Category: Lajme

Sekretarja e PDK-së, Vlora Çitaku ka kërkuar rinumërim të plotë të votave, duke thënë se Kosova ka ndërtuar me shumë mund standardin e zgjedhjeve të lira dhe të ndershme.

Ajo thekson se heshtja apo mbrojtja e parregullsive nuk është opsion dhe nuk është as kompromis.

“Rinumërim të plotë të votave. Hetim të hollësishëm. Përgjegjësi penale dhe politike, si dhe rikthim të besimit të qytetarëve. Kosova ka ndërtuar me shumë mund standardin e zgjedhjeve të lira dhe të ndershme. Prandaj, çdo indikacion për cenim apo manipulim të votës është i patolerueshëm dhe kërkon reagim të menjëhershëm e të pakompromis institucional. Demokracia ndërtohet mbi besim, transparencë dhe zbatim të ligjit. Heshtja apo mbrojtja e parregullsive nuk janë opsion. Këtu nuk ka kompromis”, shkruan Çitaku në Facebook.

Kryeministri i Spanjës, Pedro Sánchez, ka anuluar pjesëmarrjen e tij në Forumin Ekonomik Botëror në Davos, që zhvillohet nga 19 deri më 23 janar, pas aksidentit tragjik që ndodhi në Adamuz, në provincën Cordoba.

Sánchez ndodhet aktualisht në Cordoba dhe ka anuluar të gjithë axhendën e së hënës për të monitoruar nga afër situatën, pas daljes nga shinat të dy trenave me shpejtësi të lartë në pasditen e së dielës.

Autoritetet vazhdojnë hetimet për shkaqet e incidentit dhe bilancin e viktimave.

Në Qendrën e Numërimit dhe Rezultateve është duke vazhduar numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen.

Nga 914 vendvotime që kanë shkuar në rinumërim, deri tani janë numëruar rreth 94 për qind e tyre.

Sipas të dhënave paraprake, në listën e LDK-së po vërehen mospërputhje të theksuara në numrin e votave për disa kandidatë, çka ka ngritur shqetësime për manipulim të mundshëm gjatë procesit fillestar të numërimit.

E në mesin e tyre është edhe kandidati për deputet nga kjo parti, Driton Selmanaj.

Sipas rezultateve të deritanishme të rinumërimit, kandidati Driton Selmanaj rezulton me rreth 1,048 Vota krahasuar me numërimin fillestar.

Lidhur me këtë ai në një prononcim për Indeksonline ka një përgjigje.

‘’Unë mendoj që është një skemë e organizuar e për të cilën po pres shumë që prokuroria dhe hetuesia të japin fjalën e tyre, unë jam në dispozicion të plotë të krejt organeve hetuese që kësaj pune me i shku deri në fund’’, thotë fillimisht Selmanaj.

Ai thotë se edhe ai si kandidat por edhe LDK-ja dega në Prizren nuk ka asnjë lidhje të vetme me këtë proces abuzimi.

‘’Me bindje e them që unë si kandidat por edhe LDK-ja dega në Prizren nuk e ka asnjë lidhje të vetme me këtë proces abuzumi por tash po del që ekzistuar një skemë mire e organizuar. Është lënduar integriteti im personal pasi që unë që mbi 30 vite jam angazhuar për mbrojtën e votës edhe kur skam qenë fare në politikë’’, thotë Selmanaj për Indekosnline

Kam biseduar me komisionarët e LDK- së por që ata të gjithë distancohen nga ky rast por tash është rast hetimi për organet e drejtësisë, ka shtuar në fund ai.

Anëtari i KQZ-së nga radhët e PDK-së, Ilir Gashi ka thënë se me kërkesën edhe të kryetarit të PDK-së, Bedri Hamza do të propozojnë në mbledhjen e sotme të KQZ-së që të merret vendim për rinumërim të të gjitha votave.

Pasi që sipas tyre, kjo është e vetmja mënyrë për të ruajtur dhe njxerrë të vërtetën mbi integritetin e votës së secilit qytetar.

“Sot në ora 13:30 mbahet mbledhja e KQZ-së. Me kërkesë të Kryetarit, z. Bedri Hamza, si përfaqësues i PDK-së në KQZ, do të propozoj që KQZ të marrë vendim për numërim tërësor të votave, si e vetmja mënyrë për të ruajtur dhe nxjerrë të vërtetën mbi integritetin e votës së secilit qytetar. Ne do ta nxjerrim mbi tavolinë votën e çdo qytetari dhe pa asnjë dyshim do të shkojë aty ku ata kanë votuar. Transparenca është garancia më e fortë e demokracisë dhe e vërteta nuk mundë të humbet kur çdo gjë është e hapur. Transparencë. Integritet. Demokraci”, ka shkruar Gashi.

Komuna e Rahovecit njofton fermerët për hapjen e thirrjes për aplikim në kuadër të Pagesave Direkte për gjashtëmujorin e dytë të vitit 2025, përmes Ministrisë së Bujqësisë, Pylltarisë dhe Zhvillimit Rural dhe Agjencisë për Zhvillimin e Bujqësisë (AZHB).

Përkrahja financiare mbulon kategoritë e mëposhtme:

Pagesa Direkte për qumësht sipas kategorive të cilësisë;
Pagesa Direkte për therjet e raportuara të gjedhit;
Pagesa Direkte për viçat për majmëri;
Pagesa Direkte për zogjtë për majmëri (brojlerë);
Pagesa Direkte për akuakulturë.

Afati i aplikimit është nga 19 janar 2026 deri më 18 shkurt 2026, ora 16:00.

Për më shumë informacione dhe për të aplikuar, fermerët mund të vizitojnë linkun e AZHB-së:
https://azhb-rks.net/sq/thirrje-per-aplikim.

Kandidatja për deputete e PDK-së, Blerta Deliu Kodra, ka reaguar lidhur me dyshimet për manipulime në vota, duke theksuar se një gjë e tillë është një nga goditjet më të rënda ndaj demokracisë.

Ajo ka deklaruar se verifikimi i plotë i votës dhe rinumërimi janë të domosdoshëm për të zbardhur realitetin dhe për të garantuar respektimin e vullnetit të qytetarëve.

“Asgjë nuk e dëmton demokracinë më shumë sesa manipulimi i zgjedhjeve. Prandaj, verifikimi i plotë i votës dhe rinumërimi i procesit janë të domosdoshëm për të zbardhur realitetin. Çdo tentativë për të ndryshuar vullnetin qytetar duhet të trajtohet menjëherë dhe të pasohet me ndëshkim. Kjo është e vetmja mënyrë për të ndaluar keqpërdorimet dhe për të rikthyer besimin te votuesit”.

Kryetari i Partisë Demokratike Turke të Kosovës (KDTP), Fikrim Damka, ka reaguar lidhur me procesin e rinumërimit të votave pas zgjedhjeve, duke theksuar se vullneti i qytetarëve nuk mund dhe nuk duhet të cenohet.

Në një deklaratë për media, Damka tha se po e ndjek me vëmendje të lartë procesin e rinumërimit, duke nënvizuar se çdo ndërhyrje pas mbylljes së kutive të votimit përbën shkelje të drejtpërdrejtë të vullnetit të lirë të popullit.

Reagimi i plotë:

Deklaratë për Media nga Kryetari i KDTP-së:

“Vullneti i popullit është i paprekshëm” ​Të nderuar qytetarë, të dashur bashkëveprimtarë; ​Unë jam duke ndjekur me përpikëri të madhe procesin e rinumërimit që po vazhdon pas procesit zgjedhor. Dua të bëhet e ditur se vullneti i popullit nuk është i hapur për asnjë ndërhyrje pasi të mbyllen kutitë e votimit. Çdo votë është një tregues konkret i besimit, mundit dhe djersës së popullit tonë ndaj nesh. Çdo dorë që zgjatet drejt vullnetit të lirë që del nga kutia e votimit, nuk është një mosrespektim vetëm ndaj personit tim, por drejtpërdrejt ndaj mundit dhe vullnetit të përbashkët të komunitetit turk të Kosovës. ​Sulmet dhe pretendimet e pabaza që kanë shënjestruar personin tim kohët e fundit kanë vetëm një qëllim: të hedhin hije mbi sukseset e arritura dhe të dobësojnë vullnetin tonë shoqëror.

Ne jemi gjithmonë të hapur për çdo kritikë konstruktive dhe me qëllim të mirë; megjithatë, është e pamundur që këto atentate ndaj reputacionit, të kryera me qëllime të ndyra, të na kthejnë nga rruga jonë. E vërteta do ta gjejë patjetër vendin e saj, si në ndërgjegjen e popullit, ashtu edhe para drejtësisë.

​Askush nuk duhet të ketë dyshim se Partia Demokratike Turke e Kosovës (KDTP) do të përfaqësohet sërish me dy deputetë në parlament dhe në komuna; nën udhëheqjen time si Kryetar i Përgjithshëm, ne do të vazhdojmë rrugën tonë me vendosmëri së bashku me të gjitha degët tona. Me fuqinë institucionale të partisë sonë, mundin e organizatave tona në teren dhe sakrificën e bashkëveprimtarëve tanë, ne do të vazhdojmë të ruajmë si përfaqësimin tonë në parlament, ashtu edhe qëndrimin tonë të fortë para popullit tonë.

Unë marr përsipër me të njëjtën vendosmëri përgjegjësinë për ta forcuar KDTP-në edhe më shumë dhe për ta dërguar drejt së ardhmes në unitet dhe vëllazëri. ​Pavarësisht rezultateve të zgjedhjeve, ne kurrë nuk do të heqim dorë nga vullneti ynë për t’i shërbyer popullit tonë. Ne nuk do të bëjmë kompromis në asnjë rrethanë me vendosmërinë tonë për të mbrojtur të drejtat dhe të ardhmen e komunitetit turk të Kosovës”, thuhet në reagimin e tij.

Në Qendrën e Numërimit dhe Rezultateve është duke vazhduar numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen.

Nga 914 vendvotime që kanë shkuar në rinumërim, deri tani janë numëruar rreth 94 për qind e tyre.

Sipas të dhënave paraprake, në listën e PDK-së po vërehen mospërputhje të theksuara në numrin e votave për disa kandidatë, çka ka ngritur shqetësime për manipulim të mundshëm gjatë procesit fillestar të numërimit.

Lidhur me këtë ka reaguar edhe kandidatja për deputete nga kjo parti, Jona Hoxhaj. Ajo ka thënë se është më e dëmtuar në këtë proces, madje sipas saj janë hequr edhe votat e familjës së saj.

Postimi i plotë:

Si ish kandidate për deputete dhe aktiviste e partisë, e dënoj plotësisht aktin e manipulimit të votave dhe parregullsitë që u evidentuan nga procesi i rinumërimit të votave në Prizren.

Është i papranueshëm çdo devijim i vullnetit qytetar dhe çdo cenim i votës, e cila është një e drejtë themelore e secilit qytetar.

Vota e familjarëve të mi, e miqve, shoqeve e shokëve të mi, e bashkëpartiakëve të mi është prekur, është tjetërsuar dhe, në mënyrë të padrejtë, më është hequr. Kjo është një padrejtësi jo vetëm ndaj meje, por ndaj secilit që besoi dhe shprehu vullnetin e tij demokratik.

Ndihem thellësisht falënderuese për mbështetjen nga secili prej jush që më keni shkruar gjatë kësaj periudhe.

Duke qenë kandidatja më e dëmtuar nga lista e Prizrenit, kushdo që mban përgjegjësi për këtë dëm ka cenuar drejtpërdrejt të drejtën e njerëzve që besuan tek unë për të shprehur lirshëm vullnetin e tyre.

Ky proces më motivon edhe më shumë të punoj më fort, drejtë, me dinjitet dhe, mbi të gjitha, të ec me kokën lart. Rruga që kam zgjedhur është e gjatë dhe standardi që ndjek është i lartë.

Besoj se PDK-ja sikur në historinë e saj shumëvjecare politike, do të di ta adresojë përgjegjësinë, llogaridhënien dhe rikthej besimin qytetar. Demokrcia është e shenjtë dhe si të tillë e kemi të gjithë për obligim ta mbrojmë dhe kultivojmë.

E juaja,

Jona

Komuna e Drenasit ka bërë të ditur se Ministria e Bujqësisë, Pylltarisë dhe Zhvillimit Rural, përmes Agjencisë për Zhvillimin e Bujqësisë (AZHB), do të vazhdojë të mbështesë sektorin e blegtorisë dhe bujqësisë përmes pagesave direkte për vitin 2025.

Si pjesë e këtij programi, mbështetja jepet për këto aktivitete dhe kultura bujqësore: pagesa direkte për qumësht, therjet e raportuara të gjedhit, viçat për majmëri, zogjtë për majmëri (brojlerët) dhe akuakulturë.

Afati i aplikimit fillon më 19 janar 2026 dhe mbaron më 18 shkurt 2026, ora 16:00.

Kriteret që duhet të plotësojnë aplikuesit mund t’i gjeni në uebfaqet zyrtare të Ministrisë, AZHB-së dhe Komunës së Drenasit përmes këtyre linkeve: https://azhb-rks.net/sq/thirrje-per-aplikim
https://gllogoc.rks-gov.net/shpalljet/

Ky program synon përkrahjen e fermerëve dhe zhvillimin e qëndrueshëm të sektorit bujqësor në komunën e Drenasit, duke përmirësuar rendimentin dhe sigurinë e prodhimeve bujqësore dhe blegtorale.

Në të gjitha komunat ku ka përfunduar procesi i rinumërimit të votave do të fillohet me grumbullimin e informatave për keqpërdorimet në procesin zgjedhor

Kështu ka bërë të ditur Sistemi Prokurorial i Kosovës përmes një reagimi.

Më tutje në reagim thuhet se zyra e Kryeprokurorit të Shtetit informon opinionin publik se Prokurori i Shtetit në vazhdimësi ka monitoruar nga jashtë procesin e rinumërimit të rezultateve zgjedhore.

Postimi i plotë:

Zyra e Kryeprokurorit të Shtetit informon opinionin publik se Prokurori i Shtetit në vazhdimësi ka monitoruar nga jashtë procesin e rinumërimit të rezultateve zgjedhore.

Koordinatorja nacionale për zgjedhje, prokuroja Laura Pula, pas evidentimit të mospërputhjeve të votave gjatë numërimit brenda subjekteve politike për deputet, në rajone të ndryshme të Republikës së Kosovës, ka kërkuar nga kryeprokurorët e të gjitha prokurorive themelore që në të gjitha komunat, ku ka përfunduar procesi i rinumërimit të votave, të fillojnë grumbullimin e informatave të nevojshme dhe të sigurojnë prova relevante, që vërtetojnë kryerjen e ndonjë vepre penale që ndërlidhet me procesin zgjedhor.

Po ashtu, koordinatorja nacionale për zgjedhje, prokuroja Laura Pula ka kërkuar që edhe në komunat ku ende nuk ka përfunduar procesi i rinumërimit të votave që menjëherë pas përfundimit të këtij procesi të fillohet nga prokuroritë përkatëse procesi i grumbullimit të provave të nevojshme.

Prokurori i Shtetit do të mbetet i angazhuar për ta mbrojtur votën e lirë të qytetarëve, dhe do të hetoj çdo rast, për të cilin kanë dyshime është keqpërdorë – falsifikuar vota në çfarëdo mënyre dhe nga kushdo qoftë.