Category: Lajme

Delegacioni i Forcës Ajrore Shqiptare, i kryesuar nga Gjeneralmajor Ferdinant Dimo, Komandant i FAj, zhvilloi një vizitë zyrtare në Turqi.

Delegacioni i Forcës Ajrore Shqiptare, i kryesuar nga Gjeneralmajor Ferdinant Dimo, Komandant i FAj, zhvilloi një vizitë zyrtare në Turqi.

Gjatë vizitës, delegacioni shqiptar u prit nga shefi i Shtabit të Përgjithshëm të Forcave të Armatosura Turke, Selçuk Bayraktaroglu si dhe nga Komandanti i Forcës Ajrore Turke, Ziya Cemal Kadıoglu, shkruan atsh, KosovaPress.

Takimet u fokusuan në mundësi konkrete bashkëpunimi në fushat e aviacionit ushtarak, teknologjive moderne dhe mbështetjes teknike, si dhe në rritjen e ndërveprueshmërisë dhe zgjerimin e partneritetit strategjik mes dy forcave ajrore.

Delegacioni shqiptar zhvilloi gjithashtu vizita në kompani kryesore të industrisë së mbrojtjes, ku u njoh nga afër me teknologjitë më të avancuara në aviacion, sisteme pa pilot dhe mbështetje logjistike.

Presidentja e Kosovës, Vjosa Osmani, ka zhvilluar një takim me Kryeministrin e Çadit, Allamaye Halina, gjatë qëndrimit të saj në Samitin Botëror të Qeverisjes.

Gjatë këtij takimi, Osmani ka diskutuar për forcimin e marrëdhënieve bilaterale ndërmjet Kosovës dhe Çadit, si dhe për përkushtimin për adresimin e sfidave globale.

“Kënaqësi ta takoj Kryeministrin e Çadit, Allamaye Halina, gjatë Samitit Botëror të Qeverisjes dhe të diskutojmë për marrëdhëniet bilaterale ndërmjet dy shteteve tona, si dhe për përkushtimin për adresimin e sfidave të përbashkëta globale”, ka shkruar Osmani në një njoftim në Facebook.

Takimi u zhvillua në kuadër të përpjekjeve të Kosovës për thellimin e bashkëpunimit ndërkombëtar dhe për forcimin e partneriteteve strategjike.

Punëtorët e ndërmarrjes publike “Trafiku Urban” në Prishtinë kanë paralajmëruar nisjen e një greve që do të fillojë më 13 shkurt 2026. Ky paralajmërim për grevë, thonë se vjen pasi nuk morën një përgjigje zyrtare për kërkesat që i kanë bërë edhe në janar.

Në njoftimin e dorëzuar te menaxhmenti i ndërmarrjes, punëtorët theksojnë se bazuar në Kushtetutën dhe ligjin për grevën, deri më 6 shkurt nuk kanë marrë asnjë përgjigje nga organet kompetente lidhur me kërkesat e tyre.

Kërkesat përfshijnë përmirësimin e kushteve të punës dhe respektimin e të drejtave të punëtorëve, me qëllim që të mos cenohen interesat publike dhe siguria e qytetarëve.

“Bazuar në nenin 44 të Kushtetutës së Republikës së Kosovës (Liria e Asociimit), Ligjin Nr. 03/L-200 për Grevat, konkretisht nenin 10 paragrafi 1 (njoftimi me shkrim së paku 7 ditë para fillimit të grevës), si dhe nenet përkatëse që rregullojnë organizimin e grevës në shërbimet me interes të përgjithshëm. Ju rikujtojmë se me datë 26.01.2026 është bërë njoftimi paraprak lidhur me kërkesat e parashtruara dhe paralajmërimin për hyrje në grevë në rast të mosmarrjes së përgjigjes. Duke qenë se deri më datë 06.02.2026 nuk kemi pranuar përgjigje zyrtare nga organet kompetente, ju njoftojmë se punëtorët do të hyjnë në Grevë me datë 13.02.2026. Në përputhje me dispozitat ligjore që rregullojnë shërbimet publike me interes të përgjithshëm, garantohet respektimi i minimumit të procesit të punës, në mënyrë që të mos rrezikohet interesi publik dhe siguria e qytetarëve”, thuhet në njoftimin e tyre.

Ish-presidenti Hashim Thaçi që po gjykohet në Hagë, është refuzuar nga Dhoma e Specializuar e Gjykatës Kushtetuese (DhSGjK) në rastin e ankesës së tij ku pretendoheshin shkelje të të drejtave të tij themelore në lidhje me caktim e Gjykatëses së Procedurës Paraprake dhe Gjykatësit të Vetëm në çështjen gjyqësore kundër tij lidhur me administrimin e drejtësisë.

Vendimi u mor të enjten, më 5 shkurt.

“Dhoma konstatoi se disa prej ankesave ishin të parakohshme dhe të tjerat të pabaza dhe, për rrjedhojë, e shpalli të papranueshme kërkesën referuese mbi bazën e rregullës 14 të Rregullores së Punës së DhSGjK-së”, njoftoi DhSK-ja, raporton Klankosova.tv.

Thaçi ishte ankuar se kryetarja e Gjykatës Speciale, Ekaterina Trendafilova, e shkeli ligjin duke caktuar të njëjtin gjyqtar që ia aprovonte Prokurorisë përgjimet speciale, edhe si gjyqtar që konfirmoi aktakuzën për të njëjtat vepra, dhe i cili më pas merrte edhe vendime tjera për të njëjtin rast gjyqësor.

Për shkak se edhe përgjimet ishin lejuar nga një gjyqtar i caktuar jashtëligjshëm, Thaçi i kishte kërkuar Gjykatës Kushtetuese ta rrëzojë aprovimin e aktakuzës së dytë.

Ndërkohë, Hashim Thaçi ishte ankuar edhe për ligjshmërinë e përgjimeve në qendrën e paraburgimit, mirëpo në dhjetor 2024 Kushtetuesja e Speciales e ka hedhur poshtë atë.

Kryetari i Komunës së Deçanit, Bashkim Ramosaj ka thënë se lajmin për ndalimin e shefes së kabinetit të tij, Manjola Shala nën dyshimin për manipulim me procesin e numërimit të votave në Deçan e ka kuptuar përmes mediave.

“Për këtë temë jam informuar nga mediat për ndalim prej 48 orësh, për shefen e kabinetit Manjolla Shala, lidhur me zgjedhjet”, është përgjigjur shkurt Ramosaj për Ekonomia Online.

Gjatë javës së fundit, Zyra për Mbrojtje dhe Ndihmë të Viktimave ka bërë të ditur se mbrojtësit e viktimave në Kosovë kanë trajtuar gjithsej 59 raste të reja, shumica e të cilave lidhen me dhunën në familje. Nga këto, 48 raste lidhen me dhunë në familje, 6 raste me tentim-vrasje, 2 raste me ngacmim seksual, 1 rast vrasjeje dhe 2 raste të shkeljes së Urdhrit Mbrojtës (UM).

Mbrojtësit e viktimave kanë ndërmarrë veprime ligjore dhe përfaqësuese për mbrojtjen e të drejtave të viktimave. Gjatë kësaj periudhe, janë parashtruar 7 kërkesa për Urdhër Mbrojtjeje (KUM), 25 kërkesa për Urdhër Mbrojtjeje Emergjente (KUME), 3 kërkesa për urdhër mbrojtës të përkohshëm emergjent, 2 kërkesa për ndërprerje të UM-së dhe 2 për ndryshim të UM-së.

Gjykatat kanë aprovuar 30 aktvendime, ndërsa 2 aktvendime janë tërhequr. Po ashtu, është regjistruar 1 kërkesë për kompensim nga Fondi i Viktimave dhe është përpiluar 1 parashtresë tjetër. Gjatë javës janë mbajtur 86 seanca gjyqësore dhe 12 seanca në prokurori, ndërkohë që janë ofruar 76 këshilla juridike.

Si rezultat i përfaqësimit ligjor, janë nxjerrë 12 aktgjykime dënuese dhe 2 refuzuese. Përveç kësaj, janë realizuar 2 përfaqësime në polici, 1 referim i rastit në polici, 6 referime në Qendrën për Punë Sociale dhe 1 deklaratë mbi dëmin e shkaktuar.

Tre persona kanë humbur jetën dhe gjashtë të tjerë janë plagosur pasi një shoferë 92-vjeçare u përplas me një çiklist, humbi kontrollin e automjetit dhe u fut me veturë në një dyqan ushqimor të enjten, në lagjen Westwood të Los Angelosit.

Gruaja që drejtonte një Toyota Prius goditi çiklistin dhe më pas vazhdoi të ngiste edhe një bllok tjetër, përpara se të kthente drejt një furre buke brenda dyqanit 99 Ranch Market, ku automjeti u ndal.

Kapiteni i Policisë së Los Angelosit, Anthony Espinoza, e përshkroi ngjarjen si një “aksident fatkeq” dhe tha se nuk besohet të ketë qenë e qëllimshme.

Dy burra, të moshave 30 dhe 55 vjeç, si dhe një grua 42-vjeçare, të cilët ndodheshin në atë moment në furrë, vdiqën në vendngjarje. Dy burra të tjerë, 35 vjeç, u dërguan në spital në gjendje kritike, ndërsa dy burra të tjerë, 38 dhe 37 vjeç, ishin në gjendje të qëndrueshme.

Çiklisti dhe shoferja refuzuan ofertën për t’u transportuar në spital, njoftoi departamenti i zjarrfikësve.

Zyrtarët thanë se ajo po bashkëpunon me hetuesit dhe se i është nënshtruar një vlerësimi mjekësor. /Telegrafi/

Prania e kreut të AAK-së, Ramush Haradinaj, në Lutjet e Mëngjesit në SHBA ka irrituar lobin serb në këtë vend.

Organizata lobuese serbe “Serbian National Defense”, me seli në Chicago, përmes një postimi publik në rrjetin social X ka sulmuar rëndë Haradinajn.

Për rolin e Haradinajt në UÇK, organizata e etiketon atë me akuza të rënda dhe të pabaza, duke përmendur trafikim organesh e të ashtuquajturën Shtëpi e Verdhë në Shqipëri. Kjo organizatë madje i parashtroi një kërkesë institucioneve amerikane që Haradinaj të jetë në burg, e jo në lutjet e mëngjesit.

Gjatë qëndrimit në Uashington, Haradinaj zhvilloi takime në Capitol Hill, ku mbajti edhe një fjalim në Kongresin Amerikan në kuadër të Forumit Ndërparlamentar të Sigurisë, ndërsa AAK tha se ai pritet të vazhdojë me takime në Pentagon.