Category: Lajme

Në Dhomat e Specializuara të Kosovës në Hagë, avokatja e mbrojtjes, Venkateswari Alagendra, ka vijuar me fjalën përfundimtare në rastin ndaj Jakup Krasniqi, duke kërkuar nga trupi gjykues që ta shpallë atë të pafajshëm.

Gjatë paraqitjes së saj, Alagendra deklaroi se në dokumentacionin e prokurorisë nuk ekziston asnjë dëshmitar i vetëm që pretendon se Krasniqi ka rrahur, keqtrajtuar apo torturuar ndonjë person, qoftë civil apo tjetër.

“Në dokumentacion nuk ka qoftë edhe një dëshmitar të vetëm që pretendon se Jakup Krasniqi ka rrahur, keqtrajtuar apo torturuar ndonjë person, qoftë ky civil apo person tjetër. Nuk ekziston as edhe një viktimë e vetme, as një person i vetëm nga qindra dëshmitarë të intervistuar nga prokuroria për shumë e shumë vite, që pretendon apo akuzon Krasniqin se i ka rrahur, abuzuar apo se ka qenë i pranishëm kur ata janë keqtrajtuar në çfarëdo trajte apo forme”, tha avokatja.

Puna ka filluar, në ndryshimin e pamjes së NEWBORN-it.

Përderisa artistët po ngjyrosin, përpara e kanë edhe fletën që tregon si do të duket në fund.

Ridizajnimi i monumentit të pavarësisë ndodh çdo vit, në prag të 17 shkurtit.

Sipas ideatorit Fisnik Ismaili, motivet kësaj here lidhen me Ushtrinë Çlirimtare të Kosovës, por edhe me një prej aleatëve më të mëdhenj, Shtetet e Bashkuara të Amerikës, që sivjet shënojnë një çerek-mileniumi shtet.

“Po du me cek që ka të bëj me tetëmbëdjetë vjetorin tonë, me vlerat nëpër cilat na si popull kemi kapërcy për me mrri deri qitu e ato vlera kanë të bëjnë shumë me luftën clirimtare sepse është një moment i ndjeshëm për atë pjesë… edhe njëkohësisht edhe SH.B.A sivjet kan me festu 250 vjetorin dhe NEWBORNI i kushtohet edhe vlerave të përbashkëta që i kemi me aleatin tonë më të fortë.” tha Ismaili.

Qytetarët thonë se dizajnimi i Newbornit e hijeshon këtë pjesë të kryeqytetit, por edhe përçon mesazh të fortë.

NEWBORN është shpalosur për herë të parë më 17 shkurt 2008, në mbrëmjen pasi ishte shpallur pavarësia./ATVLIVE.TV/

Polica ka arrestuar një person që po kërkohej për dhunim.

I kërkuari është i mitur i dënuar me 3 vjet masë institucionale edukative.

Pas arrestimit është dërguar në qendrën korrektuese për të mitur.

Avokatja e Jakup Krasniqit, Venkateswari Alagendra ka nisur paraqitjen e deklaratës përmbyllëse në Dhomat e Specializuara të Kosovës në Hagë.

Ajo tha se klienti po privohet padrejtësisht nga liria tash e pesë vjet.

“Ekziston vetëm një opsion, që ju të merrni vendim për pafajësi dhe që të kthehet në familjen e tij. Në të gjitha këto 34 muaj gjykim, nuk ka asnjë dëshmitar që tregon se ai e ka rrahur, torturuar apo keqtrajtuar ndonjë person. Kjo prokurori kryesisht mbështetet në spekulime dhe pretendime të pabaza”, tha ajo.

Më tej, ajo tha se Prokuroria i ka anashkaluar provat shfajësuese. Po ashtu, theksoi se ZPS nuk ka thirrur një numër vendimtar të dëshmitarëve, të cilët do të kishin dhënë informacione për hierarkinë e Ushtrisë Çlirimtare të Kosovës.

Në hyrje të parashtrimeve përfundimtare, mbrojtja e Krasniqit tha se prokuroria ka dështuar edhe të argumentojë lidhjen mes klientit të saj dhe krimeve të pretenduara.

“Kjo akuzë nuk do të duhej të ishte ngritur fare. Prokuroria do të duhej të tërhiqte aktakuzën në fazë më të hershme por këtë nuk e bëri”, shtoi ajo.

Mbrojtja e Jakup Krasniqit do të vonojë me paraqitjen e deklaratës përmbyllëse gjatë tërë ditës. /kp/

Prej 19 ministrive të kabinetit të ri qeveritar të Albin Kurtit, të votuar mbrëmjen e së mërkurës, vetëm pesë gra kanë marrë drejtimin e këtyre institucioneve.

Donika Gërvalla do të vazhdojë të jetë zëvendëskryeministre e dytë. Edhe këtë mandat ajo do të jetë ministre, veçse kësaj here jo e Diasporës, por e Drejtësisë.

Ministrinë e Kulturës, tash do ta drejtojë Saranda Bogujevci. Ndërsa Fitore Pacolli në Qeverinë Kurti 3 do të jetë ministre e Mjedisit dhe Planifikimit Hapësinor.

Në krye të Ministrisë së Ekonomisë edhe për katër vite do të vazhdojë të qëndrojë Artane Rizvanolli.

Ndërsa në vend të Rozeta Hajdarit, në krye të Ministrisë së Industrisë, Ndërmarrësisë, Tregtisë dhe Inovacionit është emëruar Mimoza Kusari.

Ky numër i ulët i ministreve gra sipas Violeta Haxhollit nga Instituti Demokratik i Kosovës, ndodh për arsye të shumë faktorëve.

“Ishte pak dëshpëruese që në kabinetin e propozuar nga partia në pushtet ka një numër të vogël të grave që janë emëruar si ministre. Ky është një trend që po e ndjek edhe këtë qeveri. Kjo është për arsye të shumë faktorëve; konkretisht lidhet me bazat brenda partive politike, ku nuk ka një investim më të madh në përfaqësimin e grave, në mënyrë që gratë të fuqizohen që në degët e partive politike.”, tha Haxholli.
Por sipas Haxhollit, edhe gratë duhet të jenë më të zëshme për të kërkuar hapësirën që u takon.

“Gratë, po ashtu, duhet të jenë më të zëshme për të kërkuar hapësirën që u takon, pra që sfidat të cilat i kanë t’i adresojnë brenda partive dhe të kërkojnë mbështetje, qoftë financiare. Ne e dimë që çdo parti ka buxhetin e vet të ndarë nga KQZ-ja dhe normalisht që çdo parti ka të drejtë t’i qaset këtij buxheti.”, shtoi tutje ajo.

Edhe në Qeverinë Kurti 2, nga gjithsej 15 ministri, vetëm 5 ministra ishin gra./atvlive.tv.

Bill Gates parashikon një të ardhme të ndryshuar për botën e punës. Sipas tij, brenda dhjetë vjetëve, Inteligjenca Artificiale do të ketë një ndikim të tillë sa që shumica e punëve do t’i përfundojnë robotët dhe AI-ja, duke e bërë të mundur që njerëzit të punojnë vetëm dy ditë në javë, ndërsa pjesa tjetër të jetë kohë për relaks dhe aktivitete të tjera.

Gates thekson se kjo mund të sjellë një periudhë të re, ku shoqëria duhet të rishikojë mënyrën si do të shpenzohet kjo kohë e lirë. Ai sugjeron se AI-ja mund të mbushë boshllëqet në fusha si mjekësia dhe arsimi, duke ofruar shërbime më të besueshme dhe duke eliminuar problemet me mungesën e stafit. Për Gatesin, inteligjenca artificiale përfaqëson një revolucion pozitiv që mund të çojë në trajtime të reja për sëmundje vdekjeprurëse, zgjidhje për krizën klimatike dhe arsim cilësor për të gjithë, duke transformuar rrënjësisht jetën njerëzore në dekadën që vjen.

Me një pasuri prej rreth 125 miliardë dollarësh, Bill Gates mbetet një nga figurat më të njohura në botën e biznesit dhe teknologjisë. Por sipas tij, rruga drejt suksesit nuk ka qenë aspak e lehtë, një nga sfidat më të mëdha personale ka qenë prokrastinimi. Ish-CEO i Microsoft, ka deklaruar gjithashtu së fundmi se “njerëzit nuk kanë lindur për të punuar”, duke ngritur pikëpyetje të mëdha mbi të ardhmen e punës në një botë gjithnjë e më të automatizuar. Gjatë një interviste në podcastin Express Adda, Gates theksoi se puna nuk është një qëllim në vetvete, por një nevojë që lind nga mungesa e burimeve dhe domosdoshmëria për të prodhuar të mira për mbijetesë.

Avokati i drejtorit të shkollës “Pavarësia”, Rinor Bajrami, ka thënë se klienti i tij ditë më parë ka paraqitur kallëzim penal ndaj nxënësit, i cili ishte përfshirë në një konflikt fizik me një mësimdhënës. Sipas avokatit, nxënësi ka kanosur me vrasje dhe ka fyer rëndë drejtorin dhe familjen e tij.

Prokuroria Themelore në Prishtinë të enjten njoftoi se ka zgjeruar hetimet edhe ndaj drejtorit të shkollës, pasi ky u pa në një video duke e goditur nxënësin e njëjtë të përfshirë në rastin me mësimdhënësin.

Avokati Bajrami ka thënë se përveç se me 5 shkurt, nxënësi e ka kanosur drejtorin edhe më 9 shkurt, kur ka dalë videoja që drejtori e godet nxënësin, dhe se ky veprim i drejtorit ka ardhur pikërisht për shkak të këtyre rrethanave.

“Klienti im më 5 shkurt 2026 ka paraqitur kallëzim penal ndaj nxënësit A.O. për kanosje me vrasje, sharje dhe fyerje të rënda ndaj tij dhe familjes së tij. Pra, organet e rendit kanë qenë të njoftuara për situatën disa ditë para incidentit të publikuar. Më 9 shkurt 2026, ai është përballur sërish me sharje ndaj familjes së tij, me fyerje të rëndë të vajzës së tij 2 vjet e gjysmë dhe me kanosje të drejtpërdrejtë për jetën nga i njëjti person. Reagimi i tij ka ndodhur në ato rrethana konkrete, nën ndikimin e drejtpërdrejtë të kanosjes. Menjëherë pas momentit kritik, ai vetë ka ftuar policinë dhe ka raportuar ngjarjen”, thuhet në sqarimin e avokatit.

Bajrami ka shtuar se përgjegjësia penale e drejtorit të shkollës duhet të analizohet në kontekstin e plotë faktik dhe juridik, “e jo në mënyrë të shkëputur nga rrethanat që i kanë paraprirë dhe e kanë shoqëruar ngjarjen”.

Kryeministri i Kosovës, Albin Kurti ka arritur në Mynih.

Ai atje do të marr pjesë në Konferencën e përvitshme të Sigurisë.

Kurti në Gjermani është duke u shoqëruar nga bashkëshortja e tij, Rita Augestad Knudsen.

Në këtë konferencë do të marrin pjesë shumë udhëheqës e liderë botëror. Në mesin e tyre do të jetë edhe Sekretari i Shtetit, Marco Rubio.

24 vjet më parë kishte nisur gjyqi ndaj ish-presidentit të Serbisë, Sllobodan Millosheviq, i cili njihet si kasapi i Ballkanit.

Hulumtuesja e Tribunalit të Hagës për ish-Jugosllavi, Nevenka Tromp, pikërisht nga objekti i atëhershëm i njohur si Gjykata e Hagës, kujton ditën e 2 shkurtit kur nisi ky proces, duke përmendur turmën e gazetarëve përreth objektit.

“Ishte 24 vjet më parë kur gjyqi ndaj Millosheviqit filloi në këtë ndërtesë pas meje. Nëse do të shikonit pamjet arkivore, i gjithë ky shesh këtu ishte plot i mbushur me antena satelitore të të gjitha mediave botërore. Nuk mund të kaloje nga turma e gazetarëve – ishte lajmi kryesor në gjithë botën. Dhe tani, 24 vjet më pas, kemi një situatë të ngjashme me Dhomat e Specializuara të Kosovës, ku liderët e Kosovës, udhëheqësit e kohës së luftës, kundërshtarë të regjimit të Millosheviqit, po mbajnë fjalët e tyre përmbyllëse në një proces penal kundër tyre”, tregon ajo në një intervistë për KosovaPress.

Millosheviq gjykohej për krime të luftës, krime kundër njerëzimit, për gjenocid në Kroaci, në Bosnje e Kosovë.

Autorja e librit “Gjykimi i papërfunduar i Sllobodan Millosheviqit” flet për KosovaPress për rëndësinë që kishte ky proces për Kosovën në veçanti.

Tromp thekson se gjatë kohës sa ishte Millosheviq në pushtet ndodhën krime masive e mizori të mëdha.

“Para se gjithash, Millosheviq ishte pothuajse 10 vjet president, fillimisht i Serbisë dhe më pas i Republikës Federale të Jugosllavisë. Gjatë kësaj kohe pati tre luftëra radhazi ku ndodhën krime masive dhe mizori të mëdha. Pas vitit 1995, kur Millosheviqi ishte nje nga arkitektët e Marrëveshjes se Dejtonit për Bosnjën, ai pati nje dhanc ta rehabilitonte vetën, sepse i kujtojmë fotografitë në Paris nga dhjetori 1995, ku ai po shtrëngonte duart me Alija Izetbegoviqin -president i Bosnjes, Franjo Tugjmanin president i Kroacisë dhe Bil Clintonin. Dhe disi ai nuk arriti ta mbante vetën në anen e mirë te historisë. Ai nuk mund ta linte Kosovën të lirë dhe duke hyrë në luftën e Kosovës, ai u cementua në historinë botërore si një figurë negative, si një njeri që abuzoi me pushtetin politik dhe ishte përgjegjës për mizori masive. Fillimisht u padit për Kosovën sepse, pas Dejtonit, ai mendoi: jam i sigurt, askush nuk do të më padisë për Kroacinë dhe Bosnjë-Hercegovinën. Por sapo humbi pushtetin në tetor 2000 dhe u transferua në Hagë vetëm mbi bazën e aktakuzës për Kosovën, në qershor 2001, prokuroria e zgjeroi aktakuzën me dy të tjera: një për krimet në Kroaci nga 1991 deri në 1995 dhe një për krimet në Bosnjë-Hercegovinë, përfshirë gjenocidin.”

Ky proces, Tromp shton se kishte rëndësi te veçantelajm i madh, meqë krimi i gjenocidit për herë të parë po gjykohej në nivel individual.

“Kjo ishte lajmi i madh, sepse krimi i gjenocidit për herë të parë po gjykohej në nivel individual në lidhje me luftërat jugosllave, por gjithashtu për herë të parë u ngrit edhe një padi për gjenocid kundër një shteti, kundër Serbisë, në gjykatën më të lartë të OKB-së këtu në Hagë. Përmes aktakuzës së Millosheviqit, bota kuptoi se ekziston një mënyrë për t’u përballur me krimin e gjenocidit si në nivel individual, në nivel presidenti, ashtu edhe në nivel shteti. Pse nuk kishte akuza për gjenocid për Kosovën në aktakuzë, kjo mbeti e pazgjidhur, sepse vdekja e tij dhe zhvillimet e mëvonshme të së drejtës penale ndërprenë çdo hetim të mëtejshëm për prova të mundshme të gjenocidit në Kosovë në vitet 1998–1999”, thekson Tromp për KosovaPress.

Gjyqi ndaj Millosheviqit filloi nga 12 shkurti i vitit 2002 e zgjati deri në mars te vitit 2006, por nuk arriti të ketë aktgjykim përfundimtar për shkak se ai vdiq në qeli.

Sikur te përfundohet ky gjyq dhe të kishte vendim kundër Millosheviqit, Tromp thotë se do të ishte e vështirë që sot të gjykohen ish-liderët e Ushtrisë Çlirimtare të Kosovës.

“Nga pikëpamja ligjore, do të kishte qenë shumë e rëndësishme të kishte një vendim kundër tij. Një përgjegjësi e tij personale e konfirmuar qartë në gjuhën e ligjit do të implikonte shumë më tepër edhe udhëheqjen ushtarake serbe në kriminalitet. Jam e sigurt se do të kishte qenë shumë më e vështirë, 20 vjet më vonë, që Dhomat e Specializuara të Kosovës të gjykonin udhëheqësit e UÇK-së për krimet në Kosovë. Do të dukej shumë më jomorale dhe jashtë realitetit krahasuar me atë që do të përmbante një vendim kundër Millosheviqit si kreu i shtetit. Unë nuk kam asnjë dyshim se nga 66 pikat e aktakuzës, ndoshta nuk do të ishte shpallur fajtor për të gjitha, por për shumicën po. Dhe aktakuza për Kosovën ishte shumë e rëndësishme, sepse do të forconte narrativën e përgjegjësisë asimetrike në luftëra — që do të thotë se asnjë palë tjetër, si individ apo si shtet, nuk kishte rol dhe përgjegjësi më të madhe për shpërbërjen e dhunshme dhe kryerjen e krimeve sesa Millosheviqi, udhëheqja politike, ushtarake dhe policore serbe, dhe në fund edhe vetë Serbia si shtet”, përfundon ajo.

Projektbuxheti për vitin 2026 që kap vlerën rreth 4 miliardë euro, ka kaluar në Komisionit për Buxhet, Punë dhe Transfere.

Ligji për Ndarjet Buxhetore për vitin 2026 është miratuar me 6 vota për, asnjë kundër dhe një abstenim.

Në rend dite janë edhe marrëveshjet ndërkombëtare:

-Shqyrtimi i Projektligjit nr.10/L-003 për ratifikimin e Marrëveshjes së financimit, për programin e parë për “financimin e politikave zhvillimore për efektivitetin fiskal, konkurrueshmërinë dhe rritjen e gjelbër” në mes të Republikës së Kosovës e përfaqësuar nga Ministria e Financave, Punës dhe Transfereve dhe Asociacionit Ndërkombëtar për zhvillim;

– Shqyrtimi i Projektligjit nr.10/L-005 për ratifikimin e marrëveshjen e kredisë në mes të Republikës së Kosovës përfaqësuar nga Ministria e Financave, punës dhe transfereve, dhe asociacioni ndërkombëtar për zhvillim për projektin “kompas” – qasja gjithëpërfshirëse e Kosovës për forcimin e sistemit të shëndetësisë.

– Shqyrtimi i Projektligjit nr.10/L-006 për ratifikimin e marrëveshjen e kredisë në mes të Republikës së Kosovës përfaqësuar nga Ministria e financave, punës dhe transfereve, dhe asociacioni ndërkombëtar për zhvillim (anzh) për projektin “edukimi në fëmijërinë e hershme dhe kujdesi për kapitalin njerëzor të Kosovës”;

-Shqyrtimi i Projektligjit nr.10/L-004 për ratifikimin e marrëveshjes së kredisë për “instrumentin për reforma dhe rritje për ballkanin perëndimor” ndërmjet Bashkimit Evropian, që përfaqësohet nga Komisioni Evropian si huadhënës, dhe Kosovës si huamarrës dhe bankës qendrore të Kosovës si agjent i huamarrësit.

Ministri i Financave, Hekuran Murati derisa prezantoi projektbuxhetin e 2026-tës dhe marrëveshjet ndërkombëtare, ka kërkuar nga deputetët që të përfundojnë procedurat sa më shpejt që është e mundur.