhe kanë pasur marrëdhënie seksuale. Lidhur me rastin është njoftuar prokurori. Rasti nën hetime”, tha policia.

Gjykata e Lartë e Shteteve të Bashkuara ka vendosur të marrë në shqyrtim një çështje të rëndësishme kushtetuese: nëse fëmijët e lindur në territorin amerikan nga prindër që ndodhen ilegalisht ose me viza të përkohshme kanë të drejtën kushtetuese për shtetësi amerikane.

Çështja lidhet me urdhrin ekzekutiv të nënshkruar nga presidenti Donald Trump, i cili synon t’i japë fund të drejtës së shtetësisë së lindjes për këto kategori fëmijësh. Urdhri u bllokua nga gjykatat federale, të cilat vlerësuan se bie ndesh me Amendamentin e 14-të të Kushtetutës.

Gjykata e Lartë ende nuk ka caktuar një datë për seancat, ndërsa vendimi pritet pas disa muajsh.

Prej afro 160 vitesh, Amendamenti i 14-të garanton se çdo person i lindur në SHBA është shtetas amerikan, me përjashtim të fëmijëve të diplomatëve dhe personelit të forcave të huaja.

Administrata Trump argumenton se fraza “i nënshtrohen juridiksionit amerikan” përjashton fëmijët e imigrantëve të përkohshëm ose të paligjshëm. Ndërkohë, përfaqësuesit e paditësve thonë se asnjë president nuk mund të ndryshojë këtë garanci kushtetuese të shtetësisë së lindjes.

Sipas Pew Research Center, në vitin 2016 rreth 250,000 foshnja lindën në SHBA nga prindër pa shtetësi amerikane. Ndërsa në vitin 2022, numri i shtetasve amerikanë të lindur nga prindër pa dokumente arriti në 1.2 milionë.

Një studim i Migration Policy Institute paralajmëron se shfuqizimi i së drejtës së shtetësisë së lindjes mund të rrisë popullsinë e paautorizuar në SHBA me 2.7 milionë deri në vitin 2045 dhe 5.4 milionë deri në 2075.

Agjencia e Kombeve të Bashkuara për energjinë bërthamore ka njoftuar se mburoja mbrojtëse e termocentralit bërthamor në Çernobil është jofunksionale për shkak të dëmeve të shkaktuara nga dronët. Ukraina e fajëson Rusinë për këtë situatë.

Bëhet fjalë për mburojën e njohur si “Konvoji i Sigurisë” ose Arka, e ndërtuar pas katastrofës bërthamore në Çernobil më 1986, me qëllim të ndalimit të përhapjes së rrezatimit. Agjencia Ndërkombëtare për Energjinë Atomike (IAEA), një agjenci e OKB-së, njoftoi javën e kaluar se sulmi me dron në shkurt të këtij viti kishte dëmtuar strukturën e mburojës, raporton Reuters.

Drejtori i IAEA-s, Rafael Grossi, deklaroi se mburoja ka humbur funksionin kryesor të sigurisë, por nuk ka pasur dëmtime të përhershme të strukturës mbajtëse apo të sistemit të monitorimit. Ai shtoi se janë kryer disa riparime, por se është e nevojshme një ndërhyrje gjithëpërfshirëse për të parandaluar degradimin e mëtejshëm dhe për të siguruar sigurinë bërthamore afatgjatë.

Më 14 shkurt të këtij viti, OKB-ja njoftoi autoritetet ukrainase se centrali ishte goditur nga një dron me kokë luftarake shumë-eksplozive, duke shkaktuar zjarr dhe dëmtim të mburojës në zonën rreth reaktorit numër katër, i cili ishte shkatërruar në katastrofën e vitit 1986. Rusia ka mohuar pretendimin e Ukrainës se ishte përgjegjëse për këtë sulm me dron.

Në shkurt, OKB-ja bëri të ditur se niveli i rrezatimit kishte mbetur normal dhe stabil, pa raportime për rritje të tij.

Katastrofa e vitit 1986 shkaktoi përhapjen e rrezatimit në Evropë, duke detyruar autoritetet sovjetike të përballeshin me pasojat për një numër të madh njerëzish dhe pajisjesh. Reaktori i fundit funksional i centralit u mbyll 25 vjet më parë.

Rusia pushtoi këtë objekt dhe zonën përreth një muaj pas fillimit të agresionit ndaj Ukrainës në shkurt të vitit 2022.

Selektori i Kosovës, Franco Foda, ka reaguar pas hedhjes së shortit të fazës së grupeve për Kupën e Botës 2026, ku “Dardanët” mund të përballen me ShBA-të, Australinë dhe Paraguain nëse arrijnë të sigurojnë kualifikimin.

Tekniku gjerman e cilësoi grupin e mundshëm si “shumë interesant”, por theksoi se fokusi i tij tani është te ndeshjet e play-off-it. Kosova do të luajë në mars kundër Sllovakisë dhe, në rast fitoreje, mund të përballet me Turqinë ose Rumaninë për të siguruar një vend në Botëror.

“Për ne, gjëja më e rëndësishme tani është të kualifikohemi. Na mbeten dy ndeshje, njëra shumë e rëndësishme kundër Sllovakisë, dhe duhet ta fitojmë atë. Nëse arrijmë të fitojmë, do të luajmë kundër Turqisë ose Rumanisë, dhe këto janë tani ndeshjet më të rëndësishme për ne,” deklaroi Foda.

Ai shtoi se, edhe pse grupi i mundshëm në Kupën e Botës është shumë interesant, prioriteti mbetet kualifikimi.

“Kjo është një ngjarje fantastike dhe atmosfera ishte e mrekullueshme. Nëse kualifikohemi për Botëror, do të kemi një grup të balancuar dhe gjithçka do të jetë e mundur. Por siç e përmenda, gjëja më e rëndësishme tani është të kualifikohemi, dhe nëse e arrijmë, do të jemi shumë të gëzuar për këto ndeshje,” përfundoi selektori i Kosovës.