Category: Lajme

Gjykata e Posaçme e Apelit shqyrton sot kërkesën e kryebashkiakut Erion Veliaj për lirim nga paraburgimi.

Veliaj kundërshton në Apel vendimin e 1 shkurtit të GJKKO, që i refuzoi zbutjen e masës së sigurisë.

Në Shkallën e Parë Veliaj kërkoi ndryshim të masës, duke ofruar edhe garanci pasurore, me pretendimin se nuk ekzistojnë më kushtet ligjore për mbajtjen e tij të izoluar.

Kryebashkiaku qëndron në paraburgim prej 10 shkurtit 2025.

Një burrë në Pejë po dyshohet se ka rrahur dhe ka dhunuar seksualisht gruan e tij.

Ai tashmë është ndaluar për 48 orë për veprën penale “dhunimi” me urdhër të prokurorit të shtetit.

Zëdhënësi i Prokurorisë Themelore në Pejë, Shkodran Nikçi, tha për Gazetën Express se për të pandehurin do të kërkohet sigurimi i prezencës së tij në procedurë penale, ndërsa viktima është e sigurt.

“Brenda afatit ligjor, prokurori i shtetit do të parashtrojë kërkesë për sigurimin e prezencës së të pandehurit në procedurë penale. Kurse, viktima ka marrë tretmanin e duhur pas raportimit të rastit dhe për momentin gjendet në shtëpi të sigurt”.

Për këtë rast sot u deklarua edhe policia në raportin 24-orësh.

“Pejë 22.02.2026 – 22:00. Më 23.02.2026 është arrestuar i dyshuari mashkull kosovar, i cili ka ushtruar dhunë dhe ka dhunuar seksualisht viktimën femër- bashkëshorten e tij. Gjatë kontrollit në shtëpinë e të dyshuarit janë gjetur dhe konfiskuar tri armë zjarri dhe 27 fishekë. Me vendim të prokurorit i dyshuari është dërguar në mbajtje”.

Dialogu me Serbinë në duart e Glauk Konjufcës. Ai vjen në këtë pozitë në kohën kur Kosovës i kërkohet hapi i parë konkret dhe praktik drejt formimit të Asociacionit. Kryediplomati e kishte lavdëruar fillimisht një propozim të BE-së për Asociacionin, por më vonë e kishte arsyetuar vendimin e Qeverisë për të mos e dërguar atë për shqyrtim në Gjykatën Kushtetuese, siç kishte kërkuar Brukseli.

Glauk Konjufca do ta udhëheqë dialogun me Serbinë. Kryediplomati i Kosovës e priti sot në takim përfaqësuesin special të Bashkimit Europian për dialogun, Peter Sorensen, në Prishtinë.

Ministria e Punëve të Jashtme njoftoi sot se Konjufca e njoftoi Sorensenin që procesi i dialogut tashmë do të jetë nën udhëheqjen këtij dikasteri.

“Në takim u diskutua momentumi aktual në të cilin ndodhet dialogu, si dhe u shkëmbyen pikëpamje mbi qasjen dhe parimet e nevojshme për të siguruar një proces më efektiv dhe të qëndrueshëm”, thuhet në njoftim.

MPJ tha se Konjufca ka shprehur përkushtimin e Kosovës për t’i përmirësuar marrëdhëniet me Serbinë përmes dialogut.

“Zëvendëskryeministri Konjufca theksoi se Republika e Kosovës mbetet e përkushtuar që dialogun ta shohë si një mundësi për përmirësimin e marrëdhënieve fqinjësore me Serbinë, si dy shtete sovrane në rrugën e tyre drejt integrimit evropian”.

Që prej kur e pasoi Miroslav Lajçakun si ndërmjetës të mandatuar nga BE-ja për dialogun Kosovë-Serbi, Peter Sorensen më së shumti është takuar me ish-zëvendëskryeministrin Besnik Bislimi, i cili ishte kryenegociator i Kosovës në dialog, por që ka mbetur jashtë kabinetit të ri qeveritar të udhëhequr nga kryeministri Albin Kurti.

Sorensen ka kërkuar gjithnjë zbatimin e plotë të Marrëveshjes Bazike dhe Aneksit të Zbatimit të Ohrit, për të cilën kryeministri i Kosovës, Albin Kurti dhe presidenti i Serbisë, Aleksandar Vuçiq ishin marrë vesh në vitin 2023. Marrëveshja përfshin Asociacionin e komunave me shumicë serbe, themelimi i të cilit mbetet kërkesa kryesore e Perëndimit për Kosovën.

Ndërmjetësi i ri europian mundi t’i ulte disa herë përballë njëri-tjetrit në tavolinë kryenegociatorët e Kosovës dhe Serbisë, por nuk pati sukses në një përpjekjeje për një takim të nivelit të lartë Kurti-Vuçiq, të cilin e synonte. Ata nuk janë takuar që nga shtatori i vitit 2023.

Çështje të tjera, si arrestimet e shtetasve të njëra-tjetrës e kishin ndërlikuar punën e Sorensenit, i cili e nisi punën e ndërmjetësit në një situatë kur kurba e tensioneve ndërmjet Kosovës dhe Serbisë nuk ishte në lartësinë e saj më të madhe, por të dyja vendet dukej se po merreshin më shumë me gjendjet e tyre brenda.

Konjufca vjen në këtë pozitë në kohën kur Kosovës i kërkohet hapi i parë konkret dhe praktik drejt formimit të Asociacionit.

Një draft-statut i hartuar për këtë asociacion nga BE-ja nuk është dërguar ende në Gjykatën Kushtetuese për interpretim, ashtu siç ka kërkuar Brukseli.

Kosova deri më tani nuk ka pranuar që ta themelojë Asociacionin si prioritin kryesor, ndërsa Serbia ka refuzuar t’i zbatojë obligimet lidhur me anëtarësimin e Kosovës në organizatat ndërkombëtare dhe me integritetin e saj territorial.

Qëndrimet e Konjufcës për Asociacionin

Konjufca e komentonte pozitivisht një propozim të BE-së për normalizimin e marrëdhënieve Kosovë-Serbi në shkurt të vitit 2023.

Gjatë një prononcimi për media më 7 shkurt të atij viti, ai thoshte se tha se në propozimin europian, që njihej edhe si propozimi franko-gjerman, “nuk përmendet kurrfarë asociacioni”.

Konjufca thoshte se ai plan kishte “njohje ‘de facto’”, por shtonte se se ai “nuk e ka formën e marrëveshjes përfundimtare dhe ky është rrezik i madh”.

Në maj të vitit 2023, Konjufca befasisht u gjend duke i dhënë merita ish-kryeministrit Isa Mustafa për një letër garantuese që e kishte marrë vendi nga ish shefja e diplomacisë së BE-së, Federica Mogherini se Asociacioni nuk do të përbënte nivel të tretë të pushtetit në Kosovë.

“Nëse keni një qeveri të fuqishme mundeni me përdor atë letër, nëse e ke të dobët e gjuan në mbeturina. Varet qysh e koncepton. Ne sot e përdorim, por nuk e përjashtoj që edhe qeveria Mustafa e ka përdor. Nuk thash kurrgjë. Nëse e ka nxjerrë me shumë mundim atë letër, bravo i qoftë ja jap dorën. Qe dora. Se neve sot po na ndihmon”, thoshte ai.

Pas një muaji, në maj 2023, ai thoshte se “Kosova duhet të tregojë se nuk ka kurrfarë obligimi dhe nuk duhet ta bëjë asnjë hap, pa u realizuar binari i parë e që është njohja de facto”.

Në shtator të vitit 2023, Konjufca thoshte se ka “vetëm një çelës për të ecur dialogu përpara”

“Asociacioni bashkë me njohjen, përndryshe nuk ka avancim të dialogut, është problem”, deklaronte ai. Pesë diplomatë nga SHBA-ja, Franca, Gjermania dhe Italia, ua kishte sjellë Kosovës dhe Serbisë një “propozim modern europian për statutin e Asociacionit të komunave me shumicë serbe”, në atë kohë.

Konjufca thoshte gjatë një prononcimi për media në tetor të vitit 2023 se “në një shikim sipërfaqësor, propozimi për Asociacionin është plotësisht në përputhje me Kushtetutën e Republikës së Kosovës dhe kurrfarë niveli i pushtetit në Kosovë”.

Por ai shtonte se kjo s’duhej të ishte “temë e negociatave me Serbinë”. Thoshte se Por, “nëse ndonjëherë ndodh ndonjë draft i Asociacionit, ai do të propozohet nga Republika e Kosovës”.

Propozimi i diplomatëve perëndimorë për Asociacionin, u tha fillimisht se ishte pranuar nga palët. Madje kryeministri Albin Kurti thoshte se ishte shkruar “me kujdes dhe në përputhje me Kushtetutën e Kosovës”.

Por gjërat kishin ndryshuar dhe Konjufca, në mars të vitit 2024 thoshte se “Bashkimi Evropian nuk ka kompetencë t’i propozojë Asociacion Kosovës”.

“Është gabim të mendosh se është kompetencë e BE-së të na caktojë neve [draft-status për Asociacionin], kurse kompetencë e jona të jetë ta dërgojmë atë në Gjykatën Kushtetuese. Nuk mendoj se është kompetencë e BE-së t’i propozojë draft Kosovës dhe Kosova të qëndrojë gatitur dhe ta dërgojë draftin që BE-ja e propozon. Nuk pajtohem me këtë procedurë”.

Më pas, në qershor të vitit 2024, Konjufca thoshte se drafti i dorëzuar nga BE-ja “ka një parregullsi”, meqenëse Brukseli nuk ka kompetencë ta bëjë këtë propozim.

Konjufca ishte ankuar edhe në shtator të vitit 2024 se bashkësia ndërkombëtare po tregohej e njëanshme kur bëhet fjalë për raportet e saj me Kosovën dhe me Serbinë.

Atëherë, ai e konsideroi të vdekur dialogun e Kosovës me Serbinë, për shkak të sulmit në Banjsk/ të Zveçanit në shtator të vitit 2023, ku vdiq rreshteri i Policisë, Afrim Bunjaku.

“Ajo që ndodhi në Banjskë ishte gozhda e fundit ndoshta në arkivolin e dialogut të Brukselit, sa i përket dialogut i cili kishte filluar në vitin 2011”, thoshte ndër tjerash Konjufca.

Por takime të tjera në kuadër të dialogut Kosovë – Serbi vazhduan të zhvilloheshin pavarësisht deklaratave të Konjufcës, të cilit më nuk iu bë të fliste për këtë temë, pasi vendi hyri në një vit me zgjedhje dhe bllokada institucionale brenda.

Shefja e politikës së jashtme të BE-së, Kaja Kallas, sheh se tani është krijuar një momentum i ri për për të çuar përpara marrëdhëniet mes BE-së dhe Kosovës dhe dialogun mes Kosovë-Serbi. Asociacioni konsiderohet nga Perëndimi si pjesa kryesore që Kosova duhet ta zbatojë.

Asociacioni i komunave me shumicë serbe, sipas marrëveshjes së dakorduar ndërmjet Kurtit dhe Vuçiqit, do të duhej t’u sigurojë serbëve në Kosovë një nivel të caktuar vetëmenaxhimi. Statuti i Asociacionit, i hartuar nga BE-ja, parasheh rregullimin e pozitës së komunitetit serb, mbrojtjen e të drejtave të tyre, si dhe financimin nga Serbia./Gazeta Express

Çmimi i arit mbetet i qëndrueshëm, por i rritur sot, pasi arriti një nivel rekord tre-ditor dje. Sipas të dhënave të fundit, një gram ar i pastër (24 karat) shitet për rreth 141.6 euro, ndërsa çmimi spot është rreth 4,404 euro për ons (rreth 31.1 gramë).

Krahasuar me seancën e mëparshme, ka një rritje të lehtë të euros, duke treguar se tregu nuk tregon shenja të një tërheqjeje të ndjeshme pas rritjes së djeshme.

Rritja e djeshme u nxit nga rreziqet e shtuara gjeopolitike dhe reagimi i investitorëve, të cilët tradicionalisht e përdorin arin si një “strehë të sigurt” në kohë paqëndrueshmërie. Stabiliteti i sotëm, në vend të një korrigjimi në rënie, tregon se kërkesa mbetet e fortë.

Analistët theksojnë se pasiguria financiare globale, luhatjet e tregut të aksioneve dhe lëvizjet e valutave, veçanërisht raporti euro-dollar, kanë një ndikim të rëndësishëm në çmim. Një faktor shtesë është kërkesa në rritje nga investitorët institucionalë, të cilët rrisin ekspozimin e tyre ndaj arit në kohë rreziku.

Edhe pse rritja e ndjeshme e djeshme është stabilizuar pjesërisht, vlera aktuale tregon se investitorët vazhdojnë ta shohin metalin e çmuar si një alternativë të sigurt në kushtet e pasigurisë ekonomike dhe politike.

Nëse tensionet gjeopolitike dhe paqëndrueshmëria e tregut financiar vazhdojnë, analistët presin që ari të mbetet në një nivel të lartë ose të shohë rritje të re në periudhën e ardhshme.

Gjykata Themelore në Prishtinë edhe në rigjykim e ka shpallur fajtor dhe e ka dënuar me 4 vjet e 8 muaj burgim ish-shefin e Agjencisë Kosovare për Inteligjencë, Driton Gashi i akuzuar në rastin e njohur si “Gylenistët”.

Në këtë rast, Driton Gashi në cilësinë e shefit të Agjencisë Kosovare për Inteligjencë (AKI), akuzohej se ishte angazhuar drejtpërdrejt në dëbimin e 6 shtetasve turq nga Kosova duke shkelur procedurat ligjore, raporton “Betimi për Drejtësi”.

Aktgjykimi u shpall të martën nga kryetarja e trupit gjykues, Violeta Namani-Hajra dhe anëtarët Medie Bytyqi dhe Leon Përlaska.

Gjykatësja Namani-Hajra tha se Gashi dënohet me 4 vjet e 8 muaj burgim dhe ndaj tij u shqiptua edhe dënimi plotësues- ndalimi i ushtrimit të funksionit në administratë publike për 4 vite, pas mbajtjes së dënimit me burgim.

Në arsyetim të vendimit, gjykatësja tha se në rigjykim shumica e seancave janë mbajtur të mbyllura për shkak të ndjeshmërisë së rastit. Tha se i akuzuari ka tejkaluar kompetencat zyrtare.

I akuzuari obligohet të paguajë shpenzimet e procedurës dhe atë për paushallin gjyqësor shumën 1 mijë euro dhe 100 euro të tjera për Fondin për Kompensimin e Viktimave të Krimit.

Palët e dëmtuara për realizmin e kërkesës pasurore- juridike udhëzohen në kontest të rregullt juridiko-civil.

Të pranishëm në shpallje ishin prokurorja Habibe Salihu-Statovci dhe mbrojtësi i Gashit, avokati Driton Musliu. Ndërkaq mungoi i akuzuari Gashi.

Më 19 korrik 2023, Themelorja e kishte shpallur fajtor ish-shefin e AKI-së, Driton Gashi, duke e dënuar me 4 vite e 8 muaj burgim, derisa Valon Krasniqi dhe Rrahman Sylemani ishin liruar nga akuza.

Por, në dhjetor 2024, Gjykata e Apelit e ka kthyer këtë rast në rigjykim vetëm sa i përket pikës I të dispozitivit ndaj të akuzuarit Driton Gashi, ndërsa ka vërtetuar lirimin nga akuza për dy të akuzuarit tjerë.

Sipas aktakuzës së ngritur nga Prokuroria Speciale e Republikës së Kosovës më 24 shkurt 2021, Driton Gashi akuzohej se si person zyrtar në kohën e kryerjes së veprës penale drejtor i Përgjithshëm i Agjencisë Kosovare të Inteligjencës, tutje AKI, prej 23 mars 2018, e deri më 29 mars 2018, në Prishtinë, me qëllim që shtetasit e Republikës së Turqisë, Cihan Ozkan, Yusuf Karabina, Kahraman Demirez, Hasan Hyseyn Demir dhe Mustafa Erden, që kishin leje qëndrim të ligjshëm dhe të drejtën e punës në Kosovë dhe Osman Karakoya që kishte bërë kërkesë për leje qëndrim në Kosovë, e të cilit procedura nuk i kishte përfunduar, t’i dëbojë me forcë kundërligjshëm nga Kosova dhe t’i dorëzojë tek autoriteteve turke.

Gjithnjë sipas aktakuzës, Driton Gashi akuzohej se keqpërdori detyrën zyrtare, duke mos i përmbushur detyrat zyrtare sipas kompetencës, në atë mënyrë që Departamentit për Shtetësi, Azil dhe Migracion, më tutje DSHAM, të MPB i rekomandoi revokimin e lejeve të qëndrimit për shtetasit turq Cihan Ozkan, Yusuf Karabina, Kahraman Demirez, Hasan Hyseyn Demir dhe Mustafa Erden dhe mosdhënien e lejes për Osman Karakoya, për arsye se kinse ata paraqesin rrezik për sigurinë kombëtare, fakt që nuk është provuar fare në procedurë të zbatuar në bazë të ligjit, ndërsa të akuzuarit Rrahman Sylejmani, drejtor i Drejtorisë për Migrim dhe të Huaj në Ministrin e Punëve të Brendshme, tutje DMH, i kishte rekomanduar nxjerrjen e gjashtë urdhrave për dëbimin e të dëmtuarave me forcë nga Republika e Kosovës.

PSRK-ja pretendon se i akuzuari Driton Gashi, për këtë procedurë dhe për dëbimin e të dëmtuarve me forcë nga Republika e Kosovës, nuk e ka njoftuar Presidentin dhe Kryeministrin e Republikës së Kosovës, siç parashihet me Ligjin për AKI dhe as Kryeprokurorin e Shtetit siç parashihet me nenin 25 të Ligjit për AKI, dhe se ka tejkaluar po ashtu kompetencat duke përfshirë AKI, në aranzhimin e udhëtimit, transportin dhe pjesëmarrjen në operacionin e dëbimit që nuk ishin kompetenca të agjencisë që drejtonte, pastaj u angazhuan drejtpërdrejt në aksionin e dëbimit të tyre ani pse kjo nuk ishte në kompetencën e tij.

Me këto veprime, PSRK-ja e ngarkonte të akuzuarin Driton Gashi se ka kryer veprën penale “Keqpërdorimi i pozitës apo autoritetit zyrtar”, nga neni 422, paragrafi 1 të KPK-së.

Sipas kësaj aktakuze, Valon Krasniqi akuzohej se si person zyrtar, drejtor në DSHAM në MPB, në periudhën kohore prej 23 mars 2018 deri më 29 mars 2018, keqpërdori detyrën zyrtare duke mos i përmbushur detyrat zyrtare sipas kompetencës, në atë mënyrë që në kundërshtim me 91 të Ligjit për të Huaj, mori vendim për revokimin e lejeve të ligjshme të qëndrimit të të dëmtuarave shtetasve Cihan Ozkan, Yusuf Karabina, Kahraman Demirez, Hasan Husein Demir dhe Mustafa Erden dhe në kundërshtim me nenin 44 të të njëjtit ligj për Osman Karakoya, që ishte në procedurë për marrjen e lejes së qëndrimit, pa u përfunduar ajo me vendim të formës së prerë, mirëpo veproi vetëm duke u bazuar në rekomandimin e të akuzuarit Driton Gashi për revokimin e lejeve të qëndrimit për shtetasit turq dhe pa vërtetuar fare nëse informacionet e AKI plotësojnë kriteret ligjore të përcaktuara me ligj për të vërtetuar se të dëmtuarit paraqesin rrezik për sigurinë kombëtare.

Gjithnjë sipas Prokurorisë, po ashtu i akuzuari Valon Krasniqi, përgjegjësitë e tij ligjore për identifikimin e të dëbuarve, sigurimin e fletë-udhëtimeve, sigurimin e kujdesit mjekësor dhe autoritetin për zbatimin e operacionit të dëbimit me forcë të tyre ia kishte kaluar AKI-së dhe Policisë së Kosovës, në këtë mënyrë duke u shkelur të drejtat e të dëmtuarve, të drejtën e qëndrimit dhe punës së ligjshme në Kosovë të dëmtuarve iu ka shkaktuar dëm moral dhe material.

Me këto veprime, PSRK-ja e ngarkonte të akuzuarin Valon Krasniqi se ka kryer veprën penale “Keqpërdorimi i pozitës apo autoritetit zyrtar” nga neni 422, paragrafi 1 të KPK-së të KPK-së.

PSRK-ja e ngarkonte të akuzuarin Rrahman Sylejmani se si person zyrtar, drejtor i DMH, pranë MPB, më 29 mars 2018, në Prishtinë, tejkaloi kompetencat zyrtare në atë mënyrë që nxori gjashtë urdhra për dëbim me forcë të 6 shtetasve të Republikës së Turqisë, të dëmtuarave Cihan Ozkan, Yusuf Karabina, Kahraman Demirez, Hasan Husein Demir dhe Mustafa Erden, që kishin leje qëndrim të ligjshëm qëndrimi dhe pune në Kosovë, dhe Osman Karakoya që ishte në procedurë për marrjen e lejes së qëndrimit dhe punës edhe pse në bazë të nenit 99, par.1 të Ligjit për të Huaj, nuk ishte fare në kompetencë të DMH që drejtonte ai, por në kompetencë të DSHAM.

Ndërsa, thuhet se urdhrat për dëbim me forcë i nxori edhe pse ishin përmbushur asnjë nga kushtet për lëshimin e urdhrit për dëbim me forcë nga neni 97, par. 1 të të njëjtit ligj dhe po ashtu pa e zbatuar procedurën e paraparë në nenin 97, paragrafi 8 i të njëjtit ligj, ndërsa, dëboi me forcë dhe deportojë të dëmtuarin Hasan Husein Gunakan në mënyrë të kundërligjshme edhe pse atij nuk i ishte revokuar fare leja e qëndrimit dhe punës në Kosovë dhe nuk kishte as urdhër për dëbimin e tij, në këtë mënyrë shkeli rënd të drejtat e të dëmtuarve për qëndrim dhe punësim në Kosovë, me ç’rast iu shkaktoi dëm moral dhe material të dëmtuarve.

Me këto veprime, Prokuroria e ngarkonte të akuzuarin Rrahman Sylejmani se ka kryer veprën penale “Keqpërdorimi i pozitës apo autoritetit zyrtar” nga neni 422, paragrafi 1 të KPK-së.

Po ashtu, prokuroria e akuzonte Rrahman Sylejmanin edhe se si person zyrtar, në cilësinë si në piken III- të këtij dispozitivi, gjatë muajit mars 2018 në shkollat “Mehmet Akif”, në Gjakovë dhe Lipjan dhe në shtëpinë në lagjen “Marigona” në Prishtinë, me ndihmën e Policisë së Kosovës, privoi kundërligjshëm nga liria duke i dëbuar dhe deportuar me forcë të dëmtuarit e cekur në dispozitivin III pa ekzistuar asnjë bazë ligjore të paraparë me dispozitat e nenit 29, par.2 dhe 3 të Kushtetutës së Republikës së Kosovës dhe neni 13, paragrafi 1 i Kodit të Procedurës Penale.

Me këto veprime, PSRK e ngarkonte të akuzuarin Rrahman Sylejmani se ka kryer veprën penale “Privimi i kundërligjshëm i lirisë” nga neni 196, par. lidhur me par. 3 të Kodit Penal. /BetimipërDrejtësi/

Një helikopter me 15 persona në bord është rrëzuar në Peru.

Sipas raportimeve, një operacion i madh kërkim-shpëtimi u nis nga Forcat Ajrore Peruviane pasi humbi kontaktin me Mi-17 që po udhëtonte nga qyteti i Piscos në Chala, në rajonin e Arequipas. Ai u zhduk nga radari rreth orës 16:30 të dielën.

Kuptohet se familjet ishin në bord të helikopterit së bashku me katër anëtarë të ushtrisë dhe midis të vdekurve janë shtatë fëmijë.

Ushtria peruviane nuk ka dhënë detaje të mëtejshme rreth misionit dhe tregoi se aktivizoi kërkimin “në një përpjekje për të gjetur shokët dhe pasagjerët”.

Avionë të reagimit të shpejtë dhe patrulla të forcave speciale tokësore u dërguan dhe u vendosën së bashku me oficerët e policisë.

Avioni u pilotua nga Major Sergio Paucar Centurion dhe Luis Huertas Carcamo, së bashku me rreshterët Kamila Anchapuri Jove dhe Leiner Aguirre Huaman, të cilët po transportonin 11 pasagjerë, sipas mediave lokale.

Sipas një deklarate të lëshuar së fundmi nga forcat ajroe peruane, u konfirmua vendndodhja e helikopterit të rrëzuar.

“Pas një përpjekjeje intensive kërkimi të kryer sot, patrullat e forcave speciale, në koordinim me policinë kombëtare, arritën të lokalizonin avionin – një helikopter Mi-17, që humbi kontaktin radial.

Policia kufitare në Kukës ka arrestuar një shtetas turk të shpallur në kërkim ndërkombëtar për trafik të lëndëve narkotike. Në pikën e kalimit kufitar të Morinës u vu në pranga shtetasi V. B., 31 vjeç, banues në Stamboll.

Nga verifikimet e kryera dhe nga informacioni i shkëmbyer me Interpol Tiranën, rezultoi se ky shtetas ishte shpallur në kërkim ndërkombëtar, pasi Gjykata e Vjenës ka vendosur ndaj tij masën e sigurisë “Arrest në burg” për veprën penale “Prodhim dhe shitje e narkotikëve”.

Interpol Tirana, në bashkëpunim me homologët në Austri, vijon procedurat për ekstradimin e 31-vjeçarit.

Një person në Zveçan ka raportuar në Policinë e Kosovës se persona të panjohur kanë vendosur një letër kërcënuese në gjuhën serbe në garazhin e tij.

Sipas raportit 24 orësh të Policisë, ngjarja ka ndodhur më 22 shkurt 2026 dhe është regjistruar si rast “Kanosje”.

“Rr. Nemanjina, Zveqan 22.02.2026-NN. Ankuesi mashkull kosovar, ka raportuar se gjatë natës nga persona të panjohur në garazhin e tij i është vendosur një letër kërcënuese në gjuhen serbe”, ka thënë Policia në raportin e saj.

Tutje, Policia ka njoftuar se prokurori është informuar për rastin dhe hetimet janë duke vazhduar për zbardhjen e ngjarjes.

 

Një person është dorëzuar në polici në Gjakovë në lidhje me veprën penale “Armëmbajtje pa leje”.

Rasti kishte ndodhur më 25 janar, kurse i njëjti u dorëzua të hënën.

I dyshuari kishte me vete edhe një granatë dore. Në lidhje me rastin është njoftuar njësiti i deminimit të cilët kanë bërë shpërthimin e mjetit në mënyrë të kontrolluar.

Me vendim të prokurorit, i dyshuari është dërguar në mbajtje.