Category: Lajme

Kosova është realitet i pakthyeshëm, dhe se shteti i Kosovës është projekt i përfunduar i lirisë, kështu tha kryetari i PDK-së, Bedri Hamza në fjalën e tij në seancën solemne të 18-vjetorit të pavarësisë së Kosovës e ku theksoi se pavarësia nuk është vetëm flamur dhe himn, por siguri e drejtësi, raporton Ekonomia Online.

Hamza aty përmendi dhe gjykimin e ish-drejtuesve të UÇK-së që po bëhet në Hagë e ku nënvizoi se nuk do të lejojnë që historia të nënshkruhet në kurrizin e sakrificës.

“Pavarësia nuk është vetëm flamur dhe himn, por është siguri dhe drejtësi. Është ruajtje e së vërtetës sonë historike. Sot festojmë, por njëkohësisht edhe reflektojmë, sepse ndërkohë që ne ndërtojmë të ardhmen, pjesa më e lavdishme e historisë sonë, lufta çlirimtare, është në bankën e të akuzuarve në Hagë. Lufta jonë çlirimtare po gjykohet; ata që kanë kontribut në shtet po gjykohen. Hashim Thaçi, Jakup Krasniqi, Kadri Veseli e Rexhep Selimi po gjykohen. Dhe sot duhet ta themi qartë dhe me vendosmëri: besimi i Kosovës në drejtësinë ndërkombëtare nuk duhet tradhtuar. Ne nuk lejojmë që historia të nënshkruhet në kurriz të sakrificës sonë. Ne nuk pranojmë barazi artificiale mes agresorit serb dhe rezistencës sonë për liri. Nuk pranojmë që drejtësia të bëhet selektive”, tha Hamza.

Hamza ka potencuar se UÇK-ja nuk ishte ndërmarrje kriminale, por ishte ushtri çlirimtare.

“UÇK nuk ishte ndërmarrje kriminale, ishte ushtri çlirimtare. Ishte përgjigje ndaj shtypjes, zëri i një populli që nuk kishte rrugë tjetër. Kosova kërkon drejtësi, por drejtësi të vërtetë, që nuk relativizon sakrificën; drejtësi që nuk i nënshtrohet politikës, sepse liria jonë nuk është krim. Pavarësia jonë nuk është gabim historik, por e drejtë e fituar me shumë heronj, dëshmorë, martirë dhe përkrahje të aleatëve tanë”, theksoi Hamza.

Gjatë fjalës së tij Hamza kujtoi edhe momentin kur Kosova shpalli pavarësinë.

“Më 17 shkurt 2008, në orën 15:39 minuta, është dita dhe ora kur flamuri ynë u ngrit për herë të parë në këto institucione. Është dita kur guximi i brezave tanë dhe sakrifica e tyre u bë shpresë e përjetshme për çdo qytetar. U shpall Republika e Kosovës, u shpall fundi i një padrejtësie historike. Kjo ditë nuk ishte rastësi, ishte përfundim i një rruge të gjatë dhe sakrifice. Ishte kulmimi i rezistencës, ishte fitore e vendosmërisë së një populli që refuzoi të nënshtrohet. Kosova kaloi nga sakrifica në sovranitet, nga rezistenca në republikë dhe nga ëndrra shekullore në realitet shtetëror. Pra, kjo Republikë është fitore. Themelet e saj janë të skalitura me gjakun e dëshmorëve, janë të ngritura mbi sakrificën e atyre që zgjodhën lirinë mbi jetën. Prandaj, sot në këtë ditë shumë të rëndësishme të popullit tonë, ne përulemi me mirënjohje para familjeve të dëshmorëve, luftëtarëve të lirisë, para çdo qytetari që kontribuoi në këtë ditë dhe përulemi me mirënjohje edhe para aleatëve tanë. Në orët më të errëta të historisë sonë, bota demokratike nuk heshti. Ndërhyrja e NATO-s ishte momenti kur ndërgjegjja e qytetërimit u bë mburojë e Kosovës. U jemi përjetësisht mirënjohës Shteteve të Bashkuara të Amerikës, mikut tonë të madh dhe aleatit tonë strategjik, që qëndruan në anën e duhur të historisë. Faleminderit BE-së dhe çdo shteti që njohu pavarësinë tonë”, u shpreh ai.

Në seancën solemne në Kuvendin e Kosovës për 18 vjetorin e pavarësisë së Kosovës, Kryetari i LDK-së, Lumir Abdixhiku ka thënë se sot është ditë reflektimi për rrugëtimin shekullor të Kosovës drejt lirisë, identitetit dhe dinjitetit, shkruan Reporteri.net.

Ai tha se pavarësia është rezultat i një përpjekjeje kolektive dhe kulmi i një procesi të gjatë për mbijetesë.

Sipas tij, 17 shkurti 2008 përfaqëson jo vetëm aktin e shpalljes, por edhe vitet e rezistencës, durimit dhe sakrificës së popullit.

“Ka ditë kur historia na fton të flasim, e ka ditë kur na kërkon të dëgjojmë, e si kjo e sotmja që na kërkon të kujtojm. 18 vjet më parë Kosova u bë shtet, por shumë më herë Kosova kishte vendosur të ishte e lirë dhe të bëhej shtet. Ne duhet të ja kujtojmë vetes se pavarësia jonë është kulmi i procesi të gjatë shekullor për mbijetesë, identitet dhe dinjitet. Rezultat i një përpjekeje kolektive”.

Abdixhiku theksoi rolin e Ibrahim Rugova dhe lëvizjes paqësore të viteve ’90 në orientimin demokratik dhe ndërkombëtar të Kosovës.

“Në këtë ditë ne nuk e kujtojmë vetëm aktin e 17 shkurtit të 2008 por gjithë rrugën që na solli deri aty. Kujtojmë vitete e reuzistencës, durimit e sakrificës. Kujtojmë një popull që vendosi të mos zhdukej dhe të mos dorëzohej kur gjithçka dukej e pamundur. Në themel të kësaj rruge qëndron filozofia politike e Atit themeltar të Republikës. presidentit historik, Ibrahim Rugova dhe gjithë lëvizjes paqësore të viteve 90”, tha Abdixhiku në Kuvend.

Ai vlerësoi se filozofia politike e Rugovës e konceptoi shtetin si projekt demokratik dhe moral, me orientim euroatlantik të përhershëm.

“Rugova i dha Kosovës një orientim historik, epokal, e ktheu çështjen ndërkombëtare nga një realitet i dhunëshëm në një projekt politik me legjitimitet moral. E konceptoi shtetin si projekt demokratik. Lëvizja paqësore nuk ishte zgjedhje e lehtë, por e guximshme”.

“Rugova i mësoi Kosovës se durimi nuk është dorëzim, por forcë e përmbajtur se paqja nuk është mungesë guximi por strategji e mençurislë, dhe se orientimi euroatlantik është identitt politik i përhersëm i popullit të Kosovës. Ai e pa shtetin si kornizë morale ku qytetari ndjehet i mbrojtur”, tha Abdixhiku.

“Truri kompjuterik” i F-35, duke përfshirë komponentët e tij të bazuar në cloud, mund të hakohet për të pranuar përditësime të softuerëve të palëve të treta, njësoj si “hakimi” i një celulari, sipas ministrit holandez të Mbrojtjes.

Deklarata vjen ndërsa operatorët e huaj të avionëve vazhdojnë të jenë nën presion për atë që mund të ndodhë nëse Shtetet e Bashkuara do të ndërpresin ndonjëherë mbështetjen.

Administrata e presidentit Donald Trump ka ndjekur një numër politikash që kanë rezultuar në tendosje të reja diplomatike me disa aleatë të hershëm, veçanërisht në Evropë.

“Nëse, pavarësisht gjithçkaje, ende doni të përmirësoni, do të them diçka që nuk duhet ta them kurrë, por do ta them gjithsesi: mund ta hakoni një F-35 njësoj si një iPhone”, tha Gijs Tuinman gjatë një episodi të podkastit “Boekestijn en de Wijk” të BNR Nieuwsradio të postuar në internet dje.

Tuinman, i cili është ministër i Mbrojtjes që nga viti 2024, nuk duket se ka ofruar ndonjë detaj të mëtejshëm rreth asaj që mund të përfshijë procesi i hakimit.

Çfarë dobësish kibernetike, nëse ka, mund të tregojë kjo është gjithashtu e paqartë. Është e mundur që ai të ketë folur më shumë në mënyrë nocionale ose figurative rreth veprimeve që mund të ndërmerren në të ardhmen, nëse është e nevojshme.

TWZ ka kontaktuar Zyrën e Programit të Përbashkët F-35 dhe prodhuesin Lockheed Martin për përgjigje ndaj vërejtjeve të Tuinman.

Programi F-35 vendos kufizime unike në aftësinë e operatorëve për të bërë ndryshime në softuerin e avionit, si dhe në sistemet e lidhura në tokë.

Pothuajse të gjitha F-35 në shërbim sot shohin përditësime të softuerit që vijnë përmes një rrjeti të bazuar në cloud, versioni origjinal i të cilit njihet si Sistemi Autonom i Informacionit Logistik (ALIS).

Problemet e vazhdueshme me ALIS kanë çuar në zhvillimin e një Rrjeti të Integruar të të Dhënave Operacionale (ODIN) pasues, kalimi në të cilin është ende në vazhdim.

Rrjeti ALIS/ODIN është projektuar për të trajtuar shumë më tepër sesa vetëm përditësime të softuerit dhe të dhëna logjistike. Është gjithashtu porta e përdorur për të ngarkuar paketa të të dhënave të misionit që përmbajnë informacione planifikimi shumë të ndjeshme, duke përfshirë detaje rreth mbrojtjes ajrore të armikut dhe inteligjencë të tjera, në F-35 para misioneve dhe për të shkarkuar inteligjencën dhe të dhëna të tjera pas një sulmi.

Deri më sot, Izraeli është i vetmi vend i njohur që ka negociuar me sukses një marrëveshje që i jep të drejtën të instalojë softuer të zhvilluar në vend në F-35I-të e tij, si dhe të operojë avionët e tij jashtë rrjetit ALIS/ODIN.

Izraelitët gjithashtu kanë aftësinë të kryejnë mirëmbajtje tërësisht të pavarur në nivel depoje, diçka për të cilën do të kthehemi më vonë.

BIG: Dutch Defence Minister Gijs Tuinman hints that software independence is possible for F-35 jets.

He literally said you can “jailbreak” an F-35.

When asked if Europe can modify it without US approval:

“That’s not the point… we’ll see whether the Americans will show… pic.twitter.com/f11cGvtYsO

— Clash Report (@clashreport) February 15, 2026

Policia e Kosovës ka njoftuar se gjatë implementimit të Planit Operativ “Parandalimi i Kontrabandës në Brezin Kufitar”, më 16.02.2026 në orët e mbrëmjes, patrulla e policisë kufitare, SPMK Vërmicë, gjatë vëzhgimit të terrenit me pajisje nate, ka vërejtur një barkë në Liqenin e Vërmicës që lëvizte nga territori i Shqipërisë në drejtim të Republikës së Kosovës.

Pas shkarkimit të mallit, personat e dyshuar që ndodheshin në barkë kanë vërejtur prezencën e Policisë dhe janë larguar me shpejtësi në drejtim të Shqipërisë.

Për rastin është njoftuar menjëherë Policia Kufitare e Shqipërisë, me të cilën po vazhdon bashkëpunimi dhe koordinimi institucional.

“Gjatë kontrollit të terrenit, njësitë policore kanë gjetur një rimorkio me mall të dyshuar si kontrabandë. Në vendngjarje është sekuestruar një sasi e konsiderueshme duhani i përpunuar në paketime prej 500 gramësh, si në vijim: Marlboro – 320 pako, Dunhill – 30 pako, Davidoff – 450 pako, Parliament – 150 pako, Winston – 150 pako, Sobranie – 350 pako, Pall Mall – 30 pako, Lucky Strike – 450 pako dhe Camel – 60 pako. Sasia e përgjithshme e duhanit të sekuestruar vlerësohet të jetë rreth 1,000 kilogramë”, thuhet në njoftim.

Lidhur me rastin është njoftuar Prokurori i Shtetit, i cili ka rekomanduar sekuestrimin e mallit dhe inicimin e rastit për veprën penale “Kontrabandë me mallra”. Rasti është duke u hetuar në bashkëpunim me Doganën e Kosovës.

Policia e Kosovës ka shtuar se mbetet e përkushtuar në parandalimin dhe luftimin e veprave penale ndërkufitare.

 

Presidentja Vjosa Osmani ka publikuar një fotografi me Rifat Jasharin nga seanca solemne për kremtimin e 18-vjetorit të pavarësisë në Kuvendin e Kosovës.

Osmani në fjalën e saj në këtë seancë tha se “UÇK-ja është ideali më i madh që kanë ndërtuar shqiptarët ndër shekuj” dhe “shtylla më e fortë” e shtetit që “nuk mund të zhbëhet nga asnjë përpjekje për rishkrim apo deformim të historisë”.

Ambasadori britanik në Kosovë, Jonathan Hargreaves ka uruar Ditën e Pavarësisë së Kosovës.

Përmes një video të shpërndarë në faqen e tij zyrtare, Hargreaves tha se Britania e Madhe është krenare që ka një partnere si Kosovën, transmeton Klankosova.tv.

“Ndërsa shohim përpara, ne mbetemi të përkushtuar për të punuar krah për krah për një Evropë të fortë, të sigurt dhe të begatë”, tha ai.

Pos tjerash ai përmendi edhe deklaratën e ish-kryeministrit Hashim Thaçi të shpalljes së pavarësisë.

I mbijetuari i masakrës mbi familjen Berisha në Suharekë në 1999, Gramoz Berisha ka treguar sot se i është gjetur një plumb në trup, 27 vjet pas përfundimit të luftës.

Berisha në një postim në Facebook shkruan se ishte i plagosur në luftë nga forcat serbe në krahun e majtë, por së fundi ka kuptuar që një plumb e ka edhe në krahun e djathtë.

Lexoni të plotë postimin e tij:

27 vite më parë, kur bashkë me mamin kërcyem nga kamioni, unë isha i plagosur në krahun e majtë.

Ajo plagë ma kishte mundësuar të shtiresha si i vdekur kur na kapën tek piceria dhe na hodhën në kamion bashkë me trupat e tjerë.

Vite të tëra jam trajtuar për plagën në krahun e majtë. Të gjithë mjekët më kishin thënë se plumbi kishte rrëshqitur dhe nuk ishte më në trupin tim.

27 vite dhimbje, krenari, mungesë dhe përpjekje për të gjetur qoftë edhe një kockë të familjarëve tanë, që nuk arritën të kërcenin nga kamioni që i barte si kufoma

Unë, mami Vjollca dhe Shyhretja ishim të vetmit që kërcyem. Të tjerët shkuan me kamion. Edhe motra Dafina, edhe vëllai im Driloni, edhe babi Sedat.

Të 49 anëtarët e familjes sonë shkuan. Kishte edhe të gjallë brenda. Kishte edhe thirrje për ndihmë nga kamioni. Por nuk kërcyen. Shkuan. Mbijetuam vetëm ne të tre.

Para tre muajsh ndjeva një dhimbje të tmerrshme në krahun tim të djathtë.

I bindur se nuk kishte asnjë lidhje me të kaluarën time, meqë plagën e kisha në krahun e majtë, iu drejtova mjekëve këtu në Shtutgart. Filluan ekzaminimet. Pas disa fotografimeve, nisën të më bëjnë pyetje:

— A mos keni qenë pjesë e ndonjë plaçkitjeje?

— Jo.

— A keni marrë pjesë në ndonjë shkëmbim zjarri?

— Po. Jam i mbijetuar… Ua tregova edhe plagën në krahun e majtë.

U mblodhën shumë mjekë. “ein Wunder”, përsëritnin.

Mjekët më treguan se në krahun tim të djathtë ndodhej plumbi që kishte synuar të ma merrte jetën para 27 viteve. Plumbi kishte depërtuar nga krahu i majtë në të djathtin, pa prekur asnjë organ vital.

Kjo ishte mrekullia që ata e quanin “ein Wunder”.

Unë mësova se gjatë gjithë kësaj kohe paskam mbajtur me vete metalin që e mposhta — që sot ta shijoj lirinë dhe pavarësinë e Kosovës.

Gëzuar 17 shkurtin.

Kryetari i Prishtinës, Përparim Rama në Ditën e Pavarësisë së Kosovës, tha se populli përulet me respekt të thellë para të gjithë atyre që kontribuuan në themelimin dhe konsolidimin e shtetit.

Po ashtu, ai shtoi se ata që sakrifikuan, që vepruan me guxim dhe që mbajtën gjallë idealin e lirisë, janë gurët themelorë mbi të cilët qëndron sot Republika e Kosovës.

“Në këtë ditë të shënuar për historinë tonë, përulemi me respekt të thellë para të gjithë atyre që kontribuan në themelimin dhe konsolidimin e shtetësisë së Kosovës. Ata që sakrifikuan, që vepruan me guxim dhe që mbajtën gjallë idealin e lirisë, janë gurët themelorë mbi të cilët qëndron sot Republika jonë”, ka shkruar ai.

Kryetarja e Kuvendit Albulena Haxhiu, tha se në themelin e Republikës qëndron Ushtria Çlirimtare e Kosovës dhe lufta e saj e drejtë për çlirim, duke shtuar se populli i Kosovës e përjeton si të padrejtë Gjykatën Speciale, raporton Ekonomia Online.

“Në këtë ditë të rëndësishme e lartëson ajo që qëndron në themelin e Republikës sonë. Ajo që buroi nga populli. Që është sa mundësia edhe e vërteta e tij. Ushtria Çlirimtare e Kosovës dhe lufta e saj e drejtë për çlirim. Lufta e Ushtrisë Çlirimtare të Kosovës ishte luftë për dinjitet dhe liri. Ajo ishte kundërpërgjigje në rrethanat e një okupimi të ashpër, kur dhuna sistematike ndaj popullit shqiptar po merrte përmasa shkatërruese. UÇK-ja ishte ushtria mbrojtëse e një populli që kërkonte të jetonte i lirë në vendin e vet, pa pasur synim shkatërrimin e askujt tjetër. Dhe çdo përpjekje për ta shkëputur këtë luftë nga konteksti i saj historik dhe politik rrezikon ta shtrembërojë të vërtetën e asaj kohe”, tha ajo.

Haxhiu nga foltorja e Kuvendit të Kosovës, ku po mbahet seanca solemne në shënim të 18-vjetorit të Pavarësisë tha se lufta e UÇK-së nuk ishte agresion por rezistencë ndaj okupimit të shtypjes.

“Aq shumë kishte besim në drejtësinë e luftës sonë, saqë bota demokratike asokohe intervenoi e më vonë edhe e mbështeti pavarësinë e vendit tonë. Ne i kujtojmë këto të vërteta sepse populli i Kosovës e përjeton si të padrejtë Gjykatën Speciale. Dhe këtë gjykim, së pari sepse anashkalon vetë rrethanat në të cilat u zhvillua lufta jonë çlirimtare. Lufta jonë nuk ishte agresion, por rezistencë ndaj okupimit e shtypjes, ndaj gjenocidit dhe spastrimit etnik. Luftë për të mbrojtur tokën tonë, pragun e shtëpisë, familjet, qytetarët civilë të paarmatosur në Kosovë. Institucionet e Republikës së Kosovës do të vazhdojnë të mbrojnë të vërtetën historike, vlerën dhe dinjitetin e luftës për liri dhe parimet themelore të drejtësisë, duke kundërshtuar çdo përpjekje për ta deformuar atë”, tha ajo.