Rame Lahaj International Opera Festival ka zbuluar tematikën për edicionin e tretë i cili do të mbahet nga 21 deri më 31 korrik.
Me tematikën ‘Opera për Liri’, RLIOF do të fokusohet në promovimin e atyre zërave të cilët janë shpesh të margjinalizuar dhe të heshtur e që përdorin operën si mjet për t’u shprehur, për zhvillim dhe fuqizim, raporton KultPlus.
Edicioni i tretë i Festivalit RLIOF synon të zhvillojë idenë e përfshirjes së artit operistik si një ndërmjetësues për të promovuar e mbrojtur lirinë, të drejtat e njeriut dhe ato sociale.
Tematika e festivalit këtë vit është “Opera për Liri”. Gjatë këtij edicioni, do të fokusohemi në promovimin e atyre zërave të cilët janë shpesh të margjinalizuar dhe të heshtur e që përdorin operën si mjet për t’u shprehur, për zhvillim dhe fuqizim.
Festivali RLIOF do të trajtojë çështje si: konfliktet ekzistuese, pabarazia gjinore, të drejtat e refugjatëve dhe të drejtat mjedisore.
“Prishtina International Film Festival” si ngjarja më e madhe dhe më e rëndësishme e industrisë së filmit në Kosovë, ka lansuar programin PriDox për këtë vit.
Në këtë javë të filmit të gjatë dokumentar që sivjet shënoi edicionin e parë, do të shfaqen filma të rinj dhe të dëshmuar në festivale të rëndësishme botërore.
“Menjëherë sapo “Prifest” ka përfunduar edicionin vitin e kaluar, është hapur thirrjen për aplikim në “Prifest”, dhe prej atij momenti ka pasur interesim të madh për pjesëmarrje në “Prifest”, është bërë përzgjedhja prej drejtorit të armatës së Alush Gashit, është shumë e vështirë, po besoj ka qenë shumë e vështirë edhe për të sepse në një numër të madh aplikuesish, me filma të ndyrshëm, tema të ndryshme dhe të përzgjedhësh vetëm 5 filma po besoj se është e vështirë. Për 15 vite ka krijuar audiencën e vet dhe përpos kësaj gjithmonë është në kërkim të audiencës së re që ta sjellë në kinema që është edhe një qëllim i “Prifest-it”, tha Armend Zeqiri nga “Prifest’.
Çdo natë nga ora 20:00 në Kino Armata, do të garojnë 5 filma dokumentarë të metrazhit të gjatë për filmin më të mirë.
PriFest është një mundësi për artistët nga Kosova për të takuar ekspertë nga rajoni dhe Evropa që vizitojnë festivalin dhe rrisin shanset e tyre për t’u lidhur dhe bashkëprodhuar filmat./atvlive.tv/
“Në kujtim të të zhdukurve të luftës së Kosovës”, do të jetë motoja e ekspozitës që pritet të hapet më 12 deri më datën 20 qershor në kuadër të Festivalit Ndërkombëtarë të Filmit “FIFOG” në Gjenevë të Zvcirës.
Artisti shqiptar Ramë Beqiri do të sjell për artdashësit zviceran historinë e dhimbshme të Kosovës dhe plagën e hapur për të zhdukurit e luftës, përmes një ekspozite në Gjenevë.
Pjesë e këtij festivali pritet të jetë edhe filmi shqiptar “I treturi”, me pas do pasoj edhe debati për këtë me pjesëmarrës regjisorin Arben Thaçi dhe njëri nga aktorët e filmit, Arben Muçaj.
Në një lidhje të drejtpërdrejt në emisionin e mëngjesit ALARM në ATV, Yllka Pllana, vullnetare për komunitetin shqiptar atje, tha se kësaj radhe e kanë shfrytëzuar rastin që pjesëmarrjen në këtë festival ta ndërlidhin me pikturat e Ramë Beqirit me tematikë për të zhdukurit të luftës në Kosovë.
Ajo tha se përmes kësaj ekspozite, si komunitet shqiptar në Zvicër, po mundohen ta sensibilizojnë opinionin ndërkombëtarë me çështjen plagëve të qytetarëve të Kosovës për të zhdukurit e luftës së fundit.
“Kësaj here kemi shfrytëzuar rastin me i ndërlidhë pikturat e Ramë Beqirit me rastin e të zhdukurve të Kosovës. Është një temë që na prekë të gjithëve. Tema e të zhdukurve është një plagë e lirisë sonë, kështu po mundohemi edhe ne nga diaspora t’i sensibilizojmë edhe të huajt për këtë çështje. Festivali është ku do të marrin pjesë shtete të ndryshme për tema të ndryshme. Ne, si komunitet shqiptar në Zvicër jemi shumë të lidhur mes veti dhe çdo herë mundohemi t’i sensibilizojmë komunitetet tjera për çështjet tona”, tha Pllana. /atvlive.tv
Ekipi i ATV-së ishte sot prezent në panairin e librit “Prishtina 2023” për të parë ecurinë në ditën e tij të tretë.
Drejtori i bibliotekës AAB, Urim Sallauka, tha se ecuria e këtij panairi, këtë vit është mjaft e mirë për arsye se edhe ka një hapësirë të mjaftueshme, por edhe numri i shtëpive botuese është mjaft i lartë.
Ai tha se Shtëpia Botuese AAB tashmë tradicionalisht pjesë e këtij panairi, këtë vit, krahas botimeve të mëhershme, po prezanton botimet më të reja të saj.
“Shtëpia Botuese AAB ka dalë edhe këtë vit në këtë panair, të cilin e kemi tradicionalisht, me qenë se e kemi edhe Shtëpinë Botuese që boton libra të ndryshëm, kryesisht janë libra të cilët mbështesin drejtpërdrejtë plan programet universitare, jo vetëm të Kolegjit AAB, por të gjithave universiteteve tjera në Kosovë. Librat janë nga fusha akademike, megjithatë kemi edhe nga fusha të tjera, letërsi, kritikë letrare, shkenca sociale etj. Dhe këtë vit, Shtëpia Botuese AAB ka të botuar disa tituj të rinj, të cilët edhe gjenden në këtë panair”, tha Sallauka.
Edicioni i 23-të i Panairit të Librit “Prishtina 2023”, nën përkujdesjen e Shoqatës së Botuesve të Kosovës do të vazhdojë të jetë i hapur deri të dielën më 11 qershor.
Në këtë panair po marrin pjesë rreth 100 botues nga Kosova, Shqipëria, Maqedonia e Veriut dhe diaspora. /atvlive.tv
Kryetari i Prishtinës, Përparim Rama, në shenjë mirënjohjeje, ia ka dhuruar Çelësin e Kryeqytetit shkrimtarit Ismail Kadare.
Këtë e bëri të ditur Rama përmes një postimi në Facebook, u shtoi se i ka premtuar vënien e emrit të shkrimtarit njërës prej bibliotekave të kryeqytetit.
“Nder i jashtëzakonshëm të mirëpres shkrimtarin e madh Ismail Kadare dhe bashkëshorten e tij, znj. Helena Kadare. Në shenjë mirënjohje dhe respekti i dhurova Çelësin e Kryeqytetit. Po ashtu, kisha kënaqësinë ta informoj se kam vendosur që një prej bibliotekave të kryeqytetit do ta marrë emrin e tij”, ka shkruar Rama në Facebook.
Sipas Ramës, veprat e Kadaresë e kanë ngritur letërsinë shqipe në nivel botëror dhe vazhdojnë të frymëzojnë tash e sa gjenerata.
807 mijë vizitorë kishte tërhequr Bienalja Manifesta, e cila vitin e shkuar u mbajt në Prishtinë. Ndikimi i përgjithshëm ekonomik i Manifestës është 20.2 milionë euro.
Këto të dhëna janë përpiluar nga Instituti GAP i cili publikoi raportin mbi vlerësimin ekonomik dhe social që bienalja pati në vend. 83% e vizitorëve ishin nën moshën 35-vjeçare, derisa shumica e vizitorëve të huaj ishin nga Evropa Perëndimore, sidomos Gjermania dhe Britania e Madhe.
Derisa solli edhe ndryshim në perceptimin ndërkombëtar për Kosovën vlerësim të lartë për këtë ngjarje pati ministri i Kulturës, Hajrullah Çeku.
“Konsolidimi i imazhit nuk është burim i talenteve, por vendi është i përshtatshëm edhe për ngjarje ndërkombëtare që sjellin gjithë botën tonë. Investimi në kulturë nuk është luks, përfitimet janë të padiskutueshme. Qeveria ka ndarë fondin 1 milion euro për blerje të artit, 25 vepra të artistëve vendorë kansrtistë që kanë dhuruar veprat e tyre”, tha Çeku.
Ndërsa i pari i kryeqytetit, Perparim Rama, tha se investimi në art e kulturë është investim në ekonominë e vendit.
“Ne e pamë këtë si një mundësi fantastike për ta shfrytëzuar këtë qytet si platformë për transformimin urban dhe në të njëjtën kohë e përsëris se kjo ishte një mundësi për Manifestën që ta ndryshojë vetën që ka bërë diçka në të kaluarën si organizimi i ngjarjeve të artit dhe kulturës në shndërrimin e një platforme për transformimin urban”, tha Rama.
Bienalja nomade, Manifesta e cila ndryshon lokacion për çdo edicion u mbajt në Prishtinë, nga 22 korriku deri më 30 tetor të vitit të shkuar. /atvlive.tv
Edicionin Qendror të lajmeve në ATV e gjeni në videon më poshtë:
Pjesës së programit vjetor të PriFest nga mbrëmë iu shtua edhe PriDox që hapi edicionin e parë në Kinamnë “Armata” në Prishtinë ku deri më 10 qershor do të jetë jave e filmit dokumentar.
Kino Armata ishte vendtakim për shumë artistë, regjisorë, krijues filmash e artdashës.
Të gjithë këta u mblodhën për të shënuar hapjen e PRI-DOX, java e filmit dokumentar, e cila është pjesë e programit vjetor të PriFest.
“Po ndihem mirë se do ta hapim me një film shumë të mirë, mysafirin e kemi këtu, regjisorin, producentin e filmit që kanë ardhë nga Holanda, shpresojmë që koha e keqe nuk i pengon as njerëzit me ardhë që sonte ta hapim së bashku Pri-Dox-in. Do të kemi nga pesë filma dokumentarë gjatë javës, çdo natë nga një film. Vjosa na ka lënë vitin e kaluar, pastaj ka ardhur pikëpyetje çka me ba, mandej u mblodhëm një komunitet i shokëve e kolegëve, të cilët realisht edhe më dhanë kurajo mua dhe stafit që me e vazhdu bashkë për Vjosën. Kështu ka qenë vjet ky edicioni nëse e mbani në mend, pikërisht këtu e kemi mbajte”, tha regjisori Fatos Berisha.
“Për mua nuk është lehtë kështu edhe emocionalisht, por edhe vet si organizim sepse ajo i ka kry shumicën e punëve dhe i ka kry shumë mirë dhe unë më shumë jam marrë me filmat, por tash edhe unë po mësohem. Tani e ka një kuptim tjetër për mua, e ka një kuptim të vazhdimësisë të ruajtjes së trashëgimisë së Vjosës, e emrit të saj, punës së saj sepse ajo ka investu shumë në të, e ka dashur shumë, e ka pasur pasion, ka investu shumë kohë, shumë energji, kështu që tash e ka atë kuptimin e plotë me e mbajtë aq sa mundemi dhe dimë”, u shpreh Berisha.
Edicioni i parë i PriDox u hap me filmin dokumentar “Paved Paradise” të regjisorit holandez Karsten de Vreugd, i cili ishte i pranishëm në premierën e filmit të tij në Kosovë.
“Është vërtetë bukur të jem këtu. Isha dy vite më parë, por më pas ishte Covid-i, kështu që gjithçka u mbyll, asnjë kafene nuk ishte e hapur gjatë natës, ishte e mbyllur nga ora 7 ose 8, por disi isha në PriFest, kështu që është mirë që jam kthyer. Jam shumë i nderuar që PriDox ka përzgjedhur filmat e mi për këtë vit, kështu që jam shumë i lumtur dhe pres sa më shumë njerëz të jenë këtu sesa gjatë Covid-it”, tha regjisori Karsten de Vreugd.
Në mesin e të pranishmëve ishin edhe Ministri i kulturës Hajrullah Çeku, si dhe artistë të shumtë.
“Skena kulturore e Prishtinës u pasurua edhe më një ngjarje shumë të rëndësishme dhe mbi të gjitha, atë që kanë qenë në ngjarje të veçanta gjatë vitit, tashmë po shndërrohen në institucione. Pra, PriFest, përveç edicionit që e ka tradicional, tash po e shton edhe një ngjarje gjatë vitit që është PriDox, ku pamë filma shumë të mirë dokumentarë. Jam shumë i gëzuar që njerëz sikur Fatosi dhe të tillë ka plotë në Kosovë jo vetëm në Prishtinë, kanë sens dhe shpirtë ndërmarrësie në Kulturë dhe duke e zhvillu kulturën, unë besoj shumë se po e zhvillojmë edhe shtetin, po i ndihmojmë shumë qyytetarëve të Ksooëvs”, tha ministri Çeku.
PriDox do të zgjasë deri më 10 qershor, ndërsa edicioni i 15 i PriFest do të mbahet në shtator. /atvlive.tv
Presidentja e Republikës së Kosovës, Vjosa Osmani e ka dekoruar shkrimtarin Ismail Kadare me urdhrin “Hasan Prishtina”, raporton EO.
Osmani tha se me veprat shkrimtari Kadare ka mbrojtur e ka promovuar kulturën, traditat e gjuhën shqipe. Ajo shtoi se Kadare ka qenë një gardian i së drejtës së popullit shqiptarë.
“Si mirënjohje në emër të popullit të Kosovës, nderojmë shkrimtarin tonë të shquar, zotin Ismail Kadare vepra e të cilit është enciklopedi artistike e jetës së rëndomtë të shqiptarëve, e historisë së tyre, dokeve e traditave dhe mbi të gjitha e gjuhës shqipe. Jam shumë i lumtur që jeni këtu kur Prishtina e jonë e dashur është veshur me petkun e librit. Prania juaja në panairin e librit është një mesazh i rëndësishëm”.
“Ju keni qenë vazhdimisht pikë referimi për shqiptarët. Nëpërmjet krijimtarisë suaj ju keni dhënë shembullin për shqiptarët. Ju e keni shpalosur artistikisht si rrallë kush historinë e tradita shqiptare. Ju e keni mbrojtur e keni promovuar kulturën shqiptare, si dhe keni qenë një gardian i së drejtës së popullit shqiptarë”, tha ajo.
Shkrimtari Kadare tha se për të nuk ka nderim më të madh se dekorata që morri nga Osmani, raporton EO.
“Jam shumë i prekur që jam në mes jush, për këtë nderim kaq të madh. Është një fat i rrallë që një popull të nderoj dhe të të quaj bashkë mbrojtës të të drejtave te tij”.
“Për fat të keq Shqipëri ka pasur një rrugë të gjatë historike të shkelur me këmba nga forcat e huaja por për fat të mirë ajo i ka kapërcyer vështirësitë e errëta të historisë dhe gjithçka tjetër që mund ta pengoj një popull që të jetoj i lirë. Vetë mbledhja jonë këtu tregon triumfin e popullit shqiptarë. Nuk ka nderim më të madh për një intelektual se sa kjo që po e përjetoj sot këtu”.
Kryeqyteti është nderuar me praninë e shkrimtarit të njohur shqiptar, Ismail Kadare. Kadare po qëndron në Prishtinë si mysafir nderi, derisa dyert i hapi edhe edicioni i 23-të të panairit të librit.
Krijimtarinë e tij e çmuan lart edhe disa prej mysafirëve të panairit.
Në këtë panair që do të zgjasë deri më 11 qershor, librat e tyre i kanë ekspozuar 103 shtëpi botuese. Pjesë e tij është edhe shtëpia botuese e Kolegjit AAB.
Gjatë ditëve sa do të qëndrojë i hapur panairi, do të prezantohen 2 mijë tituj të rinj.
Përvjetorët që shënohen në Panairin e 23-të të librit janë: 120-vjetori i lindjes së Ernest Koliqit, 110-vjetori i lindjes së Petro Markos dhe 100-vjetori i lindjes së Jakov Xoxës. /atvlive.tv
Edicionin Qendror të lajmeve në ATV e gjeni në videon më poshtë:
Kryeministri Albin Kurti ka marrë pjesë në ceremoninë e hapjes zyrtare të Javës së Krenarisë. Por nga Kurti, i cili po merr pjesë për herë të parë prej se e udhëheq Qeverinë e Kosovës, pjesëtarët e komunitetit LGBTI presin më shumë përkushtim e miratimin sa më të shpejtë të Kodit Civil. Ata duan, gjithashtu, që Kurti, sikurse edhe presidentja Vjosa Osmani të jenë prezent në Paradën e Krenarisë që do të mbahet më 10 qershor në Prishtinë. Të dy liderët nuk ishin të pranishëm vitin e kaluar.
Për herë të parë prej që është në krye të Qeverisë, Albin Kurti mori pjesë në ceremoninë e hapjes së Javës së Krenarisë.
Por vetëm pjesëmarrja në aktivitetin që organizohet nga Zyra e Kryeministrit, në bashkëpunim me organizatat e shoqërisë civile, për pjesëtarët e komunitetit LGBTI nuk mjafton.
Kryeministri Kurti nuk ishte prezent vitin e kaluar në Paradën e Krenarisë, që për Arbër Nuhiun tregon një mospërkushtim që të respektohen të drejtat e qytetarëve të Kosovës.
Nuhiu sheh një hezitim të Qeverisë për ta miratuar Kodin Civil, i cili nuk i mori votat e mjaftueshme, përfshirë disa deputetëve të partisë që është në pushtet.
Organizatat e shoqërisë civile nuk duan përkrahje nga institucionet vetëm gjatë Javës së Krenarisë.
Kryeministri Kurti e presidentja Vjosa Osmani kanë marrë ftesë, gjithashtu, që të jenë pjesë e Paradës së Krenarisë me sloganin “T’du qashtu qysh je”, që do të mbahet të shtunën e 10 qershorit.
Por, zëdhënësi i Qeverisë Përparim Kryeziu nuk ka qenë në gjendje ta konfirmojë pjesëmarrjen e kryeministrit të shtunën.
Ata ftesë morën edhe vitin e kaluar, por nuk iu bashkuan marshit në qendër të kryeqytetit.
Është viti i shtatë me radhë që parada e cila ka për qëllim sensibilizimin për të drejtat e komunitetit LGBTI, do të mbahet në Prishtinë.
