Category: Lajme

Partia Demokratike e Kosovës ka thënë se do të votojë pro buxhetin për vitin 2026 të Komunës së Prishtinës.

Asambleisti i PDK’së në Prishtinë, Leutrim Retkoceri, ka thënë se do ta votojnë buxhetin me arsyen që të mos mbetet kjo “mollë sherri” mes partive dhe që kryeqyteti të mos bllokohet edhe për një vit në aspektin financiar.

“PDK në Prishtinë ka me votu buxhetin. Por, ka me votu me arsyen e vetme që mos me mbetë buxheti mollë sherri mes dy subjekteve nesër në buxhetin e ri…me u blloku Prishtina edhe për një vit në aspektin financiar”, ka deklaruar Retkoceri në mbledhjen e jashtëzakonshme të Kuvendit Komunal.

Ai tha se buxheti nuk është i vetëm një partie, teksa përmendi edhe limitet kohore.

“Ne si PDK kemi kërku në vazhdimësi transparencë, dëgjime publike, planifikim më të mirë. Sot për në më të rëndësishme janë parimet për buxhetin, sesa kërkesat. Çështja e buxhetit ka hyrë në limitet kohore. Në momentin qëpo flasim, as niveli qendror s’ka buxhet. Nuk mundemi ne në këtë situatë kur dy forca politike për muaj të tërë janë përplase më veti, me vazhdu me marr pozicionim për buxhetin për inate politike”, shtoi Retkoceri.

VV ndërkohë ka thënë se nuk e voton buxhetin.

Një person i maskuar dhe nën kërcënimin e thikës dyshohet se ka kryer grabitje në një dyqan.

Sipas raportit 24 orësh të Policisë, rasti ka ndodhur të enjten në Fushë-Kosovë dhe nuk raportohet për të lënduar.

“Fushë Kosovë / 05.02.2026 – 23:10. Është raportuar se një person i maskuar dhe nën kërcënimin e thikës kishte kryer grabitje në një market. Nuk raportohet për të lënduar, ndërsa rasti është duke u hetuar”, thuhet në njoftim.

Kanadaja ka hapur zyrtarisht konsullatën e saj të parë në Greenlandë, duke shënuar një zgjerim historik të pranisë diplomatike në territorin arktik dhe një sinjal të fortë mbështetjeje për popullin e Grenlandës.

Një delegacion i nivelit të lartë nga Otava, i kryesuar nga Guvernatorja e Përgjithshme Mary Simon dhe ministrja e Jashtme Anita Anand, mbërriti në Nuuk, i shoqëruar nga një anije e Rojës Bregdetare Kanadeze. Hapja e konsullatës vjen në një moment delikat gjeopolitik, pas deklaratave të përsëritura të presidentit amerikan Donald Trump për marrjen nën kontroll të Grenlandës.

Në një fjalim para udhëtimit, Mary Simon theksoi se Kanadaja “mbështet fuqishëm të drejtën e popullit të Groenlandës për të vendosur vetë për të ardhmen e tij”. Vizita e saj ka edhe simbolikë të fortë kulturore, pasi ajo ka prejardhje inuit dhe lidhje të hershme me komunitetet e Arktikut.

Hapja e konsullatës kanadeze përkon me një vizitë të ngjashme të zyrtarëve francezë, të cilët po ashtu po hapin përfaqësinë e tyre diplomatike në Nuuk. Deri më tani, vetëm SHBA-të dhe Islandë kishin prani të plotë diplomatike në Greenlandë.

Ekspertët e shohin këtë zhvillim si një mesazh të qartë solidariteti nga aleatët e NATO-s, në një kohë kur Arktiku po shndërrohet gjithnjë e më shumë në një zonë strategjike për sigurinë globale. Qeveria kanadeze ka paralajmëruar gjithashtu rritje të investimeve në infrastrukturë dhe prani ushtarake gjatë gjithë vitit në rajonet veriore.

Autoritetet groenlandeze kanë mirëpritur hapjen e konsullatës, ndërsa komunitetet inuit e konsiderojnë këtë hap si forcim të lidhjeve historike, kulturore dhe politike mes Groenlandës dhe Kanadasë.

Kuvendi Komunal i Prishtinës, në një seancë të jashtëzakonshme pa kryetarin e saj, ka diskutuar miratimin e buxhetit për vitin fiskal 2026, ku drejtues të drejtorive komunale dhe përfaqësues të partive politike paraqitën qëndrimet e tyre për ndarjen e mjeteve financiare dhe prioritetet zhvillimore të kryeqytetit, Ekonomia Online.

Drejtoresha për Financa, Valbona Makolli, prezantoi strukturën e buxhetit dhe kërkoi aprovimin e tij në tërësi. LDK dhe PDK shprehën mbështetje, duke theksuar stabilitetin dhe zhvillimin, ndërsa Lëvizja Vetëvendosje deklaroi se nuk do ta votojë buxhetin, duke e cilësuar të papranueshëm dhe problematik në disa aspekte.

Buxheti për vitin 2026 është i ndarë në 5 kategori: paga dhe mëditje (48.3 milionë euro), mallra dhe shërbime (32 milionë), shpenzime komunale (3.5 milionë), subvencione dhe transferime (6.8 milionë) dhe investime kapitale (60.8 milionë). Makolli theksoi se buxheti përfshin projekte kapitale të ndara sipas kategorive dhe shpenzime operative që prekin jetën e përditshme të qytetarëve, duke kërkuar aprovimin e tij në tërësi.

LDK, përmes Jeta Rafunës, e përkrahu buxhetin duke e cilësuar si instrument zhvillimi që adreson nevojat e qytetarëve dhe përmirëson jetën e përditshme. PDK, përmes Leutrim Retkocerit, theksoi se buxheti vjen në rrethana të vështira pas sfidave të vitit 2025 dhe se grupi i asamblistëve është i përkushtuar për stabilitet dhe transparencë, duke kërkuar përfshirje të qytetarëve dhe raportime të qarta.

Nga ana tjetër, Gëzim Sveçla nga Vetëvendosje kritikoi buxhetin, duke argumentuar se rritja e tij po prezantohet gabimisht si sukses qeverisës dhe se Prishtina po ngec. Ai vuri në dukje mungesën e raportit financiar për vitin paraprak dhe probleme ligjore në tri projekte kryesore: Sheshin “Xhorxh Bush”, Lidhjen e Arbërisë me Qendrën dhe Tunelin në rrugën “Agim Ramadani”. Sveçla theksoi se PDK-ja po e përkrah këtë buxhet, i cili sipas VV-së, i shërben më shumë interesave të saj sesa LDK-së.

Ky buxhet pritet të përkrahet gjithashtu edhe nga partia Lidhja e Prishtinës dhe Nisma.

Ka nisur seanca e jashtëzakonshme, në të cilën do të diskutohet dhe votohet buxheti për vitin 2026.

Pika e vetme e rendit të ditës është propozim-vendimi për miratimin e buxhetit për vitin 2026.

“Në bazë të nenit 44.4 te Ligjit nr. 03/L-040 për Vetëqeverisjen Lokale “Gazeta Zyrtare e Republikës së Kosovës” nr. 28/15, qershor 2008, e njoftojmë publikun se me datën 6.2.2026, në ora 10:00, në Sallën e madhe të mbledhjeve në Objektin e vjetër të Komunës, mbahet seanca e jashtëzakonshme e Kuvendit të Kryeqytetit, me një pikë të rendit të ditës: 1. Propozim-vendimi për miratimin e buxhetit për vitin 2026″, është bërë e ditur në njoftim.

Buxheti më herët nuk ka arritur të sigurojë mbështetjen e nevojshme në Kuvendin Komunal, duke lënë Prishtinën pa buxhet të miratuar.

Prokuroria e Tiranës përfundoi hetimet dhe dërgoi në gjyq shtatë persona pas humbjes së jetës së 3-vjeçarit, Brian Spahiu pas një ndërhyrje dentare në një klinikë në kryeqytet.

Përfundimi i hetimeve dërgoi në gjyq shtetasit Roland Xhaxho dhe M.G., për veprën penale ‘Vrasje nga pakujdesia’ dhe ‘Mashtrim’ e kryer në bashkëpunim dhe shtetasen Ina Xhaxho për veprën penale ‘Vrasje nga pakujdesia’, ‘Mashtrim’ e kryer në bashkëpunim dhe ‘Ushtrim i aktivitetit të paligjshëm’; shtetasit E.S. dhe E.A. për veprën penale ‘Shpërdorim detyre’ si dhe shtetasit D.A. dhe V.H. për veprën penale ‘Neglizhenca në trajtimin mjekësor’.

“Më datë 28.09.2023, i mituri B.S., iu nënshtrua një ndërhyrjeje dentare në 14 dhëmbë, tek Klinika “Splendent” drejtuar nga mjekët Roland dhe Ina Xhaxho, raporton euronews.al.

Pas ndërhyrjes i mituri kthehet në shtëpi dhe brenda pak orësh dërgohet në gjendje të rëndë shëndetësore (koma dhe insuficiencë respiratore akute), në Spitalin e Pediatrisë në Qendrën Spitalore “Nënë Tereza”, Tiranë, ku dhe më pas në datën 01.10.2023, ndërroi jetë.

Sipas aktit të riekspertimit mjekoligjor dhe ekspertimit mjekoligjor shtesë, nga ana e grupit ekspertëve italianë, u arrit në konkluzionin se: Shoku septik i rëndë, që solli më pas insufiçencën progresive shumëorganore, është shkaku kryesor i vdekjes të pacientit të mitur B.S. Grupi i ekspertëve arriti në përfundimin se gjatë ndërhyrjes dentare dhe procedurës së anestezisë, nga ana e anestezistit dhe stomatologeve që trajtuan të miturin, u konstatuan shkelje të rënda të protokolleve mjekësore ndërkombëtare dhe praktikave më të mira mjekësore, të cilat kanë një lidhje shkakësore të drejtpërdrejtë me vdekjen e tij.

Këto shkelje kanë konsistuar në:

– moszbatimin, moskryerjen e kontrolleve dhe verifikimeve të nevojshme për identifikimin e saktë të gjendjes klinike para operacionit të pacientit; mosformulimin në mënyrë adekuate të diagnozës para operacionit dhe mostrajtimin e duhur profilaktik para operacionit dhe në vazhdim, i mituri iu nënshtrua një procedure kirurgjikale pa u vizituar në mënyrë adekuate, pa një diagnozë të saktë, pa një indikacion të arsyetuar, pa specifikuar alternativat dhe pa kryer testet e nevojshme dhe të detyrueshme për gjendjen klinike të pacientit;

– ndërhyrje e kryer, e cila ishte më e gjerë se sa lejohej për një fëmijë të moshës 3 vjeç dhe induksioni i anestezisë së përgjithshme për një periudhë prej rreth 5 orë, për të trajtuar njëkohësisht shumë dhëmbë, mes të cilëve disa me infeksion të pulpës me rreziqet që lidhen me anestezinë e përgjithshme dhe kontrollin e vështirë të infeksioneve postoperative, evidenton përgjegjësinë për trajtim të tepërt.

– nxjerrjen plotësisht e papërshtatshme nga spitali i të miturit, duke mos marrë parasysh gjithashtu rreziqet që lidhen me anestezinë dhe patologjitë nga të cilat vuante fëmija, e sidomos arsyet për një kohë të zgjatur zgjimi, pas ndërhyrjes si dhe shenja të tjera klinike”, bën me dije Prokuroria.

Gjithashtu nga hetimi rezultoi e provuar se dy stomatologët Ina Xhaxho dhe M.G. kanë mashtruar prindërit e të miturit duke i marrë pagesën për mbushjen e 14 dhëmbëve, ndërkohë që nga autopsia rezultoi se 6 prej tyre ishin hapur por nuk ishin mbushur.

Ndërkohë, nga hetimi, u provua që stomatologia Ina Xhaxho pas ngjarjes ka vazhduar ushtrimin e aktivitetit të saj në mënyrë të paligjshme, pasi nuk ka rinovuar, në përputhje me procedurat ligjore, licencën si stomatologe nga Urdhri i Stomatologut.

Gjatë hetimeve u konstatuan shkelje të rënda të protokolleve mjekësore në kryerjen e autopsisë dhe ekspertizës mjekoligjore edhe nga ana e ekspertëve të I.M.L.-së, shtetasit E.S dhe E. A.

Gjithashtu, shkelje u konstatuan edhe tek mjekët roje të pediatrisë V.A. dhe D.S. në momentin që i mituri u dërgua në spital. Mjekët nuk zbatuan protokollet mjekësore në drejtim të përcaktimit të diagnozës së duhur, evidentimin e shkaqeve më të zakonshme të shokut tek fëmijët dhe trajtimin e terapisë së përshtatshme me antibiotikë. Si rrjedhojë edhe moskryerja e veprimeve të tyre ka shkaktuar dëmtimin e rëndë të të miturit, edhe pse ai ishte në gjendje të rëndë, fakt që rezultoi nga akti i riekspertimit, pasi vdekja e tij nuk erdhi nga mosveprimet e tyre, por nga shkaku kryesor dhe i drejtpërdrejtë, që ishin veprimet dhe mosveprimet e të pandehurve R.Xh., I.Xh dhe M.G. /euroenews.al/

Kryetari i Partisë Demokratike të Kosovës, Bedri Hamza, ka kujtuar sot 27-vjetorin e fillimit të Konferencës së Rambujesë, duke e cilësuar atë si një nga momentet më vendimtare në historinë moderne të Kosovës.

Në një status të publikuar me këtë rast, Kryetari Hamza ka theksuar se në Rambuje Kosova për herë të parë foli dhe vendosi për vetveten, duke u rreshtuar qartë në anën e paqes, lirisë dhe vlerave perëndimore, nën udhëheqjen e Hashim Thaçit.

“Më 6 shkurt 1999 filloi Konferenca e Rambujesë, një moment vendimtar në historinë tonë. Kosova foli dhe vendosi për vetveten. Nën udhëheqjen e Hashim Thaçit, si kryesues i delegacionit, zgjodhëm paqen, lirinë dhe anën e drejtë të historisë. Nëntë vjet më vonë, shpallëm edhe Pavarësinë e Kosovës”, ka shkruar Kryetari Hamza.

Ai ka shtuar se kjo rrugë drejt lirisë dhe shtetndërtimit nuk do të ishte e mundur pa sakrificën e heronjve dhe mbështetjen e aleatëve ndërkombëtarë.

“Sot nderojmë heronjtë tanë dhe falënderojmë të gjithë aleatët, që na mbështetën në çdo hap të lirisë dhe shtetndërtimit”, ka theksuar kreu i PDK-së.

Në fund të reagimit të tij, Hamza ka nënvizuar se perspektiva euroatlantike e Kosovës lidhet ngushtë edhe me drejtësinë për ish-krerët e luftës që po mbahen në Hagë.

“E ardhmja euroatlantike e Kosovës kërkon drejtësi e liri edhe për çlirimtarët tanë në Hagë, të cilët gjithnjë kanë qenë faktorë të stabilitetit dhe ndërtues të vizionit perëndimor të shtetit tonë”, ka përfunduar Kryetari Hamza.

Kosova ndodhet në pritje të përmbylljes së procesit paszgjedhor, hap ky i domosdoshëm për konstituimin e Kuvendit dhe ratifikimin e marrëveshjeve ndërkombëtare që presin prej më shumë se një viti. Për shkak të ngërçit të gjatë politik dhe mbajtjes së zgjedhjeve të reja, Plani i Rritjes ka mbetur pa u votuar, duke mbajtur pezull shumën prej 882 milionë eurosh. Aktualisht, sytë janë nga Gjykata Supreme, e cila po shqyrton gjashtë ankesa lidhur me zgjedhjet e 28 dhjetorit; menjëherë pas vendimit të saj, pritet t’i hapet rrugë certifikimit të rezultateve që e çon Kosovën drejt formimit të institucioneve të reja.

Në një përgjigje për KALLXO.com, Komisioni Europian konfirmoi se, edhe pse Kosova është vonuar në ratifikim, ajo ende mbetet e kualifikuar për t’i përfituar fondet. “Kosova mbetet e kualifikuar për të përfituar deri në 882 milionë euro financime në kuadër të Planit të Rritjes, subjekt i hyrjes në fuqi të marrëveshjeve që lidhen me Instrumentin e Reformës dhe Rritjes, si dhe i përmbushjes së të gjitha kushteve të tjera për pagesë”- tha një zëdhënës i Komisionit.

Komisioni Europian theksoi se për shkak të vonesës në formimin e institucioneve, marrëveshjet përkatëse nuk janë ende në fuqi. “Pa ratifikimin e këtyre marrëveshjeve, Kosova nuk mund të paraqesë kërkesë për pagesë në kuadër të Instrumentit të Reformës dhe Rritjes”- shkruan në përgjigje.

Poashtu, edhe njëherë potencuan se Kosova ishte ndër partnerët e parë të Ballkanit Perëndimor që miratoi Agjendën e saj të Reformave, siç kërkohet nga Plani i Rritjes i BE-së, e cila u miratua nga Komisioni Evropian në tetor të vitit 2024.Ky institucion europian rikujtoi se Instrumenti i Reformës dhe Rritjes është një instrument me afat të kufizuar kohor, i miratuar për periudhën 2024-2027, dhe është në interesin e Kosovës që ratifikimi të bëhet sa më shpejt të jetë e mundur, në mënyrë që të shfrytëzohen plotësisht të gjitha mundësitë që ofron Plani i Rritjes, për të mirën e popullatës së saj.

Në kushte normale, deri tash Kosova do duhej t’i përfitonte 61 milionë eurot e para. Përndryshe, Kosova deri në vitin 2027 është paraparë që nga kjo paketë mund të përfitojë mbi 880 milionë euro, prej të cilave mbi 250 milionë si grant pa kthim, ndërsa pjesën tjetër në formë kredie me kushte të favorshme. Plani i Rritjes nxit përgatitjet e partnerëve të zgjerimit për anëtarësim në BE, duke sjellë përpara disa nga përfitimet e tij përpara integrimit të plotë në BE. Kjo nga ana tjetër duhet të përshpejtojë ndjeshëm shpejtësinë e procesit të zgjerimit dhe rritjen e ekonomive të tyre. Kjo paketë, vlen për gjashtë vendet e Ballkanit Perëndimor – Kosovën, Shqipërinë, Maqedoninë e Veriut, Malin e Zi, Serbinë dhe Bosnje e Hercegovinën.

sh-Kryetarja e Komisionit Qendror të Zgjedhjeve, Valdete Daka, ka thënë se shkarkimi i saj nga ana e Presidentes Vjosa Osmani “ka qenë cenim i rendit kushtetues”.

Sipas Dakës, qëllimi ka qenë shkatërrimi i KQZ-së.

“Natyrisht që tash ndoshta nga kjo perspektivë dhe nga krejt kjo që po ndodh këto ditë me KQZ-në dhe me zgjedhjet, sidomos me këto dy proceset e fundit, vërehet se cila ka qenë intenca e shkarkimit tim. Ajo ka qenë që KQZ-ja, thjesht ta them vrazhd të shkatërrohet”, tha ajo.

Ajo thotë se askush nuk i di arsyet e shkarkimit të saj.

“Në fakt askush nuk e di për çka jam shkarku. Ndoshta vetëm Presidentja e di atë dhe ata të cilët i kanë sugjeru shkarkimin tim. Dhe natyrisht që, është cenu edhe rendi kushtetues sepse KQZ-ja është organ i pavarur kushtetues dhe është prekur pavarësia e atij organi. Sepse një kryetar i KQZ-së mund të shkarkohet ashtu vetëm si e parasheh Kushtetuta dhe jo ashtu si jam shkarku unë”, ka deklaruar Daka për “VOX Kosova”.

Daka ka thënë se marrëdhënia e saj me Osmanin ka qenë zyrtare dhe se me të ka diskutuar vetëm për zgjedhjet.

Presidentja e Kosovës, Vjosa Osmani, e kishte shkarkuar Valdete Dakën nga pozita e Kryetares së Komisionit Qendror të Zgjedhjeve, më 14 qershor 2021.

Ky vendim, erdhi me arsyetimin se kryesuesja e KQZ-së, Valdeta Daka, gjatë procesit të zgjedhjeve parlamentare të 14 shkurtit, ka cenuar pavarësinë dhe integritetin e këtij institucioni.