Category: Lajme

Kryetari i Aleancës për Ardhmërinë e Kosovës, Ramush Haradinaj ka shkuar për vizitë te Fadil Falziu, një ditë pas lirimit të tij nga Gjykata SPeciale.

Ai në një postim në Facebook shkruan se familja Falziu ishte në shërbim të atdheut në të gjitha fazat historike të përpjekjeve për liri.

“Vëllai i dy Heronjve, Fadil Fazliu, kaloi edhe një sfidë të padrejtë, që i ndodhi atij sikurse bashkëluftëtarëve që gjenden ende në Hagë: Hashim Thaçi, Rexhep Selimi, Kadri Veseli, Jakup Krasniqi, Salih Mustafa dhe Pjetër Shala”.

Pas kthimit të tij në familje, pata nderin ta vizitoj Fadil Fazliun, për t’i shprehur respektin për qëndrueshmërinë e tij dhe për sakrificën e familjes Fazliu ndër breza”“I gëzohemi kthimit në atdhe e po ashtu të Gjeneral Haxhi Shalës, Bashkim Smakajt, Nasim Haradinajt, Isni Kilajt dhe Hysni Ngucatit.

“Presim lirimin e të gjithëve, që t’u bashkohen familjeve të tyre dhe të korrigjohet kjo padrejtësi. Më 17 shkurt, në ora 14:00, bashkohemi të gjithë në sheshin “Skënderbeu” në Prishtinë, në mbështetje të luftës sonë të drejtë e çlirimtare”, shkruan kreu i AAK-së.

Kryeministri hungarez Viktor Orbán ka pohuar se Brukseli dhe Kievi i kanë “shpallur luftë” Hungarisë, pasi Politico postoi një artikull që përshkruante planet për “pranimin paraprak” të Ukrainës në BE, përpara se të përfundonin të gjitha hapat zyrtarë të procesit standard të pranimit, dhe për masat për të kapërcyer veton e Hungarisë.

Orbán e përshkroi Politico-n si “botimin zyrtar të elitës brukseliane” dhe idetë e përshkruara në artikull si “planin më të fundit të luftës”.

“Ky plan i ri është një deklaratë e hapur lufte kundër Hungarisë. Ata shpërfillin vendimin e popullit hungarez dhe janë të vendosur të largojnë qeverinë hungareze me çdo mjet të nevojshëm. Ata duan që Partia Tisza të vijë në pushtet, sepse atëherë nuk do të ketë më veto, asnjë rezistencë dhe asnjë qëndrim jashtë konfliktit të tyre”, shtoi ai.

Orbán theksoi se hungarezët “duhet t’i ndalojnë ata në kutitë e votimit” në prill, transmeton Telegrafi.

“Fidesz është e vetmja forcë që qëndron midis Hungarisë dhe sundimit brukselian dhe e vetmja garanci e sovranitetit hungarez”, tha ai.

Artikulli i Politico diskuton një ide të paprecedentë: “pranimin paraprak” të Ukrainës në BE paraprakisht, me anëtarësim të pjesshëm në BE që në vitin 2027, por pa zbutur kërkesat mbi parimet themelore.

Ai gjithashtu përshkruan “planet A, B dhe C” brenda BE-së për t’iu përgjigjur refuzimit kategorik të Hungarisë për të mbështetur vendimet procedurale mbi integrimin e mëtejshëm evropian të Ukrainës; plani parësor supozon se Orbán do të humbiste zgjedhjet e prillit.

Ndërkohë, udhëheqësi i opozitës Tisza, Péter Magyar, tha se ekipi i Orbán po përgatitej ta shantazhonte atë duke bërë publike video intime të tij të regjistruara me anë të kamerës së fshehtë dhe këmbënguli se ai nuk sheh asnjë “material kompromentues” në to.

Partia Tisza e Hungarisë kryesoi një sondazh të janarit me 8 pikë përqindjeje mbi partinë Fidesz të kryeministrit Viktor Orbán dhe një tjetër me 10 pikë. /Telegrafi/

Me datën 17 shkurt në Prishtinë do të mbahet Marshi ‘Drejtësi, jo politikë’ në mbështetje të ish-krerëve të UÇK-së që po gjykohen në Hagë.

Në lidhje me mbajtjen e kësaj proteste ka folur për “Gazeta Blic”, nënkryetari i OVL-UÇK-së, Gazmend Syla.

Syla tha se pjesmarrja pritet të jetë masive dhe se do të jetë një nga protestat më të mëdha të mbajtura ndonjëherë.

“Pjesmarrja do të jetë masive për shumë arsye. Në fakt ne kemi patur edhe pesë protesta të tjera më herët dhe të gjitha këto protesta kanë shku duke i mobilizu njerëzit, duke i aktivizu njerëzit kundër kësaj padrejtësie. Kjo besoj do të jetë më e madhe për arsye se do të jemi në Prishtinë sepse protestat tjera ju e dini një e kemi patur në Prishtinë por të tjerat kanë qenë jashtë Kosovës. Edhe për faktin se kërkesa e Prokurorisë ka nxitur reagime shumë të mëdha edhe tek basghkëluftëtarët tanë por edhe tek shumë qytetarë të tjerë sepse është një gjë tepër e papranueshme gjithë kjo kërkesë e Prokurorisë me çdo kusht me e nxjerr në sprovë Gjykatën për me arrit me nxjerr diçka nga këto akuza të fabrikuara nga Prokuroria e Serbisë sepse vetëm me ato dokumente është shërby Gjykata Speciale. Prandaj po mendoj se do të jetë njëra prej protestave më të mëdha por jo e fundit” tha Syla.

Policia polake ka ndaluar një 18-vjeçar për përgatitjen e një sulmi në shkollë dhe për motivimin nga mbështetja e tij për Shtetin Islamik, tha të mërkurën zëdhënësi i shërbimeve speciale Jacek Dobrzynski.

Sipas tij, Polonia nuk ka pësuar asnjë sulm të lidhur me Shtetin Islamik dhe thekson se autoritetet polake janë në gatishmëri pas një rritjeje të përpjekjeve për sabotim, përfshirë në hekurudhë, që nga pushtimi i Ukrainës nga Rusia në vitin 2022.

“Zyra e Prokurorit e akuzon djalin për nxitje publike të dhunës dhe urrejtjes për shkak të dallimeve kombëtare dhe fetare nëpërmjet internetit, si dhe për përgatitje të një sulmi”, shkroi Dobrzynski në X.

Ai tha se një hetim zbuloi se djali kishte “mbledhur informacione mbi armët, eksplozivët, substancat ndezëse dhe toksike, modelet e bombave, metodat e funksionimit dhe pajisjes, si dhe metodat e krijimit, vendosjes dhe shpërthimit të ngarkesave shpërthyese, si dhe teknikat për kryerjen e sulmeve”.

Dobrzynski shtoi gjithashtu se shënimet e djalit tregonin se ai kishte planifikuar një sulm ndaj një shkolle në rajonin juglindor të Podkarpackie. Sakaq, nëse djali shpallet fajtor, ai përballet me deri në 18 vjet burg, tha Dobrzynski.

Kujtojmë që, në dhjetor, Polonia arrestoi një student 19-vjeçar të dyshuar për përpjekje për të vendosur kontakte me Shtetin Islamik dhe u akuzua për përgatitjen e një sulmi në një treg Krishtlindjesh që mund të kishte shkaktuar viktima masive.

Pasi u shfaq në Irak dhe Siri, Shteti Islamik krijoi shpejt një “kalifat” dhe në kulmin e fuqisë së tij nga viti 2014 deri në vitin 2017, ai mbajti nën kontroll pjesë të të dy vendeve, duke sunduar mbi miliona njerëz.

Këshilli i Evropës, organizata kryesore e kontinentit për mbrojtjen e të drejtave të njeriut, ka njoftuar të mërkurën se ka rënë dakord t’ia heqë imunitetin diplomatik ish-sekretarit të tij të Përgjithshëm norvegjez, Thorbjoern Jagland, duke i hapur rrugë policisë për të hetuar lidhjet e tij të mundshme me Jeffrey Epstein.

Policia norvegjeze për krimet ekonomike ka nisur një hetim ndaj Jagland, ish-kryeministër dhe ish-ministër i Jashtëm, si dhe ish-kryetar i Komitetit të Çmimit Nobel për Paqen, nën dyshimin për korrupsion të rëndë.

Vendimi për ta hetuar Jagland, i cili ishte sekretar i Përgjithshëm i Këshillit të Evropës nga viti 2009 deri në 2019, u bazua në informacione të zbuluara nga dosje të reja të publikuara lidhur me Epstein, i dënuar për abuzim seksual në SHBA, i cili vdiq në burg në vitin 2019.

Avokati i Jagland, Anders Brosveet, ka thënë se vendimi për heqjen e imunitetit ishte i pritshëm dhe se klienti i tij do të bashkëpunojë me organet hetuese për të sqaruar të gjitha çështjet.

“Ai e merr këtë çështje shumë seriozisht, por dëshiron të theksojë se beson se nuk ekzistojnë rrethana që përbëjnë përgjegjësi penale”, ka thënë Brosveet në një deklaratë.

Për të zhvilluar hetimin policor, ishte e nevojshme heqja e imunitetit të Jagland, dhe ministria e Jashtme e Norvegjisë ka thënë se u kishte kërkuar 46 vendeve anëtare të Komitetit të Ministrave të Këshillit të Evropës ta miratonin këtë hap.

Jagland nuk është akuzuar zyrtarisht për ndonjë krim, por hetimi ndaj tij synon të zbulojë nëse ai ka marrë dhurata, apo hua në lidhje me pozicionin e tij, kanë bërë të ditur autoritetet.

“Nëse Jagland, si sekretar i Përgjithshëm i zgjedhur i Këshillit të Evropës, do të kishte marrë ryshfet, ai do të kishte shkelur besimin e veçantë që lidhet me detyrën e tij,” thuhet në një letër të policisë norvegjeze të datës 8 shkurt, drejtuar Këshillit për heqjen e imunitetit.

Publikimi i një sërë dosjesh të reja në SHBA ka zbuluar lidhje të reja të Epsteinit me politikanë, anëtarë të familjeve mbretërore dhe persona shumë të pasur në Evropë dhe Shtetet e Bashkuara.

Dosjet tregojnë, ndër të tjera, se në vitin 2014 Jagland dhe ndihmësit e Epsteinit kishin bërë plane të detajuara që Jagland, bashkëshortja e tij, dy fëmijët dhe e dashura e djalit të tij, të vizitonin Epstein në Palm Beach dhe në ishullin privat të tij në Karaibe.

Jagland, në atë kohë sekretar i Përgjithshëm i Këshillit të Evropës, ka mohuar se ka vizituar ndonjëherë ishullin privat të Epsteinit.

Sipas një emaili të vitit 2014, ai i kishte kërkuar ndihmë Epsteinit për financimin e një apartamenti në Oslo.

Emaile nga viti 2018 tregojnë se Epsteini i kishte kërkuar Jaglandit të organizonte një takim mes tij dhe ministrit të Jashtëm rus, Sergei Lavrov, duke thënë se kishte ide për t’ia paraqitur presidentit Vladimir Putin. Jagland kishte premtuar se do ta ngrinte çështjen me ndihmësin e Lavrovit.

Policia norvegjeze ka thënë të hënën se po heton gjithashtu dy diplomatë të profilit të lartë në një hetim tjetër për korrupsion të lidhur me Epsteinin, ndërsa princesha e kurorës së Norvegjisë ka kërkuar falje disa herë për miqësinë e saj me financierin e ndjerë.

Presidentja e Komisionit Evropian, Ursula von der Leyen, këmbënguli të mërkurën se Bashkimi Evropian duhet të eliminojë barrierat ekonomike që e pengojnë atë të bëhet një gjigant global dhe të thellojë tregun e saj të brendshëm.

Zyrtarja e lartë dha këtë mesazh përpara nisjes së saj në një takim me liderët e BE-së, përfshirë presidentin e Francës, Emmanuel Macron, dhe kancelarin gjerman, Friedrich Merz, në një forum të drejtuesve të industrisë në Antwerp.

Ky takim mbahet në prag të samitit të së enjtes, ku vendet anëtare do të diskutojnë prioritetet e axhendës ekonomike të Evropës, duke përfshirë forcimin e tregut të vetëm dhe rritjen e pavarësisë dhe konkurrueshmërisë ekonomike të kontinentit.

“Konkurrenca nuk është vetëm themeli i prosperitetit, por edhe i sigurisë sonë dhe në fund të fundit, edhe i demokracive tona,” paralajmëroi Von der Leyen.

Një nga çështjet kyçe të identifikuara nga BE-ja është se kompanitë evropiane përballen me vështirësi aksesi në kapital për zgjerim, ndryshe nga homologët e tyre amerikanë. “Për ta trajtuar këtë, Plani A do të ishte të përparonim së bashku të 27 shtetet e bllokut, – tha Von der Leyen, – por nëse nuk mund të arrijmë një marrëveshje, BE-ja duhet të shqyrtojë bashkëpunimin e zgjeruar midis vendeve që dëshirojnë këtë.”

Ajo shtoi se Evropa duhet të rrisë konkurrueshmërinë duke rritur prodhimin brenda kontinentit dhe zgjeruar rrjetin e partnerëve të besueshëm, duke theksuar rëndësinë e nënshkrimit të marrëveshjeve tregtare.

Pas marrëveshjeve të fundit me bllokun e Amerikës së Jugut, Mercosur, dhe Indinë, Von der Leyen tha se të tjera janë në rrugë me Australinë, Tajlandën, Filipinet dhe Emiratet e Bashkuara Arabe. Një nga propozimet më të mëdha dhe më të debatuara për nxitjen e ekonomisë së BE-së është favorizimi i firmave evropiane ndaj rivalëve të huaj në fushat strategjike, të cilin Von der Leyen e mbështet fuqishëm.

Asambleistët e Partisë Demokratike të Kosovës në Kryeqytet i janë drejtuar me kërkesë zyrtare Kryetarit të Komunës së Prishtinës, Përparim Rama, që në të gjitha shkollat e Prishtinës, ora e parë mësimore e datës 16 Shkurt t’i kushtohet rolit dhe sakrificës së Ushtria Çlirimtare e Kosovës (UÇK).

Kërkesa është bërë publike nga Leutrim Retkoceri, asamblist i PDK-së në Prishtinë, i cili ka theksuar se në prag të Ditës së Pavarësisë është detyrë institucionale dhe morale që nxënësit të njihen me sakrificën mbi të cilën u ndërtua shteti i Kosovës.

Sipas tij, një praktikë e tillë ka ekzistuar edhe gjatë qeverisjes së mëhershme të PDK-së në kryeqytet, kur përmes Drejtorisë së Arsimit organizoheshin ligjërata me ish-ushtarë dhe invalidë të UÇK-së, me qëllim që historia të transmetohej drejtpërdrejt te brezat e rinj.

Retkoceri ka theksuar se kjo iniciativë merr peshë të veçantë edhe në prag të marshit qytetar “Drejtësi, jo Politikë”, i cili do të mbahet më 17 shkurt në Prishtinë, në mbështetje të ish-udhëheqësve të UÇK-së që po përballen me proces gjyqësor në Hagë – Hashim Thaçi, Kadri Veseli, Jakup Krasniqi dhe Rexhep Selimi.

“Ashtu si gjatë qeverisjes sonë, edhe sot besojmë se historia duhet të flasë drejtpërdrejt para brezave të rinj. Historia nuk mund të zhbëhet. Liria ka themel sakrificën e UÇK-së,” thuhet në reagimin e tij.

Asambleistët e PDK-së presin reflektim institucional nga Komuna e Prishtinës lidhur me këtë kërkesë.

Përfaqësuesja e platformës “Liria ka Emër”, Eliza Hoxha është pritur në takim nga Ipeshkvi i Dioqezës Prizren-Prishtinë, e cila përfshin Kishën Katolike në Prishtinë, Imzot Dodë Gjergji, i cili i ka shprehur përkrahjen e komunitetit katolik për Marshin “Drejtësi, jo politikë”, që do të mbahet më 17 shkurt në Prishtinë, në mbrojtje të drejtësisë së paanshme dhe të vlerave të luftës çlirimtare.

Në këtë takim, Hoxha tha se mbështetja që po merr Marshi edhe nga bashkësitë fetare shtë dëshmi se kjo kauzë është mbi politikën ditore.

“Ky Marsh është një thirrje qytetare për respektimin e parimeve të drejtësisë, dinjitetit njerëzor dhe për ndarjen e qartë të drejtësisë nga politika”, tha Hoxha.

Ndërkaq, Ipeshkvi Imzot Dodë Gjergji tha se drejtësia duhet të jetë e pavarur, e drejtë dhe në shërbim të së vërtetës.

“Komuniteti katolik në Kosovë e mbështet këtë marsh si një angazhim qytetar për drejtësi të paanshme dhe për ruajtjen e vlerave themelore mbi të cilat është ndërtuar liria e vendit tonë”, shtoi ai.

Platforma “Liria ka Emër” fton të gjithë qytetarët, organizatat, grupet shoqërore dhe komunitetet në mbarë vendin që t’i bashkohen marshit më 17 shkurt, për të dëshmuar unitet dhe për të kërkuar drejtësi të paanshme.

Më 17 shkurt, në Ditën e Pavarësisë, mblidhemi në Prishtinë për një mesazh të qartë: Drejtësi, jo politikë!

Komisioni Evropian paraqiti masa për të parandaluar më mirë incidentet e sigurisë që përfshijnë dronë, pasi një seri pamjesh të dronëve ndërprenë trafikun ajror dhe shkaktuan shqetësime të mëdha për sigurinë.

“Aftësitë e dronëve dhe anti-dronëve janë komponentë qendrorë në mbrojtjen e Evropës dhe sigurimin e infrastrukturës kritike”, tha të mërkurën nënkryetarja e Komisionit Evropian, Henna Virkkunen.

Vitin e kaluar u raportuan pamje të shumta të dronëve në aeroportet evropiane, të cilat shpesh çuan në ndalimin e trafikut ajror. Në shtator, disa dronë që dyshohet se u nisën nga Rusia hynë në hapësirën ajrore polake, disa prej të cilëve u rrëzuan nga avionët e NATO-s.

“Evropa duhet të jetë në gjendje të mbrojë kufijtë dhe vendet e saj kritike me një mburojë të sofistikuar dhe shumë-shtresore që mund të zbulojë dhe neutralizojë çdo kërcënim në kohë reale”, tha Komisioneri i Mbrojtjes i BE-së, Andrius Kubilius.

Qëllimet e masave të paraqitura në Parlamentin Evropian në Strasburg, Francë, janë “rritja e gatishmërisë, përforcimi i kapaciteteve të zbulimit, koordinimi i përgjigjeve dhe forcimi i gatishmërisë mbrojtëse të BE-së”, tha komisioni.

Kjo përfshin përdorimin e rrjeteve mobile 5G për të monitoruar më mirë hapësirën ajrore, pasi rrjetet mobile mundësojnë gjurmimin e saktë në kohë reale të objekteve fluturuese.

Sipas propozimit, antenat 5G mund të përdoren gjithashtu si një lloj radari për të marrë dhe vlerësuar sinjalet e reflektuara nga dronët.

Së bashku me inteligjencën artificiale (IA), rrjetet 5G mund të jenë në gjendje të identifikojnë shtigje të pazakonta fluturimi dhe të njoftojnë autoritetet.

Masat kanë për qëllim të plotësojnë programet dhe planet ushtarake në Evropë.
DPA News.

Sindikata e Punëtorëve të RTK-së (SPERTK) ka kërkuar që çështjet jetike të Radiotelevizionit të Kosovës të trajtohen me prioritet nga Kuvendi, gjatë seancës konstituive që pritet të mbahet sot.

Në një komunikatë për media, SPERTK thekson se RTK duhet të trajtohet si institucion strategjik publik dhe kërkon rritjen e buxhetit për vitin 2026, duke përfshirë edhe realizimin e pagës së 13-të për punëtorët. Sindikata vlerëson se fondet aktuale janë të pamjaftueshme për funksionimin normal të shërbimit publik dhe për përmbushjen e obligimeve ndaj stafit.

SPERTK paralajmëron gjithashtu se situata institucionale është serioze, pasi të gjitha pozitat drejtuese të RTK-së mbahen me ushtrues detyre, gjë që ka paralizuar vendimmarrjen dhe ka krijuar pasiguri menaxheriale. Sindikata ka kërkuar që Kuvendi të emërojë urgjentisht Bordin e ri të RTK-së, duke paralajmëruar se zvarritja e procesit po i dëmton institucionit dhe misionit publik.

Gjithashtu, SPERTK ka ngritur shqetësim për mungesën e stafit në disa sektorë të RTK-së, duke rrezikuar cilësinë e programit dhe interesin publik. Sindikata ka paralajmëruar masa sindikale, përfshirë edhe organizimin e grevës, nëse kërkesat e saj nuk adresohen menjëherë.