Fëmijët po tregojnë dëshirat e tyre për një mjedis më të mirë. Këta janë “Piktorët e Planetit” të cilët përmes vizatimeve e kanë shënuar Ditën Ndërkombëtare të Mjedisit.
Pikturat e fëmijëve nga një kopsht në Prishtinë janë realizuar në sheshin “Zahir Pajaziti” në kryeqytet.
Ky është një prej shumë aktiviteteve që Ministria e Mjedisit, Planifikimit Hapësinor dhe Infrastrukturës, në bashkëpunim me institucione të tjera, i kanë organizuar për të shënuar këtë ditë.
Bajram Kadriu nga zyra për komunikim e kësaj ministrie, thotë se ky aktivitet ndikon drejtpërdrejt në edukimin dhe ndërgjegjësimin e fëmijëve për çështje të mjedisit.
“Kemi marrë një seri aktivitetesh për shënimin e 5 qershorit, ditës botërore të mjedisit. Njëri ndër aktivitetet është me fëmijët nga një kopsht në Prishtinë dhe aktivitetet e tjera që jemi duke i zhvilluar, është edhe në Rahovec, pastrimi i lumit të Rahovecit, në Lipjan aktivitete të ndryshme, vizatime më fëmijë dhe mbjellje te fidanëve të ndryshme në tërë Kosovën…3:19 Ky aktivitet është i rëndësishëm duke pas parasysh që ndikon drejtpërdrejt në edukimin dhe ndërgjegjësimin e fëmijëve dhe brezave të tjerë për çështje të mjedisit”, tha ai.
Aktiviteti është realizuar në bashkëpunim me organizatën INDEP.
Doruntina Beka Latifi, hulumtuese në këtë organizatë, thotë se “Piktorët e Planetit”, përmes vizatimeve shprehin dëshirat e tyre si e shohin mjedisin.
“Nuk është hera e parë që INDEP organizon aktivitete të tilla për Ditën Ndërkombëtare të Mjedisit. Por, këtë vit së bashku me Ministrinë e Mjedisit dhe me Komunën e Prishtinës e kemi organizuar aktivitetin “Piktorët e Planetit”, me fëmijët e një kopshti, për të shprehur dëshirat e tyre se si e ata e shohin mjedisin dhe ta shprehin atë përmes vizatimeve”, tha Latifi.
Dita Ndërkombëtare e Mjedisit është shënuar edhe në komuna të tjera të Kosovës. /KP
Shumë nxënës pasi që kanë përfunduar edhe shkollimin e mesëm, disa prej tyre nuk kanë arritur të regjistrohen në institucionin e arsimimit të lartë për shkak të provimit të maturës. E për të qenë më të përgatitur, Kolegji AAB, me degët në Prishtinë, Ferizaj e Gjakovë, organizon shkollën përgatitore falas për testin e maturës 2023.
Diana Prebreza nga Kolegji AAB, në emisionin e mëngjesit ALARM në ATV, tregoi se këto kurse organizohen në këtë institucion tash e 15 vite, të cilat edhe kanë dhënë një rezultat të jashtëzakonshëm të arritshmërisë së kalimit të testit të maturës nga nxënësit që kanë ndjekur këto kurse.
“Kolegji AAB për më shumë se 15 vite tani më i organizon këto kurse pa pagesë për testin e maturës. Këto kurse kanë dhënë një kontribut të madh në arritshmërinë e maturantëve në këtë test. Për disa vite me radhë ne kemi pasur qindra mijëra maturantë, të cilët i kanë ndjekur këto kurse. Këtë vit kurset mbahen në tri lëndë, është gjuhë shqipe, gjuha angleze dhe matematika. Kolegji AAB është përkujdesur në përzgjedhjen korrekte të elitës së profesorëve në tri qendrat ku ne i kemi kampuset dhe ku do të vijojmë me kurset për testin e maturës. Kemi zgjedhur profesorë elitarë nga shkollat e mesme të cilët do të përkujdesen maksimalisht që të bëjnë një përmbledhje të gjithë mësimeve që i kanë bërë gjatë periudhës së shkollës së mesme edhe do të përkujdesen që ta kenë nxënësit një rifreskim të të gjithë asaj që e kanë kaluar gjatë tri viteve të shkollës së mesme. Interesimi ka qenë jashtëzakonisht i madh nga të gjithë nxënësit e të gjitha qyteteve të Kosovës. Vetëm vitin e kaluar, mbi 6000 maturantë kanë marrë pjesë në këtë shkollë përgatitore, e që ka rezultuar të jetë një sukses shumë i madh për të gjithë ata që i kanë ndjekur këto kurse”, tha Prebreza.
Ajo tregoi se të gjitha informacionet lidhur me kurset do të publikohen në faqet e Kolegjit AAB në rrjetet sociale, në facebook dhe instagram, nga ku të gjithë nxënësit e interesuar mund ta gjejnë edhe formën e aplikimit si dhe numrat kontaktues për secilën degë të AAB-së, po ashtu edhe për formën e transportit të të trija qytetet, Prishtinë, Ferizaj dhe Gjakovë.
Këto kurse përgatitore do të jenë një mundësi e mirë edhe për maturantët, të cilët vitin e kaluar nuk kanë arritur ta kalojnë testin e maturës.
“Është mundësia për të gjithë nxënësit. Ky do të jetë një kontribut i veçantë edhe për ata nxënës, të cilët nuk kanë mbërri me e kalu testin e maturës, sepse siç e dimë është edhe një test shumë i rëndësishëm që të njëjtën kohë nxënësit gjatë tërë kohës e marrin me stres këtë pjesën e testit dhe sigurisht, jo ndoshta për shkak që ata nuk kanë qenë mjaftueshëm të mirë, por ndoshta për shkak të stresit që e kanë përjetu, nuk kanë mbërri me kalu testin e maturës. Ne i mirëpresim të gjithë ata nxënës, të cilët vitin e kaluar e kanë përjetu me stres këtë pjesë dhe kanë pasur mangësi në të dy afatet”, tha Prebreza.
Ajo njoftoi se pos degës së Kolegjit AAB në Prishtinë, kurset e njëjta do të jenë edhe në dy degët e saj, në Ferizaj dhe në Gjakovë.
“Do të nisim njëkohësisht në tri kampuset tona. Unë e shfrytëzoj rastin t’ju them të gjithë maturantëve, të cilët po na ndjekin edhe prindërve që t’i informojnë fëmijët e tyre që të bëhen pjesë e këtyre kurseve. Historiku i ecurisë së këtyre kurseve ka tregu që gjithçka deri tash ka ecë shumë mirë edhe krejt ata maturantë që kanë marrë pjesë në këto kurse, kanë pasë arritshmëri të lartë në testin e maturës”, tregoi Prebreza.
Edhe këtë vit transporti do të jetë i organizuar nga Kolegji AAB prej secilit qytet të Kosovës.
“Ne e kemi nëpër secilin qytet një përgjegjës prej Kolegjit të AAB që do t’i ndihmojë maturantët dhe do t’i informojë ata gjatë tërë kohës, për mënyrën e transportit, kohën, vendin prej ku do të bëhet nisja, e që është në kontakt të vazhdueshëm me secilin maturantë. Mësimi do të jetë një përmbledhje, kështu që besoj që do të jetë një rifreskim shumë i mirë për secilin nxënës që do të hyjmë testin e maturës dhe jam e sigurt që secilit prej tyre do t’ju ndihmojë shumë”, theksoi Prebreza. /atvlive.tv
I promovuar të martën mbrëma në Prishtinë, romani ‘Lindur së prapthi’ mblodhi lexues, shkrimtarë e artistë në Libraninë Dukagjini, për të dëgjuar nga afër rrëfimin e autores Rita Petro.
Kujtimet nga periudha e diktaturës së Enver Hoxhës, fëmijërinë, adoleshencën dhe rebelimin bashkë më shoqërinë asokohe, poetja nga Shqipëria i shpalosi në bashkëbisedim me shkrimtarin Ag Apollonin.
“Të gjitha këto kujtime më rrinin në kokë dhe që lexoja shumë libra që ishin shkruar për diktaturën , bisedoja me mikeshat e mia, vizitoja të gjithë njerëzit dhe u thoja ‘ne kujtojmë gjëra, por çdo kujtim që kemi për kohën e diktaturës i diskutojmë o vetëm si kronikë që në fund të fundit pse do bëjmë ne letërsi kur ato i gjejmë nëpër të gjitha, do të shikosh se si ka rënë busti i Enver Hoxhës, do të shikosh se çfarë ka ndodhur me kronikat e atyre që janë dënuar, me të gjithë të arrestuarit e gjithçka tjetër, për ato mund t’i lexosh gazetat”, tha autorja Rita Petro.
Ky roman provokon lexuesin përmes erotikës, revolucionit dhe shkrimit të lirë, sepse liria është diçka që autorja gjithmonë e ka ndjekur.
“Shkrimtari i madh e shikon vajzën e bukur, e shikon edhe lakuri dhe nuk e prekë me dorë, por i bënë krahasime dhe është një dallim shumë i madh. Është tjetër dallimi kur dikush të fut duart për të arritur qëllimin e vet. Ti do ke shkuar atje për të botuar poezitë dhe gjëra të tilla ndodhin në zyrat e shtetit, kanë ndodhur dhe do të vazhdojnë të ndodhin, kur shumë meshkuj, s’mund të them shumë femra, ka disa por janë shumë pak në krahasim me meshkujt, të cilët përdorin, ushtrojnë autoritetin e tyre për të arritur qëllimin me vajzat e reja”, tha autorja.
Si ndër më të njohurat në letërsinë e sotme shqipe, e cila për lexuesit njihet për poezitë e saj rebeluese, kësaj here përjetimet e saj i ka ndarë me ne përmes prozës.
Krijimtaria e saj është e shtrirë edhe në Kosovë, me bashkëpunime të shumta me kolegë e shtëpi botuese.
Profesori i letërsisë shqipe në Universitetin e Prishtinës, Ag Apolloni, ‘Lindur së prapthi”, e konsideron si libër që i provokon burrat dhe i inkurajon gratë./atvlive.tv/
Nga 6 qershori në Prishtinë fillon edicionit i 23-të i Panairit të Librit. Pjesë e panairit, që këtë vit vjen me moton “Libri Triumfon” do të jenë edhe shkrimtarë të njohur botërisht.
Përgatitjet tashmë kanë filluar. Nga 6 qershori dhe gjashtë ditë me radhë, Panairi i Librit do të bëjë bashkë në Prishtinë mbi njëqind shtëpi botuese.
Edicioni i 23-të i këtij panairi, këtë vit sjell një mysafir të veçantë.
“Është Ismail Kadare i ftuar nderi në panairin e 23-të të librit i cili vjen ktu me shkak nuk është këtu i ftuar nderi për veprat që janë botuar e të mos ketë ndonjë risi është botimi i kompletit 7 vëllimesh që përbejnë 7 dekada veprimtari letrare nga Ismail Kadare”.
Tutje në kuadër të këtij panairi, Kadare do të promovojë edhe kompletin më të ri të krijimtarisë së tij. E vet autori, përgjatë tre ditëve sa do të qëndrojë në Prishtinë pritet të ketë edhe takime me figura të shquara të botës kulturore.
Dhe përpos mysafirëve të spikatur këtë vit do të ketë edhe ndryshime në hapësirën ku do të mbahet panairi.
“Sivjet jemi munduar qe pjesën e jashtme ta përshtatim që të jetë sa më bukur sidomos për botuesit për fëmijë në mënyrë qe edhe estetikisht por edhe të jetë më e qasshme për fëmijët.
Panairi i Librit organizohet në bashkëpunim me Ministrinë e Kulturës, Komuna e Prishtinës dhe Pallati i Rinisë.
Numri i titujve të rinj që do të ofrohen arrin në 2 mijë.
Përvjetorët që shënohen në Panairin e 23-të të librit janë: 120-vjetori i lindjes së Ernest Koliqit, 110-vjetori i lindjes së Petro Markos dhe 100-vjetori i lindjes së Jakov Xoxës.
Më 3 qershor të vitit 1924, në Austri ka vdekur shkrimtari Franz Kafka. Ai ishte i lindur në Pragë 1883, nënshtetas austro-hungarez, me prejardhje hebraike.
Krijimtaria e tij ka qenë e ndërlikuar me tregime të shkurtra, romane që kurrë nuk i ka përfunduar. 90 për qind të krijimtarisë së tij ai e ka djegur, pjesën tjetër e ka lënë me testament që të digjej. Kafka ka tërhequr vëmendje pas vdekjes më shumë sesa kur ka qenë gjallë.
Cilësuar si një nga autorët më me ndikim apo Dante i shekullit të njëzetë, Gabriel Garcia Marquez ka thënë se me romanin “Metamorfoza”, Kafka ka treguar se ka qenë e mundur të shkruhej ndryshe.
Tenori i njohur Ramë Lahaj që po realizon tash e dy vjet “Ramë Lahaj International Opera Festival” (RLIOF) ka publikuar datat e edicionit të tretë të këtij festivali
Tashmë është konfirmuar se edicioni i sivjetmë do të zgjasë për dhjetë ditë dhe se edicioni i këtij viti do të mbahet përgjatë muajit korrik.
Data 21 korrik shënon hapjen e këtij edicioni, kurse do të zgjasë deri më 31 korrik.
Ende nuk është publikuar lista e mysafirëve pjesëmarrës, por duke iu referuar edicioneve të shkuara, edhe këtë vit pritet të kemi artistë të njohur të skenave të mëdha operistike.
Edicioni i shtatë i festivalit të vetëm ndërkombëtar të teatrove në vend, Prishtina International Theater Festival “Burbuqe Berisha” 2023, ka përmbyllur me suksese të shumta festivalin që për shtatë ditë ishte edhe epiqendra e kulturës në kryeqytet.
Në një ceremoni madhështore të ndarjes së çmimeve të organizuar në bashkëpunim më Kolegjin AAB, Art Image dhe ATV, kjo natë ishte e paharruar sidomos për garuesit e këtij edicioni që vinin nga: Spanja, Turqia, Kroacia, Maqedonia e Veriut, Shqipëria dhe Kosova.
Ndërsa para fillimit të ceremonisë, të pranishmit ndjekën shfaqjen e fundit garuese të PITF2023, “Arbri” nga Teatri Oda.
Drejtoresha e festivalit, Doruntina Alshiqi u shpreh e lumtur që ky edicion përfundoi me sukses, duke theksuar se ishte një garë e ngushtë për jurinë.
Edicioni i sivjetmë ka shënuar gjithsej shtatë shfaqje nga vendi, rajoni dhe bota, shfaqje këto të gjitha në programin garues.
Këtë vit çmimin kryesor të PITF 2023, çmimin për aktorin më të mirë në rolin kryesor e gëzoi aktorja nga Kroacia, Buga Marija Simiç.
Kjo është lista e plotë e çmimeve këtë vit në “Prishtina International Theater Festival” (PITF 2023):
Çmimi “Best Play: Student Choice” – “Arbri” – Kosovë
Çmimi “Best Play: Media Choice” – “Arbri” – Kosovë
Çmimi “Best Supporting Actor” – Ard Islami, “Club Albania”, Kosovë
Çmimi “Best Director” – Fatos Berisha “Club Albania”, Kosovë
Muzeu “Gjergj Kastrioti Skënderbeu” në Krujë gjatë periudhës janar-maj, ka shënuar një fluks të lartë vizitorësh vendas e të huaj.
Drejtori i Muzeut Historik dhe Etnografik Krujë, Mehdi Hafizi tha sot se rreth 25 mijë vizitorë kanë vizituar nga fillimi i këtij viti muzeun, me një rritje prej 50% krahasuar me të njëjtën periudhë të vitit të kaluar.
“Edhe këtë vit numrin më të lartë të turistëve të huaj, pritet ta kenë polakët pasuar nga italianët, spanjollët, gjermanë dhe amerikanët”, tha Hafizi për ATSH-në.
Sipas tij, gjatë majit muzeu ka tërhequr vëmendjen edhe të vizitorëve arbëreshë nga Civita (Kalabri), si dhe nxënës nga të gjitha trevat shqiptare.
Muzeu Kombëtar “Gjergj Kastrioti Skënderbeu” është përuruar më 1 nëntor të vitit 1982 në kështjellën e Krujës. Ky muze ka edhe karakterin e një memoriali që trajtohet si kullë shqiptare e Veriut. Kompleksi i muzeut është shpërndarë në disa hapësira, të cilat vizitohen kronologjikisht sipas ngjarjeve.
Në këtë muze ndodhen objekte që i përkasin periudhave të ndryshme historike, por në disa pavijone trajtohet historia e Mesjetës së Hershme, Principatat Shqiptare, pushtimi osman dhe betejat e shqiptarëve për të përballuar këtë pushtim.
Ministria e Kulturës ka hapur konkursin për projektimin e peizazhit kulturor të Kompleksit Memorial “Adem Jashari”, i cili llogaritet të kushtojë tre milionë euro.
Master-plani që duhet ta ruajë origjinalitetin e objekteve ekzistuese, duhet ta përfshijë projektimin për pesë zona.
Fillimisht, duhet të projektohet për konservimin e Kullave të rezistencës dhe bunkerit, objektin e informacionit, amfiteatrin veror, muzeun, shtatoren e Adem Jasharit, obeliskun, objektin për Gardën ceremoniale të FSK-së.
Veç tyre, duhet të planifikohen edhe parkingjet, si dhe zhvendosja e disa shtëpive të lagjes, përfshirë edhe shtëpitë e familjes Jashari dhe objekte të tjera të nevojshme.
Në zonën A3, ku ndodhet edhe fabrika e municionit, parashihet të jetë zona e funksionit kulturor, edukativ dhe rekreativ.
Në fabrikën e prodhimit apo në magazinë, sugjerohet të vendoset Muzeu i Rezistencës, i cili do t’i përfshijë koleksionet, hulumtimet dhe prezantimet e Drenicës dhe familjes Jashari.
Ndërsa, në objektet shoqëruese planifikohet të ndërtohen tri restorante, një bujtinë për studiuesit. Ndërsa, në ambient të hapur, planifikohet një strukturë për kampe verore, të shkollave të të rinjve dhe tubime mbi historinë.
Sallë ekspozitash dhe konferencash me hapësira për punëtori, të cilat do të mund të akomodojnë festivale teatri, vallëzimi dhe formave të tjera muzikore.
Fituesi i projektit i ka dy vite kohë që ta përfundojë gjithë master-planin. /atvlive.tv
Edicionin Qendror të lajmeve në ATV e gjeni në videon më poshtë:
