ATV

Category: Lajme

  • Pas BE-së dhe Gjermanisë, reagon edhe Italia për rrënimin e vilave në Ujman

    Pas BE-së dhe Gjermanisë, reagon edhe Italia për rrënimin e vilave në Ujman

    Gjatë ditës së djeshme, një sërë ekskavatorësh, nën asistimin e Policisë së Kosovës, nisën rrënimin e njëmbëdhjetë shtëpive në bregun e Liqenit të Ujmanit, në komunën e Zubin Potokut.

    Aksioni rihapi debatin për të drejtat pronësore dhe kompetencat e institucioneve.

    Për këto veprime, kanë reaguar BE-ja dhe Gjermania, e tash edhe Italia.

    Përmes ambasadës së saj në Kosovës, Italia është shprehur e shqetësuar për veprimet e institucioneve të Kosovës.

    “Ambasada e Italisë në Prishtinë i bashkohet BE-së në shprehjen e brengës për rrënimin e shtëpive në Liqenin e Ujmanit”, ka thënë Ambasada italiane në Facebook.

    Autoritetet e Kosovës thonë se objektet janë ndërtuar pa leje në tokën që administrohet nga Ndërmarrja Publike Hidroekonomike “Ibër-Lepenci”, ndërsa pronarët pretendojnë se prona është subjekt i një procesi gjyqësor dhe se rrënimi i objekteve nuk është dashur të nisë para përfundimit të procedurave.

  • Gjermania e shqetësuar me rrënimin e shtëpive pranë Ujmanit

    Gjermania e shqetësuar me rrënimin e shtëpive pranë Ujmanit

    Ambasada e Gjermanisë në Kosovë ka shprehur shqetësim për shembjen e shtëpive pranë liqenit të Ujmanit, duke iu bashkuar qëndrimit të Bashkimit Evropian.

    “Ambasada e Gjermanisë në Prishtinë ndan shqetësimet e shprehura nga BE-ja. Jemi thellësisht të shqetësuar për rrënimin e shtëpive pranë liqenit të Ujmanit. Respektimi i procedurave të rregullta ligjore dhe zbatimi i parimeve të sundimit të ligjit, siç janë të përcaktuara në Kushtetutën e Kosovës, janë thelbësore për rrugën evropiane të Kosovës”, ka thënë kjo ambasadë.

    E njëjta ka bërë thirrje për “ndërprerjen e menjëhershme” të këtyre veprimeve dhe ka kërkuar zgjidhje transparente e të ligjshme.

    Reagim për këtë çështje pati edhe nga Zyra e BE-së në Kosovë, e cila ka shprehur keqardhje për rrënimin e shtëpive pranë Liqenit të Ujmanit të martën.

  • Thaçi kërkoi lirim nga burgu e ofroi dorëzani 50 mijë euro, ZPS-ja e do në Hagë: Procedurat po ecin shpejt

    Thaçi kërkoi lirim nga burgu e ofroi dorëzani 50 mijë euro, ZPS-ja e do në Hagë: Procedurat po ecin shpejt

    Zyra e Prokurorit të Specializuar ka kundërshtuar kërkesën e mbrojtjes së Hashim Thaçit për lirim të përkohshëm të ish-presidentit të Kosovës nga burgu. Sipas kryeprokurores ameriakne, Kimberly West, Thaçi duhet të mbetet në paraburgim.

    “Përparimi i vazhdueshëm dhe i shpejtë i këtij procesi gjyqësor, përfshirë afatin kohor për çdo mocion përfundimtar lidhur me provat, gjithashtu mbështet vazhdimin e paraburgimit të THAÇIT”, thuhet në shkresën e West.

    Gjithashtu prokurorja amerikane ka përmendur rrezikun për kryerjen e veprave të tjera penale dhe ndëhryjen në procedura.

    “Konstatimet e vazhdueshme mbi ekzistencën e rreziqeve sipas nenit 41(6)(b) që i atribuohen THAÇIT në këtë çështje mbeten të vlefshme. Ato janë bërë mbi bazën e një numri të madh faktorësh të arsyetuar dhe të individualizuar, dhe asnjë kusht i mundshëm për lirimin e tij nuk mund t’i zbusë ato në mënyrë të mjaftueshme”, shkruan dokumenti i ZPS-së.

  • Rrënimi i vilave pa leje në Ujman, reagon Bashkimi Evropian

    Rrënimi i vilave pa leje në Ujman, reagon Bashkimi Evropian

    Zyra e Bashkimit Evropian në Kosovë ka shprehur keqardhje për siç thonë rrënimin e djeshëm të shtëpive pranë Liqenit të Ujmanit.

    Në reagim thuhet se rrënimi ndodhi ndërkohë që banorët e prekur kishin nisur procedura gjyqësore brenda afatit 15-ditor të përcaktuar në njoftimet e ndërmarrjes publike Ibër-Lepenc/Ibar-Lepenac për lirimin dhe pastrimin e tokës.

    “BE-ja është e shqetësuar për mungesën e respektimit të procedurës së rregullt ligjore në këtë dhe në disa raste të tjera të kohëve të fundit në veri të Kosovës që nga shkurti i këtij viti”.

    Tutje bëhet thirrje për ndërprerjen e menjëhershme të çdo rrënimi, largimi të detyruar apo marrjeje në posedim të mëtejshme derisa shqetësimet lidhur me procedurën e rregullt ligjore, proporcionalitetin, të drejtat pronësore, të drejtat e njeriut dhe mjetet juridike efektive të adresohen në mënyrë të duhur.

    “Autoritetet duhet të bashkëpunojnë pa vonesë me banorët dhe komunat e prekura dhe të shqyrtojnë zgjidhje të ligjshme.

    Roli i Policisë së Kosovës në operacione të tilla duhet të mbetet rreptësishtë brenda mandatit të saj ligjor, të bazohet në kërkesa ose vendime të qarta të autoriteteve kompetente dhe të dokumentohet në mënyrë të duhur. Masat e pakthyeshme të zbatimit në kontekstin e procedurave në zhvillim dhe pretendimeve të kontestuara pronësore ngrisin shqetësime serioze për sundimin e ligjit.

    Në përputhje me rrugën evropiane të Kosovës, BE-ja pret që autoritetet t’i adresojnë këto shqetësime me urgjencë dhe transparencë dhe të sigurojnë që veprime të ngjashme të mos përsëriten”, thuhet më tej. /Telegrafi/

  • ​Yll Limani bashkë me Përparim Ramën dhuron instrumente për shkollën “Prenk Jakova”

    ​Yll Limani bashkë me Përparim Ramën dhuron instrumente për shkollën “Prenk Jakova”

    Kryetari i Prishtinës, Përparim Rama dhe këngëtari i mirënjohur, Yll Limani kanë dhuruar disa instrumente si donacion për shkollënë e muzikës “Prenk Jakova” në Prishtinë.

    Rama tha se komuna po investon edhe në art e kulturë dhe se e ardhmja do të jetë më e ndritshme për brezat e rinj, duke falënduar këngëtarin për kontributin e bërë.

    “Po unë veç dua me e falënderu shumë Yllin për kontributin e mrekullueshëm që ia ka bërë shkollës Prenk Jakova. Edhe tash me iniciativën e fundit kemi pasur koncertin e mrekullueshëm të Yllit, pra në këtë muaj. Po ashtu me i treguar që kryeqyteti, përveç shtrimit të asfaltit, rregullimit të kanalizimit e shumë e shumë të tjera që duhet me i kry komuna, po ashtu investon edhe në art e kulturë. Edhe jemi shumë krenarë që në këtë aspekt e kemi një bashkëpunim të mrekullueshëm me Yllin për me i ndihmuar edhe talentët e rinj në kryeqytet. Pra që e ardhmja jonë të jetë edhe më e ndritshme për brezat e rinj”, tha Rama.

    Ndërsa, artisti Yll Limani tha se kjo nuk do të jetë mbëhtetja e vetme për këtë shkollë, duke u shprehur optimist se do të krijohen më shumë kushte dhe mundësi për talentët e rinj.

    “Ajo ka qenë më e pakta që kemi mundur me bërë. Atë çka kemi mundur me gjetë, me i sistemu gjërat rregullisht për atë sallë të shkollës, e kemi bërë. S’ka me qenë ajo gjëja e fundit që kemi me bërë për shkollën Prenk Jakova. Unë besoj që sa më shumë krijohen kushte dhe mundësi që talentët e rinj që po na përcjellin tash me ardhur edhe me u arsimuar e me u edukuar, është më mirë për Prishtinën, për vendin, Kosovën”, shtoi Limani.

    E drejtori i shkollës së muzikës “Prenk Jakova”, Driton Saqipi tha se ky institucion arsimor ka arritur në nivel artistik shumë të lartë.

    “Jemi e vetmja shkollë artistike në kryeqytet edhe e kemi dëshmuar sidomos viteve të fundit. Kori, orkestra, baleti domethënë kanë arritur në nivel artistik shumë të lartë, kështu që ju falënderojmë për kryetarin, faleminderit edhe për Yllin, sepse me të vërtetë artistët e rinj e meritojnë. Kështu shpresoj që edhe artistët e tjerë kanë me shkuar rrugës njëjtë si Ylli, sepse me të vërtetë kemi nevojë për mbështetje”, tha ai.

    Në mungesë të objektit të vet, shkolla “Prenk Jakova”, ka disa vite që funksionin në hapësirat e ndara ndara nga shkolla e mesme e mjekësisë “Ali Sokoli”

  • Shqipëria dërgon trupa ushtarake në Rumani, javën tjetër vendimi për Gazën

    Shqipëria dërgon trupa ushtarake në Rumani, javën tjetër vendimi për Gazën

    Këshilli i Ministrave ka miratuar projektvendimin për dërgimin e një toge nga Forcat e Armatosura të Shqipërisë në përbërje të brigadës shumëkombëshe në Rumani.

    Lajmin e bëri të ditur ministri i Mbrojtjes, Ermal Nufi, i cili theksoi se ky hap përbën një angazhim shtesë të qeverisë shqiptare në kuadër të sigurisë kolektive të NATO-s.

    Sipas ministrit, prania e trupave shqiptare do të shërbejë për forcimin e sigurisë në territorin rumun dhe vjen në vazhdën e pjesëmarrjes së vazhdueshme të Shqipërisë në misionet ndërkombëtare të Aleancës…

    “Sot në Këshillin e Ministrave u miratua projektvendimi për dërgimin e një toge nga Forcat e Armatosura te brigada shumëkombëshe që ndodhet në Rumani.

    Ky projektvendim është një angazhim shtesë i qeverisë shqiptare në misionet kombëtare. Jam i bindur që ky mision shtesë është në vazhdën e gjithë misioneve të tjera që ne kemi. Angazhimi i trupave tanë do të jetë i tillë që do të forcojë sigurinë në territorin e Rumanisë, është gjithnjë në kuadër të sigurisë kolektive të Aleancës…”, tha Nufi.

  • Aksion i përbashkët inspektues në Prizren dhe Suharekë, kontrollohen 26 auto-parkingje

    Aksion i përbashkët inspektues në Prizren dhe Suharekë, kontrollohen 26 auto-parkingje

    Inspektorati Qendror i Punës ka zhvilluar një aksion të përbashkët inspektues në komunat e Prizrenit dhe Suharekës, në bashkëpunim me Policinë e Kosovës, Administratën Tatimore të Kosovës (ATK), Inspektoratin Qendror të Ministrisë së Industrisë, Ndërmarrësisë dhe Tregtisë (IQMINT), si dhe në koordinim me Prokurorinë Themelore në Prizren.

    Sipas njoftimit, aksioni është realizuar në gjithsej 26 auto-parkingje, me qëllim të verifikimit të respektimit të legjislacionit në fuqi dhe evidentimit të parregullsive në ushtrimin e veprimtarisë së këtyre subjekteve.

    “Gjatë inspektimeve janë konstatuar shkelje të ndryshme, për të cilat institucionet pjesëmarrëse kanë ndërmarrë veprimet përkatëse, secila në përputhje me kompetencat, mandatin dhe përgjegjësitë e saj ligjore”, thuhet në njoftim.

    Në aksion kanë marrë pjesë Inspektorati Qendror i Punës, Policia e Kosovës – Drejtoria për Hetimin e Krimeve Ekonomike dhe Korrupsionit, Administrata Tatimore e Kosovës dhe Inspektorati Qendror i Ministrisë së Industrisë, Ndërmarrësisë dhe Tregtisë.

    Inspektorati Qendror i Punës theksoi se do të vazhdojë bashkëpunimin me institucionet e tjera për të siguruar zbatimin e ligjit dhe mbrojtjen e të drejtave të punëmarrësve.

    “Inspektorati Qendror i Punës mbetet i përkushtuar në bashkëpunimin ndërinstitucional për forcimin e zbatimit të ligjit, mbrojtjen e të drejtave të punëmarrësve dhe krijimin e një mjedisi të sigurt dhe të ligjshëm të punës”, thuhet në njoftim.

  • Përfundon verifikimi i nënshkrimeve në LDK, s’dihet data e Kuvendit

    Përfundon verifikimi i nënshkrimeve në LDK, s’dihet data e Kuvendit

    Ka përfunduar verifikimi i nënshkrimeve të delegatëve të Lidhjes Demokratike të Kosovës (LDK) për thirrjen e Kuvendit të Jashtëzakonshëm, ku pritet të kërkohet shkarkimi i kryetarit, Lumir Abdixhiku.

    Por, data se kur do të mbahet ky Kuvend ende nuk dihet.

    Kështu ka bërë të ditur për Radio Dukagjinin, sekretari i LDK-së, Ilir Ferati i cili tha se aktualisht janë në fazën e përgatitjeve teknike.

    “Ka përfunduar verifikimi i nënshkrimeve tash po presim përgatitjen e pjesëve të tjera të cilat janë teknike, por si sekretariat jemi duke punuar në këtë drejtim në mënyrë që me pas të mundshme që sa më shpejt me i dhënë drejtim demokratikë partisë. Në momentin që jemi të gatshëm e njoftojmë kryetarin dhe pastaj ai në një afat sa më të shpejt me bë ftesën për Kuvendin, nuk ka arsye për shtyrje të Kuvendit dhe me sa kam parë edhe kryetari është i interesuar që sa më shpejt ta kryej si proces që me krijuar njëfarë paqe brenda për brenda njerëzve të LDK-së“, tha ai.

    Edhe sot, sekretari i LDK-së ka ritheksuar se në takimin Kurti-Abdixhiku nuk është diskutuar për emra, po për parime.

    “Ne nuk kemi diskutuar me Vetëvendosjen për pozicione dhe as për emra në këtë takim janë diskutuar parimet të cilat duhet me u respektua tutje për të zhvilluar diskutimin në kuptim të pozicioneve. Ende nuk jemi në atë fazë, në momentin që diskutojmë për parime edhe pse sigurisht një prej tyre duhet të jetë zgjidhja e çështjes që na ka quar në zgjedhje i bie pjesa e presidentes. Kjo është çështje e negociatave ne e kemi kandidate me votë të këshillit të përgjithshëm Vjosa osmani, ka qenë bartëse e listë dhe njëherit edhe kandidate për presidente, por tani është ende herët me diskutua sepse nëse nuk ka dakordancë për parime nuk vazhdojmë tutje”, tha ai.

    I pyetur se çfarë do të ndodhë nëse Lëvizja Vetëvendosje nuk e mbështet Vjosa Osmanin për presidente, Ferati tha se kjo është një çështje që i takon Vetëvendosjes dhe se do të trajtohet në kuadër të negociatave ndërmjet partive.

    “Është çështje e Lëvizjes Vetëvendosje jo e Lidhjes Demokratike të Kosovës dhe është çështje e negociatave. Thash është herët për të folur për emra jemi ende në diskutim të parimeve nëse ka rezultat në këtë pjesë pastaj flasim për emra”, theksoi ai.

    Ndërsa nga Lëvizja Vetëvendosje presin rikthimin e negociatave me LDK, nga kjo parti thonë se proceset e brendshme të LDK-së do të trajtohen vetëm nga strukturat e saj, ndërsa për zhvillimet e mëtejshme do të flitet pasi të përfundojë procesi i rikonfirmimit të kryetarit të partisë.

    “Ato janë çështje tona të brendshme që nuk ka nevojë as Vetëvendosja dhe as ndonjë parti tjetër me u marr. Në momentin që ne i zgjidhim njëjtë sikurse u deklarua kryetari që i ka pezulluar diskutimet besoj njëjtë deklarohet edhe pasi të rikonfimnrohet si kryetar i LDK-së, pjesën tjetër të formimit dhe konstituimit të institucioneve është obligim i partisë së parë“, tha ai.

  • KRU “Drini i Bardhë” nis sanimin e dëmeve pas vërshimeve dhe erërave të forta

    KRU “Drini i Bardhë” nis sanimin e dëmeve pas vërshimeve dhe erërave të forta

    KRU “Drini i Bardhë” ka nisur punimet për sanimin e dëmeve të shkaktuara nga vërshimet dhe erërat e forta, të cilat kanë prekur sistemin e ujitjes në zonat që mbulon kjo ndërmarrje.

    Sipas njoftimit të KRU “Drini i Bardhë”, njësia operative ka dalë në terren që në orët e hershme të mëngjesit, duke filluar punën për pastrimin e kanaleve dhe largimin e pengesave të krijuara si pasojë e kushteve të pafavorshme atmosferike.

    Ekipet janë të angazhuara në disa lokacione, ku po punojnë intensivisht për sanimin e dëmeve dhe rikthimin sa më të shpejtë të funksionimit normal të sistemit të ujitjes.

    “KRU ‘Drini i Bardhë’ falënderon Njësinë Operative për angazhimin dhe punën e palodhshme në terren, në sanimin e dëmeve dhe rikthimin e sistemit të ujitjes në gjendje normale”, thuhet në njoftim.

    Nga KRU “Drini i Bardhë” bëhet e ditur se ekipet do të vazhdojnë punën deri në eliminimin e plotë të pasojave të shkaktuara nga vërshimet dhe erërat e forta, me qëllim sigurimin e funksionimit të qëndrueshëm të sistemit të ujitjes.

  • Ish-deputetja britanike dyshohet se u vra me 21 goditje çekiçi brenda banesës së saj

    Ish-deputetja britanike dyshohet se u vra me 21 goditje çekiçi brenda banesës së saj

    Vrasje makabre në Britani, ish-deputetja u sulmua brutalisht në shtëpinë e saj

    Një ngjarje e rëndë ka tronditur Britaninë e Madhe, ku ish-deputetja Ann Widdecombe dyshohet se është vrarë brutalisht brenda banesës së saj, pasi, sipas prokurorisë, u godit 21 herë në kokë me çekiç ndërsa ishte duke ngrënë drekë, përcjell albinfo.ch.

    Detajet u bënë publike gjatë një seance në Gjykatën e Magjistraturës në Westminster. Prokurori Kashif Malik deklaroi se i dyshuari, Joshua Kerry, 28 vjeç nga South Yorkshire, kishte mbërritur në shtëpinë e viktimës më 8 korrik me një automjet tip Vauxhall Corsa.

    Sipas hetimeve, 28-vjeçari hyri në banesë përmes derës kryesore, i pajisur me doreza të zeza, dhe brenda pak minutash e sulmoi ish-deputeten në kuzhinë. Prokuroria pretendon se ai e rrëzoi nga karrigia dhe e goditi 21 herë në kokë me çekiç, përpara se t’i merrte portofolin dhe të largohej nga vendi i ngjarjes.

    Prokuroria e ka cilësuar sulmin si një akt me “egërsi të jashtëzakonshme dhune”.

    Rasti u zbulua pasi Widdecombe nuk u paraqit në një intervistë të planifikuar online për emisionin “Matt Allwright Show” në Channel 5. Pas përpjekjeve të pasuksesshme për ta kontaktuar, asistentja e saj personale kërkoi nga kopshtari të kontrollonte banesën.

    Të nesërmen, më 9 korrik, ai hyri në shtëpi, dera e së cilës ishte lënë e hapur, dhe e gjeti ish-deputeten të pajetë në dyshemenë e kuzhinës, me plagë të rënda në kokë.

    I dyshuari Joshua Kerry ndodhet në paraburgim dhe do të përballet me procedurat gjyqësore, ndërsa autoritetet britanike po vazhdojnë hetimet për zbardhjen e plotë të rastit.